Thursday, December 24, 2009

بِرِي




عيونك ماتحتاج لعنوان ودلاله

كل مافيها أفهمه وينـــــــقري

عيونك أسهل من السّهالــــــه

أدري شاللي ببالك ينطِـــــري

أنا راسم لك باليوف حالـــــه

تبيع فيني وتشتـــــــــــــــري

بسبايب نظرةٍ جتّالــــــــــــــه

خلتني من عقلي بِـــــــــــــرِي

وخلت حالتي وياك حالـــــــه

حاله لاتنكتب ولا حتى تنقرِي

١٦-٢-٢٠٠٥
الأثنين

Monday, December 21, 2009

مامداني

خذتها من لساني
إيه والله أحبك
توني مامداني
بطمن قلبك
كنت بقول
إنك نقطة الوصول
لآخر مدى بإحساسي
كنت بقول وبقول وبقول
إنك أعز ناسي
كانت ببالي
آلاف الأفكار
وملايين المعاني
خذتها من لساني
.......

شلون عرفت اللي بينقال؟؟
شلون ماعطيت مجال
لأشواقي تصور لهفتها
ليش هالروح ماوهّلتها
خلني أذوقك حناني
حبيبي
خذها من لساني
١٩-١٢-٢٠٠٩

Thursday, December 17, 2009

35

اليوم يصادف مرور ٣٥ سنه على ميلادي
احسست بلحظة مرور السنين
انا وقلبي
: فكتبت
ــــــــــــــــــــــــ
راحت سنين
ويات سنين
وتناصفنا الثلاثين
ومر العمر بلمحه
اهداني فرحه
وفوق الفرح
أنين
راحت سنين
ويات سنين
وتناصفنا الثلاثين
....
أنا وياك ياقلبي كبَرنا
تذكر؟إشفنا بعمرنا
تذكر؟؟ متى فرحنا
وشكثر تألمنا
وشكثر ولهنا
لكلمة مرتاحين
راحت سنين
ويات سنين
وتناصفنا الثلاثين
عيد ميلادنا اليوم ياقلبي
نفرح؟ نحزن؟ وإلانغبّي
شبنسوي أنا وياك
ياقلبي ترى براك
صار عمره ٣٥
٣٥
٣٥


١٧-١٢-٢٠٠٩
الخميس

Monday, December 14, 2009

إحساس ورده




عَدَّه

العمر وياك

عدّه

حتى لو الحال

تردّى

بطوي طواري الزعل

وابني بقلبي أمل

آمل لو راح

أردّه

عده

العمر وياك

عده
.....

تمر أيام وسنين

وأتحمّل

ماعندي شي

يتبدّل

علي ماهي عليه

أشواقي

تكون حب بحنايا

أعماقي

وأكون لك

إحساس ورده


١٤-١١-٢٠٠٩
الجمعه

Wednesday, December 9, 2009

تفاحه مقرومه






يابخت اللي من القحفيه طلعت قذلته

يحس بفيضان بشعره من النعومه

ياحرام فقير هالقذله وايد أذّته

مسكين وده يطلع من هدومه

ياليتني اعيش ثواني حالته

أفرّج عن آهات باليوف مكتومه

ياليت أزرع خصله من خصلته

وأصك على سمر ووعد وفطومه

ياجماعه الواحد إنصلخت جبهتَه

من قيظ الدهر ولواهيب سمومه

مسكين اللي مثلي يتحسس صلعته

يحس بإحساس تفاحه مقرومه

ليمتى ياناس ابي افهم ليمتى

أندب حظي اللي يشبه البومه

اللي عنده قذله يحافظ على قذلته

ترى فيه ناس فقرانه نعومه


٢٩-١١-٢٠٠٩
الاحد


القحفيه : الطاقيه
انصلخت : إنسلخت
تفاحه مقرومه : إنظر الصوره

Wednesday, December 2, 2009

تكوين الحنان



انا انسان

يخاف على الكل

وينسى نفسه

أنا إيمان

بالود

وحسَّه

أنا غيمه تروي

بساتين

أنا عروق كلها

براهين

تروي الضميان

أنا إنسان

......

أنا حاله

مايوصفها حرف

أنا قلب

من ضماه جف

أنا إختلافات الزمان

أنا إنسان

.....

أنا نغمة

ماتنعزف بسهاله

أنا كلمه

نبراتها جتّاله

أنا صرخه مالها صدى

أنا العطش والندى

أنا

أنا

أنا

أنا تعبان

أنا إنسان

.....

أنا الجنون بحالاته

أنا الكون بمداراته

أنا أرض مالها حدود

أنا الكرم والجود

وتكوين الحنان

أنا إنسان

......

أنا مجرد فكره

تحب وتِكره

وتذكر ماتنسى أبد

ماعمري خنت عهد

بس العمر خوّان

أنا إنسان

......

أنا

الرد لو الصوت نشف

أنا

ناي عزف

على تقاسيم الحزن

أنا من الحنيه أحَن

بس محتاج أمان

أنا إنسان

أنا إنسان

أنا إنسان

٢/١٢/٢٠٠٩
الاربعاء

Sunday, November 29, 2009

نحاسه





سياسه

عقيمه ومرفوضه

سياسه

تأكد الفوضى

والتخبط والقرارات التايهه

وأصول البلاسه

سياسه

......


مالها منطق وإسلوب

فيها ألف عذروب

تفرض المنع بغباء

ترى السياسه عطاء

مو نحاسه

سياسه

.....

لاتحجب مدونه وتمنع مقاله

لاتحرم صاحب الفكر من آماله

خل الكل يعبر عن فكرته

خل الكل يقول كلمته

دام منطقك

أعلن إفلاسه

سياسه

٢٦-١١-٢٠٠٩
الخميس

Monday, November 23, 2009

مترتبه



مِتْرَتْبَه

الأوضاع متْرَتّبه

بعناية بدقه

كل شي له رف

كل شي له علبه

مترتبه

الاوضاع مترتبه

.....

خلهم يتحلطمون

خلهم يستجوبون

خلهم يتدودهون

كل شي له حِسبَه

مترتبه

الاوضاع مترتبه

....

بالقلم و بالمسطره

نشوف فوضى ودندره

ونخلي التفنتق محبره

تثبت الغلط وإتكِتبَه

مترتبه

الاوضاع مترتبه

.........

تمثيليه من ٧ فصول

احداثها تحجي وتقول

تدفن مواثيق الأصول

وتعيّشنا بكذبه

مترتبه

الاوضاع مترتبه

......


مايبيلها كلّش فهاميه

فهموا ابعاد القضيه

منو خله الديمقراطيه

هالأيام مَسبّه

مترتبه

الاوضاع مترتبه


....
20-11-2009
الخميس

Thursday, November 19, 2009

أكو أحّد




أكو أبرد؟؟

من قطيرات تقطِر

على ورود ذبلانه

وترويها

أكو أجمد

من قطرات يامده


أكو واحد مثلي

عنده خيال

لي هالحد

أكو أحّد

أكو أبرد؟؟؟


٢٢-١٠-٢٠٠٩
الخميس

Monday, November 16, 2009

نسمه رويانه



تمر النسمه

من طيبك رويانه

تمر النسمه

وأحملها أمانه

منثوره على ورود الدنيا

تحوف الكون حوف

تسكن بحنايا اليوف

اللي يعرفك

يتعطر عمره وزمانه

تمر النسمه

من طيبك ولهانه

.......

شلون تملك عطور النسمات

شلون تشهِّقني حياة

كل أيامها متعطره

من عيونك أتقرا

وأعرف كيف الهيام

يشرح صدر عاشق

مايفهم إلا معاني الوفى

ويصير الطيب بكيانه

تمر النسمه

رويانه

......

يفوح عطرك ويلامسني

يحتويني كثر مايعطّرني

وأتنفس أطياب نسايمك

وأظل بعيوني حاضنك

مثل كفوف إحضنت

ريحانه

تمر النسمه

رويانه


٢٠-٩-٢٠٠٩
الاحد

Thursday, November 12, 2009

أم عبدالله



ياللي علي صابره

محتويه عيون مغروره

وروح مكابره

ياللي علي صابره

،،،،،،

جافّه مشاعري ورويتيها

إحتويتيها و علمتيها

إن اللي يحب يصبر

يداري يتحمّل يقدِّر

يآمن بحبه

حتى لو جروحه

بيوفه متناثره

،،،،،،،

إحتويتيني سنين بروحج

صرت بصمتج ببوحج

حب راسملك حيره

ومشاعر كثيره

إنتي إنسانه نادره

ياللي علي صابره


Monday, November 9, 2009

سر في بير






شتغيّر فينا من يوم التحرير

وصلنا القمر وإلا داحرنا ألمانيا

صار الوطن هو بيتنا الكبير؟؟

وإلا الكل عاش بدنيا ثانيه؟؟

فيه غلط وفوضى وتقصير؟؟

وأصناف من الحسد ونماينه؟؟

قبل ١٩ سنه من الفرحه كنا نطير

واليوم ملامح الخوف باينه

لابنواب ولابحكومه بنستجير

هالبلد له رب حافظه وصاينه

كنوز من المعرفه بيوم التحرير

لاتعلمنا ولا داحرنا تنزانيا

٢٦-٢-٢٠٠٩
الخميس

Wednesday, November 4, 2009

الاحتباس الحراري




ناس تفكربالإحتباس الحراري

وضاع وقتها ببحوث وقراية كتب

ناس تحاول تطوّر قوانين للقواري

وفيه ناس المناصب عليها تُخُب

وفيه ناس مركبهم دوم سمّاري

احوالهم كما الريشه تطير وتطب

ناس إصنعوا لنا بيجر واتاري

وإزرعوا العولمه طيب غصب

ناس تعالج أسباب العجز الإكتواري

وناس ان قالت لأ ممكن تنقضب

ناس طايحينله مربيَن عيش بخاري

وناس وقتها للبحوث وقراية الكتب