Thursday, May 28, 2009

ليلي دنياي ونهاري



نهاري

ذابت فيه الأماني


ونسجت على خيوط الشمس


إنتظاري


وليلي مثل قلبي يعاني


كنت أحسبه وفي


لكنه باح أسراري



،،،،،،،

 ألمح الفجر أحسه يناديني


ويغسل كل إحساس فيني


 ينطرني شي بعد خطوه


يمكن يبقى بالأيام مروّه


تساعدني ببقايا


مشواري



،،،،،،

 ياليل


ظلامك ذوقني أحلامي


إنت ياليل


مخوّن فيني أوهامي


إنت ياليل


ساتر دمعاتي


وفاضح تفاصيل إلهامي


إنت يالليل


ياقوّتي وإنكساري



،،،،،،،


 يادنيا


خذتيني ورسمتيني


يادنيا


 وهدّيتـيني


رسمتي ملامحي بالليالي


لوّنتي و موّتي آمالي


يادنيا


سَمعيني مره للفرح


طاري

Monday, May 25, 2009

نبي موقف


نبي موقف
يمنع جروحنا تنزف
نبي موقف
مايخلي الوطن
دمعاته تذرف
نبي موقف
،،،،،
نبي للرئيس مواقف رجوليه
مايهاب أحد  موليّه
ماتهمه مصلحة شركاته
ولايحب تنترس مخباته
نبي رئيس يشرّف
نبي موقف
،،،،،،
من متى صارت الرئاسه تفشّل؟
الكل فيك يابوصباح متأمّل
واللي يسلمك أحسن الإختيار
وإرحم عيال وطن النهار
لايوصل للرئاسه
اللي يبُخ ويسلّف
نبي موقف
،،،،،،،
نبي شخص كفو يستلم المطرقه
ترى ارواحنا بإختيارك معلّقه
ترى الشعب سوّا اللي عليه
مانبي نقول حسافة وولّيه
ولانبي الريج ينشِف
نبي موقف

Saturday, May 23, 2009

أورّيك فيه



إخذه وياك قلبي لو نويت البعاد

دامك بعيد عني شسوي فيه

كان معاك الفرح يكتبله ميلاد

كان معاك مرتاح شايف أمانيه

مافاد قلبٍ بحنايا ولهان مافاد

خلّه يمكن ببعادك تحن لراعيه

خلّه وياك قلبٍ ماعرف  العناد

قلبٍ على كيف كيفك تمشّيه

سو ماتبي بقلبي و إنسى البعاد

أوعدني ماتخلّيني وأنا أورّيك فيه

Tuesday, May 19, 2009

عليكم بالعافيه





الدنيا ماشيه

ناس تموت وتنولد

ناس تغيب ماتنفقد

ناس هايمه

وناس لاهيه

والدنيا ماشيه

،،،،،

ناس تزرع بقلوبنا تذكار

ناس وجودها بيناتنا عار

ناس مع الحق متوالمه

ناس على الطّل حالمه

ورايحه بداهيه

الدنيا ماشيه

،،،،،،

الدنيا ماهمها منو راح

ولامنو عن كرسيه إنزاح

عالم نكسيه بمفاهيمنا

عالم نسقيه غرابيلنا

وعليه بالعافيه

الدنيا ماشيه

،،،،،

كل إنسان له مدّه

والموت محد يردّه

عيش يومك بشوية عقل

وشوية جنون شوية ثقل

ونتيفة أحاسيس دافيه

الدنيا ماشيه

Sunday, May 17, 2009

رسالة إلى العالم


شفتوا شكثر نحب الديره
شفتوا شكثر كلمتنا كبيره
شفتوا شلون عمينا عيون
وجدينا عيون ضريره
شفتوا شكثر نحب الديره
،،،،،،،،
إحنا شعب نتنفس ديمقراطيه
إحنا شعب إنتنشق حريه
إحنا شعب نمحي الإنتهازيه
بأرواحنا حب وبقلوبنا غيره
شفتوا شكثر نحب الديره
،،،،،،،،،
مو سهله ينضحك علينا
نصنع المستقبل بإيدينّا
إيه نعم كفينا ووفينا
وكتبنا بحب الوطن سيره
شقتوا شكثر نحب الديره

Monday, May 11, 2009

ورقة تصويت

ورقة تصويت
فيها ألف حسافه
ومليون ياليت
ورقة تصويت
بإيدك تبني مستقبل بلد
ترحم شايب وتكبِّر ولد
يفرح بقبره جابر وسعد
اذا صار صوتك للكويت
ورقة تصويت

Tuesday, May 5, 2009

كانت






كانت

 الكلمه بإحساس تنقال

كانت

 الدنيا فايضه بآمال

كانت

الطيبه تقود البشر


وانتعلم منها العِبَرْ

و اليوم

كل النفوس البريئه عانت

كانت

،،،،،،،

كانت بناسها فرحانه الديره 

كانت الأماني وايد كبيره

وتناثرت المحبه بكل صوب

والفرحه ماشالتها قلوب

اليوم حتى البسمه

إنهانت

كانت

،،،،،،

ليمتى والواقع أحداثه أليمه

ليمتى الصراخ والشتيمه

ليش نسينا مفهوم الأخوه

كل شي بناخذه بالقوه

والنيّات  شانت

وكانت

،،،،،