Thursday, November 8, 2007

بوق 2


تحديث

أمر وزير الداخليه الشيخ جابر الخالد بترقيه استثنائيه للرقيب أول محمد بلال وذلك تقديرا لجهوده وكفائته وتفانيه بالعمل وتمت ترقيه محمد بلال الى وكيل ضابط



مقتطفات من امور حدثت لي اردت ان ابينها لكم

اولا : تلقيت خبرا أحزنني وأعتقد أحزن جميع الإخوه الذين لازموني منذ ابريل 2006 وهذا الخبر هو ان مدونة آه يابلد barrak74.blogspot.com

تم مسحها بالكامل وتم القضاء على جميع ماكتب وعلى جميع التعليقات الراقيه التي تلقيتها من اخوه اعزاء منهم من بقي معي الى الان ومنهم من غاب أو إختار الغياب

اعتقد انني املك ارشيفا كاملا لكل ماكتبته ، وكانت هناك محاولة ثانيه لسرقة ايميلي

ولكنني استطعت ان ارجعه للمرة الثالثه ، أجزم انه في كل مره اكتب فيها قصيده عن احوال البلد برؤيتي الصادقه اتعرض بعدها لسرقه فبعد ان كتبت إلا الدستور تم سرقة المدونه والان عندما كتبت تدوير تمت سرقة الايميل الخاص بي وتم مسح مدونتي العزيزه آه يابلد

عموما نظرا لحزني الشديد على ماحصل وأتمنى ان يكون تحليلي مخطئا ولكن سأبقى كما عهدتموني أنسان راس ماله كلامه ومشاعركم الطيبه

ومن الممكن ان تتعرض هذه المدونه للسرقة بالقريب العاجل وسيكون اللقاء عندئذ في

barrak74.com

واذا فيهم خير خل يلحقوني هناك ايه ترى السايت مسويه عند ناس ماعندهم كيري ميري وعندهم حرية رأي وأول حرف من اسمها الولايات المتحده الامريكيه عاد ذيك الساع ابيهم يوطوطون عندي


ثانيا : ابوبلال السيد محمد بلال وهو ذاك الشرطي الأسمر الذي يقف صباحا وظهرا في الشارع الفاصل بين منطقتي قرطبه والسره هو صديق لي راقي ومهذب ابلغني عن مشاعر الناس الصغير والكبير والطفل وكل شخص يمر بالقرب منه في ذاك الشارع انف الذكر وللعلم ابوبلال لم يتم ترقيته منذ 9سنوات احببت ان اقول ان هذا الشعب رائع وفيه طيبة الدنيا لشخص ادى واجبه بأمانه الا يحتاج هذا الشعب وبوبلال لوقفه كريمه وللعلم بوبلال سوف يقرأ كل مايكتب عنه

ثالثا : ماأحب اضيق خلق احد انا متضايق خلاص وعشان جذيه بقول نكته

فيه واحد غبي عاش بالكويت وماتوفق راح الصين وشرى بقاله يترزق الله منها دخل عليه واحد صيني يبي يشتري عشرعلب كوكا كولا وقاله : ينق شين شانق كوكا كولا

قاله الغبي عشر علب شنو؟





إلى اللقاء

53 comments:

Om Jaber said...

dammek khafeeeeeeeeeeeeeeeeeeef ;p

Om Jaber said...

7esbyyyy allaaaaaaaaah 3alaihom bagaw kelshay.. 7atta "7elmy 7e`6nek" :(
ana shakkah belvisitor elly min israel ;/

nEo said...

غبي و لا ،،،، غبي

:P


سلامات


و بلال من اروع من شاهدتهم يضربون المثل في تفانيهم و اخلاصهم بالعمل

lawyer said...

الله يعينك

و يردلك مدونتك و يحفظك انشاء الله من الحساد

شغله ثانيه

و عسى ان تكرهوا شيئا و هو خير لكم

مدري شنو الخير في سرقه المدونه و لكن الله العالم ليش

بس ديربالك على نفسك
ولا تحر قلبك



اما بخصوص بوبلال

وااااااااااااي هالرياااااااال شوفته تشرح القلب

كل ما مريت عليه اررررررررفع ايددي اسلم

ما اعرف حتى اسسسسسسمه

بسسسسسسس شرح
يحسسني الدنيا بخير

و كلا مبتسسسسسسسسم

يشيل مني كدر دواااامي و همي الساعه 2 الظهر و انا راده


و مرة ثانيه ارد و اقولك

تصبر
باجر ديرتنا بتصير احسن

DiLLi O MiLLi said...

لاه لاه لاه !!! شنووو هذا قاموا يبوقون الكحل من العين !! لالالا ... ألا يبوقون العين بكبرها !!ء
حســـبي اللـه ونـعم الوكيـل


أنا ما أعرف "بو بلال" بس أذا قاعد يقرى اللي نكتبه .. أوجه له سلامي وأقوله

اللــه يعطيك ألـف عافيـه
وتأكد أن هالتسع سنين حصلت على
حب وتقدير وأحترام أهل الديرة
وهذا أكبر تقدير وأعلى ترقية حصلت عليها
خلك مثل ما أنت .. اللي مثلك نادر وجوده .. في بلد ماتت ضماير الناس فيها


يااا أخوي براااك
من ووين نييب الضحكة !؟
صادروها ... ما ظل بالبلد شي يخلينا حتى نبتسم !!ء

Kuw_Son said...

يا أخي ناس ما همها إلا التخريب و نشر ثقافة الدكتاتورية !!

مو الواحد وين ينفه عن عمره و يتحلطم !!؟

الله يخلي لك مدونتك العزيزة ..

و قبلها الله يحفظك من كل شر يا البرك :)

nadeyah said...

لا تحتر اخوى براك

وطالما انك حافظ قصاديك عندك وانا اختك خلاص ... وطالما انت موجود بتكتب أحسن واحسن .. وابتسم وخل ابتسامتك صدقه للكل ... وربى بينصر على من باقك وحرك ...

نصيحه اخت

الهم لك مره عن الحره

وعاد الثالثه ثابته استعجل بالانتقال للبيت اليديد ....

فى حفظ الرحمن اللى عينه ما تنام

Barrak said...

Om Jaber

Barrak said...

Om Jaber

ماباقوا الاحساس الورق يتعوض
انا عاد ماتحرشت باسرائيل من زمان

Barrak said...

nEo

مالنا خلق ننرمي ورانا عيال

يسلمك اخوي

فيه مثل بوبلال وايد
بس حبيت ابين شكثر احنا طيبين ونحب اللي يحب البلد
يقول بوبلال وبوبلال صادق
ان يوميا وجبات تجيله من ناس مايعرفهم وهدايا
على قولته فيه واحد ذابحني كل يوم بيبسي وككاو انزين غير ماكو

Barrak said...

lawyer

سالفة ان مدونتي السابقه ترد هذا من المستحيل لان باختصار اخر رسالة وصلت منهم قالولي استريح

الخير في سرقة المدونه اني اعرف طيب اصلكم بتواجدكم الراقي

انا محتر من الاسلوب محتر من عدد الفيروسات التي تصل يوميا لجهازي
محتر لان الذكرى الطيبه والايام الاولى اللي اجمعتني فيكم كنت يوميا اقرا التعليقات واستفيد منها

بالنسبة لبو بلال اللي اعرفه ان احد المسئولين امس الاول اخذ بياناته اعتقد يبون يشكرونه او يرقونه او يمكن شسمونه

اللي مريحني انه بوبلال يشوف بعيونكم فرحتكم فيه وسمع كلام وايد عنه بطريقه مباشره

وانا صابر

Barrak said...

DiLLi O MiLLi

ماادري شقول
بس كلامكم اهو الحافز

وكلام الى بوبلال سيطبع وسيصل اليه
على فكره
الضحكه موجوده في نفوسنا صدقيني احنا احسن ناس نشوف ضيم ونضحك
ماتت قلوبنا

Barrak said...

Kuw_Son

الله كريم
بشوفلي واحد عينه حاره يعطيهم وحده
انا اقولك وين تنفه عن عمرك مالك الا دبي

الله يخليكم انتو لي قبل المدونه

تسلم يالغالي

Barrak said...

nadeyah

امس انا محتر اليوم غير
وباجر اكيد غير

وكل اللي حصل في صالحي عشان اترك الكسل
وابتدي في البيت اليديد
واشكرك على دعائك سيدتي

charisma said...

خنت حيلى عاد انت شقاعد تكتب الى متسلطين عليك هالسلالاطه

شالسااالفه مالنا حجوه يعنى!

اتمنى فى تحليل ثانى للى قاعد يصير

اخاف لك اعداء براك
معادى احد احد معاديك
محترين منك يجووز

ترى الغيره سبايب
ما يندرا بعد
:))

يارك الله يا خوى


وبوبلال الله يعطى الصحه والعافيه
شوفته تشرح الصدر


والله كلهم انا من اشوفهم اقول الله يعطيهم الصحه والعافيه

وخصوصا بشبه الشمس واللواهييب
وبعز البرد

مساكيين الله
الله ياجرهم

ودام حسك موجود لا يهمك شى يا براك

Barrak said...

charisma

يمكن لي اعداء بس انا اللي اعرفه ان اعدائي 3 ومالهم شغل بالأنترنت اذا على حظي تعلموا وصاروا هكر قصدي خكر يمكن

محترين على شنو شاللي اسويه يحر
يحر اني احب ديرتي
يحر اني اكتب اللي احسه
يحر اني اتكلم عن ظواهر سابيه
يحر اني استعمل كلمات كويتيه خالصه بدأت تندثر
والغيره على شنو اذا بالشعر فيه من يكتب احسن وارقى مني وكلامهم موزون
على الضحك فيه ناس دمهم اخف مني روحولهم
على العاطفه فيه ناس عواطفهم جياشه حساسه
يمكن محترين ان ماعندي شعر واهم عندهم

بالنسبه لبوبلال
سيصل كلامك الراقي له واذا قال منو بقوله كويتيه تمبتيه اي كويتيه حتى النخاع والا عيل من وين مطلعه
بشبه الشمس واللواهييب

اشكرك

Mohammad Al-Yousifi said...

لاحقينك وين ما تروح

خل يبوقون اللي يبون

:)

موفق قلبي

شن شان شونق

الـفــــجـــ الــبـــعـــيـــد ــــــر said...

حاطين العين عليك يا برااك

زين ان عند باك اب لكل اللي كتبته

اما سالفة الكوكاكولا تضحك

تحياتي لك

Barrak said...

kila ma6goog
انا ودي اقول كلمة بحقك

في ابريل 2006 عند دخولي لهذا العالم كنت اتمنى ان اجد تعليقا او حتى مرورا منك لمدونتي
والان بعد مرور سنه و7 شهور تشرفت بهذا الرد

كم انت رائع

ماأنسى افضالك

Barrak said...

الـفــــجـــ الــبـــعـــيـــد ــــــر

ماادري على شنو حاطين العين علي
اونه عشان خشيم الفار

عندي باك اب بس ماادري وينه
سالفة الكوكا كولا الحلو فيها ان الغبي فهم اصعب لغه بالتاريخ وحلل كل الجمله الا كلمة كوكا كولا ماعرفها وايد ذكي

kuwaitya_7saweya said...

لاحول ولاقوة الا بالله
وبعدين معاهم
والله سوالف بايخه وتبط الجبد
بس مهما يسوون بتظل براك الشاب اللي يعادل عمره 100 سنه
وماراح ترد على احد واحنا معاك قلبا وقالبا
ولاتهمك هالتفاهات
افا عليك بس افا
وعلى قولتك لو فيهم خير ومسوين روحهم شطار واقويه خل يلحقونك ببلوجك الامريكي :)


وبوبلال صديق الكل والله انه ماعندي شي بذاك الطريج بس امر عشان اشوف ابتسامته المشرقه واسلم عليه وادعيله بالتوفيق
والله انه اهو الوحيد اللي يطبق مقولة الشرطه في خدمة الشعب
يعطيه مليييييييييييون وزليييييون وترلييييون عافيه

لووووووووووووووووووووووووووووول

والله يعطيك العافيه

حمد said...

لو مو تكتب بمدونة لو تنقش عالحجر بندورك وبندور اشعارك ووراك وراك

:)

فتى الجبل said...

والله بو بلال مثال للكويتي المحترم واللي يحب ديرته
الله يبارك له برزقه

Barrak said...

kuwaitya_7saweya

مشكوره اختي العزيزه هذا من طيب أصلك
هالكلام ترى يحرهم

انا ودي يروحون للسايت الامريكي عشان يمردغونهم
ماادري من وين مطلع يمردغونهم
بالنسبة لبو بلال اعتقد اذا شاف كلمة تريليون عافيه راح يتشقق

Barrak said...

حمد

اشكرك يااخوي حمد هذا من طيبك

كلامك اللي قلته جدد فيني الامل ووسع لي صدري
ربي يوسع صدرك

كلامك وايد وايد أثّر فيني

تسلم ياخوي

Barrak said...

فتى الجبل

بوبلال وماقصرت دعيتله
انزين وانا

Unknown said...

بو بلال انسان نادر في اخلاصه لعمله
لو اتمر بعز الحر والشمس حنانية تلقاه واقف ينظم السير عكس شباب هالايام اللي يقعد داخل الدوريه وماله شغل بالمرور
هالانسان كل ما امر ودي اوجه له كلمة شكر بس استحي منه اخاف يقولي يالله حركي مو وقته
:))

دامه رفيجك ابيك تقوله يوسع علينا احنا اللي يايين من الدائري الخامس على الجسر..ترى ضيج علينا ويخلي سياره وحدة تمر بدل سيارتين
قبل كنت اقعد بالجسر ربع ساعه
الحين سااااااعه حراااام علييييه

يعطيك العافيه

Najmah said...

صج ناس تافهة ماعندها سالفه

الله يعينك ويحفظ مدونتك ان شاء الله

بالتوفيق

DanDash said...

ضاق خلقي

عجل بالسايت و حاول تضيف له كل الي كتبه

Someday said...

waaaaaaaay ya zeyneik Barrak, '7alik chethy agwa min hom kilhom mahma sawwaw enshallah allah weyak o met2kdah ra7 togaf min yedeyd, o 3la el nekta, 9ij Kuwaiti!!!

سدرة العشـــاق said...

هذا من الواهي اللي فيهم يبوقون مدونتك ... و اعرف إذا أحد دزك فا انت جدامه ... عفست المثل أدري بس هذا معناه

nice one :)

سدرة العشـــاق said...

و نسيت اقدم احلى تحية و احترام للسيد بو بلال عسى الله يكثر من أمثاله و يوفقه إن شاء الله

Anonymous said...

barrrak, sirrrrrrrrrrr wa-na7no min wara'ek, basaweelee t-shirt o ra7 anafis t-shirtat POLO, o ra7 awaz3ha ib balaaash o bakteb feeha *yasQo6 yasQo6 ilbaWaag elleey baag barrak* o bedal shi3ar il-7saaan, ba7e6 sortek wnta rakb il-7saan LOOOL, shrayek?? tara nerba7 mn warahaa =[




النصر لنــــــــا =]

Anonymous said...

wa-ta7eya 3a6ira lil-akh bu-Blaaal, ya7laila emsaikeeen, marra mashiftah baghait ahiffah o ad3ima =\ bs rabbik rabbik sitar wana ekhtek lol


wa-shokran 3al nikta LOL =]

bydvsj said...
This comment has been removed by the author.
bydvsj said...

والله هالنوعيه من البشر قلوبهم مريضه ما يستحون حتى فى المدونات بوق مو كافى البوق الى صاير بالديره ما ادرى شنو بيستفيدون


حسوووودين

اكتب اكتب اكتب اشعار اتخلينهم يحترقون من القهر وعين الحسود فيها عود

Selezya said...

لووووووووووول والله صراحه عجبتني النكته لووووووول

والله لا يقوله انشالله عساهم للقص ان باقو بلوقكك كلش ولا بلوق براك

واحنا دايم معاك انشالله
وعسا الله يرزق بوبلال ويلقى تكريمه انشالله

Nachla said...

براك
ترى الكابة ما تلوق لك
ناطرين يديد منك
وعساك على القوة

فريج سعود said...

افا والله يا البرك ما تستاهل
واحنا معاك ووياك لو تسوي سايتك بالفارسي هم بنزورك

Pinky And The Brain said...

حبيبي براك

أعتقد إن هوتميل يوفر خدمة شراء إيميل آمن من ناحية السرقه

تأكد من كلامي

أنا مو متأكد

بس كأنه صادفني

و بعدين مو مهم الذكريات الماديه الرك عالمعنوي

Pinky And The Brain said...

و على طاري بو بلال

أنا آخذ طريق دمشق بس عشان أصبح في وجهه

يعطيني تفاؤل هالإنسان

يحترم الصغير قبل الكبير

و الآسيوي قبل الكويتي

غير الكشره العفويه و السلام الحلو

Pinky And The Brain said...

على طاري الصين

تدري إللي يسرق ما يزيد عن 3000 دولار من المال العام في الصين شنهي عقوبته ؟


إعدام


الصين ماكو مجال للمجامله بهالأمور

كل أسره عندها ولد واحد

يعني بعد قرن ماراح يكون في هذول عيال عم ذيلاك

ولا فلان أخو علان

0

أمانه يا براك مو نظام الولد الواحد حلو ؟

Pinky And The Brain said...

آسف علّقت وايد

بس ما عليه أحب هالمكان

أنا أقترح إن الإيميل الخاص بالبلوق يكون مجهول

محد يعرفه

و الإيميل إللي يراسلونك عليه الناس بالطقاق حتى لو ينباق

خل يبلونه و يشربون مايه

لأنه ماله علاقه بالتحكم في البلوق

Barrak said...

nena
Najmah
DanDash
Someday
سدرة العشـــاق
very.q8ya
Noor
Selezya
Nachla
فريج سعود
:'(

اشكركم جميعا
من كل قلبي
وبوبلال سيقرأ ماكتبتموه له

شكرا

Nora said...

و انااااااااااااااا
والله العظيم انه يضيق خلقي لي دخلت بالغلط شارع دمشق من زحمته
بس من اذكر انه موجود
انشكح

واااي انطر ايني الدور عشان اشق الابتسااااااامة

عسى الله يشرح قلبه و يرزقه من حيث لا يحتسب
لا صج صج مأثر في حياتي هالانسان السمح
:)

>
>
اما انت يا استاااذ براك
عسانا ما ننحرم من عذب كلامك
رضوا و الا انرضوا هدني عليهم بس لي ياك شي
;P

esTeKaNa said...

عسى ربي يحفظه ويشرح صدره ويعطيه من خير الدنيا والآخره على كثر القلوب اللي تحبه وتستبشر بويهه
:)
سنين يا براك
من كنت اروح الثانويه
لي خلصت جامعه
لي قعدت من غير شغل
وانا كل ما امر اشوفه
الله يوفقه يارب ويعلي من قدره



اما انته يا براك يا شيخ البلوقرز كلهم..روحك الطيبه
وعذوبه كلماتك
احساسك واحترامك لكل زوارك
يحتم علينا نبقى حولك وين ما تروح
مامنا فكه
:))

Barrak said...

a7La eNG

هالانسان السمح
ربك استجاب لدعاؤه ولدعاء الصادقين امثالك
وتمت ترقيته لوكيل ضابط وهذه بوادر خير من وزير الداخليه الجديد الشيخ جابر الخالد
وقد اشاد فيه بصوره شخصيه

الديره بخير

Barrak said...

esTeKaNa

سيدتي
ربك كريم
واليوم الاحد سوف تتم مراسم ترقية هذا الرجل من قبل وكيل وزارة الداتخليه بناء على القرار الوزاري الذي اصدره وزير الداخليه الجديد

اشكرك

kuwaitya_7saweya said...

يستاهل بوبلال رتبة ضابط مو وكيل ضابط بعد
ولو يستاهل بو بلال
اكثر من ترليووووووووون
عافيه
ولو بس ولو

Barrak said...

kuwaitya_7saweya

اي والله يستاهل

فعلا الديره على الاقل فيها ناس تقدر

Q80MINI said...

العم بو بلال احلى شي اشوفه الصبح وانا رايح الدوام والظهر وانا راد
شوفته تفتح النفس وتخلي الواحد يتفائل:)
الله يكثر من امثاله وعسانا نشوفه مدير الإدارة العامة للمرور
قولو امين! يه!

اما النكتة ذبحتني والله:)

Barrak said...

Q80MINI

اهلا بمرورك الراقي سيدي

مدير عام مره وحده
اهو 9 سنين يالله رقوه
هالدور مدير

ابوعبدالرحمن said...

لله الحمد على كل حال أخوكم فارس شارع دمشق تم ترقيته لوكيل اول ضابط بالاقدميه ويستاهل وانشاء الله يرقى ترقية استثائية من الوكيل او الوزير لحبه لعمله وتفانيه وحب الناس له ورفع وتطبيق شعار الشرطة في خدمة الشعب طوال سنوات عمله الدؤوب ويستاهل ترقية ملازم وشكرا شكرًا لمحمد بلال