Monday, December 26, 2016

كاره باكر



على كلمه

على خبر

على همسه

صابر

وناطر

كرهت اللحظات 

كرهت اليوم 

وكاره باكر

...


انا راضي بالجليل


انا كتلة من حنين

انا عايش سنين 

حزين 

ومكسور الخاطر

كرهت اللحظات 

كرهت اليوم 

وكاره باكر
....

ذبحني غياب احبابي

انولد الخوف عند  بابي

صرخت بكل كلمات الرفض

لا ...كافي... مابي 

مابقى بالدنيا رجى

يطيّب الخاطر

كرهت اللحظات 

كرهت اليوم 

وكاره باكر

.....

بارفع للامل رايات

والحلم بعيوني بيبات

بارسم للامل ملامح

واثبات

منو كثري 

على حلم اللقا موّات

منو كثري 

كتب بدم قلبه للوله

دفاتر

كرهت اللحظات

كرهت اليوم 

وكاره باكر








زولك ماغاب



 عن عويناتي زولك .... ماغاب

منثور بنسمات الهوى

وعلى خد السحاب

انتي زولك

الاهل

الفرحه

اليبّاب

 عن عويناتي زولك .... ماغاب


....

رغم بعادك .. ورغم ناري

تزيد الموانع .. ويزيد اصراري

شلون جرح غيابك مايبرا

وانتي طيف ومنى .. وذكرى

لو فكرت انساك

قلبي يهاب 

عن عويناتي زولك .... ماغاب

Monday, November 7, 2016

تجاويف مشاعرك



خابرك 

من يهل الغيم

تتذكر اللي كاسرك

خابرك

من تحس بالمطر

ترتروي تجاويف مشاعرك

مايغيرك 

الا ... قطرات الماي .. لي تغنّت وأَنشِدت

مايحركك 

الا حس السما .. لي تنهّدت

ماغير الامطار 

تجبر بخاطرك

خابرك 

خابرك


Wednesday, November 2, 2016

عَنْوَه




كنت أبي لحظات حلوه


ويضيع عمري على شي .. يسوى


وصدر يحتويني

ولي تعنّيت له

يشيلني بيوفه

ويقدّر العنوه

كنت ابي لحظات حلوه 

.....

احتجت من يبعد الياس .. من عمري

من يبرّد الضو اللي بصدري

كل مااحتاجه... أمل

وقلب كبير

يكون لي .. أهل

وعزوَه

كنت ابي لحظات حلوه

.....

كان ودّي بعيون .. 

القى فيها مكاني

واشوف حلمي ...على اهدابها .. يتبسّم

كنت ابي روح ...هوى أفّادها..وياي يتنسّم

ياكثر احلامي الميته

وياكثر ماقلبي يتجوّه

مو هذي الهقوه 

كنت أبي لحظات حلوه

واتمنى الراحه منوه

ويضيع عمري على شي .. يسوى


Wednesday, September 28, 2016

زهيرية

 ياكثر مالقلب منه إستاذه
اهوه ملك الغرور وإستاذه
ياكثر ماجرح وظلم وآذى


ماخذه عناده حيل والتيه
مارحم الللي كان يحاتيه
يادنيا مابقى شي ماسويتيه

وليش ياوقت بس كل هذا




Thursday, September 22, 2016

لازم تمثّل




مثّل

وامورك ..بتستعدل

لازم تجامل

ومن ورا قلبك تعامل

ولمفاهيمك 

تغيّر

تعدّل

تبدّل

لازم تمثّل


-----

مابين قناعاتك ..وإيمانك ..والواقع

لازم ترتّب ...أمورك

لاتستسهل دور .. التواضع 

حاول تعيش .. دورك


وتتمتّع بقدرات تخلّيك

 تكمّل

لازم تمثّل



------

لكل عمر .. شخصيه ... وحوار

اختار بعناية ... الادوار 


حاول ادوارك.. تتقمّصها 

الحياة رواية ..خلّصها

ترى العمر مايوهّل

كمل 

ومثّل

مثّل


Tuesday, August 2, 2016

ياكويت تذكرين




بنفس هاليوم 

كنتي تنزفين

وباسم العروبه تنادين

بنفس هاليوم 

بيّنوا عيالج الاصيلين

كانوا على قلب واحد

لاسني 

لاشيعي

لاحضري

لابدوي

كانوا كلهم كويتيين

بنفس هاليوم كنتي تنزفين

.....

الدم كان يرخص لج

ارواح راحت بس ينبض نبضج

كان كل شي رخيص ..بحقج

الا حبج

 ثمين

بنفس هاليوم


كنتي تنزفين

...

بنفس هاليوم


تشردنا

تمرمرنا

كانت نظرات الناس تذبح

كنا نبي نموت

بس مانسمع كلمة مشردين

بنفس هاليوم 

ياكويت تذكرين

....

بهاليوم

كل نفس بالتضحيه تفننت

اجمل الألحان لج تلحّنت

كان حب الكويت 

ماتستوعبه قلوب .. 

وشرايين


بنفس هاليوم ياكويت تذكرين

....


بهاليوم 

يوم فكروا يفرقونا .. تعاضدنا

يوم فكروا يكسرونا .. توحدنا

كنا نعطي مانفكر بثمن

كان الوطن فعلا وطن

احلى كلمة تنقال كلمة

صامدين

بهاليوم ياكويت تذكرين

.....

سطور سطروها الكويتيين


تبي من يقراها ويستوعبها


هالديره جميله .. ليمتى بنتعّبها


متى ياكويت على خبرنا تردين


يوم عيالج مايعرفون الا التفاؤل


ليمتى ياكويت عيالج متشائمين


نزفتي بما فيه الكفايه


مانبيج اليوم تنزفين











Thursday, May 12, 2016

حلمي


البارحه

كنت  ... حلمي 

من رجفة .. نبضاتي

من حس .. آهاتي

لما وعيت ومالقيتك .. يمّي

تآكدت انك

البارحه ... حلمي 

.....

الدنيا طارت .. فيني

صرت جدام عيني

حوالينك طيور تغرّد

الكون كان مورّد

وحسيت بوردتين ذابوا ... بدمّي

تآكدت انك .. حلمي

......

ماأدري انا حلمان

والا من كثر ماني ولهان

كل اللي اذكره

كنت اشوفك

وابتسم 

وأسمّي

كنت حلمي








Wednesday, May 11, 2016

خبر كان



بعيونك .. رسمت احلام

وبنيت .. وطن للأمان

حسيت اني ضايع ودلّيت

وبالقى اللي تمنيت


وصدقت وتعشمت بكلام

نلت الجسى .. وغاب الحنان

......

هقيت بحضنك

بالقى الراحه والسكون

وللاسف منك

صار العذاب علي يمون

وصرت على الفرح ولهان

نلت الجسى .. وغاب الحنان

.....


حتى  سكوتك ..

كنت احاول .. افهمه

ومن نبرة صوتك

اكتب قصايد واصله السما

كنت بعشقك .. فنان

نلت الجسى .. وغاب الحنان

....

شرهتي على قلبي .. اللي صدّق

وصدرٍ كان بإسمك .. يشهق

ماهو ندم بس .. تحطّمت

مشكله اذا عمرك ماقصّرت

وصار حبك بخبر كان

نلت الجسى .. وغاب الحنان




Wednesday, May 4, 2016

نعور




بيننا وبين التطور ... سور

نخاف العلن .. نعشق المستور

في قصور التخلف .. بنينا دور

نثرنا بزواياها كلام وهذره

نحب الظلمه.. 

ونهتف نبي النور

بيننا وبين التطور سور

....

ودنا نعطي للتقدم .. اثبات

ودنا نزيّن الكون والحياة

نتكلم عن العزيمه والهمّه

واحنا نعشق المرضيات

شلون نبني

وايادينا فيها خدور

بينا وبين التطور سور

....

نقارن احوالنا .. بدول عظمى

نبي الضياء .. ونعشق الظلمه

مانواجه بعض .. مانتصارح

نحب انتناجر..انتطارح

نكسر بعض

ونغني بيرقنا بيرق منصور

بينا وبين التطور سور

.....


عايشين عشان ..انتحلطم

عايشين عشان انتحطّم

بالتشاؤم احنا نتفنّن

نحب نحاسب وانتمنّن

واذا حاسبونا

قمنا بحسبتهم نعور

بينا وبين التطور سور




Thursday, April 28, 2016

مايجوز



سيف الاحلام ارتفع وانشهر

انتهى عصر يجوز ومايجوز

الناس ماتنسى بقلوبهم قهر

محد صار بتقديرهم يفوز

التخلف خله الكل ابتهر

شبعنا من كلمة بس ..يوز

عروس الخليج محتاجه مهر

دبروا مهرها لاتصير عجوز

Monday, April 25, 2016

حريه وقيود



 مستمر بالمحبه .. وعواطفها 

بنهايات ماودّي ...أعرفها

بالضياع تايه

ماودّي اواجه

الروح .. ونقطة ضعفها 
.....

ليش أجاوب على .. اسئلتي؟

مكتفي بعنادي وصمتي

حبي له .. ماعرف حدود

حبي له .. حريه وقيود

حبي له .. سالفه ليش اسولفها

.....

فهّمت عنادي يظل ..مستمر

أقنعت قلبي يظل .. مندمر

ورضينا برحلة المجهول

وكلمالها المسأله تطول

حالتي حاله .. مابي اوصفها
...

اسرح من زود هيامي

راضي لو تلاشت احلامي

دوم اسأل : وتاليتها ؟!

 الروح هذي حالتها؟!

كل ماقالت بس ... اخالفها



Thursday, April 14, 2016

يبقالك اثر



يبقالك أثر 

مرسوم على صفحة القلب

مو مرسوم .. إنحفر

حتى بالنبضات

لك حس يتكلّم

لو أفرح ...لو أتألّم

انت إصرار قلبي

وانت قلبي اذا استسلم

انت يأسي المستمر

وانت الفرح

وانت القهر

ويبقالك أثر 

......

راسخه تفاصيلك بشراييني

لما اضيع وأسأل ويني ؟؟

القاك عناويني

ولما أنكِره من الوجود

القاك امل بعيني

تخيلت انك قصه وبتنتهي

كل شي انتهى وبقيت ..

بيوفي نهر ....

كل يوم تتجدّد فيني تياراته

نهر ...

انت ضفافه ومساراته

نهر 

من شوقي إبتَهَر

ويبقالك اثر

......

الأنّه تعوّدت توالف .. عمري

والضيقه تعلّمت على .. صدري

النسم نسيت اردّه من رحت

روحي ماراح ترد ... ولاإنت 

مالي غير أناجيك

ماحيلتي غير أوعّيك

توعّى ....

شوف حالي

افهم ..

أنّات موّالي

كنت شي حلو بالنسبه لي

بس مالله كتب

بس مالله أَمَرْ

ويبقالك أثر

......







Tuesday, March 22, 2016

الفوضى مصدر الالهام






الفوضى مصدر الالهام


تغرس الامل 


وترسم الاحلام


الفوضى تبين لك


معنى الضعف


ومفهوم الكبرياء


وتكوين الحطام


الفوضى مصدر الالهام


..


بتسمع اصوات تنادي ..بالإصلاح


بتشوف رايات تداري ..الجراح


بيرسمون لك ..الحلم الوردي


افكارهم من سنة جد جدّي


خذ بالك من


تجّار الاوهام


...


التاريخ مايرحم .. تحمّل


التاريخ مايجمّل الأجمل


التاريخ يذكر رجال المواقف


واللي مع الشيطان متحالف


اللي مرتوي بالإراده 


وهو ناشف


التاريخ مايجامل


ولايرحم


ويفرّق بين الظالم


والظلاّم



Thursday, March 17, 2016

راحه واذيه




خل بروحك .. ورود نديّه

وانثر بكونك محبّه 

علم مشاعرك تكون وفيه

وصالح حظك وحبّه

 ماتصير مثل ماتبي  الدنيا

لاتخلي الفرح يتغبّى 

لاتمنع نور الامل 

وخذ منه ضيّه

.....

لاتعلم قلبك على الشقى

اهو بروحه بيتعلّم

عيش اللي بقى 

وحاول  تتفهّم

ترى الحياة 

راحه

وأذيّه



.....

العمر ترى لحظات

كل شي بيروح

عيش صح الحياة

وخلها خضرا الروح

وعلمها عالحنيه






Thursday, February 18, 2016

ذرى وحضن



من لواهيب الجفا 

ادوّر ذرى

أدوّر عين علي تحِن

ادوّر حضن

أتعثّر بأشواك الوحده

واحسها بضلوعي المنهدّه


احس بيمده

ودي لو مره وحده

روحي ماتوِن

من لواهيب الجفا

ادوّر ذرى 

ادوّر حضن


....

لا ياجفا بسّك

ماتت كل النبرات

ومابقى الا حسك

مابقى شي مامات

اصوات الفرح انخرست

دوم انّة الولهان مكتومه


 مالها صدى

يروح عمره  بالهدى

وماغير اهاته على باله

تعِن

من لواهيب الجفا

ادوّر ذرى

ادوّر حضن


......

خذني من حضن العذاب

إمسح على قلبٍ جفاك إكسرَه

ليش الحظ وياي ردي وكذّاب

تعبت كثر ماباعني وشرى

ماهقوتي بارتاح

ماأظن

من لواهيب الجفا

ادوّر ذرى

ادوّر حضن


١٨-٢-٢٠١٦
الخميس

Sunday, February 7, 2016

صغار



كنتِ  الإختيار

وضي النهار

كنتِ الحلم اللي

معطيني اعتبار

فرقنا الزمن 

وصرح المحبه انهار
....

كنا نحب رغم الظروف

 وفوق الصعب نطوف

كان حس الشوق جبار

كنتِ الاختيار

وضي النهار
....


صرنا من الفرحه نغار

وجدام الصراحه صرنا صغار

هدمنا بيدياتنا :

احلام جميله

وحملناها الاقدار

كنتِ الاختيار

وضي النهار

.....

فجأه .. 

الجفاف تمكن من مشاعرنا

فجأه ..

 احنا والوفى ماتوالمنا

خيبتِ ظني

هقوتي لي بعيونج دار

كنتِ اسوأ إختيار

...


Tuesday, January 5, 2016

ملاذ ومأساة



اطريك


ويهتز فيني الحنين ..

هزات ..

اطريك 

ويصير الوله حياة

أطريك

ماألقى من يعين..

سوى لحظات  وداع 

 وآهات ..

...

ذكراك رحلة ألم .. جاسيه

تخلي الأيام ...متواسيه

ماأفرّق بين العذاب

والبسمات ..

يصير الوله حياة ..

......

 اتحاشى كل لحظه ..تذكرني

ماالقى غير الذكرى .. تريحني

الاوجاع منك .. تعيّشني

ياإني ميّت بحبّك

ياإنّه احساسي مات

وصار للوله حياة 

....

حتى البكى ..لذّته راحت

من كثر مابكيت....

ماخبرت النفس ارتاحت

إلا اذا علَي..طريت

انت بالنسبه لي ملاذ

ومأساة ..

صار للوله حياة


٥-١-٢٠١٦
الثلاثاء










Monday, January 4, 2016

قصة امتلاك




من عرفتك

وانا قطره متلونه 

بهواك

من عشقتك 

 وانا متمادي

 معاك

 مسلّم لك عمري 

 وكاتب لك بعروق قلبي

قصة امتلاك

....

قصة

 محاورها خيال وحس


وروح انت راحتها

روح انت علمتها

توصل لحالة

ما بين الجنون

والارتباك

قصة امتلاك

....

تعلمت على ايدياتك 

مفهوم الموده

صارت الحنايا 

منك مورده

بساتين الأمل بعيوني

انهت من حياتي

مفاهيم الوحده

وين ماالتفت  ،،، 

القاك

قصة امتلاك

....

تزيد الموانع ويزيد اصراري


ابقى قانع رغم ناري

اصل المحبه منك تعلمتها

سطور المحبه منك حفظتها

 ماادري شلون كانت الدنيا

بليّاك

قصة امتلاك

١-١-٢٠١٦