Monday, December 8, 2014

معزوفة حلاتك




ترقص بصفحة القلب ذكرياتك


تنثر بداخل النبض شوق وأماني


انغام عذبه تعزف لحلاتك


حفلة وله  تشعل كياني


يخونني الحرف لو كتبت صفاتك


تخونني الاقلام والورق ولساني


بقليبي انا محدً سوّه سواتك


من اطريك طار من مكانه وخلاني









Monday, December 1, 2014

ياغافلين



غافلين ... غافلين

بغيبوبة الزمن مغيبين

مابين صفقة اليوم

وسهرة البارح

عايشين 

وغافلين ..غافلين 


.......

زحمة الدنيا ... نسّتنا اشياء كثيره

مشكلة الانسان .. النسيان

ولي فات الفوت ... أنّبه ضميره

طابور جدام العين نشوفه

دورنا جاي 

بس متناسين

وغافلين

...



Sunday, November 23, 2014

اعبر بأعماق نفسك






بسافر  ..بأعماق نفسي 

وأزور محطات بحياتي

وأهذّب غصون ذكرياتي

رحله متعبه ... أحتاجها

تلاقي النفس ..علاجها

الكل يحتاج يسافر بأعماقه

الكل روحه لروحه مشتاقه



بسافر بسافر


...


بأروي ضما احلام مرسومه

وأنثر صرخاتي المكتومه

واترك الحنايا مع الافكار تتحاسب

اخلّي القلب مع اللي راح يتعاتب

بامحي الحيا بامحي الخجل

باحرق نفسي  واشعل امل


مااكابر 

بسافر بسافر
....


اطول سفر هو سفر الاعماق

تخيل انك شجر وروحك ساق

إجبر اللي انكسر وأروي الاوراق

عشان تحيا من جديد براحه

لاتهاب ماضيك وواجهه

تعلم من كل لحظه تافهه

لاتكابر

وسافر

....





Tuesday, November 18, 2014

زهيري




عودَه قصة فراقك عوده

كسرت غصن الحنان وعُودَه

ليت طاري الغياب ماتعُودَه

شوفتك تروي الفّاد وتصونه

حافظ هواك بعمري وأصونه

ذاتك بقلبي ياقلبي مصُونه

بعدك ماعرفت الا اتدوده





Monday, November 17, 2014

ثقافة الوزار




منو عالغدا يلبس وزار

وفي بيته رواشن  وجندل

منو يعرف الجليب و اليُمّار

وفرق هب ريح عن التمبل

متى يبقى لتراثنا  آثار

متى درب الاصاله يندل

متى مثل مسلسل الاقدار

نسمع ذي وأهوه وتعنتل

كل شي تغير شصار؟؟

حتى الحجي علينا تبدل

متى ترد ثقافة الوزار

متى احوال السنع تتعدّل




زهيرية تحر



رسمت لي الاحزان سما وبحر

ومشيتني بيناتهم حزين وحُر

كل اللي شفته منك يِحُر

غديت ولهان وبقليبي حَرّه

عن اخبارك اسأل وأتحرّى

والخفوق به الف حره وحره

وكل حره بصدري تِحُر

تحت الهدب




تحت الهدب

تلقى تعب

وحرف ماإنكتب

ناطر عيونك

ترد بقايا روحي


وصوتي اللي ...إنسلب

وتحت الهدب 

تلقى تعب

.......

تصدّق !!! تعبت أنزف

تصدّق !!! ماتعلّمت أعزف

الا واوتار القلب مشدوده

تصدّق ودي اصرخ

بس الالم نشّف الريج

تصدّق مشكلتي ..

اني وايد .. أحِب

وتحت الهدب

تلقى تعب

....


مابغيت أتكلّم

بس التعب غصبني

مابغيت أتألّم

بس مو منّي

كل شي بحياتي

احس بعذابي له سبب

وتحت الهدب 

تلقى تعب


...


شي يخوف لو كنت شاعر

وبداخلك وحش كاسر

ينهش احساسك ويهزمك

ماتلقى احد يفهمك

تحس بنشوة انتصار

وكل مافيك إنغلَب

وتحت الهدب 

تلقى تعب


..

الله أدرى




الله أدرى

 الروح مني تتبرّا

والموت يدني

ويزيد حزني

وكل شي قمت اخسره

الله ادري 

الله ادرى

.....

أشرب هم وأعطش ألم

واروي همّي بجرّة قلم

والعمر يبي زود

ماللشقى حدود

ابد بالمره

والله أدرى 

الله إدرى


.....

وقف الوقت على غيابك

وعلى لحظات الموادع

هذا الوقت جاسي

عمره مارحم ضايع

ولادارى عَبْرَه

والله أدرى

الله أدرى



لاماأظن




إنت تِحِن!!!

وروحك تِإن!!!

انت عمرك

ماشلت ذرّة وفى

الود أبد ماتعرفه

لاماتعرفه

لاماأظن

إنت تحن!!!

.....







زهيري





دمعٍ غرق الوجنات ينادي...مِشَّه

وارحم مهمومٍ دمعته...... برمشه

نخيتك هالالم من يوفي... مَشّه

ابعده ترى منه البدن ......إنسَم

ياللي قبل لاتطلب قلت ....سم

من رحت ماقدرت حتى. اتنسّم

كأنه الموت على روحي ..يتمشّى






Sunday, November 9, 2014

مابقى كلام






بحالتنا مابقى لنا كلام

خلص الحكي 

وكل مانبي قلناه


ماعرفت معاك الا حب وأحلام

ماعرفت إلا أقول  الله الله

Thursday, November 6, 2014

اركب حصان خيالك




خذ بالك ...

لاتنحرم من نعمة خيالك

خذ بالك ....

اترك الكون والناس


اجعل الاحلام .. والنجوم

حلالك

لاتحرم نفسك من خيالك

.....

استمتع بهالنعمه

الحياة ماهي بس مسؤوليات

الحياة ماهي بس مفاجآت

ارسم عالمك بروحك...

لوّن زوايا روحك...

روح ...لكل مكان ماتقدر له

روح.. احجز للمستحيل رحله

لاتهاب ....


استمتع بهالنعمه

وحط البسمه ... في بالك

لاتحرم نفسك من خيالك

.....

لاتنسجن بزنزانة الواقع

انسى معنى الحدود

انسى مفهوم القيود

اكتب على جدار الخيال كلماتك

إلجم صرخاتك

واركب حصان آمالك

لاتحرم نفسك من خيالك


Monday, November 3, 2014

ماتدرين






تدرين ...



اني عايش بأرض جامده



نسماتها ماهي عليله

تدرين ..


ان السما علينا بخيله



والورود حوالينا جليله..



ومع هذا ...



ابقى اتغنّى فيك



بالنوير .. 



بالسدره الحنينه


واخلق من بساتين عيونك...


دواوين ...



وتدرين ...






،،،،





تدرين ...


ماشفت نهر جاري



عشان اشبه شوقي



وتصدقين ...



ماقدرت



اوصف نبض نُبض بعروقي



وهيام ...



ولهفه ...



وحنين....



وتدرين...






،،،،،




ماتدرين ...


معنى الهدوء افقده



بس احسه وياك



ماتدرين حبك بدا



يسري من قلبي لي يمناك



وياعلك تحسين



وتدرين ....







.......


ماادري شيصير




من اشوفك .. 

ماأدري شيصير !!

يخونّي التعبير


اصير ملامح انسان ..

روحه بين ضلوعه بتطير 

ويخوني التعبير 



،،،

اشوفك 

بأوصاف ماعرفت حدود

 أشوفك 

باوصاف مالها وجود

اشوفك بكذا صوره

بدر ينوّرني نوره


 شمس ملفوفه بحرير

ويخوني التعبير 

ماأدري شيصير


،،،



Sunday, November 2, 2014

شهادة وفاة





شعب أدمن التشره وعشق اظهار السلبيات

هدفه الاساسي التحلطم التشاؤم والتشهير

بإصرار  يكتبون للوطن شهادة وفاة

كل يوم  يقتلون احلام وبسمات بضمير

كأنه هالارض مافيها ريحة الايجابيات



كأنه هالارض مامنها أمل مافيها خير

Wednesday, October 29, 2014

انا اليال




ظلال 
لها اشابيه بالارض ..
 وآمال

تنسج حياة ونبض ..
وسؤال

وشمس تعكس الواقع

الناس تشوف فيها نور

وانا اللي اشوفه خيال

وظلال

....

لي إهتز الغصن .. أسمع له أنّه

وصوت للريح .. يخوّف

اللي يصير .. شمنّه؟؟

وليمتى على هالحال

وظلال


...

الظل رسمه تشبه الاصل

مالها ملامح

الظل سواد لصوره

تحتاج خيال جامح

وطٌولة بال

وظلال

......

لو كل من حس نطق..

واستوعب المنظر

ولو الحرف غرق

بجوف الدفتر

وعلمني شلون احكي 

بلا كلافه

ولايبقى شي أخافه

ان قالوا الشعر بحر

أنا اليال ..

....


شلت روحي



شِلت روحي بإيديني وطلبتك طلب


خل عمري ويّاك يمشي  بهدا


وان راح بتبقى أغلى وأحَب


وياك لآخر نسم لآخر مدى


طرة نور



محتاج حضور

لعيوني وقليبي

محتاج شعور

محتاجك حبيبي

 تداريني..

تحس فيني..

حرام اموت فيك

وخاطري مكسور

محتاج حضور

...

بالتفت ابيك يمّي

ابي تذوب بدمّي

تسكن تفاصيل حلمي

ماابي انام مقهور

محتاج حضور

....

مطلبي مو صعب عليك

دارني مثل مااداريك

خلها دايم محاريك

تهل مثل طرّة النور

محتاج حضور

....

ابتهج





ابتهج لو اسمع طاري عنك
من الفرحه غورقت عيوني


سنين ماشفتك لكنك
الصوره البريئه بعيوني

Monday, October 27, 2014

جروح نديه



على هالحال يوميّه
اتذرى بآمال
وأحلام ورديه
ولاألقى راحه
ولاعيشه هنيّه
وعلى هالحال يوميّه
....


الايام وياي إبخلَت
والأفراح عنّي سَلَت
عايش عشان انظلم
عايش عشان أنحرم
كل شي يذبل
إلا جروحي نديّه
وعلى هالحال يوميّه

...
ليمتى اللي ابيه يروح
ليمتى الصبر ياروح
ليمتى قادره تشيليني
يزاج الله خير فيني
 انتي اللي وفيّه
على هالحال يوميّه
...

كل من لقى حلمه الا انا
انا انسان الوهم عنوانه
كل ماتتفزّز أحلامي
تسود بعيوني أيامي
وتصير الفرحه حياويّه
وعلى الحال يوميّه
.....

تبي اكثر


تبي تفاصيل اكثر
تشرح احوالي
تبي احلف شكثر ولهان
تبي احلف شكثر شقيان
تبي أبكي
تبي اشكي
تبيني أتعبّر
تبي أكثر
....

افهم اللي صاير ...شمنّه
شلون تهدّي قلبي وتطمنه
صرت انسان راس ماله حزنه
صرت انسان ضلوعه بصدره 
تتكسّر
تبي اكثر 

....

هاك ..خذ من الانه .. واسمع صوتها
شوف نبراتها .. حس بجبروتها
لاتسمع لاتحس
بس افهم...
ترى الوله لو إلتم
بيوف عاشق يأذّيه
تحمّل حبيبي
انا وايد أتأثّر
تبي اكثر


Thursday, October 16, 2014

لما تغيب

لما تغيب 

يزيد خوفي


يقل شوفي

وكل اللحظات تخون

ماتعرف توفي

حتى النسمه 

احسها لواهيب

لما تغيب 

….


الفرح مايصير له بينه

يختفي مثل مااختفيت

وصور فظيعه وحزينه

تصير لآهاتي بيت

ويسكني عالم من الضياع

وأصير عنوان للأوهام

ويذوب بكياني كل شي .. كئيب

حتى النسمه احسها لواهيب

لما تغيب …

….


لاتتخيل الحزن فيني

ولاتشوف رسماته بعيني

ولاتفكر تعيش هاللحظات 

بتحس كل مافيك مات



لاتتوقع بعدك حياة

لو مالي وياك  .. نصيب


لما تغيب

١٦-١٠-٢٠١٤
الخميس