Wednesday, December 31, 2008

إنتهازيه



بعد سلسله من المباحثات الجديه ، بيني وبين المدعو : خشيم الفار، تم الإتفاق على ان تتوقف المناوشات، وتم الاتفاق على ان نأخذ السيد محمد الى ربوع دبي ويبقى عبدالمحسن في الكويت عقابا له على سوء أخلاقه !!! مقابل عودة الهدوء والامان للبيت
وهذه بنود الإتفاقيه
إتفاقيّه
عشان عيونك ياوليدي
إتفاقية
وماكو شي بيدي
طلباتك أوامر
إنت بس تامر
عشانك بنسافر
ونونسك شويّه
إتفاقيّه
،،،،
أول بند : تحرّم تطِق إخوانك
ثاني بند يصير الثِّقل عنوانك
ثالث بند أنا فلَّسْت عشانك
إنت مليان إنتهازيّه
إتفاقيّه
،،،،،،
نشيل قشنا ونروح دبي
دار الطيب دار الحي
يقولون غاليه شوي
ياولد الحجِّيّه
إتفاقيّه
،،،،،
أبَركَب عشانك طياره
رغم الخوف والعساره
ليت عالمك نفهم أسراره
وتفكنا من الأذيَه
إتفاقيه
،،،،
باودعكم ياإخواني المدونين
الله يحفظكم قولوا آمين
أنا وخشيم الفار وعبادين
والغاليه الوفيه
إتفاقيه
31/12/2008
الأربعاء

Saturday, December 27, 2008

عالهبنّي


وجدت هذه الرساله بإنتظاري من إبني عبدالله يشرح بعض من ممارسات شقيقه محمد الملقب بخشيم الفار
وقبل أن أبدأ بتفاصيل أبعاد القضيه أردت أن ارسل لسيادته قصيده لعلها تحرك أحاسيسه الجياشه ويسمعني
،،،،،،،
ياحمّودي إسمعني
ليش كلّه مغربلني
ومينّنني ومفتخني
ياحمودي إسمعني
،،،،،
ليش طاق محيسن
ماخذ بالتكوفن الليسن
محّد عاجبك موليّه
مو مخلّي ياهل وبنيّه
ناوي تسجنّي ؟؟
ياحمودي إسمعني
،،،،،،
يافالع هذا يامعرجب هذاك
ياناغز هذي مهي حالة معاك
الفريج يتشكى منك خلاص
لاراحم سياره لاباص
تراك إمِّسخرنِي
ياحمودي إفهمني
،،،،،،،
ليش مانسوي جلسة مباحثات
وتصير بيناتنا مشاورات
عشان نحقق الامان للبيت
مستعد اشتري بألف برميت
بس ريّحني
ياحمودي إسمعني
،،،،،
عشان شعرك ناعم مو معبِّرنا
عشان عندك مِشِط مو محترمنا
عندك قذله وإحنا محرومين
على العموم إحنا آسفين
السموحه ياإبني
ياحمودي إحقرني
24/12/2008
الأربعاء

Thursday, December 25, 2008

يخرب بيته


....داريته
.
...حبّيته

وبهدب عيني....حطيته

داريته .......عطيته

عمري وسنيني

عطيته

وشنهي التوالي؟؟؟


صفيت على جروح


بس هذا اللي خذيته

داريته

،،،،

قلت يمكن يبيّن بعينه

يحتوي قلبي ويعينه

شباجيلي من ذكرياته

لي عوّرني قلبي

طريته

داريته
13/9/2008
السبت

Tuesday, December 23, 2008

لنج




ليت أبحر ببحرك وحبك اللَّنْجْ

وأقيّل بعيونك يومين وليله

إنت شحلوك بس مرّات قَلْجْ

أصيرلك فنر وإنت الفتيله

عشانك أصير قلب وحَلْجْ

وأغيّل بتراب أرضك غيله

أشوفك كإني ماخذ بَنْجْ

وكإني بالع شَكِر وتيله

أحس بعشقك بارد فَلْجْ

كلّه أقول عنّك يبيله

يبيله إنت وأنا اللَّنْجْ

ببحر هوانا مانبي دليله

25/11/2008
الثلاثاء


لنج : أي القارب
أقيّل : بتشديد الياء أي تعسيله بالسّوري نومة الظهر بالكويتي
قلج : أي صعب
فنر : أي مصباح قديم يستخدمه الكويتييون سابقا لانارة دروبهم ويستخدمها الشياب بالطريق عند السروه ( أي العوده للمنزل ليلا) بتسكين الرّاء
حلج: أي الفم
الغيله : اختلاط الرمل بالماء يسمى غيله
بنج : بِنج بالمصري بكسر الباء
شكر : سكر
تيله : شلون بس اشرحها كرة من الزجاج صغيره والفائز بهذه اللعبه يقول طنّب
الفلج : الثلج
دليله : بكسر الدال وهو الشخص المتمرّس من الوصول للمكان المطلوب مثال مناحي دليله اي يعرف الطريق جيدا

فاصل فكاهي


وصلني هذا المسج من شخص هالأيام صاير كنج

كم سؤال حيّر أقلام الكتابه
وكم إجابه صارت أشبه بالمحال
السؤال يضيع مايلقى إجابه
والإجابه تنتظر طرح السؤال
والسؤال اللي عجزت ألقى جوابه
اللحين نلبس شتوي وإلا صيفي !؟؟

Sunday, December 21, 2008

ورده بدمِّي


بكل ليله 

انتي حلمي


مرتبه تفاصيله


قبل لاأغفي

ألقاك يمّي

انتي حلمي

،،،،،،

حلمي إلا إنتي

 من نومي تكوّنتي

ماجزت العين ولا غفت

كل احلامي وياج صدفت

ويازين حلمي

،،،،،،

قبل لاأنام بشوفج أدري

وبيفز قلبي من صدري

وبتذوب روحي فيج

بأنام وألتقيج

وبتذوبين ورده بدمّي

وبيزين حلمي

،،،،،،،،

تصيرين بين الخد والقلب

إحساس بالخفوق شب

وإنطفى بإيديني

أخليج هدب عيني

وأسمِّي

يازينك بحلمي

Tuesday, December 16, 2008

شوراك




شوراك

ياعمر شوراك

ردّت اللحظه من جديد

لنفس الذكرى تعيد

إنسان

يفهم دنياه

يقدر لحظة القوة

ولحظات الإرتباك

شوراك

ياعمر شوراك

،،،،،،،،

ردّيت

أرسم تواصيف عمري

كُبرت

من غير ماأدري

زادت السنين سنه

نصها وله وعنا

لشخص غاب هناك

شوراك

ياعمر شوراك

،،،،،

آه ياالعمر مايمديني

كلمالك وتكبِّر فيني

لحظه  وهِّلني

لحظه  إفهمني

ماهي حالة معاك

شوراك

قولي شوراك

،،،،،

من حقي تفرح حروفي

وتكبِّر صرخه بيوفي

من حقي تشرق شمسي

من احقي اقول لنفسي

كل عام وانت بخير

والله يهداك

شوراك

،،،،،

أربعه وثلاثين ترى قويّه

صدقني يابوعبيد مو شويّه

بدى يكبر فيك العمر

ويزيد شيب الشعر

شيٍّبت يابراك

17/12/2008
الأربعاء
17/12/1974
الثلاثاء

Thursday, December 11, 2008

ثقافة قطاوه





تنظّفت القطاوه

صارت الوانها غير

جسمها غير

تمشي اتبخطر

بهداوه

تنظّفت القطاوه

،،،،،،

 قبل كانوا مفلّعين

 قبل كانوا متشلخين

حالهم يسِر اللحين

آخر حلاوه

،،،،،،،

الأجسام صارت ممشوقه

راحت الألوان المحروقه

القطوه ماصارت مطفوقه

تستاهل علاوه

،،،،،،

يمكن لأن الحياة تغيّرت

ولإن مخلفاتنا كثرتْ

يمكن الاحلام قصرت

وفقدنا طين خاوه

،،،،،،

ياقطوتي تمخطري براحه

وسبحي بشوارعنا سباحه

وتحت سياره في براحه

تعشّي بقلاوه

ومهياوه


تغيرت القطاوه

11/12/2008

Monday, December 8, 2008

أمُّون المتعافيه

عساكم من العايدين
الغانمين الفايزين
ياعسى تحلو بعيونكم الدنيا
ياعسى يعطونكم عيديـَّـــــه
وكل قلب يلقى أمانيَّــــــــــه
اللهم آميـــــــــــــــن
عساكم من العايدين
عسى كل أصلع بخير
وعسى كل عَصَلْ بعافيه
معيّذ وخلّــــــــــود وبْديـــير
وشاهه وأمَُون المتعافيه
ومزنَه وهياويين
عساكم من العايدين
،،،،،،،
الترجمه
عصل : بفتح العين والصاد أي الشخص الضعيف
معيّذ : بتشديد الياء أي معاذ
خلّود : خالد
بدير : بتسكين الباء أي بدر
أمون المتعافيه : آمنه الممتلئه
هياوين : هيا

Monday, December 1, 2008

ياورده




ياورده

بيوفها مودّه

ياورده

ياندى عذب

ومن الندى أنده

ياورده

....

ياللي حبك ساكنّي

بنسايم هواك شايلني

وفوق غيماتك ماخذني

وإن خذاني ماأردّه

ياورده

.....

ياأطهر قلب عرفته

ياعشق باليوف أسكنته

ياحب توسدني وتوسدته

وغفيت بين عيونه وخدّه

ياورده

3/10/2008
الخميس

Saturday, November 29, 2008

الله أدرى

الله أدرى
فيني
الله أدرى
أحس الروح مني
إتِّبرَا
وراحت مني
زاد حزني
وتاه الفرح من دنيتي
كل شي حولي
قمت أخسرَه
الله أدرى
الله أدرى
،،،،،
تشربني همومي وتعطش بألم
وأرويها مرات بجرة قلم
ماتكتفي تبي زود
ماللشقى عندي حدود
إي والله بالمره
والله أدرى
،،،،،،
يوقف الوقت على لحظة غيابك
وتصير الأوقات لحظات موادع
شناديك وأنا محروم جوابك
عمر الوقت مارحَم ضايع
ولادارى عَبْرَه
الله أدرى
الله أدرى
26/08/2008
الثلاثاء

Wednesday, November 26, 2008

بفك متفوخ




أبي أركب صاروخ

يودّيني أي مكان

كوكب كلّه أمان

مافيه عقل يفكّر

وقلب مفضوخ

أبي أركب صاروخ

،،،،،

يقطني بعيد

لاجرايد  لابريـــد

بتعرّف على كائنات فضائيه

ماتعرف اللّويه والأذيّه

كلها عزّه وشموخ

،،،،،،

يلوي فيني على المجرّات

آكل ببلوتو سكر نبات

وأتعشّى بأورانس والمشتري

وأرد على المريخ قَــــــــــرِي

وبعطارد أدوخ

،،،،،،،

بتكوكس بدون جاذبيه

أتمـــقّط وأهيهي شويّه

ويسموني الرائد : براك

أصير سفير الأفــــــــلاك

وأخلّي همي مشدوخ

،،،،،،

بالقمر أبني لي عرزاله

وأتأمّل نوره وجماله

وأشرب بيالة شاي

ويمّي دولكــــة ماي

وبفك متفوخ

أبي أركب صاروخ

27/11/2008

الخميس

مفظوخ : فضخ أي مزّق وعادة مايقولون للشخص الحساس قلبه فضيخ

يلوي فيني : أي يسير معي بإتجاهات متعدده

قري : أي إلى الخلف مثال صبحي قطّه قري

بتكوكس : ومفردها كوكسه أي الشقلبه من الأمام إلى الخلف والعكس وهناك 

نشيده ترددها الامهات لأبنائهن عندما يلعبن معهن تبدأ بكوكسه إلى أن تنتهي

 بالمدرسه

أتمقّط : بتشديد القاف أي أفرد ذراعي يمينا وشمالا وعاده مايتمقط الانسان بعد

استيقاظه من نومه

أهيهي : أي أمشي بلا هدف

مشدوخ : أي ساقطا على الأرض

عرزاله : وهي عبارة عن جلسه مرتفعه تصمم عادة على شاطئ البحر أو في البر

بيالة شاي : قدح من الشاي وعادة الشاي بالكويت يقدم بالكوب أي البياله 

والاستكانه أي الطبق الصغير والقفشه أي الملعقه

دولكه : أي قنينه كبيره

متفوخ : أي منتفخ

،،،،،،،،

فاصل فكاهي

،،،،،،،

سألوا غبي شنو الحيوان اللي عنده أربع ريول ؟؟
قال
^^^^^^^
^^^^^
^^^^
^^
^
دجاجتين

Sunday, November 23, 2008

خرّازه




شعب عايش عمره على أمل إجازه

العموم بس يبي يهج ويسافر

شعب نفوسهم للعطلات معتازه

مايحبّون الأذيّه والمعافر

شعب يحب الصْبور  تازه

ملفّي جورج وحسني وظافر

شعب ارضه تشتهر بالغرازه

يحبون سنان والسنافر

والصندوق المبيّت والفازه

مسلسلاتهم ثلاث أرباعها مخافر

معظم بنيّاتهم عندهم  غمّازه

وبعضهم يطولون الأظافر

عرفتوهم؟؟إيه يبون إجازه

 شعارهم الوحيد نبي نسافر


16/10/2004
الثلاثاء

Thursday, November 20, 2008

أرسِمَــــــــه




أتوسّد بقايا ذكرياتك وأهيم بطواريها

وأتخيّلك هوى بيوفي أشهَقْ أتنَسّمه

ذكراك جميله وجميله أكثر معانيها

تطري ببالي وأحسني معلّق بالسِّما

أحس بصوتِك يمطر الدنيا يرويها

يخليها  بقطرات حسِّك متوَسِّمَه

الذكرى للناس لحظه تمُرْ بما فيها

وذكراك عندي لحظه وقفت متبسِّمَه

ذكرى تدلّي أشواقي و تجدّيها

وبصدر الوقت تاخذ طاريك ترسِمَه

أتوسّد بقايا ذكرياتك أهيم بطواريها

انت هوى بيوفي أشهَق أتنسِّمَه


20/11/2008
الخميس

Monday, November 17, 2008

كودنه



بعد 50 سنه
جم واحد نذكره
جم نائب نذكر صراخه؟
وجم وزير نقول الله يرحمه
كان معيشنا بهنا
بعد 50 سنه


جم إستجواب بنقول فَهَّمْنا
ساعد بتثقيفنا وطوّرنا
ورحم عيالنا وأهلنا
وداوانا كِلِّنا
بعد 50 سنه


الناس تنذكر بالخير بسيرتها
بإخلاصها وتفانيها ومودتها
ياما ناس الأيام طوتها
والتاريخ إعتبرها
كودنه

بعد 50 سنه
كودنه : وهو الشئ الغير مهم
خارج الموضوع : اشكر مدرسة البيان ثنائية اللغه على دعوتهم الكريمه
اول محاضره لي على هذا العنوان
أوان

Thursday, November 13, 2008

فلسفه



للوله فلسفة

وماضي مثل ماتفهمه


تعرفه


انثر بهالمكان عطر


واشتمك وفى


للوله فلسفة


للشوق حلاوة ولواهيب


وللجرح ألم وطبيب


تعال داوني


تعبت بجرح غيابك


لوحدي انزفه


للوله فلسفة


10-2-
2005الجمعة

Sunday, November 9, 2008

متاي



على البسطه أمّاعين حزني وبياله

وبالقند قصتي تحلّي الشاي

باسجّل على دثرتي إثبات حاله

وبتسندني الزلابيه ولهوم الحواي

تسندني الدوه والبيز ببساله

تقول لهمومي بالسلامه باي

أنا بقلبي ياناس فاتح بقاله

فيها بفك  ودثره ومتاي

والمتاي اصل تكوينه سيباله

وأكله جميله للفقارى والحفاي

هذي سوالفي قبل لاتنكت البياله

قايلكم مره ثانيه لاتصبون شاي


الترجمه


البسطه : كلمة مأخوذه من البساط

أمّاعين : الأواني المنزليه

البياله : كوب الشاي او الحليب

القند : مكعبات السكر

دثرتي : ومفردها دثره وهي عباره عن اغراض مبعثره

الزلابيه : نوع من الحلو المشبّك

اللهوم :حبيبات نباتيه مثل الحلبه والسويداء (حبة البركه) والفلفل الأسود والكركم يسف في الفم ويشرب عليه الماء

الحواي : اي الحواج وهو بائع الادويه الشعبيه

الدوه: بتشديد الواو وهي المنقله يوضع فيها الفحم للتدفأة ويسكّر عليها الشاي

البيز : قطعه من القماش تخاط من بقايا القماش لمسك الأواني الساخنه

المتاي : بتشديد التاء وهي مقالي هنديه مجففه

بفك : رقائق الذره

علوج : العلكه



Saturday, November 1, 2008

أحداث حزينه



أحداث حزينه

مو خوف .. هي مسأله منت فاهم معانيها


أنا صارت كل حياتي بإيديّاتك...... رهينه


هي حاله مابين الأحاسيس وخوافيهــــــا


هو واقع مر وبنفس الوقت شزينــــــــــه


لو تفهمني جان أحلامي عرفت أمانيــــها


لو تحسني جان لقى قليبي من يعيــــــــنه


هي مسأله تناصف كل اختلاف فيهــــــــــا


هي سالفه باختصار غريبه وحزيــــــــــنه

Wednesday, October 29, 2008

هناك



هناك

أبي أبعد هناك

بأي عالم انت ترتبه

 فايضه فيه المحبّه

أنا فيه الأرض

وانت الملاك

هناك

أبي أبعد بعيد هناك

.....

فيني احلام تبني وطن

تخلق واقع وتغير زمن

احلام تترجى الوقت يداريها

أحلام محد قدر يحتويها

غير ارض اسمها

براك

ابي ابعد بعيد هناك

6-9-2008
الأحد

Wednesday, October 22, 2008

إداد



اول ظهور صحفي لي عن طريق جريدة الصوت الكويتيه

اشكر السيد / يوسف محمد السميط

والسيد/ عبدالله الفريح

http://www.assawt.com/Upload/Page%20Pdf/2008%5c10%5c21%5c205613334-32.pdf

الطله الثانيه

http://www.assawt.com/Upload/Page%20Pdf/2008%5c10%5c22%5c193650407-32.pdf

Monday, October 20, 2008

مملحه




مصلحه

تاخذ السنع

وتعفر فيه

وتذبحه

مصلحه

،،،،

عشان فلوسك أحبّك

وأحاول أملك قلبك

أغنيلك وألفح لو تبي

اصيرلك سايق وصبي

أدوس منطق الكرامه

وأذبحه

مصلحه

،،،،

عشان منصبك أتقربلك

أموت فيك وأهواك كلّك

لك مدة للصلاحيه

اليوم وياك 100%

وإن شالوك

أحذفك بمملحه

مصلحه

،،،،،،،

عشان موترك أتغزّل فيك

أدبخك وأدلعك وأجدّيك

أتفيخر بيختك وشاليهاتك

أخليك أسعد أدمي بحياتك

والأماني حولك

مسدّحَــــه

مصلحه

20/10/2008

الأثنين

السّنع : بتشديد السين وهو الشئ الراقي ويطلق على الشخص المهذب سنع بتسكين النون

تعفر فيه : أي تقلبه رأسا على عقب

ألفح : لفح فلانا أي رقص

أحذفك بمملحه : أي أرميك بقنينه ممتلئه بالملح

موترك : سيارتك ان كانت جيبا او كشفا أو مصندقا
أجديك : الجيم تنطق جيما فارسيه أي اطبطب على صدرك لتتجدّى وعادة الامهات يجدون اي يطبطبون اطفالهن بعد رضع الحليب لاخراج الغازات وعادة ماينتهي التجدي بصوتا يصدح من حنجرة الطفل الرضيع وهناك اطفالا يطلقون اصواتا من منطقة عريفجان جنوب الكويت مثلا ويصل الصوت لحدود نيروبي

مسدّحه : أي مرتميه على الارض مثال انسدح لطفي على القنفه أي ارتمى لطفي على الأريكه حلوه الاريكه وعاش واقف

Wednesday, October 15, 2008

حدرك



منتظرك

و أدري

العمر مابرني

ولا بـَرّك

منتظرك

،،،،،،،،

جاسي إنتظار المجهول

يعلمني كيف أصبر

شوفني لما ماألقى حلول

ولما على فراقك ماأعبّر

مهما صار منك


يزيد قدرك

منتظرك

،،،،،،،،،

أكتبلك أشواقي على ورقتي

وأكسر بمحاريك صمتي

وأأمِّــــــل نفسي بالخيال

وأتريّا يتحقق المحال

وأرسمك غيمه

وأنا عطشان حدرِك

منتظرك

،،،،،،،،،

أتريّا

حلم مو راضي يصير

وأريِّـح

بالوله الروح والضمير

أرتاح


وأنا متعذب بفرقاك

أهتني

بليل ماشاف نور ويّاك

ينكسر خاطري

ينكسر خاطري

وهم أعذرِك

منتظرك

16/10/2008
الخميس