Monday, February 25, 2008

جريدة وقناة



لو أملك جريده

لو أملك قناة

جان نثرت محبه مسطّره

وخليت للحب بيت وذرى

والبرامج 

كلها غناوي


وسمرات

لو أملك جريده

لو أملك قناة

....

الكتّاب بكيفهم يكتبون

أعلمهم على الكويت يخافون

وتكون بقلوبهم أمانه صحفيّه

بيكتب الشايب قبل البنيّه

هذي تكتب قصيده

وهذا يرسم للصدق

اثبات

لو أملك جريده 

لو أملك قناة

.....

بحط مذيعين غير شكل 

بامنع عن المذيعات الكحل

واسوي مناظره عن الفوضويه

واكشف الناس الانتهازيه

بعيّن مضحي وتفيده

وجاسم ومزنه وآيات

لو أملك جريده

لو أملك قناة

25/2/2008
الاثنين

83 comments:

عيون الحب said...

الله أنا أول تعليق؟؟
آخ يابراك
لو الـ (لو) تنفع
كان سوينا بلاوي

بس احلى شي بمنع الكحل عن المذيعات ههههه
الكحل الحين صار ولا شي
يافل ميك اب يا ماتقدم ههههه

ومن زمان عن المركز الأول
=)

عَـــــــــــــذبه said...

.
.
.
.
.
.
كااااااااااااسك ياا وطن


كلامك يعـــــِّور يابراك

kila ma6goog said...

تهقة تربح من هالقناة؟

الناس تبي هواش و فتنات

9ahba'a said...

آه يا بلد

ضربت على الوتر

Peace said...

ان شاء الله تكون عندك جريده و قناة
و راح نكون من قراء الجريده
و مشاهدي القناة

ezain_kilah said...

وي جان بخت! أنا أول واحدة أزهب لك راس المال

عيال خواتي يعجبونك والمسجد قبال بيتنا... أهدهم عليه جم شهر إلا تكلفة الجريدة والقناة عندك

عتيج الصوف said...

its gonna be my pleasure to be the first volounter to work with you in that JAREEDA & QANAT ;)

صبا said...

صح السانك علي هالكلام الطيب

قلبت المواجع

تحياتي يا خوي

Aldenya said...

الله
جانزين عندك هالقناة
جان مسحت كل القنوات
وخليت بس قناتك يا براك

charisma said...

ههههههههه
تفيده عاد
:))

يا ريت الى مثلك وشرواك يملك جريده او قناة
ايييه يا براك الله كريم
الاعلام مو مثل اول
الناس تشدها الفضايح والفتن
والجذب والنفاق
والطق والرقص
://

خلك بينا نقرا ونتفاعل
وعسانا ما ننحرم

بوست بالصميم
تسلم ايدك

esTeKaNa said...

وليش تمنع الكحل يا حافظ وتخلينا نشوف عيون حمصه؟
:Pp~
الله يا براك والله انها بتكون قناة كويتيه حتى النخاع
حتى برامج الاطفال نبي خشيم الفار يقدم وعندي بنت عم بثانيه روضه تعجبك
نخليهم مع بعض يقدمون
:))
وانا؟
تخليني اكتب بالجريده عن خاطري
واسطتي رب العالمين وبراك
ترا ما عندي احد
:Pp~

MKSARAT SAYED SAAD said...

انت تملك اكثر من ذلك
تملك قلم نابض بارك الله لك فيه
تحياتي
سيد سعد

kuwaitya_7saweya said...

وناسه لو تملك قناة
بصير اول مذيعه تطلع من غير مكياج
واكيد راح توظفوني صح

Ni3Na3aH said...

el mothe3at ele may7e6on ke7el ma7ad yeshtehe y6el bwayehom ba3dain..LOL
eh walah lo el wa7ed 3endah Qanat.. chan 7a6 shaghlat o mina3 shaghlat 3ala kef keefah
bas yallah 7aleyan nektefe ina n9aker el tv laman maye3jebna shay
nice post:)

Maximelian said...

اخ لو عندنا قناة

بس ترد على قناة وجريدة الحرامية

صح لسانك حبيبي :]

Barrak said...

عيون الحب

سيدتي صاحبة التعليق الاول
يمكن مع اللو يسمعونا ويفتحولي على الاقل ملحق بجريده

ركزت على الكحل لان هالايام الكحل صار وضعه مو طبيعي
كانه الوحده صاكينها بكس
اشكرك

Barrak said...

عذبه


كاسك


ادري انه يعور بس يشرح الواقع الحالي


اشكرك

Barrak said...

kila ma6goog

مثل مافي ناس تبي هواش

هم فيه ناس تبي برامج تغذي الفكر

اشكرك

Barrak said...

9ahba'a

اهين يابلد



شقول غير هذا اللي ابي اقوله من زمان

Barrak said...

Peace

ان شاء الله وكل شي بأمر الله

قولوا امين

Barrak said...

عتيج الصوف


انا اللي راح افتخر فيك لما تتأسس القناة ويتجمع راس مال الجريده


بسوي برنامج لك اسمه عتيج الصوف
بس بشدد الرقابه عليك

Barrak said...

صبا

صح بدنك
واشكر مرورك الطيب


مايخالف تحملوني

Barrak said...

Aldenya

مشكوره سيدتي الراقيه

راح اسوي برنامج لك باسم الدنيا

بعد شتبين

Barrak said...

charisma

طبعا تفيده لها مغزى بس ماراح ينقال
شرواك الطيب ياوخيتي

صدقيني حتى لو اللي احلم فيه يصير راح اكون بينكم
اصلا فيه برنامج يومي لمده ساعتين يتحدث عن جديد المدونات
من اعدادك وتقديم نرفانا

شكو نرفانا ماادري

Barrak said...

esTeKaNa

ياحولو كلامج الكويتي العتيج

عيون حمصه شخباري حمصه

هههههه

خشيم الفار ماراح يصلح حق برامج الاطفال
الظاهر بسوي فقره دينيه
لانه هالايام من يشوفني يقول الحمد لله والشكر لله
مسوي الهوايل ويقول الحمد لله والشكر لله

وراح اطرح موضوع بنت عمك على خشيم الفار وننتظر موافقته
الحمد لله والشكر لله

الجريده تحت امرج
بس انا مالي راي
خشيم الفار اهو اللي يقرر
انا عبد المامور

Barrak said...

MKSARAT SAYED SAAD

سيدي السيد
اشكرك على مرورك الراقي
اسعدني تواجدك وتعليقك
انت رائع كما هي كتاباتك

شكرا للإطراء

السؤال هل القلم النابض له مكانه بهذا الزمان ؟

Barrak said...

kuwaitya_7saweya

المكياج مسموح بس بدون كحل
اذا راضيه لازم تجتازين اختبار خشيم الفار


انا مالي شغل

Barrak said...

Ni3Na3aH

اشكر وجودك المنعنع

صدقيني راح تكون هناك غربله لمفاهيم الاعلام بقناتي

حلوه قناتي

Barrak said...

Maximelian

ماراح ارد على احد
بس اعتقد راح اسحب البساط منهم

Almas said...

الله يرزقك

مافي شي بعيد عن رب العالمين

إييييه

تكفى براك .. امنع البف بكل أنواعه

لأنه مضر بالصحة

أحسه ثقيل عالراس

lawyer said...

والله يا ريتك تملك

عشان نشوف شي راقي

ويتعدل الذوووووق العام

هـــدب said...

اخوي براك

ان شاء الله تكون عندك جريده و قناة

وتشيل كل شي معفن وتحط بداله يديد

الله يوفقك وييسر لك الخير اللهم امين

يارب العالمين

فتى الجبل said...

هذا اللي تتمناه
بس الواقع ان معظم اللي يملكون الجرايد همهم نفسهم وبس

strawberry said...

ya salam 3alek wallah at7a66 m3ak 0 asaowy sharakah 3ala hal8anat ;)

بـابـل said...

كافي إن عندك إحساس ومدوّنة

أحسن وأصدق من عرب سات

تسلم يابراك

مدهش والله


وبس


بابل

G and L said...

why not? :)

qesat_5ayal said...

بالجريدة
بالقناة

تحط ناس يتكلمون كويتي مو مكسر؟

لان مليت من اللي يتكلمون مكسر
:\

`~MnO YeNSa! ~` said...

اييي والله..
صدقني قناتك تربح ..
الكويتيــــن شيبون غير الوناسة بس اللي على اصول ..

عــــاد شنور راح تسمي القناة
و الجريدة

لا تقولي خشيم الفار يقرر :P

Barrak said...

Almas

الله يرزقنا ويرزقك
ولو اني مااعرف شنو البف
بس عشانك راح امنعه

البف مو نفس البفه
والبفه اهو الشخص المتين
او باللهجه الكويتيه الطريفه الطمبحله

Barrak said...

lawyer

مانبي اماني وامنيات لازم تشاركين بالحمله البراكيه للقنوات التلفزيونيه

بالنسبه للذوق العام
من غيري بيعدله
عدل ؟

Barrak said...

هـــدب

جريده وقناة مره وحده
انا راضي بشي واحد
واشكرك على دعائك الصادق

Barrak said...

فتى الجبل

دام الاحلام ببلاش
والاماني هم ببلاش
يحق لي احلم

وترى حلمي بسيط
بس همتكم معاي

اشكر مرورك ياصديق

Barrak said...

strawberry

بذمتج انتحاطط على جم

الا عاد اذا انتي دفعتي مليون وانا ميتين دينار

ممكن الحلم يصير حقيقه
ها اعطيك رقم حسابي ؟

Barrak said...

بـابـل

الله يخلي لي هالاحساس
وهالمدونه
بس هم نبي ناكل خبز حالنا حال خلق الله

اشكرك

Barrak said...

G and L

الاسباب متعدده ومتشعبه ومتفرعه
الا اذا عنكم واسطه وراس مال هذا موضوع ثاني


اشكرك على مرورك الاول

Barrak said...

qesat_5ayal

انتي من صجك
انا يسموني صائد البدليات
تبيني احط ناس يتكلمون مكسر

مستحيييييييييل

والدليل اني راح اسوي مناظره عن البدليّه

لاتحاتين

Barrak said...

`~MnO YeNSa!

راح اسميها
قناة الاخبار لخشيم الفار

انا مااقدر اشك خيط بابره من دون شوره

امس يقولي ليمتي انت بتصير ابوي

شقوله هذا

كويتي متعصب said...

شعرك وايد حلو ويشرح الواقع .. انزين نبي قناة وطنية وتخاف على الديرة وبرامجها حلوة .. أمنية .. شرايك نتحاطط :)

Barrak said...

كويتي متعصب

اشكرك على وجودك
وعلى اطرائك

اذا بنتحاطط انا وياك مانقدر انجرلنا كورولا موديل 90

كويتي متعصب said...

عاد كان عندنا كورولا موديل 90 بس انباعت :) ... انا ودي انه التجار الوطنيين يسوون قناة على مستوى عالي منها يربحون ومنها يفيدون البلد ويكون صوت الوطنيين

Kuw_Son said...

أنا أحيي قناة الوطن .. لو تصير هي تلفزيون الكويت الرسمي يكون أبرك

Barrak said...

كويتي متعصب

ليش بعتوها
ياااه

التجار الوطنيين او غيرهم مادري شفيهم خاملين

Barrak said...

Kuw_Son

من حقك تقول رايك
ومن حقي اقول رايي

تبي قناة الوطن تلفزيونا الرسمي

تبي موضوع الطائفيه ينتشر مثل مانشروه
تبي يهللون بولد راعي المحطه
تبي قناة الوطن تكون التلفزيون الرسمي وهي همها بازالة الدواووين اكثر من همها على الديره


الحلو فيها ان اللي يشتغل فيها اهم كويتيين

عموما
رغم تحفظاتي على قناة الوطن الا انها قناة المل يشاهدها مو من زينها لا
لاننا محرومين من شي فيه ريحة الكويت
الانسان السعودي عندما يشتاق لبلده يجد اكثر من محطه

والمصري واللبناني

اما احنا

شقول

اشكرك

mtfa2el said...

براك
انا عندي طلبات صراحة ..ابيك تاخذ النقل الحصري حق كاس اوربا و كاس العالم و كاس افريقيا و كاس اسيا و كوبا امريكا و الجامبيون ليق و الدوري الأسباني و الدوري الإيطالي و الدوري الإنجليزي و الدوري الألماني- لا الألماني مو لازم - و الدوري الفرنسي
بعدين ابيك تحطني معلق مع أحمد الطيب و الأخضر بريش
و ابي مباريات برشلونة أنا اللي أعلق
تم ؟

بو محمد said...

أخي العزيز براك

إن شاء الله تصير عندك قناة و جريدة
و تكشف الكذاب و تربط ايده
مثل المردم تحكره و تصيدة

تدري يا البرك

عندك اللي أحسن من الجريدة، عندك هامدونة العامرة اللي ما شاء الله تبارك الرحمن دوم عامرة بحسك و حس زوارها، و إذا الجرايد تنباع ب 100 فلس فمدونتك ما يازنها طن ذهب
أسأل الله لك و للجميع التوفيق

Shaima'a Alkandari said...

لوتملك قناه وجريده جان سويت سواه موطبيعيه ياخوي

وصح لسانك

Enter-Q8 said...

لو
و
لو
و
لو

لو يملك براك قناة او جريده
كان شفنا هجوم عليه
بمجلس الامة

لو يملك براك قناة او جريده
كان ما خلوه سبب خراب هالامه

بس براك يملك اكبر من القناة و الجريده
محبة من ناس ما يعرفهم و لايعرفونه

وراحة بال راح يفتقدها
لو ملك
القناة و الجريدة


ريح بالك يالبرك

لو ما تسوي شي

E6eba_Ethb7tny said...

كلامك يه على الجرح أخوي الكويت تستاهل كل خير

وللأسف في ناس ماهم غير انهم ينشرون الفتن الداخلية

وحروفك صدقني توصل وتأثيرها أكبر من قناة أو جريدة

وانت ولد الكويت وان شاء الله يكون صوتك مسموع

الله يعطيك العافيه ويحميك للكويت ويحميها لنا

NewMe said...

كثيرا ما افكر
كيف لي ان اجعل الناس
يحبون انفسهم ويحبون بعضهم بعض
جريدة أو قناة
جميل أن يكون لا يزال لديك بعض من الأمل
واتمنى لو تحققت امنيتك
ربما حينها كنت ساتابع التلفاز
دمت بحب
تحياتي

Almas said...

البف .. الله يسلمك أخيي


أهو إنتفاخ موديلات حجاب 2008

يا ربي هالموديل من وين طلع؟

غريب

أمبيه ذكرتني بقبل لما المتين يطيح

نغنيله طاح طاح طمبحله
طاح طاح طمبحله

وغالبا ماتصير هالمواقف بالعيد
المسكين كاشخ ومتزقرت .. وبالآخر طيحة واحراج

المسكين يعصب من صجه

يحليلنا والله

فراوله said...

مساالورد والجوري
مبدعنا صاحب جريدة وقناة
المستقبل
والله لو واحد مثلك وشرواك
يملك تلك القناة والجريدة
جان تعدلت احوال
كثيرة
بس شنقول
الله المستعان
:(
دمت كما انت
ابدا
:)

Barrak said...

mtfa2el

انت تامر امر

طبعا اخذ مني حجي
اولا تبي نقل حصري لكل هالمباريات
شقالولك براك ولد شهبندر التجار
انا اذا نقلت لكم الدوري السوري زين
بالنسبة لتعليقك لمباراة برشلونه انا موافق
بس لازم اخذ رد ميسي وتورام واحتمال اكسافي

طلبك مجاب ياعنتر

Barrak said...

بو محمد

ياحلو كلامك
تصدق من اقرا تعليقك افرح
واحب صراحتك
هالمدونه فاضت بمحبة زوارها
من غيرهم مخليني استمر
الله لايحرمني منهم ولا منك

Barrak said...

Shaima'a Alkandari

تهقين اقدر اسوي شي

Barrak said...

Enter-Q8

عاد انت لاتصدق
كلها قصيده

ابي ابين فيها ان اللي قاعد يصير وينكتب بالجرايد غلط
واللي قاعد نشوفه بالتلفزيون هم غلط


تذكر مره كتبت ابي اروح المريخ

السالفه بدت تبيخ
هذي القصيده على نفس الوتيره

حلوه وتيره

اشكرك ولو اني شرهان عليك
بس شسوي مااقدر

Barrak said...

E6eba_Ethb7tny

الله يسلمك ويخليك
تشرفت بهذا المرور


وترى الطيبه ماتذبح
تقوي


اشكرك

Barrak said...

NewMe

جميل ان اجد تعليقك على صفحات هذه المدونه
وجميل ايضا ان تكون لنا احلام

والاجمل انه بعد ان استلم القناة ستكون لدي مشاهده من ناس راقيه امثالك

اشكرك
وايد طولتي علينا

Barrak said...

Almas

اشكرك على هذه المعلومه
وللعلم من اول ماطرينا الطمبحله
كتبت قصيده
عن الطمبحله

بس اخاف انشرها يفقصوني الطمبحليين

يعني جمع طمبحله

Barrak said...

فراوله

مساء النور

شنو شتقولين
الامور الماليه راح تكونين انتي مسؤله عنها

بس بنظام المكافآت

قولي تم

حسافتج يا كويت said...

لو تفتع عمل قناة الوطن وجريدتها

Barrak said...

حسافتج يا كويت

اسف مافهمت

حسافتج يا كويت said...

براك

إن كلمة لو تفتح عمل الشيطان
(حديث شريف)

Barrak said...

حسافتج يا كويت

اشكرك على ردك الثاني

وكل اللي اقوله صدقت ياسيدي يارسول الله

sologa-bologa said...

من الحين اقولك أنا وياك

بس لا تطلب مني بيزات

الحالة تعبانة يا ليلى خطبة مافيش
إنتي غنية يا ليلى واحنا الدراويش

سدرة العشـــاق said...

لو
ياليت
جان زين
جان البخت

كلمات سهلة بس التطبيق ؟

و صح إلسانك

صبا said...

لو تملك جريده
لو تملك قناة
اشتغل عند بلاش وما اغث احد
؛؛؛؛؛؛؛


تحياتي

Barrak said...

sologa-bologa

عاش بو درويش

حتدفع يعني حتدفع

Barrak said...

سدرة العشـــاق

انتو عطوني بيزات وأنا اعلمكم التطبيق شلون بيصير

Barrak said...

صبا

اتشرف بوجودك بجريدتي وقناتي

اصلا انا بحط برنامج اسمه صبا

فراوله said...

مساالورد والجوري
مبدعنا الراقي
تم
وما بعد كلامك كلام
دمت بدفء وعذوبه
ابدا
:)

Barrak said...

فراوله

اشكرج ياسيدة الذوق

MKSARAT SAYED SAAD said...

بارااااااااك العزيز
كما يوجد ملح يوجد سكر ولولا وجود الأثنين ما عرفنا الفرق بينهم
دمت بكل ود عزيزي
سيد سعد

Barrak said...

MKSARAT SAYED SAAD

اشكرك ياصديقي على مرورك
رغم تقصيري

اشكرك جزيل الشكر وصح لسانك