Tuesday, May 20, 2008

مغرم آلام



رد نام لاتخاف

هذي شهقة عمر

رد نام لاتخاف

هذي ضيجه بالصّدر

لاتحاتي

كمل الأحلام

رد نام

....


فزّيت من ألم بصدري

خوّفتك حبيبي أدري

بس مو بيدي آسف

مثل ماإنت شايف

عمرها مارحمتني الأيام

رد نام

....

يوميّه هذي حالتي

ماأتهنى بنومتي

أفزع على صوت أنّاتي

لاتحاتيني ياحياتي

تدري إني مغرم آلام

رد نام

66 comments:

Kuw_Son said...

سم بالله و رد نام الله يخليك :)

7osen said...

الله

مغرم ألام

مو بيدي أسف
مثل مانت شايف
عمرها مارحمتني الأيام

روعة

العنوان بس يخلي الوحد يحس بكل شي

الألام سر من أسرار الحياة
مايعرف معناها إلا إللي يحس فيها

صورتها بطريقة مبدعة وبلغتك اللى مافي منها

براك
حبيت هالقصيدة وقريتها بوقت محتاج اقرا فيه شي من هالنوع ومنك إنت بالذات

لأنك غير

شكراً لك لأنك حسستني بألامي
شكراً من القلب

The Voice Within said...

تمنيت أفلتر لك احلامك
أشيل أحلام و أزيد أحلام
و أمحي هموم ناشبتك حتى بمنامك
و أتم أداريك و أحرسك طول لايام


تسلم ايدك و صح لسانك
مبدع على العادة :D


يسلموووو

Mohammad Al-Yousifi said...

خخخخخخخخخخ

DanDash said...

شادية تقول
الألب يحب مرة ميحبش مرتين

بس انا اقول نكسر القاعدة

مغرم آلام .. بس خل نتفه عونه تفاؤل

عشان نقدر نعيش

(روح) said...

:(
شهقة عمر !


بس شهقة بالصدر؟

بس؟؟؟



يا قو قلب اللي بيرد
ينام!!!



و من فينا هالليلة ينام :(

Super Woman said...

براك شفيك متغير ؟؟

مغرم آلام مره وحده ؟؟ يا حافظ يا عقايل الله

الله يبعد عنك الآلام
ويخليك تتهنى بالمنام
وتحلم احلى الأحلام



بعد شتبي ؟؟ دعاء من القلب

GUCCI-q8 said...

سلامات
سلامة قلبك
رد نام والخير فالك

فتى الجبل said...

مغرم آلام
هذيلي الكويتيين
يصوتون بعدين يتحلطمون على تصويتهم

78o8eYa said...

..
..

:)

بحروفك
حليت الآلام

تسلم الأيادي يا بوعبدالله

Anonymous said...

تعوذ من ابليس
حمام دافيء يفي بالغرض

Barrak said...

Kuw_Son

سيدي العزيز

صاحب التعليق الاول

اول شي الحمد لله على السلامه

ان شاء الله بنام
وانت نام وكمل الاحلام


اشكرك

Barrak said...

7osen

مو بيدي أسف
مثل مانت شايف
عمرها مارحمتني الأيام



لما الواحد يفزع من نومته موبيده
ولابيجه رحمة الايام


العنوان كان عاشق الام
بس لما كتبت ياحياتي
قلت مغرم اعمق



الالام سر

من اسرار الحياة

هالكلام مايحسه إلا اللي متألم بذمه

بالنسبه لاخر جملتين من تعيقك استاذي العزيز

قريت هالجملتين
وقبل ماأشكرك على كلامك بقولك ان اخر جملتين خلتني اكتب
قصيده ان جاز التعبير
اسمها
لا حس ولا خبر

وعشانك انت
باهديلك مطلعها

وانتكتبت ترى قبل 5 دقايق


مر اليوم
وأنا لاحس ولاخبر
أتأمّل أتذكّر أنتظر
شاليديد يايومي
شالمفيد ياهمومي
وينه
الحلم اللي ينتظرني
أي درب
بيدلني
وكل مافيني إنكسر
مر اليوم
وأنا لاحس ولاخبر


وصح لساني

Barrak said...

The Voice Within
تمنيت أفلتر لك احلامك
أشيل أحلام و أزيد أحلام
و أمحي هموم ناشبتك حتى بمنامك
و أتم أداريك و أحرسك طول لايام


قريت وطرت أنا بكلامك
وتشرفت حيل بهالكلام
محد مناشبني علامك
انا بس مغرم آلام

صح بدنك

بسلمو تو

Barrak said...

kila ma6goog


رد نام

Barrak said...

DanDash

وشاديه قالت بعد

اياه يأسى عليّ


راح نعيش وكل له اسمه


واحد يسمونه عاشق احلام
وواحد يسمونه
يحب ينام
وواحد يسمونه مغرم آلام

واه على الدنيا السلام

Barrak said...

روح

ايه ايه شهقة عمر



على فكره تم تغيير البيت من

شهقة صدر
إلى ضيجة صدر

الضيجه أبلغ وأدق

مو صح

؟؟؟؟

اشكرك

Barrak said...

ShLaLaT


بسم الله علي


جنّي البخت


بس اهي صوره انرسمت
تقمصت شخصيه وأحببت أن اوصفها لكم

بكل صدق
وتعمقت باللحظه أكثر من الموقف

الرسم له معان كثيره
وصور أكثر


صوره لزوجه مظلومه
لزوج مهزوم
للحظه قويه
لشهقة صدر


فزات الليل تمر على صدورنا لكن من يق
ر يوصفها
يتخيلها قبل لاتصير


مرات احب تقرون كلامي وتوصلون له اكثر مني

مو معناته الكلام اللي ينكتب انا
يمكن لحظه رسمتها وتخيلت اني بوصلها بيوم من الايام


مغرم الام رسمه بسيطه
لكن الوانها معقده


مو سيرياليه

يمكن خياليه



طولت وايد

بس انا مافيني

اهم اللي فيهم

Barrak said...

GUCCI-q8

كل بينام

وعلى كيفها ترتبنا الاحلام

Barrak said...

فتى الجبل


ماأعتقد

Barrak said...

78o8eYa

بذمتج

أنلام
وإلا ماأنلام


راقيه هذي الزياره
مثلك


اشكرك

Barrak said...

مُحَسّدْ



تعوذت


جني البخت


اشكرك

(روح) said...

الضيقة ..

شهقة

مادري

فيها موت الشهقة

والضيقة
فيها بس احتضار
بطيء


بس

esTeKaNa said...

ضيقه بالصدر
وفزه بنص هالليل
وشهقه عمر
تقطع سكون هالليل
وتقوله رد نام؟
كيف يرتاح له جفن
ولا كيف ينام
وحبيب قلبه وروحه ذبحته الآلام
!!
اهو رد نام؟
ما ظنتي نام الا يوم نومه في ضلوعه
وسكن رعشه خوفه
ومسح على راسه
وقاله نام
بكرة بتصدق الأحلام
وكل شي بيكون تمام
بس انته نام
:)))

2cool2care said...

ما نفز إلا إذا كنا مهمومين ونفكر بسي.

الأيام قليله والدنيا ما تسوى, تكلم باللي هامك " للي يستاهل " ولا تخلي ابالك وراح تنام بذن الله نومه عجيبه... بس لا تخلي بقلبك

وخل مشاكل الغير الكبيره لهلها ;)

قلب طفله said...

مغرم الام

حزن و هم يطرد النوم

و غصه بالقلب تسري بالدم

يا شينه من شعور يصاحب

الادمي بصحوته و منامه

تسلم ايدك بو عبدالله

دمت بحب

5:20 said...

قسما باللة مخك مبدع

U-Turn said...

ما حبيت أستعجل بالرد :p
عشان آخذ فكره عن الي قاعد يصير
قريت التعليقات
ولاحظت الرد على الغاليه شلالات :p
وفهمت الموضوع


!!

فزت الليل الله لا يبها لنا إن شاء الله
وشهقت صــدر بعد @@
الله لا يقوله

اسم الله علينا

الصراحه التعبير يخرع
وما أعتقد عقبشهقت الصــدر أحد يقدر ينام !!

أخوي مغرم الآلام :p j.K
أخوي براك
صح لسانك
دايم مبدع بكتاباتك
ودايم أستمتع بكلماتك

بختصــار أخوي إنت مبــدع

وعساك على القوة

Shaima'a Alkandari said...

علامك ياخوي انغرمت بالآلاااااام


فرفش استانس ترى نهايتك تصير متيم بالفرح

honey said...

الشعر مبهم سبب الألم في
شي حلو اتوقع كل واحد يقرا يطري على بالة شي مضايقة بالفترة!

الله إخفف عنك آلامك و يقويك عليهم

qesat_5ayal said...

مغرم آلام
باغي تعذيب
هاوي حب


هالثلاث تراكيب
شيصيرون لبعض


براك كلماتك تشرح نفسها
والنوم بعيشة هالتراكيب صعبة



براك تسلم ايدك

kuwaitya_7saweya said...

تفائل يا براك
ومافي احد خالي من الآلام
بس قط كل شي ورا ظهرك وعيش

Lavender said...

اسم الله عليك

احنا بروحنا قاعدين انام عشان ننسى !

بعد حتى النومه مانتهنا فيــها !!

...

لاحظت شي غريب بأغلبية المدونات

أن أغلب البوستات مواضيعها عن ألم ,انتظار , شوق, غدر, خيانة, تحلطم


عفيـــا خنفجها شوي:))

Aldenya said...

تسلم إيدك على هالكلمات المعبرة

دوم مميز بكتاباتك يا براك

the.thinker said...

نوم العوافي :)

سم بالرحمن ولا تخلي شي يشغل بالك .. الله يريح بالك ياخوي :)

mtfa2el said...

و الله ظنتي كله من المجلس اليديد
أييب الكوابيس

sologa-bologa said...

ضيجة الصدر
يا أما من التدخين
أو من أحوال عامة
أو من قراية الجرايد
أو ريال مدريد خسران

يقول الفنان محمد عبدالوهاب

أنسى الدنيا وريح بالك
أوعى تفكر باللي جرى لك

ذكرتي بواحد اسمراني حليوة قالي مرة
ليش احنا نتحلطم
بالصيف سياراتنا وبيوتنا ودواماتنا مكيفة
اذا استمرضنا نلقى العلاج موجود
ندش الجمعية رغم الغلاء اللي فيها
بس ما نطلع الا ايدنا فيها الخير

الحياة فيها ليل ونهار
والليل مو كله اظلم
ترا فيه نجوم تلمع وقمر يضوي

واكرر واقول

إحنا الخطاوي
:)

ودمت بحب وود

Barrak said...

روح


سيدتي الراقيه
انت شرحت الضيقه
انا تكلمت عن الضيجه

وهناك فرق
والفرق واضح

اشكرك

Barrak said...

esTeKaNa

اهلا بسيدة الرقي


سيدتي

وأنا اقرا كلامك تذكرت

أداري والهوى نمام
على حالي
وأقول لو تسمح الأيام وتصفالي
واعيش وياك مدى عمري
وسرك في الهوى سري
تغيب عني ويضيق صدرك
وأغيب عنك ويضيق صدري


الله عليج
بس هذا اللي بقوله

Barrak said...

2cool2care

مرحبا بمرورك الاول

ياسيد التفاؤل


كلامك ينحط فوق الراس قبل لاينسمع ياخوي


اسعدني وجودك

Barrak said...

قلب طفله

ياشينه من شعور
والله يعين اللي عاشه واللي بيعيشه


اشكرك سيدتي

دمت بهنا

Barrak said...

5:20

مخي واقف


هذا سوايا قلبي

Barrak said...

U-Turn


مايطوفج شي


اشكرك لانك وفرتي علي الرد

بس هم برد

التعبير مايخرع بس يمكن غريب
او يمكن لازم ينحس عشان ينفهم
او يمكن ماكو شي يخرع
بس اهي حاله لابد اننا نستعد لها لاي ظرف كان

اشكرج واشكر مرورك

والله لايحرمنا من كلامج

Barrak said...

Shaima'a Alkandari

جني البخت ياشيماء
ومفرفش ومتشقق ومستانس


واشكرج ياسيدتي الراقيه

Barrak said...

shahad


انتي عرفتي السالفه كلها


مايطوفج شي
ماشاء الله عليج


بالنسبه لهم لاتحاتين

منصورين منصورين

Barrak said...

qesat_5ayal

يصيرون لبعض
من نبج واحد

تراكيب صعبه
لو اندخلعا في محاسبه كيميائيه يحصل انفجار
وانا بصراحه تخصصي ادبي والا كان قلتلج المعادله


اشكرج

Barrak said...

kuwaitya_7saweya

ماكو شي عشان اقطه


وفعلا محد بهالدنيا خالي

وكل واحد معه همه على قده


اشكرج

Barrak said...

Lavender

الله يسلمج بالنسبه لمناخ المدونات هذا مرتبط بالمناخ الجوي وحيث اننا في بلدنا الحبيبه الكويت نعاني من مرتفع جوي اطل علينا من جبال القوقاز فلهذا الجو العام حار وقته

بس تدرين شالحلو بالموضوع ان الاخوان الاعزاء في المدونات اللي طروا الهم والكدر تفننوا في نقل الصوره كل حسب طريقته
وهذا هو الابداع


انا عن نفسي فجيتها شوي ببوست درل الباجي عليكم
اشكرج

Barrak said...

Aldenya

الله يسلمج واشكرج
وصدقيني ماهو تميز كثر ماهي صراحه وصدق
وترى لوما انتي وامثالج من الراقين اللي يحللون الكلمه وينتقدونها ويحسونها ويفهمونها ويفسرونها جان ماانعرفت ولاتميزت على قولتج


ذكرتيني بمقوله قالها لي الدكتور عامر جعفر لاتكون وايد مباشر بكلماتك قول شوي وخل الباجي للقراء والمستمعين

اشكرج واشكرهم واشكره

Barrak said...

the.thinker

مشكور على هالدعوه

تسلم ياخوي


ماادري ليش ذكرت اغنية عبدالحسين باسكتش بعد الزواج

سمي بالرحمن وانتي تخمين الليوان



اشكرك ياراقي

Barrak said...

متفائل


انا بصراحه ماحبيت اتكلم عن المجلس اليديد


ولكني كتبت ابياتا عده

وكلها بعيده عن التفاؤل
منها عيب ياصوتك
و مدينة الاموات

عموما أحمد مشاري العدواني الله يرحمه قال كل شي من الستينيات ومخلالنا شي

بس تعليقي على المجلس اليديد
قالته ام براك الله يحفظها
سمت المجلس لاطبنا ولا غذا الشر
انا سميت اللي حصل عيب

Barrak said...

sologa-bologa

ترى ولهت على تعليقاتك
اللحين ماعندك حجه
السبع فاز وخلاص عاد

حبيبي انت

التدخين اي والله مضيق الصدر وايد
وصلنا مرحله مو زينه كلش

الاحوال العامه انت شايف وانا شايف

قراية الجرايد مااقرا الا صفحة الادب وفنون ومقالات ناجي سعود الزيد

وريال مدريد بأكرهه كتير كتير
لان الفريق اصبح متكون من خوال

اه ياعبدالوهاب


على طاري الاسمر الحليوه
اذكر مره قالك هالاسمر ان اهو لما يكون فرحان ومستانس يكتب عن الهم والالام والوداع والجروح
ولما يكون ضايق خلقه يفتر راسه ويكتب عن الفانوس والابره وخلافه

هذا مو تحلطم
هذا تقرطم
وشتان مابين الاثنان

وتدري فيه هالاسيمر مثل الرياح العنيده


اقول يبيله قهوه في ربوه الشانز بس

الزين said...

شنو هالحب
شنو هالحميمية بالتعامل
شنو هالتراحم

براك
اللي يحب صج
يقول اللي قلته حق حبيبه

يداريه رغم الألم
رغم المعاناة والتعب

رد نام لا تخاف
مافيني شي
انت اماني وبالنسبة لي كل شي

مدري شقول
بس ابي هالعلاقه بحياتي
ابي مثلها
ابي اللي يداريني واداريه

تهقا صعبه؟؟

Najmah said...

مغرم آلام

شكثر تعور القلب الكلمة

وشلون ينام
ونص روحه ضاعت منها الأحلام
شلون ينام
وقلبه صاحي
وجفنه الثاني مانام

ربي يبعد عنك كل ألم يابراك

بـنـت بـطنـهـا said...

"مر اليوم
وأنا لاحس ولاخبر
أتأمّل أتذكّر أنتظر
شاليديد يايومي
شالمفيد ياهمومي
وينه
الحلم اللي ينتظرني
أي درب
بيدلني
وكل مافيني إنكسر
مر اليوم
وأنا لاحس ولاخبر"

وصح لسانك

~warda~ said...

تدري إني مغرم آلام

براك
غريب ما يبعثه هذا التعبير في النفس
.. مغرم آلام

جميل ومؤلم في آن واحد
مميز قلمك في القدرة على التعبير

(والله يبعد عنك كل حزن وآلام يا خوي)

Barrak said...

الزين

شنو هالحميميه؟


الحميميه موجوده بكلامج
ماخربها الا كلمة صعبه

الطيبين امثالج مايستصعبون هالمسافه


بنلتقي باللي يحتوينا
بس ناطرين الزمن


ماادري شقلت بس كلامج وصل لابعد ماتصورته

اشكر خيالج

واشكرج

Barrak said...

Najmah

ربي يسلمك ويخليك

يانجمه


ويبعد الالام عنا

Barrak said...

بـنـت بـطنـهـا

صح بدنك


لما اليوم يمر
وانا لاحس لاخبر

شي يجبرنا ننكسر

مايطوفج شي

Barrak said...

~warda

الله يسلمج ويخليج


صج ورده


اشكرج

تراب الكويت said...

شخص مختل
ماله حل
عاشق ألم
والقلب مُحتَلْ

،،

إذا سكت أوأنهى كلامه
ما ينتهي الاحساس
لو يجي مايل ولاّ باستقامة
يصيبك من الساس للراس
،،

ما بين العبقرية والجنون شعرة
،
،

حيرتني

:)

Barrak said...

تراب الكويت


مااعتقد اني مختل

ولكني منسجم مع نفسي
اتصور انني ارسم الكلمه ولااكتبها
احاول ان اشرح مااحسسه بصدق


اشكرك
وآسف على الحيره

تراب الكويت said...

Back

تحملنا شوي

مختل..فهمتني غلط :(

على العموم
I like ur feelings the way they r

:)

Barrak said...

تراب الكويت

مااعتقد اني فهمتك غلط

واذا ماتحملنا تراب الكويت منو نتحمل


افا عليج بس

قلم حبر said...

no comment :)
ابييييييييييه
وبس :)

Barrak said...

قلم حبر

سلامتك من الإيه وبس