Monday, September 24, 2007

ديانه



ابن آدم ضعيف أقوى مافيه لسانه

لاالنسب ولا الحسب ولا الفلوس تكبره

هالدنيا كل حساباتها ترى خسرانه

والفهيم من خذى من دنياه العبره

ليش مالواحد يخلّي إيمانه بوجدانه

لوسامح وعفا شاللّي بيخسره

لو درى ابن آدم اشضعفه بزمانه

كان انتهى موضوع الندم والحسره

الدنيا أبد مافيها خير سمعوني آنا

القلب اللي يبرّك بالطيب برّه

أبد ماهي مواعظ أو زود ديانه

القلوب بالكذب صارت متخدره

لو كل شخص يثمّن كلام لسانه

كان الخير مثل النفط نصدره برّه

4/12/2004
السبت

40 comments:

Q8DOLL said...

والله صدقت
اللسان ممكن يبعد الناس عنك
وممكن يقرب ناس لك
قالوها
لسانك حصانك ان صنته صانك وان خنته خانك

وأحيانا اخوي براك
قلمك وما تكتبه يقرب الناس منك
وممكن تبعدهم بعد عنك
وانت كسبت الناس باللي تكتبه
الله يديمهامن عليك نعمه
وصح لسانك :)

قواك الله

`~MnO YeNSa! ~` said...

ما شاء الله عليك 100% صح و بعد ابصم بالعشرة و على قولتك الانسان ضغيف و ما فيه الا لسانه وفيه يكسب الناس كلهم و بيده يخسرهم كلهم و يا بخت اللي ينذكر بالخير..

حكم عظيمة تفيدني كثيرا و شكرا لك ولمدرسة الحياة

Purplecious said...

صح لسانك يالبرك

و حمدالله على السلامة

:))

Barrak said...

Q8DOLL

والله صدقتي
سيدتي
انتي اختصرت كل اللي بقوله بجملك الرائعه

حتى الرسول صلى الله عليه وسلم اوصانا بالانتباه لما يقوله اللسان

وفعلا الكتابه امانه
ولابد ان نخاف الله فيما نكتبه حتى لو اختيارنا وقع على موضوع هزلي
او حتى عندما نعلق على موضوع عند الغير
فالكلمه تجرح
عموما ماكتبته يتكلم عن اللسان وادمان الخير وحسن النيه
وهي نفحات ايمانيه
اشكرك زميلتي السابقه
صاحبة التعليق الاول

الوجد said...

اولا الحمدلله على سلامتك


كلماتك كثير حلوة



ولو كل واحد منا تحكم بلسانه



لعشنا بسلام

kila ma6goog said...

صح لسانك يا ولد العم

Najmah said...

صدقت والله وصح لسانك

كلها حكمة

sologa-bologa said...

صح لسانك استاذنا

وأثني على كلامك بأبيات شعر لعلي بن أبي طالب

كن ابن من شئت واكتسب أدبا
يغنيك محموده عن النسب
إن الفتى من قال ها أنا ذا
ليس الفتى من قال كان أبي

The Voice Within said...

والله صح لسانك


الواحد شماخذ من هالدنيا

Kuw_Son said...

صح لسانك يا براك ..

إلا يقولون سعر برميل النفط مرتفع هالأيام
:P

Barrak said...

`~MnO YeNSa

هذا مو كلامي هذي هي الاصول وبصراحه دايما الواحد اذا سمع كلام جارح عنه ومو صحيح يتأثر وايد
لازم نحس بهالموضوع قبل لانسويه

في مجتمعنا كلام الناس وظلم الناس لبعضهم البعض بالكلام وايد يجرح

Barrak said...

Purplecious

صح بدنك

والله يسلمك من الشر

Barrak said...

الوجد

اولا الله يسلمك من الشر
ثانيا شهالغيبه

ثالثا
الكلام اللي قلتيه هذا مو تعليق هذي حكمه

Barrak said...

kila ma6goog

صح بدنك ياخوي

Barrak said...

Najmah

صح لسانج اختي
اشكرج

Barrak said...

sologa-bologa

انت الاستاذ يااستاذ
ولاكلام فوق كلام علي بن ابي طالب كرم الله وجهه

Barrak said...

The Voice Within

والله صح بدنك

مو ماخذين منها شي

Barrak said...

Kuw_Son

صح بدنك ياخوي

البرميل مرتفع الاراضي مرتفعه اليورو مرتفع
وواحد من الربع رد من السفر وصاير مرتفع

يالله عاديه السالفه

بـوبـحــر said...

يا صديقي

ياعزيزي

يا رفيقي


احسن مافي الانسان ندمه ..وكل ماندم كل ماتقدم..احسن مافيه لسانه ...لانه كل ماتكلم كل مافهم

بس بيني وبينك خلنا انا وياك نرجع ..كم واحد فينا يفجج من هالمساطيل حوالينا ...

نسيت يوم كتبت ..بانه العالم مسطول بحشيشه تفوق الجوده اعلى المعايير..

خلهم بسطلتهم ..يمكن باجر يصحون ويندمون ويبجون ويقولون اخ وينا وياليتنا كنا صاحيين ...

عزيزي براك لك كل التحية والاخلاص ...

انا مليت ..وانت باجر راح اتمل

والي يمسكنا ضميرنا وراح انرد نكتب..

حنطفيس said...

هذي أم ناصر

لسان طويل والحيل قاصر

magnoonah said...

يا ليت احد يسمع منك


صج انت كاتبه من زمن بس وقته وووقته ووقته

ما ظنتي بتم الحال شكلها للاسوء

راح احاول اتفاءل

وصح لسانك على هالكلام الراقي

نصيحه عسانا نحفظها ونذكرها

kuwaitya_7saweya said...

اي والله اي والله
صح لسانك براك

mtfa2el said...

لو يدري بن آدم انه لسانه حصانه
و انه لسانه اهو الميزان اللي ينوزن فيه
جان اعتبر و حافظ عليه
بس منو يسمع يا براك

esTeKaNa said...

ليش الواحد ما يخلي ايمانه بوجدانه؟
اي والله يا براك بوجدانه
لو خلا هالايمان بقلبه
بيزين كل اخلاقه
الايمان والديانه مو لحيه ونقاب وبس
لااا
الايمان
اخلاق
وسنع
والتزام وادب
ومنهج حياه كامله
صح لسانك
:)
اشلون خشيم الفار؟
ماكو قرقيعان؟
:)

Barrak said...

بـوبـحــر

انا علي اقول النصيحه واللي يبي يتفاءل احسن له واللي مايبي من قرادته
يااستاذي
مشروع السطله مشروع مشيّد بتقنيه راقيه

بس ترى ماراح امل
لانه للحين فيه ناس تخاف الله بلسانها وبوطنها
وبس
اشكرك

Barrak said...

حنطفيس

السؤال اللي يطرح نفسه
كم ام ناصر موجوده
وماهو دورنا في محاربة ام ناصر

Barrak said...

magnoonah

النصيحه مالها زمن ووقت
صدقوني الانسان ضعيف بس لسانه اقوى شي فيه

والدلايل كثيره
يامجنونه

Barrak said...

kuwaitya_7saweya

صح بدنك

Barrak said...

mtfa2el

ترى انت بآخر 3 بوستات ماتقول إلا حكم ومواعظ

كبير ياخوي

Barrak said...

esTeKaNa

هذا المقطع الوحيد اللي خلاني من خلاله ابتدي القصيده ان جاز التعبير

الاخلاص
وجود الايمان بالوجدان

كل مننا يستطيع ان يصلي ويخاف الله
ولكن العظمه بالايمان تكون بالاخلاص

بالنسبة لخشيم الفار من داوم بالروضه وهو محد عاجبه بس ابشرك طالع طلعه يديده يسمي القرقيعان
قرقرعان

78o8eYa said...

الحمدالله على السلامه
وقرت عينا بردتك

ولو كنت مخضوض شويه من الطياره، ما عليه
المهم شوفتك سالم
^_^


تسلم يمينك على هالكلام الطيب

جنك اليوم حاس فيني

"الدنيا أبد مافيها خير سمعوني آنا
القلب اللي يبرّك بالطيب برّه"

lawyer said...

اي والله مو سالفه ديانه

الا سالفه القلب الي خلقه القران و بس

و الرسول يقول
الدين خلق

و انت اختصرت الاخلاق بتصرفات تطهر القلوب

اي والله مو سالفه ديانه

Barrak said...

78o8eYa

الله يسلمك يااختي القانونيه الرقيقه

انا بس مخضوض الا طايره بوهتي من الخوف اللي قاعد يتجدد بصورة مو طبيعيه
قبل كنت اسولف ويا عمري اللحين قمت اصارخ والقادم اعظم


الدنيا أبد مافيها خير سمعوني آنا
القلب اللي يبرّك بالطيب برّه"


فعلا من جعل الدنيا هي جل اهتماماته لن يربح الكثير ومن يقدم لك الخير قدمله الخيرات لان الواحد مايبي من الناس غير كلمة الله يذكره بالخير او والنعم
اللي خلقله اعداء بدنياه شاللي اربحه؟

اشكرك سيدتي
الحاضره الغائبه

Barrak said...

lawyer

اخاف يقولون هذا بس عشان رمضان يسوي روحه ديّن
اهي السالفه مو سالفة ديانه
اهي سالفة خوف من ربه وتطهير لخطايا القلب والروح
الصيام هو تهذيب للروح والعقل
والله تعالى بعث نبينا محمد ليتمم مكارم الاخلاق
وانك لعلى خلق عظيم

اشكرك سيدتي

Selezya said...

درر درر

صح لسانك اخوي العزيز براك

كلامك بالواقع وياليته حلم مو واقع

بس الشكوى لله

Barrak said...

Selezya

صح بدنك اختي العزيزه
واخاف يجي اليوم حتى الحلم يصير حرام

الشكوى لله

Anonymous said...

مو غريب عليك...



كعادتك
مبدع


يحفظك المولى..



.....
(روح)
ashlaa-roo7

Barrak said...

روح


ومو غريب عليك هالمرور الراقي

اشكرك سيدتي

my sold said...

مررت لقول

كل عام وانت بخير

Barrak said...

my sold

وانتي بخير وصحه وسلامه