Monday, September 27, 2010

قوطي منخفس





من خبر بجريدة تنقلب الدنيا وتنعفس

ومن سالفه بدوانيه  يصير استجواب

اذا هذوله ربعنا طبيعي الحال منتكس

وطبيعي احنا للتخلف مشرعين الباب

اللي يقط بدليه احتمال كبير ينجِبِس

واللي يغني إغنية يسووّنه كباب

الروح من الكدر والضيم قامت تنتِرِس

نسينا الفرحه والبهجه وحتى اليبّاب

مفهوم الانهزاميه يوميّه فينا ينغرِس

شيّبونا غصب وإحنا للحينّا شباب

فيه ناس عقولهم جنها قوطي منخفِس

يسرحون يمرحون من غير أي حساب

احس نور الأمل خافت خايف مندِعِس

بقلب جم واحد يحب بذمّه هالتراب

تراب غالي يبيله ناس شوي تِحِس

تكشف المخادع وتبخص اللئيم والكذّاب

٢٧-٩-٢٠١٠
الثلاثاء

تنعفس : تنقلب رأسا على عقب
منتكس : منقلب
ينجبس : أي ينكبس أي يضرب
تنترس : تمتلئ
اليبّاب : الزغروطه قوللولولولوووش
قوطي : علبه والجمع قواطي 
منخفس : يعني قوطي سفن اب ودايسه عليه سياره
مندعس : مختبئ


تبخص : تعرف ... تفهم 

4 comments:

SHOOSH said...

صح لسانك

بس هذا قوطي سفن أب صجي ؟؟

يعود لأي عصر ؟؟

لو أطحس ما أشرب منه

شكله حصاله على فكره

Barrak said...

SHOOSH

صح بدنج شكرا

هذا قوطي سفن اب على ايام رونالد ريغن

Anonymous said...

صح لسانك خوش حجي :P

Barrak said...

كركور

صح بدنك اشكرك