Wednesday, October 31, 2007

ياعمّي طير



تدوير

يرز التافه

ويهمّش عقل مستنير

تدوير

يموّت الراقي الشريف

شي يسوونه عالكيف

مايخافون الله

يذبحون النظيف

وينرز اللي ماعنده ضمير

تدوير

الله يعينج ياديرتي عليهم

صرتي لعبه بأياديهم

ناس مو كفو تخطّط

وعلى القرارات تشخّط

عشنا بسر 

والسر في بير

تدوير

مو عيب جذيه يسوّون

من الله مايخافون؟

دانة الخليج اخطفوها

العيون الحالمه عموها

مو عيب جذيه فينا يصير

تدوير

أبي واحد مرتز على عِلمَه

على قد أخلاقه وفهمه

موعشان حبّه خشم


ناس غشّم

صاروا هوامير

تدوير

إيه هيّن نشم ريحة إصلاح

إيه للأسف حظنا طاح

واللي بيقولّي تفاءل

بقوله : ياعمّي طير

تدوير

Monday, October 29, 2007

مو بولام



مو إنت اللي تنلام

أنا اللي أنلام

أنا اللي ضيّعت عمري

أو أسكنت بصدري

جذبات وأوهام

أنا اللي أنلام

.....

غلطتي شريت واحد مثلك

ماعنده من الوفى ذرّه

نسيت وهذا من طيب أصلك

مامنّك رجى بالمرّه

أصلا إستمرارنا حرام

أنا اللي أنلام

.....

ألوم زمن عرّفني عليك

وصوتي لو يناديك

وعين كانت عشانك

ماتنام

أنا اللي أنلام

....

 ناس توفي وناس تخدع

ناس من كثر شوقها تدمع

فيه ناس بسهاله تبيع

فيه ناس صدرها وسيع

فيه ناس ماعندها

غير الكلام

أنا اللي أنلام

3/09/2006الاحد
11/10/2006 الأربعاء

Thursday, October 25, 2007

طراره



بمناسبة الحديث عن حل المجلس والحديث عن تدوير بعض الوزراء والحديث عن تعيين بعض الدماء الجديده في الوزارات وبما انني لم ارتكب اي مخالفة مروريه جسيمه واحمل الجنسية الكويتية المادة الأولى وبما أنني كنت طالبا بالكويت بالمدارس الحكوميه منذ مرحلة الروضه إلى المرحلة الجامعيه وبما أنني فوق الثلاثين عاما وأحب بلدي حبا كبيرا أعتقد ماراح يلقون أحسن منّي وزير بس ماأدري ليش الى هذه الساعه محّد دق علي

تهقون ليش ؟




مادقّوا علي ماعطوني وزاره

ولاحسّوا بإمكانياتي الجباره

ولاحتىرقمي سألوني عنّه

ماحتى بالغلط عطوني رنّه

ياقاصدينها ياعياره

ماعطوني وزارة

ودّي أعرف شنهي المعايير

يبوني أهوّس وإلا أطير

ودي أفهم شنهي المواصفات

يبون ضمير حي وإلا مات

يبون ناس مريشه

وإلا فقاره

ماعطوني وزاره

إنزين على الأقل وزارة التخطيط

خل يعطون ويه للزعاطيط

يمكن يلقون فيهم حلول

خل أصبر يمكن أنول

يمكن تنفع الطراره

ماعطوني وزارة

أحس إني انفع للأعلام والأشغال

يمكن أعدّل وأصلح الأعطال

يمكن أسمح لبرنامج للمدونات

يمكن أهدي لشعبي حياة

وتكون بيدي مكامن السّنع

وأسراره

ماعطوني وزارة

31/07/2007

السبت

Monday, October 22, 2007

ابي راي

أبي رأيكم بصراحه بالموقع الجديد وهو تحت الإنشاء

Friday, October 19, 2007

ياكبرك بعيني




ياكبرك بعيني

صرت شوفي

حشاشة يوفي

و حياتي

وأمنياتي

صرت كل شي فيني

ياكبرك بعيني

.....

لك مكان بخافقي إنرسم

لك كيان بذاتي ابتسم

ومن فرحته فيك انتشى

يحبك ؟! لا لا !! حشا

كلمة يحبك ماتكفيني

ياكبرك بعيني

...

أشوفك كل مره أحلى

كل مكان تسكنه تجمله

وتنثرله ورورد بالحياة

وتسقي بساتين الامنيات

شتبيني أقول بعد شتبيني

ياكبرك بعيني

6/07/2007
الجمعه

Tuesday, October 16, 2007

هوب هوب



فرض الله تعالى الحجاب على المرأة المسلمة تكريما لها ، و حفاظا على مكانتها السامية من أن تمس بسوء من الفساق و أشباه الرجال بصراحه يزعجني منظر الحجاب عند بعض النساء وخصوصا حجاب بوروب وهو عباره عن حجاب يكون تحته قوطي روب وفي نظرهم انه جميل ورائع ، انا من ناحيتي اعتبر الموضوع حرية شخصيه ولكن اريد ان اناقش هذا الموضوع من جانبي وأدلي برأيي المتواضع واريد ان اقول انني اخاطب فئه بسيطه من البنات وليس الكل يستهويهم حجاب بوروب


هوب هوب

شسالفة حجاب بوروب

هوب هوب

مابقى إلا يسوّون اختراعات

ويخترعون لنا صرعات

ويحطّون بالشيله تيوب

هوب هوب

شسالفة حجاب بوروب


شفيكم يابنات عسى ماشر

باقي تربطون روسكم بمصر

ترى أساس الجمال الحشمه

فيه لبس بالفعل تحترمه

وفيه لبس من ساسه لي راسه

ذنوب

هوب هوب

شسالفة حجاب بوروب


أنا أقول الشرهه على الأهالي

أكيد البنت ماعندها والي

لو لقت من يفهمها

لو لقت من يعلّمها

جان شفنا للسّنع أسلوب

هوب هوب

شسالفة حجاب بوروب


لاتلعبون بحسبة الحجاب

احترموه ينولكم ثواب

تراه صدقوني مولعبه

صيري ياوخيتي ذربه

اخاف السنه اليايّه

تحطين على راسج هيلا هوب

هوب هوب

شسالفة حجاب بوروب


ماني متكلّم عن حجاب بوطبقات

فيه بنات بنوا على روسهم عمارات

وحده مطلعه ثلاث أرباع القذله

ووحده رازّتها رز البكله

ليش ماتردون لحجاب أيام

يابحر توب توب

هوب هوب

شسالفة حجاب بوروب
الأثنين
16/10/2007

Saturday, October 13, 2007

عن العياره



كأي أب يهدي لأبنه عيديه بيوم عيدالفطر السعيد اتجهت إليه كأول شخص اهديه عيديته ،أهديته دينارين وقلت له
لاتقول لأخوانك فنظر إلي بنظره غريبه ثم قال : ماهذا قلت له هذه هي هدية العيد قال لامشكور مابي عيديه اريد سيّاره حالي حالك ،قلت له : بس إنت توّك صغير وأنا توني شاريلك سكوتر لم يلتفت إلي ونظر إلي بنظره مريبه وأعطاني الدينارين وذهب فكتبت التالي من حرّتي




يبا إهي مو طراره


أبي العيديه سياره


أبيها مثلك تكون كشف


وأبيك تحس وتعرف


إذا ماتحقق الطلب


ترى النفس بالسوء إمّاره


يبا إهي مو طراره


شنو يعني دينارين


إحنا وين قاعدين وين


أبي أعيش مثل الناس


أبيك ترفع الرّاس


والحجي لج ياجارة


يبا إهي مو طراره


أبي موتر يرزني رز


والعالم تشبع فيني خز


هذا يقول شهالموتر


يبا ملّيت من السكوتر


يبا يبا عن العياره


يبا إهي موطراره


ياوليدي وإذا كبرت شاشتريلك


ياوليدي دبّرني شسويلك


يالله ولبي أقدر أدرسكم


رحموني يرحم أمكم


يعني اذا تخرجت


تبيني اجيبلك طيّاره؟


يبا إهي مو طراره
الجمعه
12/10/2007

Thursday, October 11, 2007

أي عيد



عيد!؟

أي عيد وانت بعيد

عيد!؟

ما أحس بفرحه

والقلب تعود جرحه

مابقى شيّ يفيد

عيد!؟

أي عيد

...

من رحت غابت فرحتي

من غبت إنتهت قصّتي

سكن فيني همّ قديم

سكن فيني ماضي أليم

كاسيني همّي

شينفع ثوبي اليديد

عيد !؟

أي عيد

....


العيد للي مثلي ماينحس

تختنق الروح وتضيق النفس

شلون بفرح

وماتشوفك عين

وماتلمسك إيد

عيد !؟

أي عيد

....


أهنّي الكل وماألقى من يهنّيني

أعايد الكل ودمعتي بعيني

ياااه على قلبي وويلاته

ياااه على الزمن وجساته

ياااه على نيران

باليوف تقيد

عيد !؟

أي عيد

وانت بعيد

11/10/2007

الخميس

Friday, October 5, 2007

حبني




بإسم الألم اللي بقلبي اسمعني

بإسم الوجع اللي بكياني إفهمني

بإسم كل هم بيوفي جرحني

أطلبك تسمع صرخة ولهانك

من باع الدنيا على شانك

بإسم حبنا إرحمني


بإسم الألم اللي بقلبي اسمعني

.....

بإسم السنين اللي قضت ومرّت

و الرّوح اللي مني تبرّت

اوقف معي بوحدتي

اسمع نوح كلمتي

ياخي من سجن غيابك اعتقني

بإسم الألم اللي بقلبي اسمعني

....


بإسم الروح اللي تغرّبت

والأيام اللي بحسّك شرقت

ماعمره ارتاح قلب بعناده

ماعمرنا لقينا بالبعاد استفاده

حرام توصلني الناس

وانت ماتدلني

بإسم الألم اللي بقلبي حبني

4/10/2007
الخميس