Sunday, April 13, 2008

إتجاه فرعي




إتجاه فرعي

لأحوال التّخلّف يستدعي

ينثر على الأرض

رفض

وفوضى بالطّول

والعرض

الفزعه ياهلي

وربعي

إتّجاه فرعي

...


حذّف صخر كسّر سيايير

رفرف بمباديك وطير

الصّح يبقى ياخوي

صرّخ وتشكّى ولوي

ولاتقول إكسروا

صبعي

إتجاه فرعي

....

إحنا ترى نحترم القانون

والهون أبرك مايكون

بكيفك بس خذ جزاك

لاتصارخ محد معاك

لاجاسم لابزّه

لامرعي

إتّجاه فرعي

...


الوطن له كيانه وإحترامه

كل بهالبلد له كرامه

إحنا قبيلتنا الكويت

 ماتبي اقعد بالبيت

ولاتقول كسّروا ضلعي

إتجاه فرعي

....


ياديرتي سامحيهم بيتعلّمون

ياديرتي حتى لو يغلطون

إنتي قلبج كبير

إنتي الملاذ والمصير

كلنا لج

ندعي

إتجاه فرعي

12/04/2008
السبت

67 comments:

مُحَسّدْ said...

لا فض فوك ومات حاسدوك :)

بوتشخيص said...

مبدع كالعادة يا براك ..

وصفت اللي في قلوبنا

ياقلبي ابتسم said...

تتحفنا مثل عادتك بكلامك القوي

يعطيك العافيه وسلمت يمناك :)

صبا said...

الله يرحم حال هالديره

ويحميها من كل شر

كلامك قوي ويعور القلب

Najmah said...

إحنا قبيلتنا الكويت

ياليت يطبقونها يابراك ياليت

:(

Barrak said...

مُحَسّدْ

اشكرك ياسيدي الفاضل

ياصاحب التعليق الاول

من يحسد هو من لايقرا الناس بعين تحب الوطن

Barrak said...

بوتشخيص

كل انسان شريف
يحب هذا الوطن ولاشي سواه يقول نفس كلامك

Barrak said...

ياقلبي ابتسم

الله يسلمك ويخليك

بهذا البلد نقول مانشاء
وننتقد

ولكن هالمره انتقادي حاد جدا

اشكرك

Barrak said...

صبا

آمين ياصبا آمين

الاتجاه الفرعي مانعرفه

ابدا ابدا

Barrak said...

Najmah

قبيلتي الكويت
ونعم القبيله
ونعم الاصل


صدقيني تبقى الكويت
رغم كل هذا

kila ma6goog said...

ندعي

Barrak said...

مطقوق


الله يتقبل دعاؤنا ودعائك

Moi said...

اييي والله اتجاه فرعي, كلمات جمبله

Barrak said...

Moi

الاجمل زيارتك الاولى

شرفتني اخوي

قلب طفله said...

صح لسانك اخوي

عبرت عن ما بدوخلنا بروعة كلماتك

ربي يحمي هالديره من كل شر

دمت بود

waterfall said...

مبدع اخوي براك

بس يا ليت يتعلمون مثل ما اقول
اللي يدافع عن الغلط شلون يتعلم ؟

جارة القمر said...

صح السانك يا اخوي

اتجاه فرعي

و يبتها على جرحي

!!

اتجاه فرعي

يعطيك الخيار

و بيدك القرار

يا المجد او الانتحار

آمار said...

صح لسانك


والله يحمي هالديره

سيدة نفسي said...

" والهون أبرك مايكون "

بارك الله لك أخي الكريم بهذا المنطق الكبير الذي فقده بعض هواة الكراسي

سلمت يداك

عتيج الصوف said...

صح لسانك يا براك

عزيزي لو إهي رادة على سالفة الإتجاه الفرعي جان السالفة تهون و نقدر نطق رصيف و نتلاحق..ولكن الوضع يبدو إنه نفس حال دوار البدع..زحمة و دزني و دزك ولا مخرج إلا بالللإلتزام و إحترام القوانين

magnoonah said...

ايــــــــــــــــــــــــــــــــه


الله كريم

Selezya said...

صح لسانك

charisma said...

صح السانك

وختامها مؤثر
:(

ياديرتي سامحيهم بيتعلّمون
ياديرتي حتى لو يغلطون
إنتي قلبج كبير
إنتي الملاذ والمصير

يا بعد عمرى يالكوييييت
والله ما تستاهلين الى يسونه فى عيالج

DiLLi O MiLLi said...

صـــح لســانك




يا براك

طول عمرنا وأهلنا علمونا نمشي سيده
ما أدري شنو هالأوادم اللي بايعين الديره
من متى نمشى ونحذف صخر على اللي يفرض القانون والهيبه
والله يا براك الود ودي أرجّع السنين ورا وأعيش عيشة يديده
الله على ذاك الزمن الواحد باله مرتاح وينام طول ليله
الله على سوالف يديده عن ذاك الزمن وأيامه
يوم الناس على قلب واحد .. أفراحهم وحده وأحزانهم وحده
كان الفريج بيت واحـد .. كانت بيبانهم كله مفتوحه
كانت الزوارة ما توقف .. وأذا واحد غط .. سألوا وينه ؟
الله على جاي الضحى بذيج اللواوين وكل من في أيده مهفه
على طاري الجاي تذكرت شعر في وصف الجاي كانت يديده كله تقوله
تقـــــــول فيــه

جايكــم والله شـــقردي
يــوم عــود ويــوم وردي
ونّحصـــلي كيــف يــردي
ونّتســــكر فنـــه عجييـــب

شفت يا براك .. حتى أشـعارهم فيها البساطه

بذمتك يا خوي يا براك
ما ودك تعيش بذاك الزمن ؟

يعقووبوو said...

إحنا قبيلتنا الكويت

صح لسانك

mantovani said...

براك

تحية طيبة و بعد

انا راد عليك في مدونتي

اتمنى انك تقرى البوست الاخير

احييك

==

تعال متى تنشر مجموعتك الشعرية ؟؟

انا ابي كلامك معاي بكتاب
ملينا من اللابتوب
عيونا راحت يا حجي

==

مانتوفاني

فريج سعود said...

لا ما راح يتعلمون
وبيظلون على طول فرعي
اتجاه فرعي

Pinky And The Brain said...
This comment has been removed by the author.
Pinky And The Brain said...

شفيكم على أطفال الحجاره؟

و اشفيه التجمع في البراحه؟

إقعد في بيتك يا شرطي

أو خذلك طريج فرعي

و إحذر اتروح البراحه

في تفلّع في البراحه

هذاني قلت لك ما عندي

و لا اتقول ما قلت لي

لا تروح صوب البراحه

و اشلك في العباله

خذلك طريج فرعي

Eng_Q8 said...

ببلغ عنك

Shaima'a Alkandari said...

احنا كلنا عيال قبيله وحده

وننتمي لقبيلة الكويت


وكلامك عين الصوااااااااب ياخوي لافرعيه ولابطيخ

Barrak said...

قلب طفله

ماأدري ان اللي فيني نفس اللي فيكم
اشكرك واشكر قلبك الطفولي

Barrak said...

waterfall

غصب طيب بيتعلمون
اشكر مرورك الاول

Barrak said...

جارة القمر

اعتقد انهم اجبن من الانتحار


اشكر وجودك المستمر

Barrak said...

آمار

صح بدنك
واشكر مرورك الاول

Barrak said...

سيدة نفسي

اشكرك
وعلى فكره مبدأ الهون ابرك مايكون
مايعرفونه

Barrak said...

عتيج الصوف

هلا فيك بالغايب

اتمنى ان ربعنا يصملون

عندي سؤال بسإلك اياه انت بس

ليش اهل دواوين الاثنين ماانحاشوا
وربعنا من اول طلقه من صيد امس ليش

Barrak said...

magnoonah

ياهلا وسهلا فيك

يهون الجرح الاليم

Barrak said...

Selezya

صح بدنك اشكرك

Barrak said...

charisma

السؤال المطروح هل فعلا اهم عيالها

العيال مايأذون امهم
مايحذفونها بصخر

نون النساء said...

اتجاه فرعي
حاد ومنزلق

اي والله

صح لسانك يا براك
يات عالطلب

Barrak said...

DiLLi O MiLLi

اهلنا علمونا نمشي سيده لانهم يحبون هالبلد
من ايام الفقر والنقر وهم يحبونها
حبوها واهم فقاره وبعد العز هم حبوها

على فكره انا كتبت قصيده كامله تخيلت فيها نفسي بسنة
1920
اشكرك

Barrak said...

يعقووبوو

صح بدنك
احنا قبيلتنا الكويت فخذ شرق

Barrak said...

mantovani

تشرفت بقراءة بوستك الاخير

واحرجتني

بالنسبه لديوان الله كريم

Barrak said...

فريج سعود

لازم يمشون سيده
كا احنا ماشين سيده

Barrak said...

Pinky And The Brain

هذا وانتي دارسه قانون بعد

عموما اشكر وجودك
وانتي بنفسك قلتي انهم اطفال
والاطفال لازم يطقونهم عشان يصيرون خوش رياييل

Barrak said...

Eng_Q8
اذا تتغشمر مايحتاي انا ادش من البيت يعرفون رقمي
وانا بالكويت اقول اللي ابي وانام ببيتي

واذا من صجك
واي يمه خفت

Barrak said...

Shaima'a Alkandari

اشكرك

والطريج الفرعي طول عمره مؤذي

الطريج اللي سيده هذا وايد زين

Barrak said...

نون النساء

صح بدنك

انا وعدتك بالبوست اللي فات

ووعد الخر دين عليه
اشكر وجودك سيدتي

فتى الجبل said...

تسلم ياخوي

mtfa2el said...

ولا يتعلمون خذها مني
قاعد نرجع قري

~warda~ said...

لابد من احترام القانون
اذا لم يحترم ضاعت هيبة ديرتنا

الكويت غالية
الله يحميها

سلمت اناملك

E6eba_Ethb7tny said...

براك دايما تييبها عالجرح ^.^

أجدت طرح القضية التي هزت الشارع الكويتي
ولم يرضى عليها كل من يدين بالولاء والحب لأمه الكويت
فمهما تعدت مصالحهم وكثرت انشاغالاتهم يجب أن تكون الكويت نصب أعينهم وهي شغلهم الشاغل

اسلوبك جدا راقي ومؤثر بالطرح

فرعي ومصيره بيلتقي مع الطريج الصح
بس متى؟

ما نقول غير ياناس حبوا الكويت بضمير

ولا الضمير صار من أفعال كان

تسلم أخوي ولا تحرمينا روعة جديدك طرح جدا مميز

للأمام

فراوله said...

مساالورد والجوري
مبدعنا الراقي
الاتجاهات كثيره
والتوجهات كبيره
بس وين محورها
هذا السؤال الاهم
؟؟؟؟؟
باختصار شديد الكويت...ثم الكويت...وللابد الكويت
عساها دووووم تاج فوق روسنا
قول آمين
:)
وختامها كان مستقر الابداع
وبتظل قلبها كبير
بس لي متي
؟؟؟؟؟
دمت بدفء وعذوبه
ابدا
:)

Barrak said...

فتى الجبل

يسلمك ويخليك اخوي

Barrak said...

mtfa2el

لا ولالك لوى
بيتعلمون
وصدقني الديره بخير

Barrak said...

~warda

اشكر وجودك سيدتي الورده

وكل شي له حد

Barrak said...

E6eba_Ethb7tny

اشكرك سيدتي الطيبه

كل هذا عني
جنه وايد علي

مشكوره
وصدقيني الكلام اللي قلته قريته بعيون وايد ناس

اشكرك

Barrak said...

فراوله

مساء الفراوله
هلا فيج اختي

والله قلبها كبير
وتتحمل

لازم نريحها
اذا عيالها مايريحونها منو عيل يريحها

اشكرك

يعقووبوو said...

عيل انت ولد عمي
انا من فخذ شرق
--
شوف بلشنا عنصريه d-;

Barrak said...

يعقووبوو

ونعم فيك

على فكره العنصريين اهم اهل جبله
اهل شرق شياطين بس مو عنصريين

حسافتج يا كويت said...

كلامك اصلي يا براك ماهو بفرعي

Barrak said...

حسافتج يا كويت

الأصل يبقى

والمسباح يقول
الصج يبقى
والتصنف جهاله

GUCCI-q8 said...

صح لسانك
رائعه

قلمي said...

فالك البيرق يا براك
وصح لسانك

Barrak said...

GUCCI-q8

صح بدنك


شكرا

Barrak said...

قلمي


اشكرك على زيارتك الاولى

من اسمع طاري البيرق
اتذكر شخص مليق