Saturday, September 29, 2007

مابتعلّمش



أبي أفهم ياقلبي

أبي أفهم

متى بتتعلّم

أبي أفهم

تسامحهم لو ظلموك

تراعيهم لو صدموك

تخلقلهم أفراح

وإنت لوحدك تتألم

أبي أفهم

...

عطني أمل تقسى مرّه

عطني أمل تنسى مرّه

أنك طيب

أبي الطيبه عليك

تحرم

أبي أفهم

....

 طيبتك تعلمهم يخدعون

ياقلبي ماظلّوا الناس يوفون

كل شي تغيّر بهالدنيا

عشاني إقسى شويّه

خل الطيبه

عليك تترحّم

أبي أفهم

Thursday, September 27, 2007

يوميّات صائم

في مساء الاربعاء الموفق 26/09/2007 المت بابني عبدالله وعكه صحيه بسبب نزلة برد حاده اخذته الى المستشفى الاميري لكي يتنعّم بالعلاج المجاني ،وبعد فحص دقيق من الدكتور اخبرني انه يحتاج الى وضعه تحت الملاحظه لمدة 6ساعات، يالهوي اللحين الساعه 1 مساء ومعناته اني بتسحّر وراح أمسك بالمستشفى ،المهم أمري لله ،فجأة مرّت علي عاملة النظافه واعتقد اسمها حسينه لاني كنت الوحيد الموجود في المستشفى لهذه المده في غرفة الطوارئ ودار بيني وبينها هذا الحوار على قولة اخواننا السوريين كانت تبي تسوي طق حنك عشان يضيع الوقت
حسينه : بابا هذا منو انت اخو ؟
براك : لا هذا انا ولد باششاه
حسينه :وين ما ما مال هوه
براك : ماما في البيت مع تاني باششّا
حسينه :وليش ماما مايجي يقعد عند هوه ولد
براك :مايخالف اهي يقعد مع تاني باششّاه
حسينه : بس هذا كلام موجين لازم ماما يقعد وياه
براك : مايخالف ياحسينه انا شويه وهي شويه
حسينه : لامايصير ماما موجين هزا حرام
براك : انتي شكو هي يقعد والا لا روحي شوفي شغل مال انتي
حسينه : انا يقول حق انتي عشان انتي لازم فيه فهم
براك : انتي روحي شوفي شغل مال انتي وخليني انا مابي فهم
حسينه : بس بابا
براك : مقاطعا انتي يشوف هذا عقال فوق راس مال انا هذا راح يسوي نفس بيجر هزاز على ظهر مال انتي
حسينه : والله مشكله انت بابا
بعد ما هوّتنا حسينه مرت علي عدة اتصالات ولحظات تفكير ترجمتها بطريقتي كالتالي
أولا
جائني اتصال من واحد من الربع جالس بإحدى الدول الاوربيه قالي : وينك قلتله : انا بالمستشفى مع ولدي ضحك وقال : يعني ابو صالح عاش بوصالح انا بس داق احرّك واقولك اني قاعد بالبلكونه والهوا يهفهف علي بس بحرّك فكتبت
ناس قاعدين بوسط بلكونه
وناس مرابطين بالأميري
ناس يغنّون عاداله العونه
وناس يغنّون علم سيري
ثانيا
اتصال آخر من عمي عرض علي مساعدته في ادارة مصنع بلاستيك فكتبت
ياعمّي ماعندي خبرة بالبلاستك
أنا يالله ولبي أشوف أشغالي
شوف بغيري ياعمّي حاجتك
صدّقني البوق بيصير حلاّلي
أنت مشكلتك ماكمّلت دراستك
طيب ياعمّي قولي وأنا مالي
ثالثا
من كثر التعب والزهقه من القعده والجو العام كان كئيب اشتهيت ألعب لبّيده أي بالمصري استغمايه وبالانجليزي نو واتشينج يو فكتبت
مشتهي ألعب لبّيده
أو عمبر أوصيده مصيده
وأعد من الواحد لي العشره
وأصيدهم وأموتهم حسره
حمّود وصلّوح ووضحه وتفيده
مشتهي ألعب لبّيده
ودّي ألبد ومايصيدوني
يقعدون سنين يدوروني
ويسوون إعلان بالجريده
مشتهي ألعب لبّيده
ماعشت طفولتي
ابي أنفلع وأنكوي بأوتي
وأصيد قطوه بميده
مشتهي ألعب لبيده
اخيرا
بعثولي مسج قبل الامساك بدقيقه
بعد حملة الترشيد تم تغيير شعار حملات ترشيد الاستهلاك برمضان
من الحل بالترشيد
إلى الحل بالتشريب
والسلام عليكم ورحمة الله وبركاته

Monday, September 24, 2007

ديانه



ابن آدم ضعيف أقوى مافيه لسانه

لاالنسب ولا الحسب ولا الفلوس تكبره

هالدنيا كل حساباتها ترى خسرانه

والفهيم من خذى من دنياه العبره

ليش مالواحد يخلّي إيمانه بوجدانه

لوسامح وعفا شاللّي بيخسره

لو درى ابن آدم اشضعفه بزمانه

كان انتهى موضوع الندم والحسره

الدنيا أبد مافيها خير سمعوني آنا

القلب اللي يبرّك بالطيب برّه

أبد ماهي مواعظ أو زود ديانه

القلوب بالكذب صارت متخدره

لو كل شخص يثمّن كلام لسانه

كان الخير مثل النفط نصدره برّه

4/12/2004
السبت

Saturday, September 22, 2007

بشروني


ها .. بشروني
شلون الديرة من دوني
ها .. بشروني
كل مشاكلنا حلوها
عشى امالنا حققوها
خلاص مافي زحمه
صارت الوجوه سمحه
بكحّل بالسنع عيوني
ها .. بشروني
أنا مخضوض خوش خضّه
الطيار ماعرف جوّه من أرضه
تصروعت بين روما واليونان
اللي يركب الكويتيّه ترى يان
وصلت بالسلامه
بخروني
ها .. بشروني
عسى المسلسلات كانت هادفه
وعقول الممثلات ماكانت خافّه
صار فيه منطق بالحوار ؟؟
وصرح المصاخه إنهار ؟؟
تكفون طمنوني
ها .. بشروني
ولهتوا علي وإلا عادي
والا بس اللي وله أولادي
وجني وشريف ومارسيل
تكفون ابي منكم دليل
أمانه نسيتوني
ها .. بشروني
22/09/2007
السبت

Tuesday, September 18, 2007

غيمتين ونجمه






بين غيمتين ونجمه

ونهار ناسيه همه


أبرسم احساس


او يرسمني


ابي ألم الناس


وتلمني


كذا لمّه


بين غيمتين ونجمه


...


ماهو ضروري اكون رسام


انا كل كلي الهام


القلم يصير ريشه


والورق ينثرلي الوان


و حولي نور وظلام


ماهو ضروري اكون رسام


لاجل اصور بسمه


بين غيمتين ونجمه


.....

هوى يسري باعماق صدري


ارد النسم واشهق بعمري


من جمال هاللحظه اذوب


تخضر حولي دروب


كل مااختار درب


تنولد لحظة حب


شاللي صاير ماادري


كل مااعرفه بكمّل هالرسمه


بين غيمتين ونجمه


....


اسمع حس امطار تنادي


كل قطره تعطر فؤادي


ناس من المطر تحتمي


وانا بالمطر ارتمي


للاسف ماقدروا هالنعمه


بين غيمتين ونجمه


17-9-2007
Trouville

Wednesday, September 12, 2007

إلحقيني يمّه

من دون مقدمات سأغادر إلى مدينة الاحاسيس ليش بهالوقت ماادري ليش برمضان هم ماأدري اهي فرصه وصارت محتاج شوية تغيير وولهت على باريس مدينة الاحاسيس ، وللأسف الظروف اجبرتني اني اطير على متن الخطوط الجويه الكويتية مسافر انا مسافر بجناح الفرح طاير ، وطبعا انا كلش ماأخاف من الطياره ولا أتراجف أبد ومن يوم مانويت السفر حصلت امور مضبوطه كانت في صالحي
أولا : استقالة مجلس ادارة الخطوط الجوية الكويتية
ثانيا : ثلاث طيارات يحصل بها خلل فني وتهبط اضطراريا
ثالثا : واحد من الربع طيار يقول ان طائرات الخطوط الجويه الكويتيه انتهت مدتها الافتراضيه
رابعا : يالهوتي ياخرابي الحقيني يمّه
اخيرا : انا بروح وبوصي المنتجين والمنتجات يخافون الله بهالشهر الفضيل مانبي مسخره وطراقات ومسلسلات مافيها الا مواتر وموبايلات ومخافر ودراريع ، نبي فكر ورقي بالحوار
وترى مدرس العربي يسلّم عليكم
مانبي طراقات
يامنتجين يامنتجات
مانبي براطم متفوخه
الواحد تعب يافوخه
مانبي تفاهات
مانبي طراقات
نبي يمر هالشهر الفضيل
من غير مصاخه ودم ثقيل
نبي شوية سنع
مانبي هلاقه ودلع
ومصاخة ممثلات
مانبي طراقات
أنا رايح ماأوصيكم ياممثلين
ابيكم شوي تصيرون سنعيين
تحترمون هالشهر
لاتقطون السنع بحر
الرحمه ياأصحاب الفضائيات
مانبي طراقات
أنا من باريس بتابعكم
مابي اقول سليمه تصكّم
ابي اقول والنعم فيكم
الرحمه واللّي يعافيكم
مع السلامه ياصبيّان ويابنات
مانبي طراقات
12/09/2007
الأربعاء

Monday, September 10, 2007

بلاليط

هالمره راح يكون شكل الكتابة غير مادري ليش ، المهم امس رحت لصديق ضليع بامور الهاكرز وهو مصري الجنسيه جلست عنده وقلتله سرقوني ياهاني قال لي مالك يابراك يابني مين اللي سرقك قلتله القصه بالتفصيل المهم اخذ الجهاز وفحصه وبعد نصف ساعه سمعت صوته من الغرفة المجاوره يقول لي : يخرب بيتك ايه ده قلتله : شنو قالي 275 واحد باعثلك مادري شنو سماها بالانجليزي والخلاصه انه فيه امر من اكثر من هاكرز بعثولي سم للكمبيوتر او فايروس من مميزاته انه اي باسوورد احطه ينبعث ايميل الى الحبايب يعني اهم حاطين ريل على ريل وتوصلهم الايميلات واحد تلو الاخر
وانا قاعد اقول باقوا ايميلي وبلوجي زين ماباقوا فنايلي اللي بالكبت
كل هالكلام اقوله لاخواني اهل البوجرز ديروا بالكم موتستانسون لما تشوفون التعليقات عندكم بالهبل ترى فيه ناس قاعدين لكم قعده
اللهم اني بلغت
ثانيا
واحد من الربع توه راد من السفر من لندن مع واحد ثاني مسمينه الملقوف الريال مايعرف ولاكلمة انجليزيه المهم راحوا ماكدونالدز جان يقول الاول العاجل حق الملقوف لاتتكلم خلني اطلب لانك بتفشلنا قاله الملقوف لا لازم اني اتعلم واللغه يبيلها جرأة المهم قام الحبيب بصوت عالي قال
one cheese burger without cheese
التفسير الحبيب الملقوف يبي همبورجر من دون جبن
راعي المطعم قاعد يطالعه ولا تكلم ولاكلمه صاحبنا راح اقرب مكتب حجز تذكرتين ورد بالسلامه
ثالثا
واحد من الربع ثاني يسولف سالفه عن صاحبه اللي مايدرون شلون تخرج من الجامعه وصار مدرس عربي طبعا اكتشفت ان الموضوع اللي بقوله صار نكته وبدا ينتشر عن طريق المسجات
يقولك صاحبنا المدرس يملي على الطلبه
ذهب سعيد إلى السوق يوم الثلاثاء
سأله الطالب : استاذ همزة الثلاثاء على الألف او عالسطر ؟
قال المدرس : خلوها الخميس
رابعا
مبارك عليكم الشهر
الأثنين
10/09/2007

Saturday, September 8, 2007

فيج عذوبه



فيج عذوبه

تطمّن عين ولهانه

تهنّي قليب بزمانه

فيج عذوبه

تخليني غير أنا

احوف خطواتنا بأمان

امشي بطريقج هيمان

واتشاوف دروبه

فيج عذوبه


......


فيج سحر ماشافته عين

فيج كل الزين

تنثرينه للناس عبره

ومنج يتعلمونه

اللي يحبج

كان الله بعونه

احس حقوق الجمال منج

مسلوبه

فيج عذوبه

2/08/2007
الثلاثاء

Wednesday, September 5, 2007

أزمة أخلاق



أزمة أخلاق

الصدر منها ضاق

نتمنى السّنع أمنيه

صارت كل هالدنيا

بلا طعم

بلا مذاق

ازمة أخلاق

لاولد يحترم أبوه

لا أبو يحترم عياله

الحنان للأسف ظلموه

صارت حالتنا حاله

كذب 

ونفاق

أزمة أخلاق

هذا يضحك عالمدرس

هذا يغازل وهو مفلّس

ذاك يرمي ورقة بالشارع

وهذا يظلم ماعنده مانع

وذاك يصفط بموقف

معاق

أزمة أخلاق

Tuesday, September 4, 2007

المنتخب


إلا ابسأل شاخبار المنتخب ؟
للحينه بطل الخليج والعرب ؟
شاخبار المنتخب
خلاص راحت أيام جاسم يعقوب
خلاص ماراح تفرح القلوب
ولاراح تعلمونا شالسبب
إلا بسأل شخبار المنتخب ؟
اتحاد الكره صار بالتوريث
لازم اللي يرأسه غثيث
واذا ماخليتوه يخرّب
يختار حتى المدرّب
حتى بالكره حقنا انسلب
إلا بسأل شاخبار المنتخب؟
صج!! عندنا محترفين بالبرازيل
صج !!منتخب ألمانيا علينا يعيل
صج!! اسعار لاعبيننا بالملايين
صج!! خذنا كاس العالم مرتين
صج !!على ارضنا رونالدينهو انغلب ؟
الا بسأل شاخبار المنتخب؟
الرياضه أصبحت فن وإدارة
الانديه صارت منبع للتجارة
ليش متخلفين سنين لورى
ليش فضايحنا أشكره
انا اسميها قلة أدب
إلا بسأل شخبار المنتخب

Monday, September 3, 2007

أصول



 شتبي زود  ...

 قول

عطني حلول

خذت روحي

خذت عمري

خذت شبابي

وكلمالها قصّتك... تطول

مو شتبي زود... 

قول

......

ياأخي حنّن ... علي قلبك

شلون بتفهم ... إني أحبّك

شاسوّي عشان تصدّق

شلون تبيني أعشق

باتعلّم منك الأصول

مو شتبي زود ... قول

.....

مو خل لي عيوني ... أشوفك فيها

ليتك تحبها... كثر ماتشقيها

حرام عليك الرّحمه

هالعين دوم متألمه

مشتقيه وياك على طول

مو شتبي زود ... قول

21/12/2006
الخميس

Saturday, September 1, 2007

محّد




غرّد

صوتك بمسامعي غرّد

والكون حولي

إخضر ووّرّد

غرّد

وتلوّنت الدنيا بلونك

ماشفت فيها غير البياض

نسيت اللون الأسود

غرّد

كل ماتخلص كلامك عيده

بكل حرف تنكتب قصيده

موزونه بحلاة حسّك


مااشوف الا انت

وغيرك محّد

غرّد

من أحس بهمسه أهيم

حلو صوتك والله العظيم

صداه يترنم باليوف

ترى مايحتاي أشوف

 صوتك

يناجي الود ويتودد

غرّد