Sunday, December 19, 2010

كلاكيت للمره الثانيه


اللحين أنا شايب !!؟؟
وإلا توني شباب
لاتعيبون
ترى العياب عند الباب
توني صغير
وإلا مشدّق ؟؟
أبي الكل يقول
وينطق
ياجماعة الخير
كافي عذاب
أنا شايب
وإلا توني شباب
.......

أدري براسي جم شعره بيضا
بس عندي إبتسامه عريضه
وأعرف إن الحياة صوره
إنت ترسمها
بأحلامك
بكلامك
بكبريائك
وتبقى إنسان صادق
في زمن كذّاب
اللحين أنا شايب!!؟؟
وإلا شباب
......

باقي ١٠ سنين ويقولولي: يدّي
باقي ١٠ سنين ويتجمّعون الأحفاد عندي
براكوه وهياوين
وقماشه ونسرين
وذياب
اللحين انا شايب!!؟؟
وإلا شباب
.....

تطير الدنيا فيني وأنا واعي
أدري فيه أمور مالها داعي
وأمور ابيها بس بعيده
ماغير ربّي يرحم عبيده
الحمد لله خاطري
من كل شي طاب
لللحين انا شايب!!؟؟
وإلا لسّه شباب؟؟

١٧-١٢-٢٠١٠
الجمعه

Saturday, December 18, 2010

٣٦





طارت السنين
ومن اللحين
صرت ٣٦
ومن اللحين
بدت تنكِتب عناوين
تختصر رحلتي
مع هالدنيا
وأعاتب نفسي على ماراح
وأطمّن قلبي بوعود
وأطوي كل أيّامي
وأبتسم
يمكن ألقى أحلامي
جود
وهذا إحنا عايشين
وطارت السنين
......

أكبر .. ويكبَر الحلم فيني
وضميري راضي .. ومراضيني
نفس كل سنه. أتبَسّم
ومن يديد أتنسّم
هوى الأماني الخنينه
أدري الأفراح مالها بينَه
بس أنا وقلبي
على الخير
ناوين
طارت سنين
وصرت ٣٦
١٧-١٢-٢٠١٠
الجمعه

Wednesday, December 8, 2010

ياوليدي يسلمك



حوار بيني وبين احد ابنائي أثناء مشاهدتي لاحداث التهجم على محمد الجويهل



ياوليدي لايهمّك

لو سمعت كلام يجرح

ياوليدي لايهمّك

تعلّم إنك تفرح

وترسم أحلامك بإيدينك

ياوليدي يسلمك
.......

لو شفت ناس تحبطك
خل تبتسم امانيك
لاتخلي ناس تافهه
من الاحلام تحرمك
ياوليدي يسلمك
.........

الزمن كفيل باللي يلعبون
لاني ابوك وعليك أمون
أبيك تعشق ديرتك
تعلم تحبها كل يوم
وقدّر أجدادك .. وسواياهم
وتابع مسيرة خطاهم
وخل حب الكويت بدمّك
ياوليدي يسلمك

........

الديره ياوليدي فيها رياييل
الديره مثل الشيره الواقفه
اللي يستظل فيها الضعيف
والجاهل والفاهم والكفيف
ضم الكويت بحب
مثل ماتضمّك
ياوليدي يسلمك

........

فيه ناس يبونها تنرز
بالغصب او بالدّز
لايهمونك ولا تسمع كلامهم
مثل ما الفوضى غاية احلامهم
خل السنع حلمك
ياوليدي لايهمك

٨-١٢-٢٠١٠
الاربعاء

Friday, November 26, 2010

غير نُمونه







تَبرق عيونه

وتمطر السما

لين شفته

تصير الدنيا مزيونه

لو لمحته

وتتلوَّن اللحظات

بطيوف أشواقي

غير حسنه ...ماأشوف

وغير نوره ... ماألاقي

كل شي يصير

غير نمونه

وتبرق عيونه


....


هالعين....نورها كاسيني

هالعين ...بنظره تحتويني

هالعين لو برقت

أحس إن العذوبه رُبَت

بين جفونه

وتبرق عيونه


....


تضوي النيوم .. لو غَــمّض

أحس السما....تتــلَمَّض

غدير سحره العذب

جماله مو صج .. جذب

تتعبون لو توصفونه

وتبرق عيونه

٢٦-١١-٢٠١٠
الجمعه

Friday, November 19, 2010

صوت إحتبس





الصوت لو أصرخ ... إحتبَس

والجرح بالصّواب .. إنغرس

وقلبي من الوله.......... يِبَس


وتاهت خطوتي بدربي

وصار الحزن من صُلبي

والحال إنتكَس

.......

ماتنسِمع الآه ... لو أقولها

والروح زادت حمولها

وتمّيت أرسم الأحزان

وألوّن دنياي بألوان

ماتعرف إلا السواد

وبس

الصوت لو أصرخ ... إحتبَس

والجرح بالصّواب .. إنغرس

وقلبي من الوله.......... يِبَس

........


ألتجي للأوراق .. وأشكي لها

تاخذ من عندي وآخذ من عندها

وأصدّق إني طمّنت روحي

وبحت بكل آلام جروحي

ومابقى فيني.... نِفس

الصوت لو أصرخ ... إحتبَس

والجرح بالصّواب .. إنغرس

وقلبي من الوله.......... يِبَس
....


يقولون دوى المهموم .. الصبر

واسمع كلام الناس وأعتِبر

والعبره عرفتها .. تالي

الصح ... تنهدم آمالي

ومحد فيني حَس

الصوت لو أصرخ ... إحتبَس

والجرح بالصّواب .. إنغرس

وقلبي من الوله.......... يِبَس
....

٢١-٧-٢٠١٠
الاربعاء


Thursday, November 4, 2010

حياة



بكلمتين منك  أنسحر .. عمر

وبحس صوتك... تزين الحياة

قيود الصمت بعيونك تنكِسر 

وتزيد الدنيا أمان ... وحلاة

حسّك يختصر كلمة سِحر

حسّك ينثر بالدنيا ... أمنيات

هذا بس صوتك ...شقول ياقمر

عن عين ورمش ونقاوة ذات

من عرفتك ماعرفت ... أخَسر

شلون وفيك اعذب الصفات

منوّر قلبي .. ومنوّرلي ..العُمُر

انت اجمل شي... بالحياة 


٢٣-٣-٢٠٠٦
الخميس


Sunday, October 24, 2010

كل حقيقة ... خيال



كل حقيقة عند الناس
عندي أنا خيال
يحسّون .. الديره كئيبه
يشوفون .. أمور مريبه
وأنا كل شي آشوفه
طاغي الجمال
كل حقيقة عند الناس
عندي أنا خيال

.....

حقايق التفرقة يشوفونها باينه
وأنا .. أشوف الواقع وأعاينه
ألقاه أبيض من البياض
اللهم ... لااعتراض
إحنا بنعمة
ياعيال الحلال
كل حقيقة عند الناس
عندي أنا خيال

....

ألقى أمل بكل فريج
للحين الحب لنا صديج
نلقاه بعيون الشيّاب
نحسه بعيون الشباب
وبإبتسامات الأطفال
كل حقيقة عند الناس
عندي أنا خيال

......

كل الحقايق ... يوضّحها أمل
أمل يوميه بعيوني .. إستهَل
وبان ... ووراني الكويت جميله
نسمات هواها عليله
ترى الأمل موجود
ومازال
كل حقيقة عند الناس
عندي أنا خيال

....

باجر صدقوني ... أحلى وأروع
هالديره مسرع ماتنسى الألم مَسْرَع
لانها طيبة وناسها طيبين
ربي يحفظها اللهم آمين
ترى الخير .. بقبال
كل حقيقة عند الناس
عندي أنا خيال


Monday, October 4, 2010

تامر عليها



شاسمّيها

أحاسيسنا

ومشاعرنا

 وأشوقنا

وخفقات أفّادنا

وروحي اللي ترويها

شاسميها

.....

تفيض من روحك ... غناوي

تَسْحر ... تبهر ... تداوي

بسكوتك وبنبرة كلامك

بالحنايا تنعزف أنغامك

تصير غنايه بالروح

أشهَقها ... وأغنّيها

شاسمّيها

....

شاسمّي حبّي لك .. شاسمّيه ؟؟

شلون أوصف معانيه؟؟؟

وأصْدِق بكل إحساس ويّاك

الله ياكبر غلاك

ترخصلك عيوني

لو تامر عليها

وشاسمّيها

٦-٥-٢٠١٠
الخميس

Monday, September 27, 2010

قوطي منخفس





من خبر بجريدة تنقلب الدنيا وتنعفس

ومن سالفه بدوانيه  يصير استجواب

اذا هذوله ربعنا طبيعي الحال منتكس

وطبيعي احنا للتخلف مشرعين الباب

اللي يقط بدليه احتمال كبير ينجِبِس

واللي يغني إغنية يسووّنه كباب

الروح من الكدر والضيم قامت تنتِرِس

نسينا الفرحه والبهجه وحتى اليبّاب

مفهوم الانهزاميه يوميّه فينا ينغرِس

شيّبونا غصب وإحنا للحينّا شباب

فيه ناس عقولهم جنها قوطي منخفِس

يسرحون يمرحون من غير أي حساب

احس نور الأمل خافت خايف مندِعِس

بقلب جم واحد يحب بذمّه هالتراب

تراب غالي يبيله ناس شوي تِحِس

تكشف المخادع وتبخص اللئيم والكذّاب

٢٧-٩-٢٠١٠
الثلاثاء

تنعفس : تنقلب رأسا على عقب
منتكس : منقلب
ينجبس : أي ينكبس أي يضرب
تنترس : تمتلئ
اليبّاب : الزغروطه قوللولولولوووش
قوطي : علبه والجمع قواطي 
منخفس : يعني قوطي سفن اب ودايسه عليه سياره
مندعس : مختبئ


تبخص : تعرف ... تفهم 

Saturday, September 11, 2010

ليمن ذكرت فرقاك




ترتعش الروح

والحنايا تخاف

ليمن ذكرت فرقاك

تكتمل بملامح حزني

كل الأوصاف

وأتحرّاك

وكل ماأنتظر جيتك

وكل ماأتفزز لشوفتك

ماألقاك

وترتعش الروح

والحنايا تخاف

ليمن ذكرت فرقاك

........

الصبر وينك ياصبر وينك

ضعت أنا من بعد عينك

ولاقادر أتحمل ضياعي

ولاقادر آداري أوجاعي

ولاقادر أنساك

ترتعش الروح

والحنايا تخاف

ليمن ذكرت فرقاك

......

وتنكسر روحي برياح غيابك

وبجروحي حاسب حسابك

وداري انك سبب مافيني

وداري انك ساكن بعيني

وماخذ القلب معاك

وترتعش الروح

والحنايا تخاف

ليمن ذكرت فرقاك



براك

Friday, August 20, 2010

شيم


ودي أتكلم عن الواقع الأليم
بس باسكت لان هالشهر كريم
أشوف طبخات سياسيّه
أحس بلويه وأذيّه
اخاف اقول
وادش بسين وجيم

.......

صندوق تنميه مافرحت فيه
ماادري ليش وايد أحاتيه
اسمع تصريحات
وفرد عضلات
بين هامور وزبيديّه
وشيم

....

ماودي بهالشهر أتكلّم
بحاول إني أتعلّم
وافرض قانون السكوت
وأطيحله محلبيه وبسكوت
وأستمر بالريجيم

.......

فيني حجي وايد .. وايد
بس رمضان يهوّن الجايد
ويخلّي الأرواح تتصافى
مالي شغل الا بالكنافه
الله يهدي الجذاب
ويعقّل اللئيم

20-8-2010
الجمعة


الشيم :من الاسماك المحببه عند اهل الكويت ، وتعد من اسماك الدرجة الاولى ، وقالوا في الامثال : الشيم أكل الحشيم او ماياكلها الا الحشيم

Sunday, August 15, 2010

التحدّي

من يقبل التحدي
ويراهنّي
على قصص المسلسلات الرمضانية
اللي مواضيعها
من سنة يدّي
من يقبل التحدّي
....
اراهن .. بنشوف بجي ونواح
اراهن ... على الصراخ والصياح
والخيانات الزوجيه والتفاهات
وثقل الدم بكل القطّات
وغير هالحجي ماعندي
من يقبل التحدّي
........

من يتحدّاني على تعابير الممثلين
عاقدين النونه وكلّه معصبين
ترى بيخسر اللي بيراهنّي
ياناس اخذوها منّي
صار الفن
سمك .. لبن .. تمر هندي
من يقبل التحدّي

Sunday, August 8, 2010

أحاسيس حيّه




للحين الأحاسيس حيّه؟؟

للحين فيها خير الدنيا ؟؟

كثيرة أسإلتي

مالقيت حل لمشكلتي

غير اقدم حروفي هديّه

وأترجم اللي بصدري

من هواجيس

وأحلام

وأماني

كل اللي إبيه

أكون موجود

بسطر

بنبض حرف

بصدر صفحة

آنا إنسان عباره عن

كلمه ...... وأمنيّه

للحين الأحاسيس حيّه

......

وايد أسأل نفسي

ليمتى أكتب ؟؟

وأقرر خلاص كافي

بسّي

شالفايده من كلامي

وايد أسأل نفسي

علامي؟؟؟

كل ماأنوي اكتفي

أسمع صوت وفي

يحرّك المشاعر

: يقول

مثل مالجوع كافر

هم الصمت كافر

وايد أسأل نفسي

على أي أساس

سمّوني شاعر

وأنا غايتي

اقول اللي فيني

وأترجم صور بعيني

تسكن فيها يوميّه

للحين الأحاسيس حيّه
......

من فيض احاسيسي المتناثره

حتى الورق كسرت خاطره

يشوفني مرات

بدور البطل

بدور الطفل

بدور الولهان

بدور المواطن الإنسان

من فيض أحاسيسي المتناثره

حتى الورق كسرت خاطره

: قالّي

كمّل ... وقول

يمكن بحروفك تنول

دنيا جديده

رسمتها بخيالك

خذ الحروف حلالك

لاتفكر بإعجاب

او قبول

أو عطيّه

للحين الأحاسيس حيّه

....

شاللي قاعد اقوله

تعديت منطق الجنون وأصوله

غمضت عيني

وظل الحبر ينزف

وخلاني احلف

اني ابقى

صورة مالها برواز

نظرة يتيم معتاز

غمضت عيني

وحلمت بوفا

مالقيت غير حروفي

الوفيّه

للحين الأحاسيس حيّه

٨-٨-٢٠١٠
الأحد