Monday, March 30, 2009

إرتوي يادار



شكثر فرحت الأرض بالأمطار

شكثر الناس إستهلّت وتبسّمت


أمطرت وارتووا صغار وكبار

كل نفس بهالأرض إرتوت

إروينا ياسمى فجّري فينا أنهار

شكثر أرض الكويت إعطشتْ

ربنا راد ومراد الكريم صار

وبيجازي كل نفس إصبرت

صبرنا وايد  إرتوي يادار

لك الدنيا أسفرت وأنورت

صار بأرض الكويت أمطار

قطره تسعد تداوي وقطره روَتْ

Saturday, March 28, 2009

عجّافه




مثل ماتحط ضناك تحت لحافه

غيرك ياخذ ضناه ويدِفنــه

ناس أحوالها آخر كسافه

وناس تقول :عشنا وشفنا

 أمم من الجوع خوّافه

و كل واحد ماكل تِبنه

وأمم كثروا فيها العجّافه

ياكثر مالعوزونا وتلجَّمنا

الكل يحمده وهو يجر لحافه

يارب بالأمن والأمان متّعنا

26/02/2009
الخميس

Tuesday, March 24, 2009

وله يتنثـــَـــــر





 قمت أحبّك أكثر

وصار الوله يتنثر


صارت غاية أمنياتي

أشوفك ثواني

صارت معالم حياتي

أوله وأعاني

وبدروبي أتعثر

واحبك اكثر

،،،،،،،

توِن بيوفي أَََنـّه مختفيَه

بألامي ماقصّرت موفيَه

اللي كان كان

كانت هالجمله مكفيَه

وعلمتني شلون

أتصبّر

واحبك اكثر

،،،،،،،،،،

 لأني وايد ولَهْت

لإني وايد تِهْت

مالقيت ذرى لأوهامي

ومالقيت أحد جدّامي

غيرك

تصوّر؟؟



13/07/2005
الأربعاء

Saturday, March 21, 2009

أبو الكنابل


هذه صورة للحاف أزرق اللون ووساده ليست خاليه بل محتضنه توم وجيري داخل مقاعد السياره وكل هذا بسبب إبني محمد الملقب بخشيم الفارعندما رفض الذهاب للمدرسه إلا مع هذا الغطاء وتلك الوساده الحمراء
نظرت إلى حالة سيارتي العزيزه وأنهملت من مقلتاي الدموع بسبب دكتاتورية الابناء تجاه الآباء في هذا الزمان الصعب


آخر عمري أنا إقلبوا سيارتي دار
دار راعي أوتي ومترِّسَه كنابل
حرام عليكم جذيه بسيارتي صار
باجي بس تنتِرِس كواسكو وبلابل
ليش ياوليدي ليش ياخشيم الفار؟
تخلي الأبو يشوقل وينوقل ويعابل
باجي تحط ناي ومياديير وطار
مابقى إلا تحط فيها بعد قنابل
عشان أودّيكم المدرسه أعيش بنار
نار حاميه ملزوم أوقفلها وأجابل
أشوف السياره وأنا حيل محتار
هذي سيارتي وإلا حدائق بابل؟؟
إنقط كل شي فيها عفيه عالشطّار
باقي تحطون على عقالي سنابل
آخر عمري سيارتي إنقلبت دار
حرام عليكم سموني براك أبو الكنابل

5/3/2009
الخميس

معفوسه : قلبت رأسا على عقب
راعي أوتي : الذي يكوي الملابس
مترَسه : بتشديد الراء وفتح السين أي ممتلئه
كنابل : ومفردها كمبل أو كنبل أي اللحاف
كواسكو : والمفرد كاسكو وهو طير الأمازون الناطق
ينوقل ويشوقل : يشيل ويجلب ويأخذ (( ينوقل )) مفردها (نقل ) من نقل و((يشوقل )) من شوقل أي (شقل ) هذي من عندي لاتصدقون
المياديير: والمفرد ميدار وهي الحلقه التي تكون بأسفل خيط صيد الأسماك ويكون معه البلد أي الثقل ويقولون لمن يخيط الميدار بالثقل (البلد) يردع
أجابل : أقابل
إنقط : بتسكين النون والطاء أي رمي مثال حمادوه قطّوه بالسكه اي حمد أو أحمد رموه خارج المنزل

Tuesday, March 17, 2009

خنتريش






خنتريش

منتريش

عنتريش

شوفوا لنا حل

شتامرون فيه

منقار نعامه؟

وإلا شفايف ضب؟

وإلا عيون خفافيش؟

خنتريش

منتريش

عنتريش

,,,,,,,,


من سنين والحظ رِدِي

والتخمبق ورانا طْرِدي

بقلوبنا حرّات

مِتشتتّه الجهات

صفينا على ماميش

خنتريش

منتريش

حنتريش

,,,,,,,,


فيه ناس عندنا فيها زيران

عن الصح صاروا عِميان

كل شي ينشاف بالمقلوب

من ساسهم لي راسهم عيوب

وتيش بريش

خنتريش

منتريش

حنتريش

,,,,,,,

يابلّورتي تشوفين الشعب

غير تراب هالوطن ماحَبْ

ساكتين يطالعون مذهولين

مابقى شي ويصيرون ميانين

مقزرينها يريش

خنتريش

منتريش

حنتريش

,,,,,,,

شيبي الواحد غير السّنع

الفرح عن شوفتنا إمتنع

وخَّر وقال خلّوني

إنتو اللي ماتبوني

ودي بيناتكم أعيش

خنتريش

منتريش

اذا إنخظ البيبسي

يطيش

18/03/09

الأربعاء

Sunday, March 15, 2009

طرّة نور




محتاج حضور

....يروي قليبي

محتاج شعور

.....محتاج اكثر حبيبي


أبيك .. تداريني


أبيك .. تحس فيني


حرام أموت فيك


وخاطري مكسور


محتاج حضور


..........

أبي  ألقاك يمّي

أبي تذوب ...بدمّـــي

وتسكِن تفاصيل حلمي

ماأنام مقهور

محتاج حضور

...........

مطلبي مو صعب عليك

دارني مثل...ماأداريـك

خلها دايم محاريك

تهل مثل طرّة النور

محتاج حضور

12/02/2009
الخميس

طرة النور : حينما يظهر نور الصباح

Thursday, March 12, 2009

عرش الكرامه




مؤقت

كل شي مؤقت

يبونّا ننسى وإنتزقرت

يبونا طرشان بالزفه

يبون عقولنا مستخِفه

يبون قلوبنا إتّفتفت

مؤقت

،،،،،

 يصير خير بالهون

ما لقينا لأحلامنا عون

مايخالف .. كل شي سهاله

فيه ناس ..علينا عاله

عايشه عشان إنتّشَتت

مؤقت

،،،،،

جسور وعمارات ومدينة حرير

إيه هيّن حلم واحد يصير

تعودنا على التأجيلات

ماتهتِني بكلمة ((بعدين ))حياة

نار بضلوعي شبّت

مؤقت

،،،،،،

ناطرين باكر متى نشوفه

وياهم دشينا بطوفه

حكومه ونواب وحسّاد

متى تتعمر البلاد

وعلى عرش العز

إنتسمَت

مؤقت

13/3/2009
الجمعه

Sunday, March 8, 2009

حتى صوتي 2

عقدت العزم على الدخول لمعترك الكلمه المسموعه بعد قرائتي لتعليقاتكم الراقيه وللاستماع لبعض من قصائدي المسموعه
يرجى التوجه الى القسم الثاني من المدونه

Wednesday, March 4, 2009