تبون مطر
خافوا الله بديرتكم
تبون مطر
نثروا الحب بدنيتكم
وخلّوا التسامح
يغطي هالارض
بر وبحر
تبون مطر
...
...
تبون ترتوون .. سهله
الكل ياخذ قلب ... ويأمله
ويحضن أخوه
مايهمّه مذهبه
تبقى عناوين المحبّه
مذهّبة
بسنه وشيعه
وبدو وحضر
تبون مطر
...
...
ليش شحّت السما
ويبس عود النخل
ليش الورود بالعطش متوسّمه
ليش الكون بخل
والدرب طال
وقصر
تبون مطر
...
...
تبون غيمه تسمع نداكم
تبون رحمة من سماكم
حبّوا هالارض إحضنوها
مثل مادارتكم داروها
وإبشروا بالمطر
تبون مطر
24/2/2008
الاحد
68 comments:
اي نبي مطر براك
يغسل هالقلووب ويصفي النفوس
والله صح لسانك
من ذنوبنا السما شحت
قواك الله دايما مبدع
صح لسانك :)
ليس بالضرورة ان نربط شح المطر بالذنوب فالأمطار لا تتوقف في اوروبا
أهديك برنامج الوشيحي و الهوشات الي ياية بالدرب
شكلنا ما راح نشوف مطر لي بعد مية سنة
براك
:)
انتفائل و لننشر الوعي عدوى حميدة بين البشر, لنتكلم بمجالسنا عن من يستحق أن يمثلنا لنناقش و نجادل, لنصرخ بوجه الظلم و اليأس و إنكسار البشر...لنصرخ ...2008 عام نطقت به الأغلبية الصامته
لا يأس مع الحياة ولا حياة مع اليأس التغير بيدنا لنعمل من أجل من يستحق
نبي مطر
يغسل هموم البشر
نبي فرحه
بسنا حرات و قهر
نبي الطيبه تعانقنا
قلوبنا صارت صخر
نبي مطر
يروي قاع الشجر
ويلون كفوف الزهر
ما زهقتوا؟
هذا يسب و هذا يلعن
ترى والله مو فخر
وينك يا مطر؟
نبي نسمع غير الفتنه خبر
تكفون!
قلبي عالديره انفطر
نبي نزرع
نبي نبني
نبي نحصد ثمر
وشلون ابنحصد ثمر؟
من غيرك يالمطر
نبي مطر
صح السانك .. أنا أمر مدونتك أفرغ كل شحنات البلاوي اللي أشوفها في المدونات ..أحسها محطة للراحة النفسية ..
تسلم و صح لسانك
حبّوا هالارض وإحضنوها
مثل مادارتكم داروها
وإبشروا بالمطر
و رسالة لخوي محسد
المطر اللي يقصده براك
مو مطر الماي
اهو مطر الرمز
يرمز الى المطر فهو خير للأرض و فرحة كذلك
عساك على القوة
ان شاء الله ييينا مطر
يغسل القلوب
و يغذي الارض الطيبه
و من بعد المطر
تكثر الخضره بارضنا
و يعم الخير
إي والله نبي المطر
و نبي نشوف اصدارك عن قريب :)
نبي مطر يهل
نبي نكون كلنا اهل
نبي و نبي
بسنا نبي متى يكون النصر؟
ما ينبني الدار الا بطول صبر
و الا ترانا ما راح نسمع خبر
و لا راح نفرح بشي يسر
:(
صدقت ياخوي
الدنيا شحت بالرحمة والحب
والكل شايل سلاحه
وناس تضرب بناس
والبركه انعدمت
لا مطر ولا سمج بالبحر
والجو كله معتفس علينا
والحر ياينا يركض بيهلكنا
حتى ربيع ما شفنا السنه
شاللي صار يا براك
ليش تغيرنا جذيه
حال يبجي الصخر
aaawwwww 9a7 lsanik walllah
that was so beautiful and true :)
thank u for writing things that we really neeed ...
اي والله يابراك
صج فقدنا المطر هالسنة :(
تبون رحمة من سماكم
حبّوا هالارض وإحضنوها
مثل مادارتكم داروها
وإبشروا بالمطر
صح لسااانك
نبي برررااد مو إلا مطر بس اي شيئ إوسع الصدر
أنا بشوف متى إيي يوم يحتضن البدوي الشيعي
إذا هذي صارت بينه فيضان مو مطر بس
لحظة في سؤال
ليش الغلا بالأسعار
وكل متطلبات الحياة صار سعرها نار بنار
الله المستعان
ويهون الأمور
الله يرحمنا برحمته
والله غورقت عيونى
اى والله صدقت صدقت
وصح السانك
بس الدنيا بخير والناس الطيبه مثلك وشرواك موجودين يا براك
اهم الخير والبركه
والله لا ياخذنا بذنوبنا يا رب
:(
من اجمل ما قرأت لك يا براك
اتفق مع طائر لتكون لنا وقفة ليختار الشعب من يستحق ان يمثل هذه البلد التي اعطت الكثير
كفانا صمت
دمت بحب
من اجمل ما قرأت لك يا براك
اتفق مع طائر لتكون لنا وقفة ليختار الشعب من يستحق ان يمثل هذه البلد التي اعطت الكثير
كفانا صمت
دمت بحب
صح لسانك
انت حاط البوست بتاريخ 6\ابريل
بعدها بيوم طق مطر
خيراتك يابراك (:
براك بره قاعد يطق مطر ، اتهقى الناس حبو الارض واحظنوها ومثل مادارتهم داروها
اي يبا تبي مطر
ونبي نسوي كل الي قلته وننتظر
ممم والله شيء حلو و مفرح أشوف أحد للحين مهمتم بالديرة و يحبها
(: تحياتي
صح بدنك
مو بس من ذنوبنا السما شحت
اشكرك سيدتيصاحبة التعليق الاول
مُحَسّدْ
المطر هنا يرمز للخير
ومن قال ان اوربا كلها ذنوب
kila ma6goog
اعتقد المطر ياي بس مو هالسنه ولا اللي وراها
طائر بلا أجنحة
صدقت يااستاذ
التغيير بايدينا
بسنا نتكلم عن الحكومه وعن فلان وعلان
ليش احنا مانسوي خير للارض اللي احضنتنا
اعرف شخص معروف على المستوى الاعلامي
تقرأ مقالاته تقول هذا وبس
تصدق عاد مايدري عن دوامه من سنة 1992
نبي خير وعمل بدون شكاوي
Soul
كلامج اوضح من كلامي
واروع
صح لسانك
بوتشخيص
وجودك اصلا اهو سبب الراحه النفسيه
اشكرك اخوي العزيز
Enter-Q8
يافاهمني
فعلا هذا ماأقصده
طول عمرك محرجني
تسلم
Peace
ماأدري ليش احس ان امانيج بعيده
ماني متشائم
بس الغبار خير دليل
بعثرة مشاعر
اول ماتغرق الديره بالمطر راح تلقين اصداري
قولي امين
جارة القمر
صح لسانك
اي والله نبي مطر يهل
نبي نفوسنا تنغسل
مانبي شي
كل اللي نبيه مجرد
أمل
ترسم ابتسامة طفل
وسلامتك
الزين
شاللي صار يالزين انا اقولك
شلون تبون مطر
وفريق الازاله حب انه يشيل غرفه صغيره امام احدى المنازل ووجد فيها رجلا طاعن بالسن
قال لهم ارجوكم لاتزيلون هذه الغرفه فهي بيتي الوحيد بعد ان طردني ابني وجعلني اسكن في هذا المكان الحقير
شلون بيجينا مطر
لما واحد يمد ايده على ضابط امن ومايهمه احد
شلون بيجينا مطر لما تشوفين مشاكل الخدم واضطهادهم
شلون بنشوف مطر ومآسي دار المسنين وكثرة اعداد الابناء الذين يودعون ابائهم لدار العجزه
شلون تبون مطر
بس خلاص تعبت
No3iK
صح لسانك واشكرك على وجودك
وصدقيني اللي انا كتبته مكتوب بعيون اهل الديره
بس محتاج انه نشوفه
Najmah
صح بدنك
فقدنا المطر
وفقدنا التسامح
وفقدنا الخو يحضن اخوه
فقدنا اشياء وايد يانجمه وايد
ارد وأقول احنا السبب احنا
بس مره نحاسب نفسنا
خلونا من موضوع فلان قال وهالحكومه مادري شنو
shahad
يحضنون بعض
انا ماابي احضان ابي احترام
نحترم الشخص لانه كويتي مو لانه من هالقبيله ولا ولد بطنها والا شسمونه
الله يهدينا ويهديهم
Almas
هم الجشع ياوخيتي يبعد المطر عنا
وماابي ادخل بالتفاصيل
بس نقطه ذكيه منك
charisma
فعلا الدنيا بخير والكويت بخير
بس احنا ماتعودنا تكون بس بخير
نبيها بخير وايد وايد
وايد
وسلامة عيونج
9ahba'a
اشكرك ياسيدتي العزيزه
دائما افرح بوجودك
اشكرك جدا
يعقووبوو
صح بدنك
الحمد لله على النعمه
بس ماكان مطر
كانت رشة مطر
Q8Sky
ماأعتقد
هذا مطر يوصخ السيايير مايروي
الارض وايد عطشانه
فريج سعود
انتو سوو ولاتحاتون
خنقتني العبرة
!!
يارب لا تاخذنا بذنب السفهاء منا
شي غريب يا براك
الغيوم تحتضن بعضها
وتصك السما
وننطر
ونستبشر
ولا ينزل مطر
ذنوبنا وذنوب هالبشر
:(
براك الأمل بالقله المصلحة والصادقه بهالديرة
عسى ربي يحفظنا ويحفظ ديرتنا
:)
بوست فكرته جميلة
نحتاجه في الديوان
الله يرحم هالديرة برحمته
مساالورد والجوري
مبدعنا الراقي
ودنا بمطر...ومو بس مطر
نبي شلال منهمر
يغسل هالقلوب وهالنفوس اللي شانت
بنواياها الغريبة
اعوذ بالله من شر هالنفوس
بس اقولك شي
قول آمين
الله بخلي هالارض وبيغسلها
بمطر دام فيها نفوس طاهره مثلك
وشرواك
:)
دمت بدفء وعذوبه
ابدا
:)
صدقت واللة
ذنوبنا زادت واللة يعينا
ماأعتقد راح ينزل مطر
شوفوا جريدة الراي صفحه 73
المهم ينزل مطر بقلوبنا عشان يغسل قلوبنا ومن بعدها راح ينزل مطر ربك
اى نبي
كل شي نبي
ونبي قلوب بيضه تحتضنها الكويت ونبي الكل يتغير ويصير نفس قبل واحسن من قبل ويصفووووووون النيه
ونبي مطرررر
علشان يغسل قلوب الناس
Sam
وايد يهتمون بالديره ويحبونها
وايد وايد
واشكر مرورك الاول
وسلامنا لسمير
esTeKaNa
مو بس انتي اخنقتك العبره
شقول بس
الله كريم
وان شاء الله راح نحاول نضيفها بالديوان
بس اخاف يقولون شقصدك بالمطر
واروح فيها
فتى الجبل
اللهم آمين
اللهم آمين
فراوله
مساء الورد
اي والله شلال منهمر
بس اعتقد سالفة الشلال بعيده وايد
لسببان
الاول ان احنا بالكويت ماعندنا جبال عشان نشوف شلال
والثاني
اليوم بجريدة الراي اب يترك ابناءه في ممشى الخالديه
بعد تبون مطر
ايه هيّن
وعلى قولة خشيم الفار
ايه ويهي
حسافتج يا كويت
مطر يغسل قلوب
يبيله مطر ممزوج بقطراته
تايد الغسيل اللي مفيش مستحيل
Shaima'a Alkandari
نبي ونبي
وايد نبي
بس ليتنا مره نعرف شنبي
والله كريم ياشيماء الله كريم
مممممممواه
ايلوموني فيك بعد اذا قلت حبيته؟
يسلملي هالتم والله
9a7 lsanek :)
el mo6ar anwa3 :
1- ma6rat khair
2- ma6rat shega ya3ni mo khair :p
ya3ni mo kel elli e6eg 3ndhom mo6ar merta7een bel 3aks metla3wzeen ...
ya3ni el mo6ar mo dayman khair ...
fa e7na nabi ma6rat el khair o allah yarzegna mn khaira enshalla :)
تفضلو بزيارة موقعنا والذي ينقل آخر الاخبار والتطورات في الدائرة الثانية بكل شفافية بدون اي تحيز لأي مرشح كان
وأرجو من صاحب هذاالموقع ان ينشر عنوان موقعنا وشكرا
http://ommah2.blogspot.com
ما شالله مبدع !
المطر جميل و الله اييب الخير ان شالله !
أمانة ، لا تتهاون في نشر ديوان خاص لك
لو كل واحد قال لا و لا شلون جان ما شفنا و لا كتاب بالعالم :)
بالتوفيق
يعطيك العافيه
بس متى يكون في مطر؟
صح لسااانك
وبلوق أكثر من رائع =)
والله ييب المطر
SolaimaN
الله يلوم اللي يلومك
لاموني اللي غاروا مني
مشكور
Glass Fabric
صح بدنك وأشكرك على زيارتك الاولى
صحيح المطر أنواع
بس المعروف عن أهل الجزيره العربيه يستبشرون بالمطر
والمطر ممكن ان يهدم وومممكن ان يبني
هذا اذا كان تركيزنا على المطر
سيدتي
بدأت في مطلع هذه الابيات بجمله استفهاميه
تبون مطر
تبون المطر اللي اذا نثرتوا الحب والتسامح راح يغطي بر وبحر
تبون المطر اللي يروي
مجرد استفهام
وكل يختار قطرته
الدائرة الثانية
شكرا
Mai
اشكرك على وجودك
وان شاء الله لن أقول لا
GUCCI-q8
اشكرك على مرورك الاول
وجوابي على سؤالك
تبون ترتوون .. سهله
الكل ياخذ قلب ... ويأمله
ويحضن أخوه
the.thinker
تشرفت بمرورك الاول
سيدي الفاضل
والله ييب المطر
نوفر لكم الان افضل جليسة مسنين بالقاهرة على الاطلاق وكذلك افضل دار رعاية المسنين بالقاهرة الذى يسعى لتقديم جميع الخدمات المتعلقة بالاهتمام ورعاية المسنين وتقديم لهم افضل سبل العناية وتعويضهم بعد ذلك المجهود الذين قاموا به مع اولادهم ولربما ايضا مع احفادهم لذلك فهم يستحقون منا كل تقدير واحترام فى رعاية المسنين بالمنزل مصر الان
Post a Comment