Monday, April 17, 2017

حلم الندى بشراييني



هِل يامطر


وخل الفرحه فيني  


عميقه 


هِل يامطر 


وإعزف بضلوع قلبي 


 موسيقى 


......



محد غيري 


 يقدّر عنوة الغيوم


وتعب القطرة


 قبل لاترويني


يتشكّل امل مغزول


 فيني

ويجدد حلم الندى


 بشراييني


حس المطر 


يخلّي قسوة الدنيا 

بعيوني


رقيقه



هِل يامطر


وخل الفرحه فيني


عميقه


هِل يامطر 


وإعزف بضلوع قلبي


 موسيقى


......



الدنيا نسّتني 


احساس البرد


العمر والناس نسوني


 طعم البردي


صار العطش


ينتهي فيني ويبتدي


الضما موجع أليم 


والوقت ردي


هِل يامطر


خلني اسبح بخيالي


نشّفت عروقي 


 الحقيقه



هِل يامطر


وخل الفرحه فيني 


 عميقه


هِل يامطر 


وإعزف بضلوع قلبي


 موسيقى

Sunday, April 16, 2017

قائمة موسيقى



انا ريشة امل 

في جناح الايام

انا احساس الذبول

بنشوة الاحلام

انا البسمه 

انا الحطام

......

انا اللي كسرت 

قوانين الحزن

انا اللي عطيت

 للأسى وزن

ولبّست الحيره ..

 ثوب جديد

انا فرحة اليتيم

 اذا انمدت له إيد

انا اللي اعدت

 تكوين تفاصيل الآلام


انا ريشة امل 

في جناح الايام

.......


تمر باسماعي نغمه

مرّت بزحام حزين

اصير شجن الشجن

وبيوت الحنين

مسرح الحياة .. 

مااستوعب قصتي

مالقيت حوار...

 يشبه ملامح كلمتي

ولا حتى الارض مستوعبه

ولا الدنيا رضت 

تفهّمني معنى كلمة : هِبه

اللي يصير فيني

  حرام

انا ريشة امل 

في جناح الايام




Tuesday, April 11, 2017

ابي حقي



ابي حقي 

اللي سلبته مني

ابي عيني اللي نستني

كل مافيني راح لك 

وهجرني 

ابي حقي


ابي كلماتي اللي اختفت

ابي صوتي اللي خَفَتْ

ابي يوفي وعنوانه

ابي القاني .. ويني انا ؟

وين كلي 

دَلنِي

ابي حقي 

ابي حقي

Sunday, April 9, 2017

لاتخليني



قلبي يردني

لعيونك .. اللي اسرتني

قلبي يردني

لاخر نجمه بالسما

ولاول شهقه

ترد فيني النسم

غيابك حبيبي

خنقني

وقلبي يردني

--------

تعرف شلون نبضك

ينسج على ارضك

تعب وثقل وضيقه

اموت كل دقيقه

وابقى احبك

والله ياجرني

وقلبي يردني

------

عشان ارتاح لاتخليني 

من عمر وانا بروحي

عشان اعيش شوف عيني

بس شوف وترد روحي

والله ترد روحي

 صدقني

لاتردني


Thursday, April 6, 2017

تايه



دروب ادلها ... ضاعت

دروب مااعرفها.. نادت

بين النبره والحرف مسافه

والضياع سرقني

كل حجوه بلساني .. انباقت

حتى اللهفه .. انكرتني

حتى الفرحه ..استغربتني

الحلم اللي خبره فيني .. اتمناه

ضيعني وياه

يمكن ماني قد الفرحه

يمكن ادمنت الاه

تايه 

تايه

....

ليش اخاف اذا .. فرحت

ليش الامان .. يستغربني

تعيش البسمه بصدور البشر

وتبقى وياهم مرتويه

واذا فكرت ارتوي 

احس روحي غلط مسويه


ليش اخاف اذا فرحت

ومااثق بضحكة العمر 

وتايه

.......

تطول سفوح قلبك نسمات

تغير كل نبضه بعروقك

توصل لاعمق نقطه بالذات

تحس بحب يخاف ربك فوقك

اشرّع شبابيك الاماني

تهل طيور على مد النظر

ويتزيّن بيتي ومكاني

وحس الهم فيني كبر

شاللي صاير ياكياني

قلبي انجبر؟ والا انكسر؟

تايه 

تايه

......

تيارات الحياة شالتني ببحرها

مابين حناياها كنت اسافر

محد ملا العين ونظرها

ولااقتنعت بكلمة .. مشاعر

ليش اللحين

ليش هالحزّه؟

ليش بيني والسما معزّه

انا حيرتي ضيّعت وقتي

انا اللي اوايه نفسي .. ماأغبي

انا اللي اوايه ؟؟؟؟

تايه 

تايه

......

ليش اخذ نجمه ...

 واتوّها بغيومي؟

واتركها 

ببحور ظروفي تومي

ليش ماأوعّيها ..

 واحسّسها بنورها

ليش ماأبيّن لها ..

 شنو دورها؟

في مجرات الكون


احد سمع عن كون مظلوم؟

ودنيا نست نجوم ؟

ونجمه توسّدت غيوم

انا اللي اوايه ...

تايه 

تايه



Sunday, April 2, 2017

أهل



بالهدى ياحبيب الروح والريّه تمهّل

انا انتشي بسحر صوتك لين هل

احساسك وحسك ياعيوناتي ماوهّل



طيّرت قلبي من مكانه وحرمته آهاته

قلت : عطني همك وشقاك بعد هاته

يازينك ويازين قلبك ويازين رهاته

وياكبر فرحتي ليمن تسألني :أهل؟

Wednesday, March 29, 2017

مطمني


احتاج ابقى عليك ولهان

مابي هالشعور يروح مني

لما اوله احس اني بأمان

اشتياقي لك بقلبي مطمّني

يالله


لاملامح 

لاطعم 

لااتجاه

بس الم

واه

...


تعبير صامت يخنق 

قلب مايقدر يخفق

عين دموعها تبرق

حرمان بلون الحنين

يالله 

يالله 

يالله 

.....

اطياف احضان بعيده

بدايات ولادة قصيده

شاعر ارتجف وريده

وقيود قديمه متماسكه

استوطنت احشاه



Monday, March 27, 2017

بوبراك

اهداء الى روح والدي 


ماتاخذني وياك ؟

باشوف عالمك

حدود سماك

الكلام عندك شلون ينقال ؟

الاحاسيس شلون تنحس ؟

كم حاله ضياع 

وكم لحظة ارتباك

ماتاخذني وياك ؟

ابي اكون صوب قلبك 

اغفي عليه

ابي انادي

واسمع لبّيه

من ١٤ سنه ماقلت يبا

ماودّك ارتاح ؟

ابي ترحمني من هواك 

ماتاخذني وياك

ماتاخذ اللي روحه بيت مهجور

 انت ضياه وحوشه والفنر والنور

ماتاخذ اللي عيونه نست الشوف

عاشت بارتباك ووحشه وخوف

يتروالي 

مابقى شي واكون وياك ... هناك




Wednesday, March 22, 2017

البس احلامي



ألبس احلامي وأهيم بين النجمات واتنشق غيوم 

حالمه

انرسمت اللحظات العذبه كون وطريج ومسار 

لعناوينك

احس كل قطعة بيوفي  مبتسمه فرحانه بس

 موفاهمه

شاللي يصير فيني كل من يشوفني يقول

 شزينك

خايف على قلبي شلون يتحمل مشاعر فيه

 متزاحمه

ايدي تكتب ازهار روحي تشهق ياقلبي الله 

يعينك

شهالحياة؟  شهالدنيا  كل يوم نور عيونك

 أوالمه

شنو انت شهالعمر اللي يقرب اللهفه  بيني 

وبينك

حتى مساماتي مرتوية ومع ندى غيومك

 متفاهمه

حبيت كلماتك بحتك حروفك حبيت سينك

 وشينك

من عرفتك مااشوف الا غيوم  غرقانه احساس

 حالمه

كل ماابي اهدى وارتاح ماادل الا مسار

 عناوينك

Monday, March 20, 2017

مايك


خلني رايك

وهواجيس الخيال

والفكرة لي طرت بالبال

خلني شهقات المطر

خلني تيارات النهر

وقطرات الندى بمايك

خلني صوت الحزن 

في نايك

خلني هلة الفرح

لما يبتسم وهو يايّك

خلني رايك

Monday, February 27, 2017

صور افكاري


ابي ارسم صور لأفكاري

وانسج من وحي الخيال دروب

منو غير الأحلام يطفي ناري

ويخلي كبرياء الجرح يذوب


ودي اترجم غناوي الطيور

وأوصف صوت الجنحان

ودي اتعلّم ترانيم الزهور

وأصير غيمة ألحان

وأصير بذرة حنان

وأصير حُب منثور



يانسمة هوى مرّت على الغالي

سحبيني صوبه

يارويحة الجنه ناديه بدالي

ضيعتني دروبه


ماأبي أجف

صدري ارتجف

ياقلبي تحملني

فيني شي موعادي

ياقلبي وهّلني

انا عيونه مرادي

على يوفي 

صاحت الحنايا وافّادي

ياقلبي تكفى تحملني




Thursday, February 23, 2017

لانك النور



يحق لي احتفل

لانك النور

واوفى الحروف 

واعمق المعاني 

بين السطور 

انتي الشمس 

اللي تحن علينا 

وحنانها حوالينا

يدور 

يحق لي احتفل


لان مثلك ماانوجد

انتي حبيبه مانتي بلد

انتي ام وظهر وسند

وحضن وسور

الفخر عرفناه منج

فوق الفخر فخر لاني ولدج

فخر لين سموني باسمج


انتي بنيتي بالفخر بيوت ودور



شوق وحسره



ذوقتني طعم الهيام ..... ورحت

علمتني ابد ماأنام ... وغبت

وانا لولاك ماعرفت ..

 الشوق والحسره

والقلب بلياك .. 

مالقى من يسرّه

باختصار انا من بعدك .. مِت

والروح ودها مني تتبرا



تهت وتاه القلب بدقاته

قلب صرت انت حياته

غيابك هلاك .. وغربال

محد يلقّي لي بال

والقلب مل من صبره


وين مكانك انت وين

عاونّي شلون أدلّك

حملتني الهم دين

وثقل حملي وخف حملك

مو حرام عليك  

تحت جفوني حزن الكون بأسره






زهيرية



ياللي بحياتي شمس عالجبين تشرق

هواك يغرّب بقليبي يوميه ويشرق

من كثر حبك لو جابوا طاريك اشرِق


انت الحلو بحياتي لو حظي ردي

رغم لهيب فراقك ذكراك بالروح بردي

قلبي وياك لو رحت عنه صوبك طرِدِي

انت الجانب الوحيد اللي بحياتي مشرق

Monday, February 20, 2017

صوره





أدوّر صورة

فيها ملامح .. عمري

وشقا صبري

ترسم معالم الخيال 

وترتّب أموره

أدوّر صورة

...

بزواياها اصدق ذكرياتي

فيها كل حياتي

فيها العواطف والحنين

وضحكة ودموع عين

وسواد عمري ونوره

أدوّر صورة


...

أدوّر قمر فز من صدري

وتاه بينات النجوم

وغيمه انكرت الغيوم

وصار الضمى بقطراتها

ضرورة

أدوّر صورة

...

أدوّر صورة

تبني بوجداني مدينة

تداري قليبي وتعينه

تهديني عناوين جديدة

تاخذ الحب من إيده

وتهديني الامان

وتكسر كيان الجفا

وتهدم سوره



Tuesday, February 14, 2017

محاتاتي



علمني الوقت شلون احاتي

واتوسد حضن ذكرياتي

شلون ارتّب الوله ... بروحي

وأعلّم نفسي  اعيش بريحاتي 

وشلون احاتي

........

راح العمر بين محاتاة .. وانتظار

ولهفة وقلب شاب .. نار

عودت حروفي بدالي تحكي

عودتها تنوح وتنخ وتبكي

انا دواي اوراقي

وفيض كلماتي

ومحاتاتي

....



Monday, January 2, 2017

عيش حياتك



عيش حياتك

تقدر لاخر نفس

تحقق حلم

وترسم امنياتك

عيش حياتك

...

شيصير ؟؟ 

لو اخذت من الجنون لون

شيصير؟؟

لو عالمستحيل تمون

شيصير؟؟

لو علمت عيونك وقلبك يحبّون

وزرعت البسمه بذاتك

عيش حياتك

....

اكسر قيودك

وبكيانات الفرح

اثبت وجودك

حطم معنى التشاؤم

وتغافل اليأس

واترك التفاؤل

يحدد جهاتك

عيش حياتك

...

ان كان همك كُبَر

خل احلامك اكبر

لو فيك كسر ماإنجبر

لاتخلي نفسك تتأثّر

احنا جم يوم بنعيش

عشان نحتر

شوف باكر 

لاتلتفت للي فاتك

عيش حياتك

...