Thursday, April 17, 2008

لا ماهلّت




لا ماهلّت

إنسلّت

ضوت وأضوت

وإختفت مابين أحلامي

كاها جدّامي

زارتني لحظتين

وملّت

لا ماهلّت إنسلّت

نسمة عبير تنتشي منها رويحتي

رقه وعذوبة تملي علي دنيتي

ونهار ماله لون

ماأدري شلون

مثل نجمة

متلونه بسماك

وقلب ارتوى معاك

ومطر هل شوي هني

وشويتين منّاك

وتواصيف الجمال

إكتملت

لاماهلّت

إنسلّت

44 comments:

مُحَسّدْ said...

يا عيني عالرذاذ

الجو لندني :)

بوتشخيص said...

عجببببببب يا براك قاعد تتحفنا كل مرة

Soul said...

9a7 elsanek!

kila ma6goog said...

كاها

حلوة

esTeKaNa said...

لا ماهلت
إنسلت
!!
حسيت بقمة الرقه والاحساس
ابدعت
كعادتك
ودي اقول شي ثاني
احسك مليت من كثر ما اعيد كلماتي
بس ماني لاقيه شي
غير ابداع متجدد
:))

Najmah said...

الله
التجول في معاني حروفك متعة
:)

7osen said...

الله عليك
صج والله ، الله عليك

روعة بكل معنى الكلمة

حسيت بقمة الشعور حسيت بالكلمات تدخل بصميم المشاعر

حسيت بكل رومانسية هذا العالم القاسي بين هالحروف


نسمة عبير تنتشي منها رويحتي
رقه وعذوبة تملي علي دنيتي
ونهار ماله لون
ماأدري شلون

أحيانا تعطينا مقاطع تعبر عنا
وتصور لنا أحساس عشناه ونعيشه
بكل دقة وأحساس

بكل صدق
إنت أحساسك غير
وكل شي تكتبه غير

شكراً لك

ومثل ما قالت إستكانه ودي أكتب شي غير
بس مو قادر

mtfa2el said...

يا اخي يا ليت في جريدة يومية جذي
لا حنة
لا عوار راس
لا مرشحين فاتحين حلوجهم و يصارخون
شوية من الكلام الحلو اللي تكتبه نبي نشوفه كل يوم
بس يكون بروحه ...مو صفحة بجرايد تعور الراس

Barrak said...

مُحَسّدْ

اهلا بصاحب التعليق الاول
الجو مو لندني وانت الصاج
الجو باريسي

Barrak said...

بوتشخيص

أقولك شي
لو تسألني عن اي كلمه انكتبت بيكون جوابي ماادري

هي لحظه عايشتها واردت ان ارسمها

Barrak said...

Soul

صح بدنك

اشكرك

Barrak said...

kila ma6goog

هالمره انت صدتها

القمنده كلها
كاها

Peace said...

صح لسانك

حسافتج يا كويت said...

للحب معني أخر مع براك

قلم حبر said...

كلام حلو :)

mantovani said...

براك تحية جميلة

انا استانس لما اشوف لك شي يديد
اتابعك و اتابع الاحساس لي وين يوصل

الساحة الشعرية في الكويت و الخليج

تفتقد الشعر المحلي الغير بدوي

يعني شعر كويتي


الكتاب حاليا في المنطقةاغلبهم يكتبون باللهجة البدوية و قليلا منهم يعبرون بالعامي الحضري ...

و هذي فرصة حلوة اتمنى من براك انه يحطها في عين الاعتبار

---

و على فكرة ... مفردة (( كاها )) مفردة جديدة على عقلي

لكنها ظريفة

مانتوفاني

charisma said...

:)

الله يا براك
ما ادرى ليش هالمره كنت مبتسمه مع كل كلمه اقراها



مثل نجمة


متلونه بسماك


وقلب ارتوى معاك


ومطر هل شوي هني


وشويتين منّاك


وتواصيف الجمال


إكتملت


يا سلام عليك
تصبح على خير

Barrak said...

esTeKaNa

انسلت
يعني تسحبت
يمكن هلت
يمكن ملت
بس الاكيد انسلت

العفو احنا مانمل
يكفي كلمة وحده تحسسني ان كلامي انسمع
بس هذا اللي ابيه
اشكرج ياراقيه

Barrak said...

Najmah
اشكرج
يانجمه
فعلا نجمة

Barrak said...

7osen


هلا فيك اخوي

الله على هالطله
ارتاح بوجودك
تسلم

حاولت ارسم هالنهار اللي شفته
لين هلت
اكتشفت انه ماله لون
طبعا اذا ماله لون
أكيد السؤال شلون

مااقدر اوصف نسمة عبير

انت واستكانه غير

اشكركم

Barrak said...

mtfa2el

قايك عطني امية ألف

انا قايلّك بس انت ماتندّي



وأنا اسويلك جريده
ثاني يوم صاكينها

Barrak said...

Peace

صح بدنك

Barrak said...

حسافتج يا كويت

لوجودك معان كثيره

Barrak said...

قلم حبر


وجودك أحلى

Barrak said...

mantovani

اهلا فيك استاذي


انت بكلامك حرقت علي بوست كامل
خلنا نتّفق إن الشعر له فروع كثيره منها الشعر النبطي
انا أتفق معك ان بعض شعراء الشعر النبطي اسلوب الصراخ طاغي عليهم
والعنف والتحدي بكلمات القصيده سمة من سمات هذا العصر

ماأذكر إن استاذ الشعر النبطي خالد الفيصل كان يصرخ بالقاء قصيده
كانت كلماته قوية المعنى بسيطه في تكوينها
يمكن لاني اهيم بكلمات بدر بورسلي وساهر ومبارك الحديبي ويعقوب السبيعي
هاليومين ماادري شفيني على اغنية ياعديل الروح
يمكن باقي ردي على كلامك راح يكون بمقدمة ديواني المقبل
تذكر كلامي


اشكرك يااستاذ

Barrak said...

charisma

مبتسمه
هالكلمه بروحها فيها قصيدتين

مبتسمه
وفرحتها
من السما أسمى
مبتسمه


تصبحين على الف خير

DiLLi O MiLLi said...

دامها نسمة عبير .. لابد زيارتها تكون خفيفة وتّسحّب بدون لا ننتبه لها
بس مرورها يترك أثر كبير في حياتنا

عسى أيامك كلها نسمات عبير مصحوبة برذاذ المطر

mtfa2el said...

و الله يا بو عبد الله اهو لو في شوية سيولة جان نسوي انا وياك جريدة و مجلة و قناة
و نسميها ..نبيها صرقعة !!
نسوي حق كل مرشح كشف تسلل
مو تدري كل واحد الحين مسوي روحه غاندي و نيلسون مانديلا
و نفر على الدوانيات نسوي كاميرا خفية نطلع منو اللي ناشفة عنده و يبي سفرة صيف على ظهر جم مرشح و نسوي فيه مقلب حليو ..بعدين نقوله معاك قناة الصرقعة
و كل يوم نعطي برامج تحليل سياسي حق الجويهل و الحفيتي و خزنة العماني

.
.
شفت شلون اني راعي مشاكل مو ويه فلوس :(

قلب طفله said...

الله عليك يا براك

عيشتنا معاك جو عجيب

صح لسانك و تسلم يمينك

دمت بود

MKSARAT SAYED SAAD said...

بارااااااااااك صديقي الجميل
--
وشويتين منّاك


وتواصيف الجمال


إكتملت


لاماهلّت


إنسلّت
---
بهذه الكلمات فتحت السداده عن كلمات تعتقت سنين فلما خرجت اعتقد ان كثيرن سيسكروا منها
تحياتي ليل ولموهبتك
صاحب المكسرات
سيد سعد

Q8ya said...

اموت على هاللحظتين...:)

يعطيك العافيه...:)

Shaima'a Alkandari said...

وهذا هو براك يهل علينا هلة بس مش زي اي هله


مستمر بالعطاء الرائع يابراك

فاتحفنا بالمزيد

لاننا نتعطش لنبضك

Barrak said...

DiLLi O MiLLi

اي والله مرورها يترك أثر كبير في حياتنا
مو بس في حياتنا
في عيونا
في ارواحنا
في قلوبنا
وبعد كل اللي قلته
تواصيف الجمال اكيد بتكتمل


اشكرك واشكر حروفك الراقيه

Barrak said...

mtfa2el

حتى لو انت راعي
مشاكل
هم ابي امية الف
لاتتهرب

Barrak said...

قلب طفله

اشكرك سيدتي

مو مني

اللي هلت اهي السبب

Barrak said...

MKSARAT SAYED SAAD

رونق الجمال يبتدا منك سيدي الفاضل
اشكرك على ذوقك وحسك المرهف وتواصلك

Barrak said...

Q8ya

هاللحظتين مايحسهم الا اصحاب القلوب الرقيقه

وانت كذلك

اشكرك

Barrak said...

Shaima'a Alkandari


شقولك ياشيماء

اقولك مشكوره موكافي
اقولك تسلمين هم مو كافي

تدرين شلون

ماعندي تعليق

Mok said...

:) محد قدك

Barrak said...

Mok

إحنا تلاميذك

mantovani said...

مساك الله بالخير براك

لا يبا ما حرقنا شي

احنا تونا بادين معاك على الخير انشالله

و انا من الحين حاجز نسختي الموقعة و اللي عليها اهدائك لي

و تحياتي

Barrak said...

mantovani

عالخير ياإستاذ الخير

بدينا ننسى الحجي
أنا قايلك نسختين
شلون صاروا نسخه؟

youma said...

الله يسلمك يديك

روعة

Barrak said...

youma

يسلمك ويخليك

يعافيك


اشكر مرورك سيدتي