تذكرون أيام الغزو
يوم اذبحوا كل شي حلو
أيام الإعتقالات
أيام الباصات
اللي شالت شباب الكويت
وراحت لنينوى والبصره
وعند الناس اللفو
تذكرون أيام الغزو
،،،،،،،،
تذكرون السيطرات
وأهل الهوسات
وصيحات الماجدات
ماكان في كويتي واحد
يقول : أنا شكو
تذكرون أيام الغزو
،،،،،،،،،،
تذكرون دموع جابر
يوم بجى على الديره
وربّى بدمعته مشاعر
خلّت حب الوطن سيره
يوم الناس كلهم
عشانه صفقوا ووقفوا
تذكرون يوم الغزو
،،،،،،،،،،
تذكرون عيال كيفان
خلوا المنطقه ميدان
داسوا على روس المغتصبين
علموهم شنو يعني كويتيين
وشنو يعني ندوس العدو
تذكرون أيام الغزو
،،،،،،،،
تذكرون يوم على السطوح كبّرنا
وسمّعنا برنا وبحرنا
الله وأكبر على الظالم
وإسمعونا كل العالم
وقالوا ونعم فينا
والله كفو
تذكرون أيام الغزو
،،،،،،،،
تذكرون يوم الضربة الجويه
يوم إشبقتنا الدنيا
وكان الأمل يبرق
كانت القلوب تخفق
وطارت أسراب المحتليين
مثل الطفو
تذكرون أيام الغزو
،،،،،،،
تذكرون يوم حلفنا نحب الوطن
ومانخليه مهما دار الزمن
تذكرون إغنية وطن النهار
اللي بكّت كبار وصغار
منو مابجى يومها منو
تذكورن أيام الغزو
،،،،،،،،،
وحقول البترول يوم حرقوها
وعيال الكويت بعزيمتهم طفّوها
ماهمهم نار ولا حروره
كان حب الوطن ضروره
ماخافوا دخان وإلا ربو
تذكرون أيام الغزو
،،،،،،،،،
بأذكّركم بذيج الأيام ياكويتيين
شوفوا انتو شتسوون اللحين
صرنا مفترقين
ماقمت اسمع كلمة كويتي
بس سلف -شيعه-حضر
وبدو
نسيتوا الغزو؟؟
28 comments:
الله يرحمه امير القلوب ويسكنه فسيح جناته
والله لا يعيدها من ايام سوده وذكريات تعيسه
صح لسانك
نغيب ونتغير ولكن نعود فنجد براك متمسك بإبداعه وأصاله فكره وجمال كلماته وعبق الماضي في نظمه وسرده
لله درك من مبدع تأسر قلبي عندما أتصفح روائعك :)
نغيب ونتغير ولكن نعود فنجد براك متمسك بإبداعه وأصاله فكره وجمال كلماته وعبق الماضي في نظمه وسرده
لله درك من مبدع تأسر قلبي عندما أتصفح روائعك :)
كنت موجوده
بس عنونه :$
فالصراحه ما أذكر
تسلم إيدك على هالكلمات
ويعطييك العافيه
حرام اعلق زياده أظلم الكلمات بعدين :]
يبتها على الجرح يا براك
مو بس صح لسانك إلا يسلم راسك بعد
صح لسانك ..
ما نسينا ولا نقدر ننسـى :(
-------------
بـراك صراحه لي مده معاي أمانه لك وكل ما نويت أوصلها أنسى :)
بنت وحده من البنات الي معانا بالدوام زايرتنا من فتره بالدوام وشفت معاها ديوانك حدها طايره فيه وامها بس تتحلطم لان البنت مستخفه على الشعر ومطنشه الدراسه على قولة الام بدال ما تشوف بيدها كتاب علوم والا رياضيات ما تشوف الا ديوان براك ..;p
عاد وانا قاعده اسولف مع البنوته تفاجـأت بصراحه ان لها محاولات انها تكتب مثل كتاباتك تقلدك بالاسلوب والطريقه ..
وانا وعدتها اني آخذ وحده من هالمحاولات مالتها وأوصلها لك ;D
طبعا اهيا مو مصدقتني وإعيزت تحاول اتعرف اشلون راح اوصلك اياها وبما ان امها مانعه عنهم النت وهالسوالف والا جان عطيتها موقع مدونتك لكن احترمت رغبـة الأم :)
مدرسه
فيها الدراسه معفسـه
دين ورياضه وهندسه
فيها ادارة مفهرسه
حتى المواد إمسيسه
صج مدرسه
تابعه لوزارة تربيه
ينقصها العطاء والتضحيه
ما يبون غير الأذكيـه
للفوز بمسابقات التربيه
خوووش مدرسه
مدرساتنا سوريه ، هنديه ومصريه
شوفيلنا صرفه يا نوريه
درجاتنا مقابل الفلوس والهديه
عشان نحصل 60 بالميـه
إيــه مدرســه
مدرسات تلعب طول السنـه
وتاليتها أنيابهم مسننه
وقت امتحانات آخر السنــه
خلونا نعيد السنـه
أكو أحلى من هالمدرســه !!
ان شاء الله الأمانه تكون وصلت واعذرني لاني تأخرت في توصيلها :)
الله عليك يا بوعبدالله
عورت قلبي
وختمتها صح
تسلم الايادي يارب
وصح السانك بكل كلمه نطقها قلبك يالشيخ
,,
كوييييييييييت
كويت
كويت
والله العظيم لو مو ذاكره بردج انه البنت اهي الي كاتبه هالحجي
والا والله جان قلت هذا برااااك
بو عبدالله
ماشالله عليها
عجيبه
براااااااااك
في وحده تنافسك
الله عليكم
إنتو
شي ثااااني
ما شالله
:)))
الله لايعيدها من ايام
بس للأسف محد يتعض ويتعلم
صح لسانك
* لزهيرية كانت حق رحمة الله عليه *عبدالرحمن الضويحي
صح لسانك لا تكفي لما سطرت
لا اعلم كيف أعبر عن ما كتبت
من أفضل ما قرأت في المدونات الكويتية اطلاقا وأكثرها اختصارا
--
"ماكان في كويتي واحد
يقول : أنا شكو"
نبي هالهمة في الانتخابات
"تذكرون دموع جابر
يوم بجى على الديره
وربّى بدمعته مشاعر"
الله يرحمه
ويرحم أيامه
وعلى اللي يدمع للديرة
"تذكرون عيال كيفان
خلوا المنطقه ميدان"
وستين نعم
"تذكرون يوم حلفنا نحب الوطن"
ما نسينا حلفنا
"شوفوا انتو شتسوون اللحين"
مع الأسف
--
الغزو وانا أخوك أمس للكثير منا
ناسين أشياء من الاسبوع اللي فات لكن تفاصيل الغزو نذكرها بريحتها وتفاصيها
أحييك على هذا البوست
شكرا
هو كان فيه غزو
؟؟
ذكرياته طارت مثل الطفو
تصدق عاد
حتى أغنية وطن النهار أعادوا إخراجها
وقتلوا فيها أحلى مناسبة نذكرها
شنو اللي بقى بعد
!!!
بعد اذنك براك
رسالة إلى المدونة
KUWAIT
ما شاء الله على هالبنية
اهتموا فيها
عندها حس راقي وجميل
ودمتم بحب وود
صبـا ..
اييييييي انا بعد لما قريت كتاباتها حسيت نفسي قاعده اقرا لبراك حيل قاعده تحاول تقلده :)
سلوقا بلوقا ..
@@
أم البنت تشوف ان الدراسه اهم من اي شي ثاني ومن النوعيه الي ينظرون لمواهب الشعر والرسم وغيرها نظره سطحيه وما يتعاملون مع البنت على اساس ان عندها ابداع لا بالعكس يحبطونها لدرجة ان البنت ما كان حتى عندها ثقه بنفسها وما كانت راضيه تراويني كتاباتها متفشله وتقول ان خرابيط مثل ما امها تقول عنها :)
ايه والله اذكره الله لا يرده ..
يعطيك العافية براك.. لكن من الي يتعض...
هكذا تجد الغزو في كل بلد
ولكنه بصور مختلفة
ولكن نتيجته واحدة
التفرق
دمت بخير
مَـــــعْــــمَــــعَـــــه
الله يرحمه ويرحم الشيخ سعد
اشكرك على تعليقك الاول
شكرا
مطقوق
صح بدنك
رجل يحمل مشاعر
سيدي الراقي
كم اشتاق لوجودك هنا
وكم اسعد بكلماتك الصادقه
فهي تشجعني
جدا
تقبل احترامي سيدي
U-Turn
جذيه انتي كبرتيني
انا كان عمري 16
يالله الجدوه
اتمنى ان لاتمحى هذه الذكرى
لو استنبطنا معانيها
حتما سنتغير للافضل
كبرياء انثى
صح بدنك
مشكوره سيدتي
تسلمين
Kuwait
صح بدنك
فرحني كلامك وايد
قولي حق شاعرتنا الكبيره
براك يقولك انها اكبر من اني اقيمها
البنت واقعيه دمها خفيف
عندها القدره على اختيار كلماتها بذكاء
فيها ادارة مفهرسه
هذا قصدي بالذكاء
ياسلام الله يحفظها
انياب مسننه
الله الله
وقوليلها بعد
رايي انا مو مهم
شوفي راي صبا وسولوجا
حسوا بالكلمات وهذا الشي كافي
مو مهم انا شقول
قوليلها استمري ولاتهابين
وشرف لي ان ديواني يكون بين اياديها
ومشكوره على توصيلك للامانه
صبا
صح بدنك
ومشكوره على وجودك وتعليقك
ومشكوره على تشجيعك للبنت
اهي تستحق منكم التشجيع
ميمة السبيت
وليش محد يتعض
وليش وليش
ليشات وايد ياوخيتي
قبل جم يوم شفت اسم شعيده بطله من شهدائنا الابرار على فرع لوازم العائله لجمعية السره
تخيلي
وين تبين نتعض
بالنسبه للزهيرية
الله على اختيارك
قلتلك جني سامعها
كان حلمي اني التقي بالمرحوم بس شقول غير الله يرحمه
اشكرك وايد
كويــتي لايــعه كبــده
حبيبي انت
وصلت مشاعرك
والله الحره اللي بقلبي والتناحرات اللي اشوفها اهي اللي اكتبتني
ليش صرنا جذيه
الغزو ربى فينا اشياء وايده ليش فجأة انتهت وانمحت
معقوله مااستفدنا شي
صدقني انا انسان اشوف الوضع واشوف العله فينا احنا
ماقمت اسمع كلمة كويتي
انتهت هالكلمه ياخوي
واحنا اللي نهيناها
بس عموما
فيه ناس فيها خير
والامل بالله دايم مايضيع
اشكرك ياخوي الغالي
وايد
Kuwait
قولي لام البنت حرام تقتل موهبتها حرام
sologa-bologa
اخاف يجي اليوم ونقول اهو فيه ناس كفو
اخ ياخوي
كلامك يزيد ناري نيران
دائما راقي بتشجيعك ياخوي
ماأنكر افضالك علي
ماحييت
حاليمة
الله يعافيج
بالنسبه لسؤالج بعد الانتخابات اجاوبج
بنت أبيها
نورتينا سيدتي بنت ابيها
كلامج عين العقل
الله يبعد التفرقه عن بلاد المسلمين
Post a Comment