Wednesday, April 30, 2008

مافي بترول



لو جفّت الأرض

واختفى البترول

وقل المخزون

بنلقى ناس يقزّون؟

بنلقى ناس يتحلطمون؟

.....


بنطالب بالزّياده ؟

بننسى طعم الرباده؟

بترخص أسعار الأراضي

ماراح نلقى أحد فاضي

النّاس بيهجّون

....

بنشوف حملات للترشيد؟

بنشوف مواطن سعيد؟

راضي بمصيره وقانع

بنحس بإراده ودافع

فيه ناس بيتسنّعون

.....

راح يكون فيه استجوابات؟

راح تتغيّر الحجابات؟

مافي حجاب بو روب

مافي حجاب بو تيوب

بتكون الديره

أأمن مكان بالكون

لو قل المخزون

....

جم مواطن بيصمد بالديره؟

بتكون القلوب مليانه غيره ؟

بنغار على تراب الوطن؟

بينتهي موضوع الفتن؟

الناس بيتغيّرون

....

بنروح المارينا والأفنيووز؟

فيه أمور ممكن عنها نيووز؟

بننسى الكشخه والكماليّات؟

بنعيش أسعد حياة

وعيال الديره بيفرحون

لو جفّت الأرض

وقل المخزون

Friday, April 25, 2008

هياوين

هياوين
هي (هيا ) خالتي إنتقلت الى رحمة الله تعالى قبل 6 ساعات مساء اليوم 24/4/2008
هياوين هذي قصيده مني لروحج الطاهره قبل لاتندفنين


راحت هياوين

من بقى لي اللحين؟

منو بيحسني؟

منو ينوّرني 

منو يسعدني ؟

ويمنّي لي هالعين ؟

راحت هياوين

....


خلاص يالغاليه ماراح تناديني ؟

بابقى بروحي أعابل سنيني؟

ووفى حضنك بافقده

انا ولهان عليج

قبل لاتندفنين

هياوين

...


وحجي أيّام أوّل؟

لما أكون وياج

كنت أشوف الدروازه

وأشوف رضى النّاس

بوقت العازه

لما أكون ويّاج

أشوف السّيف واليال

وأشم ريحة البحر

لما أكون وياج

الدنيا بعيوني تزين

راحت هياوين

...


تعلّمت من عيونج الحنيّه

كل يوم وياج حياة يديده

كنتي تقولين

الدنيا تورّ الخير وتورّي الشر

وكتبتها قصيده

ماقريتيها

ولا بتقرينها

لانج بتبعدين

هياوين

...


شاللّي تحسينه؟

تحسّين بوله يوفي؟

تحسّين بخوفي؟

بعدج أنا منو ؟

هياوين

مو هني إنتي اليوم ؟

خلاص

مو هني إنتي دوم

خلاص

بصير منج محروم؟

اللّي مصبّرني

إنّج بحبّي تدرين

هياوين

هياوين

هياوين

ماتت هياوين

24/4/2008
الخميس

Thursday, April 24, 2008

سمحه

اليوم بالذات فيني شي شنو ماأدري، جلست وتناولت الدفتر ونظرت للصفحه وتخيلت انني اكتب
وبعد أن أنتهيت وجدت كلاما مكتوبا ، لاأعلم من كتبه
اليوم أنا فيني شي
إقروا الكلام وتكفون قولولي شفيني ؟؟


تشوفني الصفحه

تناديني

 يوّد القلم

وتكلّم عن قلبك

وجرحه

تشوفني الصفحه

...

تتريّاني .. أطاوعها وأكتب

تترجاني .. أرسم حروفي

تقول لوّني بكلامك

وإنثر حروفك بيوفي

واللي فيك وضْحَه

تشوفني الصفحه

.....

تناديني أخط اللي أبيه

وتوعدني ماتبوح أسراري

تقول إيه.. يابرّاك .. إيه

قولّي شلَّي جاري

وإن ماعجبك الحجي

مِسْحَه

تشوفني الصفحه

.....

تبيني ألبّي لك 

وبيديني الحرف يهلك

ويتعذب من خيالي

يتعَب من آمالي

وروحي السّمحه

تناديني الصفحه

.....

ألا ياصفحتي عذريني

اليوم بالذات مافيني

ماعندي أي كلمه

احساسي ماأقدر أفِهمه

مابقى لي صوت

ولا بالصّوت بحَّه

تشوفني الصفحه

24/04/2008
الخميس

Tuesday, April 22, 2008

مامن تعب



يسألني :


تعبت ؟؟


قلت :

 مامن تعب

يازينك ويازين ماشفت


يسألني تعبت؟


....

شفايدة حبّي وهيامي


شخانة عشقي ياغرامي


فيني بعد حب ماتتخيّله


أحبّك وهذي كل المسأله


لو تعذّبت



لو حقّي انسلب


يسألني تعبت ؟


مامن تعب


Monday, April 21, 2008

طواله



بعد 50 سنه جدّام إحنا شبنكون

ممكن تصير شوي أحسن الحاله

بتظل قناة الوطن وسكوب وفنون

وبتظل جرايدنا همّها العباله

بنكون أسعد ناس بهالكون

ويتطمّن الأبو على مستقبل أجياله

بينتهون اللي دوم يحسدون

بتتعمّر فيلجا ومسجان والحاله

الشّمّاته ممكن بيوم ينقرضون

ويتطمّن الواحد على عياله

بيتمّون نوابنا كلّه يصرخون

وإلا السالفه بكبرها سهاله

بتهتني قلوب بتفرح عيون

وإلا السالفه طواله بطواله

بتظل باقيه مشكلة البدون

ممكن ينفرض قانون الإزاله

بعد 10 سنين احنا شبنكون

أحسن ؟ وإلا على نفس الحاله

11/3/2008
الأربعاء

Thursday, April 17, 2008

لا ماهلّت




لا ماهلّت

إنسلّت

ضوت وأضوت

وإختفت مابين أحلامي

كاها جدّامي

زارتني لحظتين

وملّت

لا ماهلّت إنسلّت

نسمة عبير تنتشي منها رويحتي

رقه وعذوبة تملي علي دنيتي

ونهار ماله لون

ماأدري شلون

مثل نجمة

متلونه بسماك

وقلب ارتوى معاك

ومطر هل شوي هني

وشويتين منّاك

وتواصيف الجمال

إكتملت

لاماهلّت

إنسلّت

Sunday, April 13, 2008

إتجاه فرعي




إتجاه فرعي

لأحوال التّخلّف يستدعي

ينثر على الأرض

رفض

وفوضى بالطّول

والعرض

الفزعه ياهلي

وربعي

إتّجاه فرعي

...


حذّف صخر كسّر سيايير

رفرف بمباديك وطير

الصّح يبقى ياخوي

صرّخ وتشكّى ولوي

ولاتقول إكسروا

صبعي

إتجاه فرعي

....

إحنا ترى نحترم القانون

والهون أبرك مايكون

بكيفك بس خذ جزاك

لاتصارخ محد معاك

لاجاسم لابزّه

لامرعي

إتّجاه فرعي

...


الوطن له كيانه وإحترامه

كل بهالبلد له كرامه

إحنا قبيلتنا الكويت

 ماتبي اقعد بالبيت

ولاتقول كسّروا ضلعي

إتجاه فرعي

....


ياديرتي سامحيهم بيتعلّمون

ياديرتي حتى لو يغلطون

إنتي قلبج كبير

إنتي الملاذ والمصير

كلنا لج

ندعي

إتجاه فرعي

12/04/2008
السبت

Thursday, April 10, 2008

غير



الثواني بليّاك غير

ماألقى فيها خير

ثجيل الوقت علي

تدق دقاته بيوفي


وأتذكّر

إشّافت عيني

وأشوف شفيني

ماألقى إلا قلب يدق

وصاحبه محروم

الثواني بليّاك غير

....

أسلّي نفسي بهمس شفاتك

أعلّم حسّي يتنفّس ذكرياتك

أقضي لحظه وأرسمك

أخلق كلام وأتكلمّك

وأسولف وأتخيّلك ترد

وأعيد ماقلته

عل وعسى

ألقى رد يسر

عل وعسى

الدنيا تبر

وأشوفك حقيقه

تعبت أحلم

وماأشوف حلمي

تعّبني الندم

ومحد يمّي

أنا تعّبت الهم

وتعّبت حلمي

وتصبح على خير

الثواني بلياك غير

Sunday, April 6, 2008

تبون مطر




تبون مطر

خافوا الله بديرتكم

تبون مطر

نثروا الحب بدنيتكم

وخلّوا التسامح

يغطي هالارض

بر وبحر

تبون مطر


...


تبون ترتوون .. سهله

الكل ياخذ قلب ... ويأمله

ويحضن أخوه

مايهمّه مذهبه

تبقى عناوين المحبّه

مذهّبة

بسنه وشيعه

وبدو وحضر

تبون مطر

...



ليش  شحّت السما

ويبس عود النخل

ليش الورود بالعطش متوسّمه

ليش الكون بخل

والدرب طال

وقصر

تبون مطر

...



تبون غيمه تسمع نداكم

تبون رحمة من سماكم

حبّوا هالارض إحضنوها

مثل مادارتكم داروها

وإبشروا بالمطر

تبون مطر


24/2/2008

الاحد

Thursday, April 3, 2008

إقروا

منذ زمن وأنا أحلم بأن يكون لي ديوانا شعريّا، ولكني متخوّف من ردة الفعل على جميع المستويات ،أخشى ان ادخل في معمعه رقابيه أخشى أن يكون سؤالي الدائم كم نسخه وزعتوا ؟؟
لاأريد أن أدخل عالما آخر غير عالم التدوين
اعلم ان قراءة ديوان في الوقت الحاضر أصعب من الدخول لاي مدونه
أي اذا رأيت أن 7000 شخص من 50 دوله قد قرأ نصفهم كلامي أفرح ولكن السؤال اذا اصدرت ديوانا شعريّا لاسمح الله هل سأجد 100 شخص يهتم بإقتنائه (وليش هاللّويه ) على قولة رابح صقر خلنا كذا حلوين
مشكلتي بهذه الدنيا أنني أحلم بالدقيقة الواحده مرات عدّة،والديل أنّني إلى الآن لم أطبع الديوان ولكنني بسبب عشقي للأحلام انتهيت منذسنة ونصف من كتابة مقدّمة الديوان القادم (مجرّد حلم ) لاتصدقون بس تخيلوا ان الكلام القادم هو مقدّمة ديواني الشعري الاول الخيالي
بس تخيّلوا وإقروا


إقروا

وتأمّلوا طفل يتيم

ربى على ضيم

وراحت روحه منّه

تشاوفوا تواصيف حزنه

وبكلامه

فكروا

إقروأ

تأمّلوا واقعه بحروفه

حسّوا بأنّات يوفه

مرّه بس إفهموه

بأحلام دنياه طيروه

وحسّوه

وقدروا

إقروا

يشرح الإنكسار والأمان والوحده

يرسم دمعته قبل لاتلامس خدّه

يوصف قصيص دنياه

يشرح ضحكه وآه

ياللي تقروني

حسّوا

إقروا

فيه بين سطوره حرّات

تلقون إنسان مات

وحيا على حس كلامه

بتلقون هذره وفهامه

إخذوا وخلّوا

بس

إقروا

22/6/22007
الجمعه