Tuesday, March 24, 2009

وله يتنثـــَـــــر





 قمت أحبّك أكثر

وصار الوله يتنثر

ويتطاير مع ذكرياتك

صارت غاية أمنياتي

أشوفك ثواني

صارت معالم حياتي

أوله وأعاني

وبدروبي أتعثر

واحبك اكثر

،،،،،،،

توِن بيوفي أَََنـّه مختفيَه

بألامي ماقصّرت موفيَه

اللي كان كان

كانت هالجمله مكفيَه

وعلمتني شلون

أتصبّر

واحبك اكثر

،،،،،،،،،،

يمكن لأني وايد ولَهْت

يمكن لإني وايد تِهْت

ومالقيت ذرى لأوهامي

ومالقيت أحد جدّامي

غيرك

تصوّر؟؟



13/07/2005
الأربعاء

31 comments:

`~MnO YeNSa! ~` said...

واااااااااو

وايد وايد
حبيت حرفك هالمرة

براك انت انسان راقي
صاحب احساس شفاف

لكن
شقي لدرجة الابداع

فريج سعود said...

بلحنها وابيعها والمقسوم بالنصيفة

ماشي

AK-47 said...

ياعيني عليك وانا من اهدك جم يوم ايي الاقيك مبدع
:)يبيلنا نشوف ريفالدو

والموت يعشق فجأة مثلي..والموت مثلي لا يحب الإنتظار said...

العزيز براك

الله عليك يا سيدي ..

سيدي ...

تعبير اختناق الدموع في الصدر

خنق عبرتي

فعلا

تصوير جميل للشوق و الوله

شعور الغصة..تختنق

ابداع منك سيدي

أحسنت ..وصفاً وتصويراً

دمت بخير وسلام

بنت أحمد said...

صح لسانك

يعطيك العافية على هالابداع

للوش said...

Barrak

آسْتَمْتَعتُ بــِ كَلِمآتُكــَ وَبِهدوءْ حَرْفُكــَ ..،
فـَ مَدآدُ مَحبْرتُكــَ يَنزْفُ بــِ آرَقْ آلمَشاعِرْ
قَلمٌ رَقيقْ مُتَسلسلٌ فآضَ بـــِ نَدى الإبْدآعْ ..،
سَلمَتْ يُمنآكــَ يآمُبْدعَ ..
لــِ قَلْبُكــَ آلزَيْزَفونْ ..~..

SHAHAD said...

وحتى انا صرت اتعبر معاك

عجيييب يا براااك

فراوله said...

مساالورد والجوري
مبدعنا الراقي
يازينه من تبعثر
وياحلاته من تصور
وياعذوبته من تذكر
:)
بذمتك بعد كل هذا وما يتعبر
؟؟؟؟
!!!!
دمت بدفء وعذوبه
ابدا
:))

أسيرة اللوحة said...

//
لاني قمت أحبّك أكثر
//

احياناً من شده الحب لا نجد سوا الدموع و العبرات لتوضح احساسنا و مشاعرنا ,,

هنيئاً لك بقلبك و قلمك
كُن بخير ^^

Barrak said...

منو ينسى


اشكرك ياصاحبة التعليق الاول

ماعليج زود

وعمر الشقي بقي

Barrak said...

فريج سعود

انا كلي لك


بس بشرط اللي تغنيها انغام

والموزع هاني فرحات

Barrak said...

AK-47

قايلك لاتهدني

ترى اشط وايد

ياخوي الابداع تعلمناه منك ومن ريفالدو


بس السؤال المهم

ليش صاحبنا بكل مناسبه يجيب لنا كنافة نو ر الاقصى ؟؟

Barrak said...

والموت يعشق فجأة مثلي..والموت مثلي لا يحب الإنتظار

سيدتي الراقيه

هناك مقطع لسامريه لسيدة الغناء الكويتي المرحومه عايشه المرطه

وهذا السامريه من يتأملها يخرج بقصائد عده

سبب قلبي عيونه هيضني
تولع خاطري والتاع بيه

الى ان تقول

تهل العين والعبره خفيّه

اشكرك ياسيدتي على كلامك الكبير علي

شكرا

Barrak said...

بنت أحمد

صح بدنك

الله يعافيك ويخليك

Barrak said...

للوش

سيدتي

الحرف الهادئ لايأتي من فراغ
بل من معاناة مختلطه بتأمل واحساس يحاول ان يترجم ماأشعر به بصدق

دائما راقيه بوجودك وبتعليقك

Barrak said...

SHAHAD

سلامتج من العبره

اشكرج

Barrak said...

فراوله

مساء الفل


بيظل يتعبر

ويتنطر

والوله يتنثر

كل اللي يبيه

يلقى مايتمناه مو أكثر


اشكرك

Barrak said...

أسيرة اللوحة

الهيام هو حاله

نحاول ان نترجمها بصدق


أصبح في هذا الزمن القليل من حب يعفون ماهو هذا الحب

وماهيته


اشكرك

7osen said...

يمكن لأني وايد ولَهْت
يمكن لإني وايد تِهْت
ومالقيت ذرى لأوهامي
ومالقيت أحد جدّامي

الله يالبرك

دائماً كلماتك فيها شي غير

لأنك إنت غير

حيييل عجبني الكلام

خصوصاً هالمقطع

mtfa2el said...

ما لقيت أحد جدامي غيرك ..

عشان جذي يوله و يتعبر ..يحق له

و لام الله اللي يلومه

qaqoqa said...

براك

امس كنت بجلسه نقاشيه عن المدونات واخذت انت حيز كبير من النقاش


وكلنا اتفقنا انك تعاني من ابداعك

انا اقولك ليش


انت قبل لاتكون شاعر انسان تملك احساس ساحر وهذا كلام معظم المدونيين وتحب الكويت بطريقه نادره
وانت شاعر متمكن من أدواته الشعريه ومحدد مساره وأهدافه

ارجع لمحور الموضوع

براك
تدري ليش انت تعاني من ابداعك لان الناس اللي ترد عليك وعلى اشعارك مع احترامي لهم بعضهم مايناقشك بكلامك وليش قلت هالكلمه بدل هالكلمه
وانت نوعك ماتتكلم الا لما يسإلونك

براك

لازم توضح للناس انت شقاعد تقول
انت انتقلت من مرحلة الهاوي الى الشاعر المتمكن لك ديوان ولقاءات وندوات وجمهور كبير من المدونين خارج الكويت وداخلها
واحترم فيك انك لم تتطرق لاسم اي شخص بشعرك حتى لو ماتحترمه وهذا الشي محببنا فيك


ادخل على الموضوع
وصار الوله يتنثر
ويتطاير مع ذكرياتك

هذي صوره جميله وله يتنثر كان ممكن تقول وله يتطاير وذكرى تتنثر ولكنك كنت تحب تأكيد ان الوله أعمق من الذكرى وأثقل


يمكن لأني وايد ولَهْت
يمكن لإني وايد تِهْت
ومالقيت ذرى لأوهامي
ومالقيت أحد جدّامي

مالقيت ذرى لأيامي

جلسنا البارحه أكثر من ساعه لتحليل هذا المقطع

الذرى وتذرّى والذروه

كل هذه الكلمات تعني المكان الأمين
العاده ان الانسان يتذرى تحت شجره خوفا من الشمس


ودي تفهم اخواني وتفهمني
مع اني ادري انك خاش شي مع انه واضح

براك مرات يضيق خلقي لما اشوف بوست منك كبير بمعانيه وماالقى الا 10تعليقات

ياناس اقروا مابين السطور هذا الريال قاعد يتعب ويدللكم باحساسه

براك ترى فيه وايد ناس تحبك وانت داخل بتفاصيل حياتها

اسمع هالكلمه برويّه

Barrak said...

7osen

لانك حساس

وراقي


ولاني وايد ولهت على تعليقك هني


اشكرك

Barrak said...

mtfa2el

هلا فيك اخوي


انت صح

اختصرت كل اللي بقوله


تسلم

Barrak said...

qaqoqa

شي يشرفني لما تتناقش بكلامي مع ناس راقيين مثلك

وانا امثل جزء بسيط من هذا العالم حالي حال باقي اخواني المدونيين

انا اعاني من ابداعي

اولا اذا كان كلامي هو ابداع فهذا من فضل الله ومن وجود اخواني المدونين هم الذين صقلوا موهبتي بأسئلتهم وبوجودهم وبتعليقاتهم

فعلا انا ماأحب اتكلم لانه هذا انا احب اقول اللي بقلبي وأبتعد
هذه شخصيتي وتكوينها
اللي يسأل يلقى الاجابه لكني احاول اوضح اللي بقوله ماأقدر او ماأبي
ماادري ليش

بالنسبه للديوان وللندوات هذا لان عالم المدونات بالكويت عالم قوي يساعدك على التميز والاتقاء بالناس وكلنا اخوان نحاول نساعد بعض

صار الوله يتنثر

افرح كثيرا عندما ارى تعليق على كلامي بهذه الصوره النقديه المتمكنه
فعلا اتعب عشان اكتب سطر مو عشان اتميز لا
عشان اني ادري ان الناس اللي تقرا مو سهله ناس فاهمه تلقى فيهم الدكتور المتخفي او الطبيب او صاحب القرار او صاحب فكر متحرر او متقوقع
انا عامل حساب لكل هالناس البسيطه والمعقده
رغم ايماني بأن المدونه هي انت وماتحس به لاتهتم بغيرك فكر بما تريد ان تقوله سواء كان جاد او هزلي

يمكن لأني وايد ولَهْت
يمكن لإني وايد تِهْت
ومالقيت ذرى لأوهامي
ومالقيت أحد جدّامي

جرت العاده ان من يتذرى فإنه يتذرى عن الشمس الى الفي او ظلال الاشجار كما قلت
ولكن اردت ان ابين للقارئ الكريم ان ماأحسسه هو فوق المعقول
لانني اتذرى بأوهامي
اي ان الشمس عندما تحرقني
او الوله عندما يحرقني من كثرته يجبرني على الاستنجاد بالاوهام
تخيل صارت الاوهام ملاذ من هول الوله

وايد اسعدني وجودك والى الان انا اقرا امثالك التي اخترتها

ارجوك لاتبتعد عن عالم المدونات
ولاتبخل علي بأسسئلتك

Barrak said...

قاقوقا


نسيت نقطه اسف

بالنسبه لموضوع التعليق

صدقني سهل انك تلقى اكثر من تعليق على موضوع معين هناك أمورا كثيره لو تكلم عنها اي شخص ببوست ممكن تكون التعليقات كثيره

ولكن هل كثرة التعليقات هو هدف بحد ذاته

لا سيدي العزيز
انا يكفيني تعليق واحد يحس بكلامي
او شخص يقرا كلامي ومايعلق بس يفهم اللي بقوله ويستفيد منه وهذا المهم

لاني ماأكتب عشان يعلقون اكتب عشان اقول اللي فيني وبس
وهذا هدفي

تراب الكويت said...

ومالقيت أحد جدّامي
غيرك
تصوّر؟؟

!!!!! تصـــوّر

احيانا تصير مُتعب يابراك :(

ما لقيت جدامي غيرك
تصوّر

الله الله الله
احس ان هالموقف تحول الى محور حياة

صدقني يبيلي سنه اصفق لك تحية على هالمقطع بروحه

بوركت ياخوي :)

Hashemy said...

شي جميل والله يعطيك العافيه

وصح لسانك :)

قلب طفله said...

و الله قمت اتعبر مع كلماتك
ياربي كلمة اتعبر تعور القلب كافي اتخيل ويه ادمي يتعبر حيييييل يعور
فما بالك بحبيب ولهان و يتعبر

:(((

رووووووووعه براك
صح لسانك و عسانا
ما نخلى منك و لا من ابداعك

Barrak said...

تراب الكويت


دائما راقيه في تعليقك


شقول

محور حياة كلمة جميله


تجعلني أعيد قراءة ماكتبته


اشكرك ياسيدتي العزيزه

Barrak said...

Hashemy

صح بدنك

شكرا


الجميل وجودك

Barrak said...

قلب طفله

صح بدنك

والله يبعدك عن التعبّر



اللهم آمين


اشكرك سيدتي
الراقيه