Saturday, March 27, 2010

بلبل ياباني



بأتعلم إيطالي وفرنسي وأسباني

وشوي فارسي وشوي عبري

أرطن صيني وأصير بلبل ياباني

وأترجم بالكوري معنى ماعاد بدري

أحب اللغات ودي أحجي ألماني

ماكو أحد يحب هالسوالف كثري

بتعلم هندي  وبحاول بالتايواني

بترجم معنى خدري الشاي خدري

وأحلل كلمة غميضه وكاني ماني

وكلمة رواشن ودرُو وخكري

أنا مادري شفيني وشاللي ياني

تالي الليل اخربط  وأهذري


Tuesday, March 23, 2010

حمله تافهه





فيه حمله لإثارة الأمور التافهه

حمله للجمود للتلميع والترقيع

حمله يضحك عليها من شافها

حمله مغزاها ينفهم سريع

مايحتاج اوصفلكم أوصافها

 اللي بقوله واضح للجميع

صرنا أمه سبقها الكل وطافها

مع ان المفروض نعيش بربيع

فيه حمله مكشوفه كل أهدافها

تبينا نلوي ونتوه و نضيع

حمله لإثارة الأمور التافهه

حمله هدفها الاساسي الترقيع

٤-٣-٢٠١٠
الخميس

Monday, March 15, 2010

كلمات كتبتني



زعّلتني

واهدتني ورده وهدّتني

زعّلتني

وحطّمت قلبي بصدري

ومن غير لا أدري

راضتني

زعّلتني


،،،،،،،

و سامحت

سِكتْ ..

ما تكلّمت

شقول .. وحبها فيني

شقول وهي .. ماي عيني

شقول وهي إسكنَتنِي

زعّلتني

وورده أهدتني

،،،،،

مو عشان الورده .. عشانج

بأسامح ....وبانهي أحزانج

لأني إخترتج بحياتي

لأنج إنتي كلماتي

اللي إكتبتني

زعّلتني



،،،،،،

بيناتنا عشره ... وعُمر

يخلون الزلّه ..... تُــمُر

ولاجنها صارت

راحت وتوارت

نسيت

وأشواق قلبي

نسّتنِي

زعّلتني


،،،،،،،

الزعل مايبقى بقليبي ثانيه

بكلمه  أكون بدنيا ثانيه

دنيا إنتي كيانها

دنيا عايش عشانها

حتى لو أذّتني

وزعّلتني

١-٣-٢٠١٠
الاربعاء

Wednesday, March 10, 2010

حفره



إزعج هذا وذاك إستجوبه وطفرَه


إنشر ثقافة الصراخ ولا تهاب

حاسب  على ترقيَه وسفرَه

إنسى مفهوم المكافأة والثواب

عفيه خلنا نموت من الحرّه

وسد بويوهنا ألف  باب

حاول تقِط  آمالنا بحفره

عيشنا بلويه بدون اسباب

كل واحد مغلوب على أمره

نسينا الفرح والأناسه واليبّاب

باليوف نار والروح متحسره

 شفتوا واحد خسر من النوَاب؟؟

ياللي تقرا كلامي حاول تفسره

منو فرض ثقافة الصراخ والعقاب

١١-٢-٢٠١٠
الخميس

Monday, March 8, 2010

كمّثرى




ياللّي وجناتك أشابيه الكمثرى

مايوفيك الكلام بشعره ونثره

ياكثر حبك برويحتي ياكثره




يخلّيني ولهان ومشتاق وهيمان

وشوقي وصل الشارقه وعجمان

MANإسمعها كلمه منّي يا

كلمة كسره يقولها الأثرم كثرى


١٨-٢-٢٠١٠
الخميس

Wednesday, March 3, 2010

قمت أهذري





ليمتى بتحمَّلْ

كلام جارح

يذوّب روحي بصدري

ليمتى أسامح 

واشوف غلطات

تشب نار حدري

ليمتى بتحمّل

كلام جارح

يذوّب روحي بصدري

.......

تعبت أسأل ومامن إجابه

متى قليبي يِنحرِم من عذابه

متى القلوب ماتصير كذّابه؟؟

متى طيبِتي ماتكسِرني

متى الأحلام منّي تدني

....متى

....وليمتى

.... ماأدري

بتحمّل كلام جارح

يذوّب روحي بصدري

.......

ناقص عنا عشان أتعنّى؟؟

صار حريمتي أتهنّي

ابي  لحظه تغفي عني الأيام

ابي لحظه أفهم تكوين الأحلام

ماطلبت المستحيل

أبي ماأنظُلم مرّه بعمري

ليمتى بتحمّل

كلام جارح

يذوّب روحي بصدري

.........

 قُمت أسولف عن نفسي لنفسي!!

قُمت أرِد على كلامي!!

قمت أنسى منامي

... قمت

... قمت

... وقمت

.... قمت أهذري

١-٣-٢٠١٠
الأثنين