Thursday, April 30, 2009

قلايد ذهب







على الهدب

تلقى تعب


و حرف ماانكتِب


ناطر صفحة عيونك


تهديني دروب بوحي


وتردلي بقايا روحي


وصوتي اللي إنسلب


على الهدب


تلقى تعب


،،،،،،


تصدّق!! كلمتي تعبت تنزف


تصدّق !!ماتعلّمت أعزِف


إلا وأوتار نبراتي مشدوده


 صرت أهذي بإنشوده


ماتعرف للأوزان طريج


تصدّق الكلمه تنشّف الرّيج


تصدّق مشكلتي إني


وايد أحَب


وعلى الهدب 


تلقى تعب


،،،،،،

والله وبالله مابغيت أتكلم


بغيت بصمت فيك أتحلّم


بس التعب غصبني


والله مو مني


إنت السبب


على الهدب


تلقى تعب


،،،،،،


شي موحش لو تكون شاعر


تحس بداخلك وحش كاسر


يفترس أحاسيسك ويهزمك


ماتلقى أحد يفهمك


تحس بنشوة إنتصار


وكل مافيك إنغَلب


وعلى الهدب


تلقى تعب


،،،،،

 ياأيامي إسمعيني


واسمعي صرخات حنيني


ماأبي إجابة أبي رحمه


أبي تقدرين مفاهيم الكلمه


اللي بصدري ماهي حروف


اللي بصدري 


قلايد ذهب


وتعب



30-4-2009
الخميس

26 comments:

بانوراما said...

احسنت وصح لساانك

تسلم ايدك

كبرياء انثى said...

يا عسى عيونك ما تشوف التعب
صح لسانك :)

حنطفيس said...

الله عليك يابراك ابدعت

واله انت اللي قلادة ذهب المدونات

esTeKaNa said...

ليش قلايد هالذهب بكتني
وانا اللي متفقه مع نفسي مابي ابجي
:(
اذا بتكتب جذي يا ابو عبدالله
انا اعلن قطع العلاقات الدبلوماسيه
:Pp~

ميمة السبيت said...

ايه والله عيونا راحت من هاللابتوب جنه واحد صاكنه بوكسات على هالسواد

أتيت متاخرة said...

تحت الهدب
تلقى تعب

كم هو قاسي تعب القلب وسهر العين


وتلقى حرف ماانكتِب
ناطر صفحة عيونك
تهديني دلايل بوحي
وتردلي بقايا روحي
وصوتي اللي إنسلب


دائما ما نترجمهم نحن كأنهم انعكاس لأرواحنا ، صورنا ، آمالنا

،،،،،،
تصدّق!! كلمتي تعبت تنزف
تصدّق !!ماتعلّمت أعزِف
إلا وأوتار نبراتي مشدوده
تصدّق!! صرت أهذي بإنشوده
ماتعرف للأوزان طريج
تصدّق الكلمه تنشّف الرّيج
تصدّق مشكلتي إني
وايد أحَب

كل هذا لأنك تحبهم ولستم معهم ،، تتمناهم ولا تجدهم ،، تحلم بهم ولا تستطيع تحقيق ذلك

المشكلة اننا احببناهم بصدق وتمنيناهم بصدق وحملناهم معنا وهم غير موجودين


،،،،،،
والله وبالله مابغيت أتكلم
بغيت بصمت فيك أتحلّم
بس التعب غصبني
والله مو مني
إنت السبب


ما زلنا نحمل الكثير بهم ولهم وكلما مرت السنين كبروا معنا وازددنا ضعفا بفراقهم
ذلك ما يجبرنا على البوح


،،،،،،
شي موحش لو تكون شاعر
تحس بداخلك وحش كاسر
يفترس أحاسيسك ويهزمك
ماتلقى أحد يفهمك




شيء جميل انك تكون شاعر تترجم هذا الكم من الحالات الانسانية
وهناك الكثير يفهمك براك


تحس بنشوة إنتصار
وكل مافيك إنغَلب


................................
،،،،،
إسمعيني ياأيامي إسمعيني
واسمعي صرخات حنيني
ماأبي إجابة أبي رحمه
أبي تقدرين مفاهيم الكلمه
اللي بصدري ماهي حروف
اللي بصدري
قلايد ذهب


ربي يرحمنا جميعا
انت تحمل قلب من ذهب اخي براك

نور سلطان العيسى said...

جميل جداً

تسلم

:)

sologa-bologa said...

إنت مو بس قلادة ذهب
إنت سوق الذهب بكبره
وأكيد أكبر
إنت منجم ذهب

تحت الهدب
تلقى تعب
وتلقى حرف ما انكتب


منو اللي يقرا كلام العين
!!!

إيلاف said...

: ) القلادة جميلة , وتبدو من التراث

والكلمات كذك جميلة , كما اعتدنا

تراب الكويت said...

ماتعلّمت أعزِف
إلا وأوتار نبراتي مشدوده

---

مابقى شي ينقال
توصف الحال والاحوال
في صميم المشاعر
يبحر كلامك

،
،
كم انت عجيب

:)

بـركـــــان said...

ترى تعليقي على الموضوع بالمدونه الاخرى :)

U-Turn said...

مشاء الله
أحب زهيرياتك
يستاسع صدري لي قريتهم
معنى هاذي شوي حزينه
والله لا اييب لك التعب

تسلم إييدك أخوي
وصح لسانك ;)

على فكره أدخل مدونتك عشان زهيرياتك واللحن
لا تشيله ما عليك امر
عاجبني ;)

Barrak said...

بانوراما

صج بدنك
والله يسلمك ياصاحب التعليق الاول

Barrak said...

كبرياء انثى

صح بدنك

ولاعيونج

مشكوره

Barrak said...

حنطفيس

الله على مرورك وكلامك

صدقني

مو انا اللي مبدع

اللي فيني بدع فيني


شكرا لك

Barrak said...

esTeKaNa


قطع العلاقات الدبلوماسيه

تحتاج الى اسباب مقنعه

واتفاق من الطرفين على هذا القطع


انا عن نفسي مااقدر


انتي كيفج

Barrak said...

ميمة السبيت

سلامة عيونج من السواد

ومن البوكسات


الله يحفظج

Barrak said...

أتيت متاخرة

تصدقين

لو باشرح ماقلته مااوفيه حقه

مثلج

الله يحفظج

سيدتي الغاليه

Barrak said...

بنت سيف

الاجمل سيدتي وجودج

الله يسلمج

Barrak said...

sologa-bologa

هالحجي حقي


يه يه يه

كلامك كبير علي

ارد واقول افضالك مغرقتنا يااستاذ

مانوصل مواصيل معدنك الطيب

Barrak said...

إيلاف

اشكرج سيدتي

هذا من ذوقج

تشرفت بوجودج الراقي

Barrak said...

تراب الكويت

ياوخيتي

مهما كتبت

مهما عبرت

مااوصل مواصيل احساسج

مو يمكن بوستج الاخير

له تأثير


؟؟؟؟؟

Barrak said...

بـركـــــان

وعم انا بعد

وترى ضفت على البوست هناك صوتي

اشكرك

Barrak said...

U-Turn

حلو يستاسع صدري


فيها من ريحة قبل

شرف لي وجودج سيدتي


اشكرج

للوش said...

Barrak

ماأجمل قوافيك رائعة ما اجمـل مانثره قلمك

وحروفك رقيقة كالفراشات وكلماتك كعبق واريج و كالزهر ذو أشكال وألوان

براقة

وها اناصنعتُ أكليل وعقداً من الزئـبـق الابيض لإهديه لكـ ع ها لمشاركة

الراقية

وسلمت يداكَ ويسلم قلمك الجميل ياصــاحب الذوق الرفيع

ودي وتحياتي وتقديري لكـ

فيضٌ تقديِر وإجلالَ لشخصــك الكــريـم...

Barrak said...

للوش

سيدتي العذبه

اكليل من الزئبق الابيض

الله عليك

الله


لااملك الا ان اهديك صادق مودتي واحترامي


للمره الالف كلامك كبير علي

شكرا