Tuesday, March 25, 2008

قرطبه



حوار بين مواطن وإبنه قبل انتخابات مجلس الامة وهذا المواطن اسمه براك وذاك الإبن اسمه خشيم الفار
والسيد خشيم الفار يقول بأنه يجب ان تقرأ كلمة يبا على وزن قرطبه

يبا
لاتعطي صوتك
لأي واحد يطلبه
يبا
ياللي خلّيت حب الكويت
فينّا ربى
يبا

الديره محتاجه من يحسنا
يكفينا ماشفناه وبسنا
حكّم عقلك بإختيارك
خاف الله بدارك
امسح عيون الديره
المصبصبه
يبا

دوّر على اللي يخاف
على هالارض
بصوتك تفرض الصح
فرض
لاتهمّك صور ودعايات
واعلانات مخبخبه
يبا

شوف عيوني جم حلم فيها
تدري بصوتك تقدر تورّيها
وتمنّيها بمستقبل جميل
يبا ادري الحمل ثجيل
بس مو وايد اللي
نطلبه
يبا

ولدك لصوتك يترجاك
يبا برّاك يبا برّاك
يبا قبل لاتصوّت تذكّرني
البلد بخير اسمعها منّي
يبا
يبا


25/3/2008
الأربعاء



66 comments:

DiLLi O MiLLi said...

أي والله البلد بخير
بـــس
للي يعرف قدرها


وهذا اللي قلناه
الكويــــت أمــــانة بـرقبتــــكم
حكمـــوا ضمايركـــم باللي راح تنتخبــــونة



ملح الدنيا .. خشيم الفار
أسم الله علية
ربي يحفظه
وينور طريجه


:)

حسافتج يا كويت said...

شوف عيوني جم حلم فيها
تدري بصوتك تقدر تورّيها


سالفة طوييييلة إختصرتها بكلامك الحلو

كثر من هالسوالف

فريج سعود said...

هذا حكيم زمانه مو خشيم الفار
اسمع كلامه يا البرك وما ياك بويهي

Shather said...

لاتهمّك صور ودعايات
واعلانات مخبخبه

لووول ملابس مو اعلانات :P

الله يقدرنا نسوي اللي يرضي ربنا و يصلح شان بلدنا

:)و صح لسان قايل هذا الشعر

بعثرة مشاعر said...

يحليله
خشيم الفار

الله يخليه لك ان شالله و يحفظه

صااج والله
و اسمع كلامة

و صح لسانك :)

الزين said...

خووووش كلام

وخووووش ولد

nEo said...

اي و الله بخير


صح السانك


كلش و لا عيال قرطبة

Kuw_Son said...

ولدك فيه علامات النبوغ .. شكله بيصير عضو مجلس أمه ..

دير بالك على صوتك :)

NewMe said...

ليس أجمل من حب الوطن
أطيب الأمنيات
أن يحقق المجلس الجديد
أمنيات خشيم الفار
دمت بحب
تحياتي

عيون الحب said...

شوف عيوني جم حلم فيها
تدري بصوتك تقدر تورّيها
وتمنّيها بمستقبل جميل
يبا ادري الحمل ثجيل
بس مو وايد اللي
نطلبه
يبا

حبيت هالمقطع خاصة أول بيتين

الله يحفظ بلادكم يارب

Peace said...

شكرا على الرساله

فعلا الصوت امانه

esTeKaNa said...

ترا انا بهالمزيون انجبرت
:Pp~
الله يحفظة
ويكمله بعقله
ويبلغك فيه باعلى مناصب الدنيا والدين قول آميييين
:)
امسح عيون الديرة المصبصبة
!!
تعبير مؤلم لحد الآه
كثيرا ما اتخيل عيون هالديرة تنظر لنا بعتب..
تترقق فيها الدمعات
وتنتظر منها وقفات
وكلمة مصبصبة..كلمة معبرة
وانا أٌقرأها شعرت بدموع كل اللحظات
انته مبدع
تبهرني باختصار الكثير من الأفكار بكلمات بسيطة وراقية تدخل القلب بدون استئذان


الله يحفظك
ويسعد لي صباحك وممساك
:)

`~MnO YeNSa! ~` said...

يحلاته
مشالله
الله يحفظه
زوقة
..
بس
سمالله
سمالله
عليــــــــــه
حكيم
:P
يخليه لك ويخليك له

Barrak said...

DiLLi O MiLLi

سيدتي صاحبة التعليق الاول
اي والله البلد بخير للي يعرف قدرها

وخشيم الفار وابوه يبعثولك تحياتهم

Barrak said...

حسافتج يا كويت

هلا فيك اخوي

السالفه مو طويله
السالفه جدا بسيطه
خافوا الله بديرتكم وبس

مااحب اكثر من هالسوالف

Barrak said...

فريج سعود

قول لااله الا الله

انا سامع كلامه

SolaimaN said...

يا وليدي ،،هذا صعب اللي تطلبه

احنا بلاوينا

متخومه ومتبتبه

فيها هم

فيها حسد

وفيها زود الربربه

،،

ماشالله ،،الله يبلغك فيه يا براك

سدرة العشـــاق said...

صح إلسانك

و عسى الله يحفظ اوليدك من كل شر و يشوف احلامه كلها تتحقق بحياتك ان شاء الله

: )

Barrak said...

Shather

كان هناك نقاشا طويلا مع والدتي العزيزه عن موضوع الخبخبه

فقد ذكرت الغاليه شلون تقول مخبخبه المخبخبه تكون الدشداشه ويقولون الدشداشه تخب
او العباة ويقولون العباة تخب
وذكرت لها تعليلي لاستخدام هذه الكلمه مخبخبه
اولا
كلمة مخبخبه اصلها كلمة الخبه
والخبه هي الصيحه او ناس وايد يتحجون مع بعض
وتنطق مرات من غير الالف واللام أي خبه بتشديد الباء
وبما ان الملابس المخبخبه هي الملابس الواسعه
اخذت هذه الكلمه وطورتها
كالتالي
لاتهمّك صور ودعايات
واعلانات مخبخبه

اي لاتهتم بكثرة صور المرشحين والدعايات التي تجملهم بعينك واعلانات تخب عليهم
لاننا راينا مرشحين سابقين لمجلس الامه برامجهم الانتخابيه وشعاراتهم تخب عليهم
اي اطول منهم
او اكبر منهم
لماذا اكبر منهم لانهم لم يستخدموها في اثناء تواجدهم تحت قبة البرلمان
بل استخدموها كوسيله كاذبه للضحك على عقول الناس
كانه خشيم الفار باختصار يقولي يبا لايقصون عليك
التفتت علي ام براك وقالت انت صح
اشكرك ياشذر
نورتينا

Barrak said...

بعثرة مشاعر

اكيد باسمع كلامه

طبعا مو بكيفي غصب علي

اشكرك

Barrak said...

الزين

وخوووش وجود لك

اشكرك

Barrak said...

nEo

عاد انت موتصدق

Barrak said...

Kuw_Son

قول لااله الا الله
الله يصلحهم ويرزقك

ويخليك

Barrak said...

NewMe

وليس اجمل من وجود تعليقك سيدتي في هذه المدونه

شرفتينا

Barrak said...

عيون الحب

اقولج شي
والله العظيم
انزين انا شكو احلف
المهم كنت قاعد اقول هالشطر بالذات منو اللي راح يحسه

لاني من اقراه يعورني قلبي واقول شلون كتبته ماادري

اشكرك ياحساسه

Barrak said...

Peace

العفو

اشكرك
وان شاء الله الكل يعرف شنو تكوين كلمة امانه

Barrak said...

esTeKaNa

لاتسمعك لولووه ممكن تنظم عمليه اغتيال والسبب خشيم الفار ديري بالج
انا خايف عليج مو عليه
ترى لولووه شرانيه
ولولوه اهي اللي وياه بالمدرسه مره قالتلي اذا طقيته اقول حق ابوي يوديك المخفر

ديري بالج

دائما استكانه تقرا مااكتب بصوره صحيحه
الله يحفظك
ومشكوره على دعوتك
كل ماتدعين لي وتدعين لهم اشوف الخير
بس هالمره دعيتي وصار غبار
شالسالفه

Barrak said...

منو ينسى

الله يسلمج ويخليج

وترى اهو يقرا كل كلمه عنه
واذا مافهم انا اترجمله

Barrak said...

SolaimaN

سليمان عندنا
من قدنا
يابختنا

انت وينك

صج صج انت تتغلى
شدعوه يبا
نبي شويه من قطاتك وبس

الله يسلمك بس هذا اللي اقوله

Barrak said...

سدرة العشـــاق

الله يسلمك ويخليك ويحميك

اشكرك

charisma said...

الله يا براك
يا حلو الاحساس الى حسيته والطمانينه بهالحوار

ان شاااءالله خير
ان شاءالله الواحد يطلب ويتمنى والله يكتب كل خير وصالح للكويت
لانها تستاهل

استمتعت يا بو خشيم الفار
وعساك ذخر لهم
والله لا يخليك منهم
امين

Manooya said...

ومنا لخشيم الفار ونقوله يبا اسمع كلام ابووك !!


الله يحفظه لك ان شالله =)

بو محمد said...

أخوي العزيز الغالي براك
ولدك صاج يا البرك
فكر فيه من تصوت
و مثل ما قال لك
إن شاء الله البلد بخير و عافية
دام فييها ناس قلوبهم بيضة مثلك
الله يحفظ لك الصغير و كل غاليينك
و يبارك لكم بكل شي إن شاء الله

حسافتج يا كويت said...

براك

مريت على مدونة الدوائر الخمس واسمك يمهم قلت امر اسلم عليك دامي قريب

فراوله said...

مساالورد والجوري
مبدعنا الراقي
صدق والله خشيم الفار عسا ربي يخليه لك
البلد بخير
ودايما بتظل بخير
دام فيها أمثالك " ولا هانوا الباقين"اللي لين اللحين فيهم عرج ينبض بحب هالتراب الطاهر
:)
قول آمين عس ربي يحفظ خشيم الفار واخوه
ويخليك ذخر ودايما فوق راسهم
يارب
:)
دمت بدفء وعذوبه
ابدا
:)

مُحَسّدْ said...

من أمن العقوبة أساء الأدب

يحدث في الكويت ... التظاهر بسبب تطبيق القانون !!!

هذيان said...

يبا لا تعطي الصوت لكل من أطلبه
وهو في كوره فاصل يبي يلعبه


اللللللله يا براك

الديرة بخير بأذن الله بخير

DanDash said...

وسّلم قلبه بعد يعرفون يتحجون بالسياسة
اسم الله عليه
تبارك الرحمن

صح لسانك يا خشيم الفار

بس من يسمع

Najmah said...

امسح عيون الديرة المصبصبة

هزتي هالعبارة

.
.
ي والله
/صح لساانه خشيم الفار
ربي يخليه لك ويحفظه من كل شر

esTeKaNa said...

بهذه المناسبة أهدي خشيم الفار هذه الكلمات:
أحبك لو تحب غيري
وتنساني وتبقى بعيد
عشان قلبي بيتمنى
يشوفك كل لحظة سعيد
:Pp~
الاحساس بالأمان اهم من الحب
ولولوه سبع عجبتني صراحة
:)
الله يسلمك يا براك ويحفظ لك كل غالي تحبه
هالمرة غبرت ميخالف
يت على غبار مو شي اكبر
بس لا تخاف
االخير بقبال
:pP

Shaima'a Alkandari said...

الكويت لسه بخيييييييييير


وبتكون بخير لو شعبها حبوا انهم يكونون بخير

Selezya said...

ربي يخليه لك كلامه عييين الصوااب اسمعه وطبقوووه ياعالم


وصح لسانك

Selfridges Girl said...

allah ywafeg inshalla belyay ow ye6ra7 elbaraka
kalam jameel ow mo2ather 6ale3 men elgalb ow dasg globna :)

mantovani said...

يا استاذي

وطنيتك

خيالك

رومانسيتك

محبتك

أبوتك

مظلتك

قلبك الكبير

خشيم الفار
....

كلهم على راسي

و مادري ليش احس اني اعرفك




مانتوفاني

Barrak said...

charisma

فعلا سيدتي الذكيه
هذا ماأحببت أن أقوله

الدنيا بخير
وعيالنا بخير
والديره بخير
كل اللي ابي قوله ياناس الامل
هالكلمه غرسوها بنفوسكم
الامل


ياحلو دعواتك جزاك الله خير
اشكرك

Barrak said...

Manooya

ويابراك إسمع كلام خشيم الفار


اشكرك سيدتي

Barrak said...

بو محمد

يازينك ياأبو محمد

ياحلو كلامك
وكل شي بخير مادام فيه يهال تضحك وشاب مايتشكّى

Barrak said...

حسافتج يا كويت

حياك الله
وعساك دوم قريب
يالحبيب

Barrak said...

فراوله

قولي آمين

بعد آمين

الله يسعدك
ويحفظك

Barrak said...

مُحَسّدْ

الكويت للحين بخير
حتى إسأل خشيم الفار

Barrak said...

هذيان

مو بس انا اقول بخير
الواقع يقول جذيه بعد

Barrak said...

DanDash

اذكر وني كنت محتار شلون اختار اسم دلع لاي واحد من اليهال
بصراحه عندي اسامي غريبه
يعني مثلا اي طفل عمره اقل من سنه أسميه أنّوش
ليش انوش ماادري
ليش قاعد أقولج هالسالفه
هم ماأدري

Barrak said...

Najmah

وتهز هالعباره اكثر لما يكون كل اطفالنا يقولون نفس هالكلام

Barrak said...

esTeKaNa

ويرد خشيم الفار ويقول

سنين وسنين وأنا صابر
وراح أصبر كمان وكمان

عاد تخيلي خشيم الفار يقول كمان

االخير بقبال

بالله عليج واسم الله عليج
هالكلمه مايقولونها اللحين الا اللي فوق التسعين
الله يحفظك

Barrak said...

Shaima'a Alkandari

تصدقين عاد
انتي اختصرتي كل السالفه بجملتك

ماشاء الله عليج

Barrak said...

Selezya

صح بدنك
الله يخليج ويسلمج

Barrak said...

Selfridges Girl

الله يسلمك ويسلم قلبوكم

اشكرك على وجودك

Barrak said...

mantovani

يسلم الراس وراعيه
تخيل وجودك شرف لي
فما بالك اذا تعرفني


اشكرك ياسيدي الفاضل

mantovani said...

الله يسلمك و يخليك يا براك

انا حقيقة ما اعرفك و لا عمري اجتمعت وياك

لكن المشكلة ان كل الكلام اللي انت تقولة احس ان طالع من قلبي

و هالشي احسن من اي معرفة

مانتوفاني

Barrak said...

mantovani

يسلملي قلبك

يالغالي

Aldenya said...

أتمنى
كل أمنية
تمناها هذا الملاك الصغير أن تتحقق
أن يكون هذا الحوار
هو البند الذي سيسير عليه عقول المواطنين

شكرا يا براكنا

Barrak said...

Aldenya

هم لايملكون غير الحلم
ونحن لانملك الا ان نوعدهم بتحقيق هذا الحلم

وايد عجبتني براكنا

chatterbox said...

حتى انت خشيم الفار
لووووووووووول

Mai said...

MSHALLA 3aJeBaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaa!

Barrak said...

chatterbox

عندنا وعندج خير

Barrak said...

Mai

اشكرج