اعتقد أني دخلت إلى الان 690,787 مليون سحب على جوائز ولامره فزت ، ومن القهر كتبت
،،،،،،،
،،،،،
،،،
،،
مو معقوله صك عمري فوق الثلاثين
ولا مره بالغلط فزت بهديه
لاقلم لاجنطه لاخرجه لاكراعين
مافزت بسحب فرع جمعيه
ابي بالغلط أفوز بديرمه وفازلين
راضي بقلاصات راضي بصينيه
يقولون الحظ مايموت أقول كذابين
أنا حظي مات وماربحت قحفيه
اكتب كوبونات فوق الالف ألفين
ماأخلي رقم فنيله لارقم جنسيه
أبي مره بالغلط أربح جلابتين
ترى بتصير فيني عقده نفسيه
اذا يبيعون حظ قولولي وين
ترى حظوظي هالايام وايد رديّه
،،،،،،
لو يسوون سحب على أفنديتين
أطلع الأخير وورقتي ملغيه
أدش السحب ياخال يابوثنتين
يفوز باكستاني وتفوز هنديه
لو يسوون مسابقه أنا وإثنين
اطلع عليهم الرابع بالتبعيه
لو غيري يشق هدومه نصين
ويشتغل صبي بالصحه المدرسيه
ودي يقولون اني فزت بتفاخيتين
او كنافه او زنود الست او لوميّه
ودي يسموني براك بوحظين
ودي يبشروني اني فزت بنويبيه
قهر صك عمري فوق الثلاثين
مامره الحظ ابتسم لي شويه
،،،،،،
،،،،
،،،
28/06/2008
السبت
83 comments:
برااااااااااك
اسم الله عليك
يعل انشالله دوم حظك حلو
واحسن من حظي
عاد اتصدق انا حظي حلو ..
انا ما شالله علي مشنصه
بكل شي
لدرجة ان بنت اختي اذا عندها كوبون باي مكان تحط اسمي والله وتفوز
انا اعطيك حل؟؟؟؟
اذا عندك كوبون حط اسمي وشوف حظك اشلون راح يبتسم لك
وبعدين تعال:
انت شتبي بجوائز السحب من زينها
يا جريده ولا استريو ولا ثلاجه
:))))
اللهم اذا كانت سياره اوكي
؛)))))
وبعدين انت حظك حلو
عندك عبيد بعد شتبي ؟؟؟
وإحنا بعد
:P
وصرت بو حظين
من قدك
::)))))
يارك الله البرك :)
انا فزت ب 400 من الجوهرة
عاد الحظ لي تشرقد وانسدح
شيقومه يا براك
ودي اقولك سو شي
بس لو اعرف طريقه زينه جان سويتها حق نفسي
!!
مو انا بهالموضوع
على خطاك يا براك
يا حافظ حتى مغاطي البيبسي ما يطلع لي فيها شي
:pP~
جرب منت خسران شي ولا يأس مع الحياة ولا حياة مع اليأس جرب للمرة 690788
:)
وانشالله تربح
عاد صج شعور الفوز وااايد وناسة
مو شي تفوز على كبر
خل جذيه مثلي
اياك واليأس من حظك
لولا هالكم مليار تهقى كان قالها؟
ههههههههههههههه
طلعت يا وخيي الغالي من ربعي
ههههههه
مشتهيه لو بالغلط افوز
وعقب يقولون خطأ مطبعي
حتى جذي ما قط صارت
:))
بس تصدق
للحين عندي امل
والامل في الله جبييير
وما ييأس من رحمة
الله الا الكافر
وخل نجرب شورانا؟؟
وان شاء الله ربي يلتفت لنا
وقول آمين
عسى يرزقك يايراك يا خوي
الحظ الكبير دنيا وآخره
تفائل يا الراوي التفائل زين
وحظوظك بأشياء ثانيه قويه
اذا تبي ادليك انا اقولك وين
روح الجمعيات واهمهم العديليه
اشترلك شامبو وخبز وتفاحتين
وتربح على طول بجوائز فوريه
:)
لوووول
شرايك فيني ؟؟
انظم لناديي
نادي المقرودين ..مو زين و انا اخوك الفوز بالجوائز خصوصا على كبر
الواحد بعدين ما يلاقونه الا بلاس فيغاس
حب الناس لك
اكبر مكسب فى اعتقادى
ناس كتير يتمنوا الفوز بيه
ويحاولو طوال عمرهم
وما يفوزوا بشئ
..
الله يحبب فيك الناس اكتر واكتر
هذا هو اكبر مكسب
رائعه كلماتك
صديقى العزيز
وتحياتى لفكرتك الحلوة
لوووول
ايي والله مرة رحنا كل العايلة و حطينا اسمائنا بما فينا الخدامة
احنا محد فينا فاز و خدامتنا فازت بطقم صحون لوووول
:p
الله يهنيهاا
و ياارب كل حظ الدنيه الحلوو ييك
salamz....
looooooooooooooooooooooool
موتنى ضحك ههههههههههههه
برااك شتبى بالديرمه
فازليين يا حيل الله
بس دييرمه هههههههههه
الله يرفع حظك ان شاءالله ما تدرى
لا تيأس انت بس وظل عبى هالكوبونات
:)))
صح لسانك اخوي براك
تمتعنا دائما بإسلوبك الساخر
فهو مضحك إلى درجة القهقهة
ولكن شر البلية ما يضحك أخي
"
اذا يبيعون حظ قولولي وين
ترى حظوظي هالايام وايد رديّه
"
أحبب هذا البيت
سلمت يداك
شنو آخر سحب دشيت فيه ؟
:P
شكلك توك طالع من سحب و منقهر
:P
صبا
سيدتي صاحبة التعليق الاول
ايه ياوخيتي كثري من هالأدعيه
تسرسح عالجبد
بما انك حظك حلو سلفينا ترى ملينا من حظوظنا الرديه
ابشرك العبد حضه العن مني
Blog 3amty
وافادي
وافادي
kila ma6goog
ومستانس بعد
تقولها لي بالفم المليان
الله كريم
esTeKaNa
انتي حالتك كسيفه
حتى مغاطي البيبسي
عموما كلنا بالهوى سوى
خلينا نقول ونردد بصوت واحد يااستكانه
وافادنا
قلم حبر
ماقلتي هالكلام الا لان حظك يكسر الصخر
عموما لو اوصل مليارين وربع محاوله ماكو فايده
اقولج ابي افوز بأفنديه
فريج سعود
يعني انت اللحين تواسيني
يبا راضي على كبر بس اي شي
كويــتي لايــعه كبــده
انت لازم تودينا ذاك الصوب
Mamloo7a Q8ia
الظاهر اوضاعنا ياوخيتي نفس الشئ
ابي حل تكفين
ShLaLaT
شاتفاءل وانا مافزت بلوميتين
ولا حتى نقل وبفك او أفنديه
لو اروح حتى قلعة وادرين
أكيد خسران مليونين بالميه
لاتيبين طاري الشامبو انزين
احنا الصلعان ماينفعنا موليه
mtfa2el
هههههههههههههه
لاس فيجاس
والا شيراتون القاهره
princess dodo
بلسم والله بلسم كلامك
يعدل حظوظ رديه
فعلا راقيه
الله لايحرمني من هالناس ولا منك
5roofa
طلعتي مثلي
لا انتي موضوعك صعب كلكم خسرتوا وربحت الخدامه
بس زين فازت بصينيه لو فايزه بسياره جان انتقل من زمان
شكرا
charisma
محد ياب طاري الديرمه بقصيده
ولا الفازلين
ومن حرتي كتبت كل هذا
سيدة نفسي
صح بدنك
ماادري ليش قريت قهقهه ذكرت عصير منجا بمصر ماركة قها
شنو يغث
حتى عصير قها ماربحت فيه
تسلمين ياسيدة الذوق
Kuw_Son
لا خلاص حرمت
بس اذكر بالشتاء دشيت سحب سوني اريكسون على سيكل ماادري بقي
ماطلعلي حتى تاير منه
ترى حالتي حاله ياخوي
انضم لنادي المتميزيين
وخلك معاي
أنا من كثر ما يأست ما قمت أكتب كبونات المشاركة
ههههههههه
خل اضحكك وياي يا وخيي
فتحت حساب الدانه من مده
لا ودخلت معاي فيه صديقتي اقول يمكن يتغير الحظ لكن مع الاسف طافت 3 سحوبات ولا حاشنا شي
طيحت حظ المسكينه معاي
ههههههه
بس مثل ما قلت لك ماني ياأسه
يبت بنت اختي الصغيره عمرها 6 سنوات وخليتها تدعي لي كل يوم
جود والنصيب
يمكن ربي يستجيب حق دعوة هالياهل ويتعدل حظي وافوز
اذا انجحت الخطه اعلمك
تخلي خشيم الفار يدعي لك
يمكن يتعدل حظك وتفوووز
:))
أعرف ناس
يتفاءلون بأسماء دريوليتهم
و طباخينهم
و خدمهم
في هاي السوالف
لووول
لووووووووول
الحال من بعضه يا خويه
ما قمت افكر اكتب كوبونات و غيره
اذا تعدل حظي بفوز من غير شي :P
روووعه كلماتك بس استمر جود تفوز
و ان فزت نبي عزيمه كبيييره :)
الله يعدل حظك و حظوظنا
لاتيبين طاري الشامبو انزين
احنا الصلعان ماينفعنا موليه
لوووووووووووول
ضحكتني براااك
قهقهه
حالتك كسيفه يا اخوي
لوول اذا في سحوبات محد يدري عنها بقولك
احنا مره فزنا بطاوله وطقم صحون من اكيا من قواطي الحليب
لوول ما تصدق
الصندوق خالي
لي درجه ان طلع اسمنا مرتين
واسم بيت عمتي مره لوول
أعتقد إنت فزت بسباق الملايين وخرجت لهذي هالدنيا لتفوز بأب وام وبتربية مثل التي انت عليها الان
ومضت الايام ويستمر فوزك بزوجة واولاد
وبحيات طيبة تحسد عليها من كثييييير من البشر
ولقد فزت بحبنا لك وحب المدونين لما تكتب
لقد فزت بكل هذا من غير سحب
وما زلت تطمع ان تفوز يا براك
ما فائدة فوزك بسحب مليون او عشرة وان ينقص منك ما سابك وان فزت بة؟
Fahad Al Askr
أنا أحسن منك
انا قمت أخش الكوبونات ولما البنغالي يجيب الاغراض بالسياره اعطيه الكوبون ويدعيلي
عشون عيل
ماتشوف حظي طايح
Mamloo7a Q8ia
الضحك عندي على سالفتين
الاولى
من سنة 2000 عطوني هديه حساب لولدي بالجوهره
اللحين طفنا 8 سنين وماربحت حتى كاشيه
السالفه الثانيه
بتظل بنت اختج الصغيره تدعيلك وتتزوج ويصير عندها يهال ويتخرجون ويتزوجون ويجيبون يهال
وهم يدعولك وماكو فايده
اشكرك للمره الثانيه
دبي
سيدتي العزيزه
انا عن نفسي فاهم اللي قلتيه
عسب اني كنت عايش سنة الغزو في مدينة العين الراقيه
فأحببت ان اترجم لاخواننا معنى كلمة الدريوليه
طبعا المفرد دريول بتشديد الياء
والدريول هو السائق
احب حجيكم
يونس
بس عندي اسم دشداشه أحلى من كندوره
مو جي
مو جي
يعني بالكويتي مو جذيه
القصيدة دي شبه كل الناس تقريباً إلا من حالفهم الحظ من الهنود
يمكن عشان الهنود كتير ؟
لما قرأتها على والدي بارك الله فيه .. صار يضحك كثير
أضحك الله سنك ..
:)
سعدت بك يا براك.
قلب طفله
ان فزت بس بسوي عزيمه
إن فزت بسوي حفله تنكريه
ليش تنكريه ماأدري
الحال من بعضه ياختي
وغلوتك ياهانم مفيش مره بالغلط طلعتلي بطاطسايه
اشكرك
ShLaLaT
الحاله مو بس كسيفه
الا شقول
ههههههه
حسافتج يا كويت
انت تعتقد وأنا أجزم أنك راقي بكل ماتحمله هذه الكلمه من معنى
شكرا
قهوة بالفانيليا - شيماء علي
الله يطول بعمر الوالد اللهم امين
ولاتفارقه الابتسامه
تشرفت بوجودك سيدتي الراقيه
سعدت كثيرا عندما علمت ان كلامي خلق ضحكه من القلب
اشكرك
يمكن انك حزين وتدور اي لحظه وتستغلها وتنثر على انغامها حروفك
يمكن ان حسيت فعلا حظوظك رديه
ومابغيت تزعلنا وحطيت حرتك بحروفك
بمكن انك تحاول تهرب من واقعك لنا تنادينا تبينا نفهمك
نفهمك والله يابراك
حتى لو حاولت تغلبنا بخيالك
نفهمك
كمل
سلامتك من القهر
صدقني عن تجربة " الحظ ما يموت "
بس كل شي بوقته حلو
طول بالك
:)
loooooooooooool
روعه حبيب قلبي تسلم ايدينك :/
أتمنى عقب هاللي كتبته من ندب لحظك ^_^ اتييك هديه معتبره خل نقول سياره
لا تحزن يا براك فربما لو فزت بجائزه لأصابتك عين
(وعسى ان تحبوا شيئا وهو شر لكم والله يعلم وانتم لا تعلمون)
وانا مثلك لم أفز في حياتي في شيء ولست بعيدا عن عمرك فلا تحزن فعندك من يشاركك الهم :)
دائما ما اقول لنفسي بأنني ربما سيعوضني الله بجائزه قيمه تنسيني هذه الجوائز كلها.
نثر رائع اخي براك :)
لك ودي
عادي يا براك انت مو اقل مننا حظ كلنا جذي والقدر يعطي ويمنع وماظنتي في احد اقرد مني
ولكن الحمدلله على كل حال
السلام عليكم :)
اسلم على اخوي الي مامنه اثنين
هو راعي الأوله وراعي الكلمه القويه
يحرسك ربي ويحفظك من كل عين
شلك بالكوبنات وطوابير الجمعيه
.....................
والله سبحانه يعطيك بدال الحظ حظين
وانا اخوك تقبل مني اجمل تحيه
إن شاءالله فالك بدال الجنه جنتين
.......
تحياتي فارس ولد ديرتك الأبيه
ولاهنت
:)
براك
و الله مو بس انت حتى انا
انا اذا دخلت بأي سحب من كثر ما انا
قبسة محد يفوز...
يا يبا الحظ حظ الاخرة يا يبا
-===
براك ...
شوف دام ان صبا حظها زين
شرايك نروح ندور لنا عرض و نحط الكوبونات بأسمها
و الا نفتح حساب الجوهرة و الا الدانة
و نحطة بأسم صبا
و نشوف شنو يصير
لوووووووول
مانتوفاني
qaqoqa
شوف
انا لازم اتعرف عليك
لانك شقت شي انا خاشه
وتعمدت اخشه بصعوبه
لازم اتعرف عليك
كيفك عاد
GUCCI-q8
شطوّل يابنت الناس
اقولك صكيت فوق الثلاثين
يعني اذا ربحت تذكره سقر كويت باريس كويت وانا عمري 72 بالله شهبب هناك
تراب الكويت
:)
اول مره اسويها
قآرآقوش
يسلمك شكرا
banootah
راضي حتى بأفنديه
مو سياره
رجل يحمل مشاعر
انا قايلك انت رجل يحمل كنز
الظاهر انت بتفوز وبتنول من بعد صبرك
وانا بظل اردد هالنثر على قولتك
MaNaYeR
القراده تعتبر ماركه مسجله بالنسبه لي
فارس هوى الكويت
آخذ سلامك أحطه عالراس والعين
ياشاعر يتميز برقه وعفويه
انا وين والحظ الحلو مني وين
حظي اقشر من حظوظ البنشرجيه
اشكر دعاؤك واردد معك امين
ربك يعدل حظوظي الرديه
وان ماتعدل هذا احنا صابرين
غير الصبر قولي شاللي بيديه
براك يهديلك بدل الهلا هلاوين
شرفت مكاني ياشاعر الرومانسيه
وسلامتك نود لك سلامتك
mantovani
حظك انت بعد اقشر شالسالفه
يبا نجرب صبا ونحط اسمها ونشوف
بس اذا اهي فازت بالمليون وعطتنا طاف
شسوي فيك انا
السلام عليكم
لا أ‘لم لم ضحكت عندما قرأت القصيدة..!؟
لربما لأن العرب كلها تشترك في هذا الهم والهنود في كل أصقاع الأرض أيضا تشترك فرحة الفوز!!؟
سؤال للحين مالقيت له على إجابه!!!!!!؟
اشمعنى الهنود هم اللي يربحون ونحن مانفوز!!
مرة من المرات فكرت اني استعير اسم هندي بس عشان افوز!!؟
هل تتوقعون ان خطتي الذكية بتنحج!!
طرح مميز جدا
والله براك
كنتوا سكون في العين؟؟
ركز على كلمة سكون
لووول
والله شيء طيب
بس ليش العين و مب مكان ثاني؟
لا يقولون مب جي؟؟
ما نقول مو
رمستنا نحن شوي أهون
و لا رمسة العين
وين تفهم عليهم
: P
كيف نحن نتحجى عدل كويتي
و أنتوا ما تعرفون
السبب المسلسلات الكويتية
لعبت دور فعال
أنا ألحين كله أتحجى كويتي يا معود
شاكين فيني
الأهل
LOOL
هالمرة مب من المسلسلات
من البلوقز
!!
يا هي أيام
كانت
كأن الغزو في الامارات
رغم صغر سني
لكن كنا واعيين
باللي يصير
..
لكن
الله فوق
و النصر
كان كبير
: )
مساالورد والجوري
مساالحظوظ الورديه
باذن الله
مبدعنا الراقي
باختصار شديد
علي قولت اميمتي
دووم تقول
"يابنيتي الرمح علي اول ركزه"
عاد انت وركزتك
ياتصيب ياتخيب
بس لها يوم وتصيب
قول
انشاءالله
..
دمت بحظ وحظ وحظ
ابدا
:))
ربي يحرسك ويححميك من كل عين
انت شاعرنا شاعر الإنسانيه
والحظ الردي حايشنا احنا الأثنين
ربي يعطينا حظ الكهربشيه
بضل ادعي ليما ربك يفتحلك بابين
واحد للحظ زين وثاني لايامك الهنيه
والصبر ياخوي تراه مفتاح الفايزيين
لابيدي ولابيدك بيد رب الحميه
وسلامي على شاعرنا الزين
ونور مكاني لأنك مريت عليه
تحياتي وعساك على القوه :)
براك
اذا طنشتنا صبا
او ما طنشتنا صبا
راح تثبت علينا بكل الاحوال
===
لكن سؤال :
اذا وايد منا مالهم بخت بالسحوبات
ابي ... منو اللي يفوزون كل مرة
غير الهنود ...
و الهاي هاي ؟؟؟؟
مانتوفاني
والله انا حالتي نفس حالتك .. مادري ليش !! خلاص اصلا فقدت الامل .. لو شنو ما اشارك تحبطت وايد وايد
بس صراحه عجيب الشعر يضحك حده حده حده ..
عالمها الخاص
اشكرك سيدتي على مرورك الاول
الهنود اخ يالهنود
انا بصراحه احبهم بس حظوظهم ماتصير صح الا اذا صارت الجائزه بيت والا طنين ذهب والا سياره كشخه
اما نحن العرب حدنا خلاطه
اما انا العبد لله
مافزت حده بقفشه
القفشه يعني ملعقه
اشكرك
دبي
ايه يااختي العزيزه
كنا سكون بالعين
بعقدة العامريه
اخ بس يالعين
ليش العين
لان الظروف خلتنا نحط رحالنا بالعين لوجود جامعة المرحوم زايد ال نهيان
بس طبعا لازم يوميا نروح دار الحي
دبي
اسف على بدلياتي الاماراتيه
احنا نقول مو
وانتو تقولون مب
بس احس مب صوتها جنه بوم
مو احلى
عموما اتمنى ان مسلسلاتنا الكويتيه تنقل لكم الصوره الحسنه للأسره الكويتيه
ترى مب كل الكويتيين براطمهم متفخه
انتي شوفي مسلسل الاقدار
هذا احنا بالضبط
وانتصرنا والناصر الله
فراوله
الله يطول بعمر اميمتك
اللهم امين
احنا مو مال اول ركزه
احنا يصلح علينا مثل
طوفه تصده وطوفه ترده
والطوفه تمثل رداة الحظ
فارس هوى الكويت
الكهربشيه
ههههههههههههه
بدعت بصراحه
mantovani
بقولك سالفه
مره كنت باجتماع مع احد رؤساء شركه استثماريه
وقبلها بيوم بالدوانيه قايلين لي معاشه 7 الاف
قلت الله يهنيه
وانا قاعد معاه جاءه اتصال هاتفي من بنك الخليج
يقوله مبروك فزت بسياره كاديلاك
تصدق لوما اني ذكرت الله
جان الريال بدربه للكاديلاك مشبص بباص
الله يرزقه ويرزقنا
JuVeNTiNa
ليش مانسمي هالكلام اللي كتبته
النشيد الوطني للحظوظ الرديه
حياج الله بنادي قشران الحظ
مت مت مت
من الضحك
،،،،،،
لو يسوون مسابقه أنا وإثنين
اطلع عليهم الرابع بالتبعيه
والله زين
ما غشيت
:P
الحظ يمرض ما يموت ... حاول
حاول
حاول
حاول
مـــــــــــــــرة اخرى
COOOOOOOOOOOOOOOOOOOL
مبدع الله يحفظك والله !!
منو ينسى
احاول هو بقى فيه عمر
خلاص
راح اورث عيالي رداة الحظ
Mai
يسلمك ويخليك
بدّعـــــــــــــــــت
لا يوقف :)
ربي يسعدك اخوي براك
ذكرتني بمقولة قريتها من زمان تتكلم عن الرضى بالقضاء والقدر وتقول: ربما اعطاك القدر فمنعك وربما منعك فأعطاك
مرات الواحد منا يحصل شي يتمناه وهالشي يمنعه من خير كبير علشان جذي لازم نرتاح ونطمئن باللي يصير لنا
لكن مع هذا مايمنع نطلب من الله الخير اللي عنده لانه كريم سبحانه
اتمنى لك الحظ السعيد والتوفيق لكل جميل
'3air
أشكرك
مايوقف
salman almulla
منورني ياسلمان
ياخي كلامك كله حكم
ياخي
اشكرك
برااااااااااااك
صج احنا نتشابه في اشيا وايد وهو انا من مواليد سنه القرادة
سنة 74
وصج احنا عندنا نفس الشراسة
شراسة النمر
بس آآآآآآآآآآنه
راحت عني القرادة
يوم فزت بجائزة سنعة بعد طول قرادة
تصدق
ينييت
صج صج ينيت
ما صدقت وقمت ابجي من الفرحة
يعل الي روح عني القرادة يروحها عنك يا براك
ويفرحك بهدية سنة سنعة سنعة
بالثلاث
قول آمين
Post a Comment