Saturday, June 28, 2008

حظوظ رديه

اعتقد أني دخلت إلى الان 690,787 مليون سحب على جوائز ولامره فزت ، ومن القهر كتبت
،،،،،،،
،،،،،
،،،
،،


مو معقوله صك عمري فوق الثلاثين

ولا مره بالغلط  فزت بهديه

لاقلم لاجنطه لاخرجه لاكراعين

مافزت  بسحب فرع جمعيه



ابي بالغلط أفوز بديرمه وفازلين

راضي بقلاصات راضي بصينيه

يقولون الحظ مايموت أقول كذابين

أنا حظي مات وماربحت  قحفيه



اكتب كوبونات فوق الالف ألفين

ماأخلي رقم فنيله لارقم جنسيه

أبي مره بالغلط أربح جلابتين

ترى بتصير فيني عقده نفسيه

اذا يبيعون حظ قولولي وين

ترى حظوظي هالايام وايد رديّه

،،،،،،

لو يسوون سحب على أفنديتين

أطلع الأخير وورقتي ملغيه

أدش السحب ياخال يابوثنتين

يفوز باكستاني وتفوز هنديه



لو يسوون مسابقه أنا وإثنين

اطلع عليهم الرابع بالتبعيه

لو غيري يشق هدومه نصين

ويشتغل صبي بالصحه المدرسيه


ودي يقولون اني فزت بتفاخيتين

او كنافه او زنود الست او لوميّه

ودي يسموني براك بوحظين

ودي يبشروني اني فزت بنويبيه


قهر صك عمري فوق الثلاثين

مامره الحظ ابتسم لي شويه
،،،،،،
،،،،
،،،
28/06/2008
السبت

Thursday, June 26, 2008

تفاصيل حنيني



طيعيني

وعطيني إيدياتج

وحضنيني

طيعيني

من غيره قلبي يهديك دقاته

من غيره أنا يهديك حياته

ويعلمك تفاصيل حنيني

طيعيني

.....

بورّيك عالم جديد بتفاصيله

نهاره مختلف عن ليلـــــــــه

ضوى نجومه غير

عالم منبني عالخير

صدقيني


طيعيني

.....

طيعيها مره عيوني الولهانه

اللي تشيلـــــــــــــــك أمانه

لك الغلا وكل الوداد

بتصير عيني أُفـــــــــــاد

جربيني

طيعيني

.....

ماخسر من طاع حبيبه

شكثر شايلّـك طِيبــــــه

تفيض من روحي ينابيع

شفتي هالكون الوسيع

مافيه ربع مافيني

طيعيني

18/6/2008
الاربعاء

Tuesday, June 24, 2008

لاتنكر



تذكِـــر؟؟

كنت تسكت

وتقول : ما أعبًّــر

تذكر؟؟

كنت تقول: الثواني بلياي غير

كنت تقول: الدنيا بدوني توحش

وتقـــهِر

تذكر؟؟

.....

يطري عليك يوم إعترفت

مثل طيبتي ماشفت

كنت تحبني وايد

كنت تكتب فيني قصايد

كنت تشعر

تذكر؟؟

Saturday, June 21, 2008

الظواهر السلبيه

أجمع عدد من القانونيين والدستوريين على ان عمل لجنة الظواهر السلبية البرلمانية «يتعارض مع نص المادة 50 من الدستور التي تؤكد على الفصل بين السلطات» مؤكدين أن الدستور «عهد لمجلس الأمة سلطتي التشريع والرقابة على أعمال السلطة التنفيذية، لا العمل على تعقب حريات الأفراد والحد منها، وهو ما يتعارض مع الحريات وحقوق الإنسان
جريدة الجريدة بتاريخ 12/6/2008
أعتقد ان تفسير هذه اللجنه بسيط واستطيع ان اشرحه لكم
اذا سألتوني ماهي الظواهر السلبيه راح اقولكم التالي
هذي الظواهر السلبيـــــــــــــــــه
اذا شربت عصير وماكملت باجيه
اذا فنيلتك صارت رماديـــــــــــــه
اذا تعرجبت بالزوليـــــــــــــــــــه
اذا رافجتلك دمبكجيـــــــــــــــــــه
اذا لعبت لبّيده بالجمعيــــــــــــــه
اذا قطّيت بدليـــــــــــــــــــــــــــه
اذا قعدت ساعتين بالسالمـــــــيه
اذا كلوا عيالك رقيّـــــــــــــــــــه
اذا شربت فيمتو بممّيــــــــــــــه
اذا لبست غتره بدون قحفيــــــه
اذا سلّمت على مطيرجيّــــــــــه
اذا احد من اهلك شرى KIA
اذا المتحجبه بينت الترجيّـــــــــــه
اذا حذفت جارك بصمّيــــــــــــــــه
واخيرا
اذا استمر هالمجلس 4 سنين
احلق حواجبي بجيريـــــــــــــه
هذي اهي الظواهر السلبيه
21/6/2008
السبت

Thursday, June 19, 2008

كاين ومقدر



أقدر ؟

آخذك من الدنيا وأطير

أقدر ؟

أسلّم بيدك المصير

وأخلي الدنيا إنت وبس

النبض وكل شي ينحس

وتصير الكاين والمقدَّرْ

أقــــدَرْ ؟

ممكن آخذك من الزمن وأوايهَه

وتصير إنت العين بمايهــــــــا

وتكون تفاصيل الشــــــــــوف

وأشيل يوفي وأخليك اليوف

تصدق اللي يعرفك

يحرم عليه يتكدر

أقدر ؟

19/06/2008
الخميس

Wednesday, June 18, 2008

كُـــبَــــــــــــرتْ



هذا أنا على ماأنا بس شوي كبرت

شيبتين براسي وحده ترى منـــــــج

أحس وايد وايد عشانج صبـــــــرت

ماتوقعت لهالكثر أنا أحبِّـــــــــــــــــج

مـاأقول إني بعدج إنكســـــــــــــــرت

بس ظليت  أشرِق بحسّــــــــــج

ترييت أشوفج حاولت ماقــــــــــدرت

أحس محدٍ غيرج مبعدني عنّـــــــــــج

يازمن أحسِّك على صــــدري عبرت

ثقيله مرت أيامي وكله منـــــــــــــــــج

هذا أنا مثل ماأنا شوي كــــــــــــــبرت

بس شــــــــــــيبتين براسي وحده منج

Saturday, June 14, 2008

فلوس



الفلوس

شنهي الفلوس

إهي كل شي؟؟

إهي زاد الحي؟؟

إهي الدمار

اهي العار

اللي يسحرنا شوي.. شوي

ويغيّر النفوس

الفلوس

شنهي الفلوس

،،،،،،،،،،،

نقدَرنصنع فيها صِحِّـــــــه؟؟

يقدر الواحد يطيّب جرحه؟؟

تقدر ترد الغايب

تقدر تجمِّع حبايب

وترِد العيوز

عروس

الفلوس

شتسوي الفلوس

،،،،،،،،

مصدر للسعاده وإلا وسيله

تخلي النفس بخيله؟؟

وإلا تعلمها الكرم

وتبني ماإنهدم

وتضحّك وجهٍ

عبوس

الفلوس

شقصة الفلوس

،،،،،،،،،،

فيها خير ومنها فايده؟؟

تغيِّرنا لو صارت زايده

تغمــر بيوتنا  وحنان

 تغيِّر معدن إنسان ؟؟

وتقلب الرياييل

؟؟؟؟؟؟؟؟

فلوس

وياطلاّبة الفلوس

،،،،،،،،،،،،

تعمِّــــر ديار وإلا تدمّرها

تزعِّــل الناس وإلا تسرها

 تهدي للجيل أمنياته؟؟

وإلا تخليهم شماته

ويطقطقون روس

الفلوس

شنهي الفلوس

9/6/2008
الاثنين

Wednesday, June 11, 2008

حلمان




حلمان

إيه حلمان

وإلا شلون أشوفج

وخيوط الزمان

تخنِق وجودج

وتجبرني ظروفي

أحبج

وتجبرك ظروفك

تكوني بخبر كان

حلمان

إيه حلمان

وإلا شلون أشوفج

.....

من غيابج أدمنت الخيال

عايش  على إحتمال


إني أقدر أَلـــِــــــــــــــــمْ

ماضي

إنتهى من زمان

حلمان

إيه حلمان

وإلا شلون أشوفج


2/9/2007

Monday, June 9, 2008

فلونه



فلونه روبنسون كروز هي أول فتاة أحببتها ، هي بطلة مسلسل كارتوني أعشقه إلى الآن ، دائما أقتني نسخه من هذا المسلسل وسرعان ما تتلف هذه النسخة لسبب أو لآخر ، قبل عام ضحك علي((أو قص علي )) واحد يبيع افلام إشتريت منه شريطا واحدا واستغربت من ذلك قلت له : هذا المسلسل 6000 حلقه شلون كلهم بشريط
قال : ماتخافش يافندم
رحت البيت وإلا الشريط مافيه إلا حلقتين الاولى والاخيره، !!
بالأمس القريب استطعت أن احصل على جميع الحلقات وصممت من جديد أن اعيش طفولتي مع فلونه
ملاحظه : يجب قراءة هذه الابيات على وزن اغنية
على دا العونا على دا عونا


على دا العونا على دا العونا
شقول غير ياحلو فلونه
ابوها روبنسون وياحلو أمها
وأخوها جاك ياحلو أذونه
على دا العوناعلى دا العونا
شقول غير ياحلو فلونه
،،،،،،،
طبّوا بجزيره مافيها بشر
والجو على سفينتهم إسْــتشر
ضاعوا ولا حس ولاخبر
ولا حتى أنباء صغيرونه
على دا العونا على دا العونا
شقول غير ياحلاة فلونه
،،،،،،،،
فلونه شافت حبيبها ميركوري
حلو شعره وجسمه طري
وشعر فلونه جنه كودري
وفيها عيب وايد ملسونه
على دالعونا على دا لعونا
شقول غير ياملح فلونه
،،،،،،،،
بنوا بيت بين الأشجار
وربوّا صخله وأرنب وحمار
ابوها الدكتور يكتب أشعار
وأخوها الثور مبحلق عيونه
على دا العونا على دا العونا
شقول غير ياجكر فلونه
6/6/2008
الجمعه

Friday, June 6, 2008

قايلّــــــــــــَهْ



قايلّّه

لو يروح

يروح عمري كلـــــــَه

قايلَّه

،،،،،،،،

لايفكر يغيب مره

الروح مني إتِّبرّا

ابي يعرف قدر حبه

و يحِن علي قلبه

ويعرف غيبته

أبد مو سهلــــــــــَه

قايله

،،،،،،،،،،

من عُمر وأنا مفَهْمَه

بخفايا أشواقي معلْمَه

يدري إني غير الناس

وإنّي بزود حسّاس

وعيوني بزوله

متكحلــــــــــــَه

قايله

،،،،،،،،

ياخذ القلب ياخذ الروح

ياخذ مايبي مسموح

ماأبي غير أشوفه

ويطمن قلبي بخوفه

يقول : لبيه

لو أندهلــــــــــــــَه

قايله

،،،،،،،،،

 مايباعد عن عيني

كثر ماأمَنِّيه يمنِّينـــــي

يسْمَعني لو ناديتــه

يحس شكثر حبِّبته

وشكثر قلبي من الغلا

شايلّـــــــــــَــــــــــه

قايله

Thursday, June 5, 2008

فرحه ومرحه



محتاجين فرحه

تونِّس الواحِد

وتباري جرحه

محتاجين فرحه

ولهنا على البهجـــــــه

صار الشِّعار يبيله هَـجَّهْ

الكل يبي يسافر ويروح

ترى تبي أرواح الروح

خلَّوا دروبنا

سمحه

محتاجين فرحه

....

ياكِثر ما ماشبعنا غمْ

ياكثِر ما كَلانا الهَمْ

ليش العموم مقلدمين؟؟

ليش مو مستانسين؟؟

خبرهم بالوناسه

من سنة الطَّفْحَـــــه

تنقِّصوا لهم فرحه

....


ليش من التِّشكِّي مانييوز

وشحقه مدّت البوز

فيكم شي كلموني ؟؟

مضايقكم شي علموني؟؟

فيه شي أقدر أصَلْحَــــه

ممكن اصنع فرحه

16/3/2008
الأحد

Tuesday, June 3, 2008

مطنزه



مْبَرْوِزَه

صورة الوضع مبرْوِزَه

بإطار حديدي

حَلـَي

وفوقه خرزَه

مبروزه

...


بأربع زوايا الأحداث تتقولب

يبيله واحد مشورب

يهدينا وسايل

على قولة القايل

صرنا مَطْنِزَه

مبروزه

...



تمتلي الجيوب والخرده تِفِيضْ

والآمال جِنْهِا ديايه تبيــــــــض

تتعسَّر تبي الراحه

وايد متلعوزَه

مبروزه

....



توبـِكْ السالفه وتَكتكهَا

ودروب السّنع صكها

خل الحلم يبقى حلم

وتضيق فينا أراضينا

إحنا شفينا

وليش هالجزى

مبروزه

...


فيه جيل بيضحك على هالحاله

فيه جيل يتريَّا منّا آمالـــــــــــه

يبي حقّه

ومن حقّه

ترى السالفه

مو محرزه

مبروزه

صورة الوضع مبروزه

22/05/2008
الخميس