على الهدب
تلقى تعب
و حرف ماانكتِب
ناطر صفحة عيونك
تهديني دروب بوحي
وتردلي بقايا روحي
وصوتي اللي إنسلب
على الهدب
تلقى تعب
،،،،،،
تصدّق!! كلمتي تعبت تنزف
تصدّق !!ماتعلّمت أعزِف
إلا وأوتار نبراتي مشدوده
صرت أهذي بإنشوده
ماتعرف للأوزان طريج
تصدّق الكلمه تنشّف الرّيج
تصدّق مشكلتي إني
وايد أحَب
وعلى الهدب
تلقى تعب
،،،،،،
والله وبالله مابغيت أتكلم
بغيت بصمت فيك أتحلّم
بس التعب غصبني
والله مو مني
إنت السبب
على الهدب
تلقى تعب
،،،،،،
شي موحش لو تكون شاعر
تحس بداخلك وحش كاسر
يفترس أحاسيسك ويهزمك
ماتلقى أحد يفهمك
تحس بنشوة إنتصار
وكل مافيك إنغَلب
وعلى الهدب
تلقى تعب
،،،،،
ياأيامي إسمعيني
واسمعي صرخات حنيني
ماأبي إجابة أبي رحمه
أبي تقدرين مفاهيم الكلمه
اللي بصدري ماهي حروف
اللي بصدري
قلايد ذهب
وتعب
30-4-2009الخميس
26 comments:
احسنت وصح لساانك
تسلم ايدك
يا عسى عيونك ما تشوف التعب
صح لسانك :)
الله عليك يابراك ابدعت
واله انت اللي قلادة ذهب المدونات
ليش قلايد هالذهب بكتني
وانا اللي متفقه مع نفسي مابي ابجي
:(
اذا بتكتب جذي يا ابو عبدالله
انا اعلن قطع العلاقات الدبلوماسيه
:Pp~
ايه والله عيونا راحت من هاللابتوب جنه واحد صاكنه بوكسات على هالسواد
تحت الهدب
تلقى تعب
كم هو قاسي تعب القلب وسهر العين
وتلقى حرف ماانكتِب
ناطر صفحة عيونك
تهديني دلايل بوحي
وتردلي بقايا روحي
وصوتي اللي إنسلب
دائما ما نترجمهم نحن كأنهم انعكاس لأرواحنا ، صورنا ، آمالنا
،،،،،،
تصدّق!! كلمتي تعبت تنزف
تصدّق !!ماتعلّمت أعزِف
إلا وأوتار نبراتي مشدوده
تصدّق!! صرت أهذي بإنشوده
ماتعرف للأوزان طريج
تصدّق الكلمه تنشّف الرّيج
تصدّق مشكلتي إني
وايد أحَب
كل هذا لأنك تحبهم ولستم معهم ،، تتمناهم ولا تجدهم ،، تحلم بهم ولا تستطيع تحقيق ذلك
المشكلة اننا احببناهم بصدق وتمنيناهم بصدق وحملناهم معنا وهم غير موجودين
،،،،،،
والله وبالله مابغيت أتكلم
بغيت بصمت فيك أتحلّم
بس التعب غصبني
والله مو مني
إنت السبب
ما زلنا نحمل الكثير بهم ولهم وكلما مرت السنين كبروا معنا وازددنا ضعفا بفراقهم
ذلك ما يجبرنا على البوح
،،،،،،
شي موحش لو تكون شاعر
تحس بداخلك وحش كاسر
يفترس أحاسيسك ويهزمك
ماتلقى أحد يفهمك
شيء جميل انك تكون شاعر تترجم هذا الكم من الحالات الانسانية
وهناك الكثير يفهمك براك
تحس بنشوة إنتصار
وكل مافيك إنغَلب
................................
،،،،،
إسمعيني ياأيامي إسمعيني
واسمعي صرخات حنيني
ماأبي إجابة أبي رحمه
أبي تقدرين مفاهيم الكلمه
اللي بصدري ماهي حروف
اللي بصدري
قلايد ذهب
ربي يرحمنا جميعا
انت تحمل قلب من ذهب اخي براك
جميل جداً
تسلم
:)
إنت مو بس قلادة ذهب
إنت سوق الذهب بكبره
وأكيد أكبر
إنت منجم ذهب
تحت الهدب
تلقى تعب
وتلقى حرف ما انكتب
منو اللي يقرا كلام العين
!!!
: ) القلادة جميلة , وتبدو من التراث
والكلمات كذك جميلة , كما اعتدنا
ماتعلّمت أعزِف
إلا وأوتار نبراتي مشدوده
---
مابقى شي ينقال
توصف الحال والاحوال
في صميم المشاعر
يبحر كلامك
،
،
كم انت عجيب
:)
ترى تعليقي على الموضوع بالمدونه الاخرى :)
مشاء الله
أحب زهيرياتك
يستاسع صدري لي قريتهم
معنى هاذي شوي حزينه
والله لا اييب لك التعب
تسلم إييدك أخوي
وصح لسانك ;)
على فكره أدخل مدونتك عشان زهيرياتك واللحن
لا تشيله ما عليك امر
عاجبني ;)
بانوراما
صج بدنك
والله يسلمك ياصاحب التعليق الاول
كبرياء انثى
صح بدنك
ولاعيونج
مشكوره
حنطفيس
الله على مرورك وكلامك
صدقني
مو انا اللي مبدع
اللي فيني بدع فيني
شكرا لك
esTeKaNa
قطع العلاقات الدبلوماسيه
تحتاج الى اسباب مقنعه
واتفاق من الطرفين على هذا القطع
انا عن نفسي مااقدر
انتي كيفج
ميمة السبيت
سلامة عيونج من السواد
ومن البوكسات
الله يحفظج
أتيت متاخرة
تصدقين
لو باشرح ماقلته مااوفيه حقه
مثلج
الله يحفظج
سيدتي الغاليه
بنت سيف
الاجمل سيدتي وجودج
الله يسلمج
sologa-bologa
هالحجي حقي
يه يه يه
كلامك كبير علي
ارد واقول افضالك مغرقتنا يااستاذ
مانوصل مواصيل معدنك الطيب
إيلاف
اشكرج سيدتي
هذا من ذوقج
تشرفت بوجودج الراقي
تراب الكويت
ياوخيتي
مهما كتبت
مهما عبرت
مااوصل مواصيل احساسج
مو يمكن بوستج الاخير
له تأثير
؟؟؟؟؟
بـركـــــان
وعم انا بعد
وترى ضفت على البوست هناك صوتي
اشكرك
U-Turn
حلو يستاسع صدري
فيها من ريحة قبل
شرف لي وجودج سيدتي
اشكرج
Barrak
ماأجمل قوافيك رائعة ما اجمـل مانثره قلمك
وحروفك رقيقة كالفراشات وكلماتك كعبق واريج و كالزهر ذو أشكال وألوان
براقة
وها اناصنعتُ أكليل وعقداً من الزئـبـق الابيض لإهديه لكـ ع ها لمشاركة
الراقية
وسلمت يداكَ ويسلم قلمك الجميل ياصــاحب الذوق الرفيع
ودي وتحياتي وتقديري لكـ
فيضٌ تقديِر وإجلالَ لشخصــك الكــريـم...
للوش
سيدتي العذبه
اكليل من الزئبق الابيض
الله عليك
الله
لااملك الا ان اهديك صادق مودتي واحترامي
للمره الالف كلامك كبير علي
شكرا
Post a Comment