دائما أنهي إبني عبدالله بأن لا يضع الجل على شعره ، لانني مكتوي بنار الجل ايام المراهقه ، وكلما أشاهد قوطي الجل او علبة الجل اتذكر الأيام الخوالي ، كان كل عاقل أعرفه ينهيني عن استعمال الجل وتصفيف خصلات شعري الحريريه (أخاف بس حريريه ) المهم
شفت العبد يعشق الجل فحبيت أكتبله قصيده بالآثار الجانبيه لإستخدام الجل وهو سائل هلامي يوضع على بصيلات الشعر لكي يتزركش
استمعوا لنصيحة والد أصلع لإبنه يشرح فيه معاناته مع الجل بفتح الجيم
شفت العبد يعشق الجل فحبيت أكتبله قصيده بالآثار الجانبيه لإستخدام الجل وهو سائل هلامي يوضع على بصيلات الشعر لكي يتزركش
استمعوا لنصيحة والد أصلع لإبنه يشرح فيه معاناته مع الجل بفتح الجيم
هذي توالي الجل
ماتلقى لصلعتك حل
ينتهي موضوع المشط
لاتروح بعيد وتشط
ماكو شعر
ماكو شعر
لو تييب درِل
هذي توالي الجل
تستاهل تبي تصير رامبو
اللحين ماتستعمل الشامبو
خلاص تحمّل ماصار
صرح الشعر إنهار
وخلّك بالصلع
اللحين ماتستعمل الشامبو
خلاص تحمّل ماصار
صرح الشعر إنهار
وخلّك بالصلع
معتل
هذي توالي الجل
هذي توالي الجل
قالولك لاتلطّخ عمرك
دير بالك على شعرك
ماسمعت الكلام
اشبع صلع
لو تلقى الفانوس السحري
وتقوله ابي شعر
يطالعك ويقول
يالله ول
هذي توالي الجل
20/04/2008
الأحد
81 comments:
حلوة حلوة حلوة
و يا عبدالله لا تحط جل
لووووووووووول
:]الله يخليــلك بو بــراك إن شاء الله
ايي والله محد ودر روس الشباب إلا هالجل
ويالييت شكله حلو :S
جنه شعر مدهن :D
"مع إحترامي للكــل "
بس الصــج ينقال وهذا رايي :p
أخواني كلهم صلعوا منه :D
صــح لســانك أخــوي براك
وعساك على القــوة
الله يخليك حق عبدالله ويخلي عبدالله
ويطول بعمره يارب
اي والله وما ادراك ما الجل
تلف شعور اليهال والكبار
يلوع الجبد
وانت مصلع ؟؟
اها يعني مرنز بالمقلوب :)
وصح السانك يا بو عبدالله
من شروطي للزواج انه مومصلع
شكلي ماراح اتزوج
كلهم صلعو
عيل ما كو الا العبد ولدك
محجوز لي
؛)
عادي انطر
و علياااااااا
لا لا حده مو خوش
انزين ليش عاد بفتح الجيم انا خبري انها بين الضمة و الفتحه - وحده بتفلسف مي عارفة شلون :D
< سالفة خارج نطاق الموضوع
:D
يت ساعة الشماتة
(6) الله يا بعض الناس دجوهم 4-1 اليوووم ياااااااو < أصلية مالت قحطة
الظاهر غياب الجل عن قرعة فالديز كان له كبير الأثر في تعرض مرماه لرباعية كادت تكون نظيفة
بدينا نسقل :p
اترخص و صح لسانك
شو بدي أوول بوست روعا متل ما عودتنا
كان
لوووووول
حلوه القصيده وترى الصلع موضه الحين
D:
وقول حق عبود ييوز من الجل ويستخدم كريم فاتيكا وحده بوحده P: لووووول
فوتكم بعافيه
ههههههههههههههههه
الله يخلي لك عبدالله و يبلغك فيه
و الله الجل مشكله اللي ما صلع منه
قرب يصلع مع هذا متمسكين فيه شتقول
يا بو عبدالله كل ممنوع مرغوب يمكن لو
!! تقول حطوه و تلزم عليهم يكرهونه
و صح لسانك ع القصيده الحلوووه
دمت بود
تدري براك
ذكرتني بوحدة من قريباتي .. تعلق على كل شي وتنتقد ادق الامور وتهتم كثيرا بالشكليات .. ماوسعتها فرحتها بعد ماتقدم لها شخص يطابق المواصفات والشروط المصرة عليها .. والتي كان اهمها الوسامة والطول واسم العايلة والشهادة .. طول فترة الملجة كانت طايرة من الفرحة وتتباهى دايما فيه بطوله ورزته ووسامتة وذرابته ..؛
بس ليلة الدخلة شافته اول مره بدون غترة .. واكتشفت بانه اصلع!! بكت ..قول ناحت .. واهوا مستغرب وموعارف سبب هالنواح بهالليلة بالذات
قوي
لوول
بس بدون غشمرة
ترى تو الناس عالجل
حاول تحببه بالقرعة
لوووووووووووووووووووووووووووووووووووووووووووووووووووووول
قوي قوي الشعر
إخليلك ولدك ، و القصيجة تنطبق حتى على البنات:P
5ala9 kilna in7awel "ishteshwar 4 ever"
خل الولد يستانس
باجر يتحلطم ويطاحس
يصير مثل ابوه
شعرتين .. ومستشورهم
خل الولد يستانس
خله يحط الجل الخايس
دمر شعري وشعرك
كنت مستانس .. والحين اتحطلم
خل الولد يستانس
خله يشوف شعـري
مثل شعار ماكدونلز
ناقصه كلمتين:
انا احبه
وسلامتكم وسلامة الحضور وصح لساني ولسانك ولسان الجميع
الله
يا حلوة
يخليـــــــــــه لك
يا رب
عاد
درل !!!!!!!
:P
أسألني أنا
راح الشعر يا عبيد
بالك تحط الجل
الشعر طاح وصفيت على الباجي
أنعرف بالسوق من بعيد
تلاقيها جنها أم المرادم
والله مارد نحيس
:P !
اى والله تاليها صلع
الله كريم تدري عاد ذاك اليوم رفيجتي بالدوام جم شعره من راسها ناطه تقول متكهربه فقلت لها يافلانه نومي شعرج لاتفشلينا جان تطلع دوووف وتحطه على شعرها
يعني صج بدع
يبه انصح ولدك وخله يستخدم سفن آب او دووووف
وتسلم على هيك شعرررر
الراوي براك
صاحب الصلعه الجميله
واللمعه المتميزه
ما الجل الا اداة لغش الشباب
فتونسهم فتره وتكدرهم باقي العمر
لا انكر ان بعض الناس اذا حطوا جل وودوا شعرهم لي ورا شكلهم يصير حلو وجنهم توهم متسبحين
اما اللذين يضعونه ويوقفون شعرهم ما هم الا مقلدين لعرف الديج
وبعد كل هذه المقدمه
ماكو احلى من القرعه
نظافه
رجوله
ثقل
جمال
انا من اعشق شكل الرجل بالقرعه
وقول حق العبد ان القرعه هالأيام اهي الموضه
واهي الاجمل دائما خاصه في ايام الصيف الحاره
كلمات جميله
نعم مضحك الموضوع ولكنه واقع
وعلى فكره لا تتكدر وايد من الصلعه
فالجمال جمال الروح والوجه
وليش جمال القفه والبكله
دامت لنا نصائحك الذهبه
ودام هذا الابداع
لوول
براك والله ضحكت واايد وطارت مني الفصحى :)
الله يخليلك عبدالله ويخليك له.. ويتعظ انشالله وياخذ بنصيحتك
لووووووول صح لسانك .. وعسى يخليك لوليدك ويخليك له يا رب
خرعتني من الجل عاد انا توني هالاسبوع هابه فيه حق الهباهيب يكون يعني باريح شعري من السشوار
وبعدين على فكرة الصلعه هالايام صارت دليل وقار او عبقرية :)
صح لسانك
لووووووووووووول
الله يخليه لك .. بس انصحه يحط خفيف عشان مايحت الشعر .. اذا جذي متعلق فيه وايد :)
والله يخليك له ويخليه لك
الشعر اليعد ما ينفل
أرجوك عمّي عطني الحل
نبي القذلة الحرير
مثل الفلتة الخطير
وبالهوا نلوفح
بس من غير جل
:)
lo0o0oo0o0ol
:)
والحين وش الحل !!
مالك الا تحط حل
دابر املا
مشكلت معاه تنحل
:)
ههههههههه
الله يخليلك عبدالله ويطرح فية البركة يارب
وييييه ألحيين الجـل فية فيتامينات تحافظ على لمعان الشعر وتغذية
:)
بعد هالحجي المصفف عن آثار الجل
لازم
العبد يبطل
جل
:))
ربي يسعدك دوووم
اثر الجل مسويلك قلق
وأزمة نفسية ;)
تفاعل جميل منك
دمت بود،
مالك شغل زيـــن
أكو دراسات في أمريكا
والدول المتقدمه تقول
إن الأصلع أذكى من اللي عنده
شعر لأن الشعر يأخر خروج
الفكره إلى النور
و الأصلع ما يستهلك شامبو
و لوشن ومو أثنين بواحد
حتى واحد بواحد ما يدور
في البيت حاله حال المشط
والوقت اللي بتضيعه بالتمشيط
يا بو شعر .. الأصلع يقضيه
بقراءة كتاب مفيد أو بكتابة
قصيده عن الجل
;p hehehehehehehehe
Great post .. smart & funny :)
ما لك إلا دعايات
رضاؤكم هو هدفنا
إتصل الآن
اشله بالجل
توه صغير
وصح اللسانك على الكلمات الحلوة
JuVeNTiNa
شكرا شكرا شكرا
ياصاحبة التعليق الاول
اسمع كلام خالتك ياعبدالله انزين
U-Turn
الله يسلمج ويخليج مشكوره
الجل يقتل بصيلات الشعر ويخلي الواحد ان مشى الظهر تصير صلعته منظره الحمدلله والشكر
اكيد اخوانك راح يصفقون طويلا لهذه القصيده
واعتقد انها ستصبح النشيد الوطني للمصلعين
صبا
حلوه منك ياصبا
مرنز بالمقلوب ايه عيبوا عيبوا
الله يرزقك واحد ان شاء الله شعره حرير مدهّن ووبعد الملجه بساعه ونص يطيح شعره
قولي امين
بالنسبه للعبد ماأنصحج لانه شعره من النوع اذا دست بالسياره 180 كيلو وطلع راسه من الدريشه مايتحرّك
الحمد لله على النعمه
The Voice Within
لا لا لاتقولين وعليه وتكسرين مياديفنا
حاولي انك ترفعين معنوياتنا
حرام عليج
بالنسبه لتسمية الجل كل شخص يسميها على كيفه مره بفتح الجيم مره بكسر الجيم واديلوا ادي
خارج نطاق الموضوع
والله قالولي يابراك لاتتحرش بالمدريديين خصوصا قبل لايبارون برشلونه ماسمعت الحجي
عاد فالديز مااواطنه انا عندي مطير شرقاط احسن منه
من وين مطلع يابراك مطير شرقاط ماادري
ايه نفس البوهه
هههههههههههههه
JD
الحلو وجودك
ايه جذيه خلي معنوياتنا تكون بالموجب
ناس كسروا مياديفنا الله يهداهم
انا بقول للعبد ييوز عن الجل ويحط صابون رقي احسن من هاللويه
وانا ابيج عون صرتي فرعون
عيبوا عيبوا مايخالف
أحسن نصيحة حق شباب هاليومين
: D
انا ضحية من ضحايا الجل
و الحين عندي دوار فوق راسي
==
يا عمي الشعر مو حق الرياييل
و يقولك الاصلع عنده مظهر رجولي غير
(كلام فقارة )
مانتوفاني
7ayakom allah eb my blog .. this is my first post atmana ena ya3jebkom :)
وي ... لا بالعكس اصلا ماكو على الصلعة الذهبية
< انا ارفع و انت اجبس :p
بعد الملوك يتمون ملوك ما اقدر اقول اكثر :D
شرقاط؟
لك مين هيدا؟ متأكد انو بيشبهلو؟ لك شو بكره فالديز ... حلايا لدماغ < ما لقيت المرادف حق هالعبارة بالكوري
مساالورد والجوري
مبدعنا الراقي
وانت رايق...مبدع
وانت مالك خلق...مبدع
وانت متوتر ومنغث من احوال الديره
مبدع
وحتي بالصلعه...قمة بالابداع
;)))
الله يغربل هالجل وسنينه
دير بالك علي العبد
تري تو الناس علي الصلع
خله يتمتع بحياته
قول آمين
الله يخليه لك ويخليك له
وتفرح فيه
...
دمت بدفء وعذوبه
ابدا
:)))))
ههههههههههه
حلوووة يابو عبدالله
يعطيك العافية
مشكلة الجل
لا تخليه يستعمله راح يعاني من الصلع
هههههه
ههههههههه
اي والله هذي توالي الجل
حتى الفانوس السحري يقولك ول
هههههههه
امتعتنا كعادتك يا وخيي
تسلم ايدياتك
قلب طفله
الله يسلمج ويخليج
الجل مو بس مشكله الا بلوه
لا وانا طحت فيه قبل الغزو
كان لونه اصفر
اللحين يقولون الجل صار دوى للراس على ايامنا الجل يعطيك سنتين وبعدين يقولوك قول لشعررك بايباي
واهوده اللي صار ياسيد
شكرا
haifa
مسكينه رفيجتك
انصدمت
بس الله يهداها ماطلبت منه قبل الملجه صوره للريال مكشوف الراس
اسعدني وجودك سيدتي
جدا
kila ma6goog
احاول احببه بالقرعه ملزوم لانه اعتقد راح يكون مصيره نفس مصيري
واشكرك
shahad
الله يسلمج ويخليج
عاد انا كاتب قصيده طويله عن الاستشوار
بس الاستشوار اللي قبل اللي فيه جنطه نفس لونه والدقمه اللي تشغله نفس مالت المكيف ولونها برتقالي
عليه صوت تقولين كمارو داقينها سلف
خل الولد يستانس
باجر يتحلطم ويطاحس
يصير مثل ابوه
شعرتين .. ومستشورهم
والله ابوه لو يلقاله شعرتين جان مو يسشورهم يسويهم ميش
منو ينسى
الله يسلمج ويخليج
سيدتي
الدرل
هذا الجهاز العجيب
محد عطاه حقّه
والدرل نحتاجه في المهمات الشاقه
يعني ماكو فايده
ماكو شعر
لو تييب
درل
اذكر واحد من الربع سمونه بوشميس الدرل
هههههههههه
حسافتج يا كويت
ليش اسإلك
مبين انت اول اسف بمدونتك حسافه
اكيد اللي يقول حسافه متحسف
حسافتك يالشعر
شاب الشعر ياعبيد
لما رابح يقول يالا لالالاله مو جنه صوت شفر طاقه فوق تحت بمطر
بعدين تعال انت صلعتك مثل ام المرادم يعني فيه شوية شعر
أنا صلعتي يامحفوظ السلامه بحاصه تقول رخامه
فيها من مسجان شوي
Kuw_Son
اقولك شي
وانا اكتب هالقصيده ان جاز التعبير كنت ابي اسم هذا اللي يطلع من الفانوس السحري ماعرفت ينّيت ماقدرت
اثاري اسمه المارد
Shaima'a Alkandari
شيماء ابسإلك سؤال اهو مو سؤال اهي حره من الصلع اللي حايشني
تدرين لو رفيجي يقولي براك
نوم شعرك لاتفشلنا
ألمه احضنه
غاية امالي يقولي واحد او وحده اخوي شفيه شعرك متكهرب
زبعدين عبيد جذيه ومو مترقع بقوله يحط سفن اب يصير شعره جنه ليفه مسشورينها
ShLaLaT
اللحين عقب هالحجي أنا الراوي
ما الجل الا اداة لغش الشباب
فتونسهم فتره وتكدرهم باقي العمر
تدرين ان هالحجي لو سامعه انا من عشرين سنه جان شعري اللحين لي جتفي
اشكرك
~warda
الله يسلمج ويخليج
اهم شي ضحكتي وايد
بـنـت بـطنـهـا
ناس هابين بالهباهيب مابين الاستشوار والجل
وناس ماعندهم الا مكينه رقم واحد
ديري بالج من الجل
انتي وعبدالله
the.thinker
الله يسلمك
شيحط خفيف
الحبيب ملطخ عمره تشوف شعره يلق على بعد كيلو وربع
sologa-bologa
حبيبي انت سالفة القذله الحرير انساها مو بس تنساها
الا شسمه
والشعر اليعد له عدة مزايا
اولها انك لما تلبس غتره وعقال يبين شعرك ملامح زلفك
بس في حالة العبد الفقير اللي اهو انا
يلبس الغتره جنك حاطها على كاشيه
الحمد لله والشكر
تدري شلون
احنا الخطاوي
قلم حبر
ماكو حل ماكو حل
الصله يقول للحل ول
ماكو حل
DiLLi O MiLLi
الله اللحين الجل صار فيه فيتامينات
على حظي
واحنا قبل يمكن حاكين بالجل تيزاب ماندري
اهم شي ريحته حلوه
واحنا نغيّـل فيه
انا ابي افهم من وين طالعه نغيل
نغيل من الغيله
78o8eYa
اي والله لابد
وهم انتي بعد لابلد
تشوفين لغيباتك حل
اشكرك
Naif Abu-Saida
هلا فيك استاذ
لا مو قلق ولا ازمه نفسيه
بس مجرد نصيحه اوجهها لابني
عشان مايحوشه اللي حاشني
يالهوتيني ياني
hamdool
كلامك عباره عن جرعات تفاؤل بالعضل
بس خربتها لما يبت طاري المشط
وايد عيالي يسألوني هالسؤال
يبا ليش ماعمرنا شفناك تشتري مشط
هذا السؤال سيدي لايستطيع ان يجاوب عليه علماء الدول المتقدمه
صح ؟
Aldenya
قوليله يالدنيا قوليله
يمكن يسمع كلامج
صح بدنج
واشكرج
دبي
ياليت الشباب يسمعون
mantovani
ييبا دوار مو مشكله
يعني لو تلبس غتره وعقال تضيع السالفه
والدوار حيكبر وحتبقى هناك حواري وممرات
وبعديها انصحك يابني تشتريلك بتاعه كده يسمونها الكوايته مكينه وتديلوا
انت واصل في مراحل الصلع الدرجه الثالثه
هذي عاديه بس مو تسوي مثل حسن مصطفى
تيب اللي شوي عاليمين عاليسار
بالك
~FaHaD iN MiND
ان شاء الله
The Voice Within
سيدتي
السيد مطير شرقاط هو حارس مرمى منتخب الكويت السابق ونادي الجهراء الرياضي
وفالديز هذا انا لو عندي صخلتين مااعطيهم اياه
غيرنا المدرب والوعد قدام والحي بيشوف
barrak HAAA SHAL ESTESHWAR:p min wayn im6al3a ay 3a9er ??
يعطيك العافيه بو عبدالله
فراوله
مساء الورد والرقه والاحساس والطيبه
اشكرك سيدتي
وما كتب بصدق من القلب يصل للقلب
الجل اه يالجل مابي اتكلم عنه وايد يعورني قلبي ولما يعورني قلبي تتمدد الصلعه وانا موناقص كلش ملش
7osen
اشكرك سيدي العزيز وشكرا على وجودك
وعيال هالوقت مايسوون الا اللي براسهم
Mamloo7a Q8ia
هلا فيج ياوخيتي
تخيلي الفانوس يقولي ول
يعني اغسل ايدي من موضوع الشعر
shahad
هذا من العصر ماقبل الحجري بستمية سنه
هههههههههه
GUCCI-q8
يعافيج ويخليج ويسلمج
اشكرك
اي والله الجل نهايته مصيبة اسمها الصلعة
لووووووووول
يقولون الريال الأصلع حنوون بزووود ..صج عاد ؟
ولا مسويـــن دعايه حق الصلعــــــــــان ؟
:))
أضحك الله سنك
بما أن تأليف الكتب أصبح مهنة مربحة جدا وبعد جدا ، أنصحك بتأليف ديوان شعري بعنوان .
(( مع الجل كانت أيام)) على غرار في صالون العقاد كانت لنا أيام .
اح ليش عااد درل والله قمة راسى عورتنى
لووووووووووووووووووول
الله يخليه ويحفظه ويحفظه من اثاار الجل
:))
وسعت صدرى بهالليل
تصبح على خير
فتى الجبل
اي والله ياخوي مصيبه
Lavender
اشكرك على مرورك الاول
يمكن يكون الاصلع حنون
بس مصدوم
اشكرك
من غير دعايه ولا حاجه
moowa6en
اشكرك استاذي
ياخي استانس بتعليقك
اخوي قول امين
ان شاء الله أألّف كتاب اسمه
مذكرات اصلع سابق
charisma
استعانتي بالدرل لكي اوضح عمق المشكله
اشكرك
والله يحفظك ويسلمك
ويشرح صدرك
لووووووووووووووول
اثبت دراسه ان الرجل الاصلع هو الاجمل عند البنات
ههههههههههه لانه حاليا ماكوو غيره
فلازم نرضي بالصلع
والله يخلي لك عبدالله و قوله لا اتحط جل السفن احسن منه نفس المفعول بس بدون لمعه
:p
وصح لسانك علي هالكلمات المعبره
:)
صح لسانك :)
بقراها حق اخواني جود يتوبون يحطون جل :p
يعطيك العافيه ويخليلك عبدالله
Noor
خوش دراسه بس للاسف يمكن العينه كانت قليله
محد راضي يطل بويوهما والسبه الجل
الله يسلمج ويخليج
اسف على التأخير
ANeeN-elFaJr
صح بدنك
ومشكوره على الزياره الاولى
والله يطول شعور اخوانك
ويعطينا مثل ماعطاهم
ويخليهم لكم
Post a Comment