Monday, November 12, 2007

حبول

جلست اكتب ابياتا جديده عن الاحلام وفجأة سمعت صوت اخر العنقود وهو يبكي وطارت كل الافكار مني وتذكرت ايام الصبا ايام المراهقه عندما كنت اكثر واحد بالدنيا يزعل ليش ماأدري وأذكر من كثر الزعل اجلس بالغرفه أياما عدّة ، أذكر الوالد رحمة الله عليه كان يمر عند باب غرفتي ويقول شوفوا هذا لايكون خاس
الله يرحمه كنت أدناة الدون أزعل ماكو شي عاجبني الحبيب افلاطون عصره المهم مرت علي هذه اللحظات وأنا افتر مع اخر العنقود لينام وقد عقدت العزم على الغاء الكتابة عن الاحلام واردت ان اشرح حالتي التي اعيشها في هذه اللحظات شايل اخر العنقود وأفتر فيه من دار لي دار
في كل دار بنيت فكره وشرحت الحال بالتفاصيل
اليكم الحال
هذي تاليتها
نهيهي بأنصاص الليول
هذي أخرتها
يسهرني ياهل هالطول
تبيه يسكت تترجاه تطلبه
تغني له تطق له رقبه
ولو بغى ترنعله طبول
هذي تاليتها
نهيهي بأنصاص الليول
وين قبل أيام دارك بروحك
كانت مصنع ارتباكات طموحك
أه ياداري خليتيني بهالحاله
ياداري محيسن لفح لفحناله
وكل هذا ماقبول
هذي تاليتها
نهيهي بأصاص الليول
يايايب الدوى يامودّي الأطبّه
تحس مرات جنك داش بشبّه
شايل ولدك وعلى جتفك يتحلّم
اهو مرتاح مهتني وانت تتألّم
وباب النقاش مقفول
هذي تاليتها
تهيهي بأنصاص الليول
قمت اقول قصص عن الخرفان والفيل
الساعه 2 أصير مو براك سبيل
هذا منومه وذاك موعد دواه
الساعه 2 قصص ومداراه
ماخليت شاذي وبلبول
هذي تاليتها
قمت آكل حبول
هذي تاليتها
تهيهي بأنصاص الليول
12/11/2007
الأثنين
الحبول هو البيض المتواجد بأحشاء السمكه

32 comments:

Q8i_Blogger said...

ههههههههههههه

قوي قوي الشعر

هاردلك اخوي

ليش التهور والزواج يا خوك

Fahad Al Askr said...

اللي يبي الدح

عَـــــــــــــذبه said...

الحين فهمت ليش فريد الاطرش و عبدالحليم ماتزوجوا..
.
.
علشان الحلم يظل صاحي
.
.
بس عب وهاب تزوج
ونزار تزوج
وبدر بن عبدالمحسن
كان يتزوج مع كل قصيدة
.
.
هو الزواج
ولا الروتين
ولا الاطفال هم اللي يقصقصون اجنحة الاحلام..
!!
.
.
بس البوتم لاين
ان المحظوظة هنا
هي ام العنقود كله
ماشاءالله عليكم
انت اللي تودي الطبيب
وانت اللي تدادي وتهادي
وتدبخ
وتقص القصص
وانت اللي ماتنام
.
.
الله يخليكم لبعض
ويخلي لكم
.
والله ياختك مادري شكتبت فووق
انا نص نايمه
.
.
تحياتي

Someday said...

Wallah ya zeynhom 3asa allah ey’7alyhom lik :) that was so cute

78o8eYa said...

صبحك الله بالخير يا بو عبدالله
:)

أثاريك انت اللي البارحه ماسك ياهل عيّا لا ينام
;p


أحلى سطر عجبني

شايل ولدك وعلى جتفك يتحلّم
اهو مرتاح متهني وانت تتألّم

هذي الأبوة
^_^
عسى ربي يطرح فيهم البركة
وتشوفهم رياييل ينشد الظهر فيهم
:)

Barrak said...

Q8i_Blogger

اولا
حبيت اوضح نقطه ترى هذي الامور استمتع فيها وايد
وهي من باب المداعبه والسخريه من وضعي الحالي والسابق
وبصراحه الوضع الحالي فيه اجر ومتعه
والوضع السابق كله زعل واضاعة وقت

صدقني مو تهور
انت جرب وبعدين احكم

Barrak said...

Fahad Al Askr

دح الموي

Яeema said...

يا حلوها من متعه ليه طابوا و قعدوا يتنططون جدام عينك
تقول بس مابي من هالدنيا شي


عساك ذخر لهم إنشاء الله

المال والبنون زينة الحياة الدنيا




بدونهم صدقني مالقه الدنيا

Barrak said...

عَـــــــــــــذبه

فعلا كنتي نص نايمه
بس مبدعه

درر درر
علشان الحلم يظل صاحي
ياسلام

الحمد لله على نعمته
ربي ولك الحمد والشكر

Barrak said...

Someday

الله يخليك ويسلمك

الـفــــجـــ الــبـــعـــيـــد ــــــر said...

سبحان مغير الاحوال

يعطيك العافية براك والله يحفظلك عيالك ويخليهم لك ويخليك الهم

جان ايوع واخطري في حبل =)

Barrak said...

78o8eYa

صبحك الله بالورد

هلا اختي

شايل ولدك وعلى جتفك يتحلّم
اهو مرتاح متهني وانت تتألّم

بصراحه البيت الاول ماكان جذيه

ولاكلمه مول ماتتكلم
انت تتألم وهو يتحلّم

وتم التعديل

ربي يسلمك ويخليك ويحفظك

Barrak said...

Яeema

ايتها الام الصادقه
شعور الام مهما كان دائما يتفوق على شعور الاب
هذا من وجهة نظري الشخصيه

احمد الله على نعمته
ربي لك الحمد والشكر
وربي يخليلك عيالك ويطرح فيهم البركه

esTeKaNa said...

عيل ليلتك البارحة كانت صباحي
طق رقبه
ونيهيهيهي
:Pp~
اسم الله عليه الرحمن الرحيم
عسى ربي يحفظهم ويطرح فيهم البركه
باجر يا براك اذا كبرت ودخلت سن العساره والحنه
وتقاعدت وقعدت بالبيت
بتجابلهم وتكرف قلوبهم
مثل ما اهم يوما ما كرفو قلبك
وتمضي الحياة
:Pp~
اليوم كلماتك كلها أبوة وحنان
عسى ربي لا يخليهم من أبيهم
:)

Barrak said...

الـفــــجـــ الــبـــعـــيـــد ــــــر

لابد من المساعده بين جميع الاطراف
اشكرك على دعواتك الصادقه

نسيت اسألك هل الحبول تطلق على بيض السمك عندكم ؟
ثانيا بما انك تكلمتي عن الحبول لازم اشرح ليش انا كتبتها

بصراحه الله يزيد النعمه ماأحب الحبول بس غصبوني اليهال اكل الحبول
وقمنا ناكل حبول
ذيب مو براك

Barrak said...

esTeKaNa

اهي بس صباحي
اهو بس طق رقبه
الحمد لله والشكر
فيه ناس الله مارزقهم عيال يتمنون لحظه من هاللحظات
احمدك ياربي

اشكرك على كلامك الراقي سيدتي
بالنسبه لي انا بلشت بالحنه من اللحين
والعساره مابقالها شي


اشكرك على كلامك الراقي

ezain_kilah said...

لووووووووووول جزا الوالدين الجنة

الله يخليك لهم ويخليهم لك ويبلغك بحبيبينك...نفر...نفر-على قولة مسرحية ريا وسكينة

بس إنت حالتك تهون...أنا بنت إختي كانوا يفترون فيها بالشوارع تالي الليل, وشوفها الحين...اسم الله عليها صارت أطول مني ويا ويهها!

nadeyah said...

الاطفال احباب الله

يا حلو هالشعور بس لا يمرضون اليهال عساره تستحمل بس المرض لا يصيرون جنهم خرجه واللله

الله يحفظ لك اخر العنقود وخشيم الفار واخوه

فى حفظ الرحمن

kuwaitya_7saweya said...

لووووول
الله عليك
يستاهل اخر العنقود
وباجر لما يكبر بشيلك وبتذكر القصص
لووووووووووووووووووول

kila ma6goog said...

الله يرحمه العود

الواحد ما يحس فيهم الا لمن يصير بمكانهم

مو تزعل عاد

magnoonah said...

اي اي تحلطم يالشيبه تحلطم بعد

:))
تنكر انها اسعد اللحظات
تنكر انك مستمتع فيها
تنكر ان ساعات ودك هالوقت ما يمر ولا ينتهي


الله يخليك لهم ولا يحرمك منهم وتشوفهم رياييل كبار يشيلونك على جتافهم ويقومون فيك

:)
يمكن انت تتحلطم بس صدقني الابتسامه ما فارقت ويهي وانا اقرى كلامك


مشكوور على هالاحاسيس الحلوه

DiLLi O MiLLi said...

اللـه اللـه ياااا براااك
لوحــه حنونه تخنق العبرة
اللـه يطرح فية البركه .. ويشيلك في كبرك مثل ما شلته في صغرة



عندي لك بشاره

رفيجك رقوووه


:)

Barrak said...

ezain_kilah

جزاك الله خير

بالنسبه لبنت اختك الله يحفظها بس اعتقد مسألة التهيهي عند ابوها جدا مختلفه انا حدي التهيهي بالبيت اهم مساكين
فراره بنصاص الليول بالشارع

الله يعينهم
وكل صغير يكبر

Barrak said...

nadeyah

الجو هالايام لعب فيهم وفينا دور

اشكر دعاؤك الصادق
وترى خشيم الفار حاشه طشار
الله يشافيهم
ويعينني

Barrak said...

kuwaitya_7saweya

ماني متخيل انا اكحكح ووليدي يشيلني
كل شي جايز

الله يصلحهم

Barrak said...

kila ma6goog

الله يرحمه ويغمد روحه الجنه

عمره كلامك مايزعل
بل يشرّف

اشكرك

Barrak said...

magnoonah

لا عاد صج وايد قمت اتحلطم وايد

كل شي بهالدنيا لازم ناخذ منه عبره
مانبيهم يشيلونا على جتوفهم نبي ربي يصلحهم ويقومون فينا اذا خرفنا

مشكوره على دعائك الحلو

Barrak said...

DiLLi O MiLLi

حلوه كلمة لوحه حنونه

الله يسلمك ويخليك

البشاره ادري فيها دق علي وبلغته بكلامكم الراقي

فيه كلمة قالها بوبلال للوزير بيوم ترقيته قاله طال عمرك عيالي واهلي كلهم مستانسين مشكور
قال الوزير جابر الخالد مو بس عيالك كل الكويت مستانسه عشانك

والله الديره فيها ناس فيها خير

اشكرك

Ealaf said...

هههه آجركم الله على ما تلاقون من تعب

كلمات جميلة كما عهدناك مبدعًا

Barrak said...

Ealaf

اشكرك سيدتي
وكل تعب بأجره

الـفــــجـــ الــبـــعـــيـــد ــــــر said...

براك
هي نقولها جيه
حبل للمفرد وحبول للجمع لوول
بس انا وااايد احب اكلهم
ادورهم دواارة في السمج يوم ابلح

Barrak said...

الـفــــجـــ الــبـــعـــيـــد ــــــر

عليج بالعافيه والله يزيد النعمه