Saturday, May 23, 2009

أورّيك فيه



إخذه وياك قلبي لو نويت البعاد

دامك بعيد عني شسوي فيه

كان معاك الفرح يكتبله ميلاد

كان معاك مرتاح شايف أمانيه

مافاد قلبٍ بحنايا ولهان مافاد

خلّه يمكن ببعادك تحن لراعيه

خلّه وياك قلبٍ ماعرف  العناد

قلبٍ على كيف كيفك تمشّيه

سو ماتبي بقلبي و إنسى البعاد

أوعدني ماتخلّيني وأنا أورّيك فيه

14 comments:

كبرياء انثى said...

في سبيل التواجد مع الشخص الي انحبه
ماراح نقوله لا لو شلع قلوبنا من مكانها



صح لسانك :)

صبا said...

شخبارك بو عبدالله

إخذه وياك قلبي لو نويت البعاد دامك بعيد عني شسوي فيه كان معاك الفرح يكتبله ميلاد
.
.
.
تسلم اناملك

لي راح روحي قلبي شبي فيه
ما راح ينفعني بشي ولا أبيه

,,

Sweet Revenge said...

يعني ما يصير انت ومن تحب علي هالقليب الفقير

الله يعينه :)

ضـاد said...

اي والله لا نوى البعاد, قلبك شتسوي فيه !؟

صح لسانك



:)

Shaima'a Alkandari said...

:)


كلماااتك صج معناها عجيب


ايه ايه سوو اللى تبي بس لاتخلى هالقلب بروحه

Najmah said...

أخيه
القلب وفي يابراك
:)
روعة روعة
صح لسانك

Barrak said...

كبرياء انثى

سيدنتي صاحبة التعليق الاول

المثل يقول

الحب عمي
ويقوده مينون

صح بدنك

Barrak said...

صبا


حي الله صبا

شلونج

سلامة روحج


نورتينا

Barrak said...

Sweet Revenge

بصراحه كلامج صح

على قولة ابو اصيل

مسكين قلبي من الهجر يرثاله
الى ان قال

أمشي بـحملي ميل
ياويل المولع ويل



ويل
ويل
ويل

Barrak said...

ضاد


صح بدنك

اي والله شاسوي

ماذا افعل

Barrak said...

Shaima'a Alkandari

وجودج بعد غيبه

صج يونس

Barrak said...

Najmah

صح بدنك

اشكرك يانجمه

تسلمين


حلوه اخيه

صج شالفرق بين اخيه
وأوفّيه

؟؟؟

للوش said...

Barrak

كم شعرت بكلماتكـَ كم احسست أنها تحكي كل قصص القلب ..
حين نكون كالشمعة التي تحترق من اجل ان تضيء يوما واحدا لمن تحب ..
وهو لا يحافظ على تلك الشمعة نكون في قمة غبائنا ..
لأنها ذابت من اجله ليستمتع بجمالها وحين ذابت خرج ليبحث عن شمعة اخرى ..
غبية هي القلوب تعشق لتذوب ألماً دون أن تنال مرادها..
حرفكـَ قادني الى الصحوة ..
كم انا سعيدة لوجودي بين نثر حرفكـَ وكم يروق لي حرفكـَ وقلمكـَ ..
حماكَ الله أيها المبدع وحفظكـَ من كل شر ..
أكليل من الوجد يعبق طهارة روحكـَ ..

Barrak said...

للوش
سيدتي الراقيه

تملكين القدره على تحليل كلماتي حرف حرف
بذكاء

اشكرك لك استماعك
واحساسك
الصادق

والراقي

اشكرك