Saturday, March 29, 2008

مجمّع

جلست في احدى المجمعات التجاريه لمدة خمس دقائق ، لم يعجبني الوضع فكتبت

مجمّع

فيه العالم تجمّع

تلقى الرزه

وتلقى الكووول

وتلقى الأصلع

مجمّع

....

ناس على كيفها تغازل

ناس تناقش قوانين بازل

ناس ماتشوف جدّامها

ناس تقطّط أرقامها

وناس للسنع

تخضع

مجمّع

.....

هذا كاشخ وعنده رس

وذيج جنها رايحه عرس

وهذاك يونّس عياله

وهذي حالتها حاله

وذاك تربع

مجمّع

....

شنو تبي تلقاه موجود

تلقى المهتني والمقرود

وتشوف آخر القصّات

وتلقى اروع النسفات


بس خلاص

باطلع

مجمّع

32 comments:

DiLLi O MiLLi said...
This comment has been removed by the author.
DiLLi O MiLLi said...

حتى أنـااااا بطلع

:)


صــــح ألســـانك

kila ma6goog said...

طماشة

`~MnO YeNSa! ~` said...

اي والله
مو مجمع
عرض ازياء
...
انا طلعت من زمان
:)

78o8eYa said...

صبحك الله بالخير وبالكرامه
:)

تبعدنا الدروب
وعن هالمكان لا يمكن نتوب

ما بين رومانسية
"رفرف" و "نسايم روح"
إلى وطنية
"قرطبة"
إنتهاءاً بـ
حرّة قلب
"مجمّع"

مثل موج البحر
ترفعنا فوق
وتآخذنا تحت

وبكل حروفك
بكل حالاتك
ر و ع ة

...
شـ أخبار الديوان المكتوب
؟
^_^

حسافتج يا كويت said...

قال بو صالح وبو صالح صادق



صدق براك
صدق براك

مُحَسّدْ said...

احسن وقت للتسوق في المجمعات

من 10 صباحا ليما 4 العصر

وبعدها لا تفكر تروح

لأن الروحة بتطلع من جبدك

shahad said...

كن كل ضد و ضد تلقين فيني

هالمقطع يمكت كان غغني عبده نيابة عن المجمع

صح غلسانك بس أنا الحين بدش المجمع

فتى الجبل said...

مو عشان جذي سموه مجمع
لأنه يجمع كل اصناف البشر

moowa6en said...

قريحتك مجمعيه ..
اعجبني النثر بقدر اعجابي بمدونتك العزيزه

Kuwait said...

يا حلات دكاكين المباركيه ولويتها ونييييسه وبلا مجمعات وبلا عوار راس ..
يعطيك العافيه ..
تقبل مروري..
kuwait

حسافتج يا كويت said...

شدعوة بيعنا بالسوق

Barrak said...

DiLLi O MiLLi

صح بدنك
ياصاحبة التعليق الاول

اي والله بطلع

Barrak said...

kila ma6goog

طماشتين بعد

Barrak said...

منو ينسى

عاد لو عرض الازياء حلو مايخالف

لوعه

Barrak said...

78o8eYa

بالخير والكرامه ياسيدتي الراقيه

حتى لو تبعدكم الدروب
تبقون بالقلوب

اذا فيه شي اسمه روعه فهو كلامك ياسيدتي

بالنسبه للديوان
ياسيدتي الديوان خالص بس فيه مراجعه قانونيه وادبيه من قبل اغلى الناس عندي

مابقى شي
زهبوا فلوسكم

Barrak said...

حسافتج يا كويت

اولا لابد من ان اشكرك على اطراء هذا الفنان العملاق
خالد النفيسي بوصالح رحمة الله عليه
هو فنان بمعنى الكلمه
قبل يومان كانت ذكرى وفاته الاولى
الله يرحمه
ويذكرك بالشهاده
اللهم امين

Barrak said...

مُحَسّدْ

وانت الصاج

من 10 الى 1 وبعدها فريره هوى حمامه لي البيت

Barrak said...

shahad

عندج الكيبورد فيه مشكله بحرف الغين
بس مايحتاج اقرا لان كلامك ينحس ماينشاف

سيدتي طولتي علينا

ومن كل ضد وضد تلقين فيني

صح بجنك دشي المجمع وشوفي اللي جنهم رايحين عرس

Barrak said...

فتى الجبل

انت حكيم

Barrak said...

moowa6en

حلوه مبجمعيه

اذكر قبل سنه ونص كتبت بمدونتي السابقه قصيده ان جاو التعبير وصفت بها حالتي وانا جالس في احد المطاعم بإحدى الدول الاوربيه
الله ياهو حجي هناك
والله ياهو حجي هني


اشكرك

Barrak said...

كويت


انتي صدتيها

فعلا هذ اللي ابيه المجمعات التجاريه الجديده ماتقدر تطول فيها خمس دقايق كل شي فيه تصنّع

اما سوق المباركيه بتقد اكثر من ساعتين لان كل شي حولك طبيعي


انتي صح

حافظك الله

Barrak said...

حسافتج يا كويت

اشتريك بالغالي


يالغالي

بعثرة مشاعر said...

حلوه
مبين الوضع مو عاجبك :)

(ناس تناقش قوانين باز )

شنو باز ..؟

بعثرة مشاعر said...

و انصحك تروح الضحاوي
الليل يخرع السوق

Barrak said...

بعثرة مشاعر

قانون بازل
اولا بازل هي مدينه سويسريه عقدت فيها عدة اتفاقيات دوليه تحت مظلة الامم المتحده
وهناك عدة اتفاقيات وعلى سبيل المثال لاالحصر اتفاقية بازل للنفايات
وقوانين بازل التي اقصدها هي بالاصح معايير بازل
وهي معايير محاسبيه تتعلق بالتدقيق المحاسبي
وبشرح ادق بعد ان فرضت العولمه على العالم أجمع ظهرت هناك معايير محاسبية بالتدقيق المحاسبي وهي تتجدد كل سنه تقريبا
وهناك معيار بازل 1
ومعيار بازل 2
معايير بازل هي باختصار شكل اخر للعولمه المصرفيه او قيود محاسبيه جديده فرضت على المدقق المحاسبي في عمله
والذي قصدته في تلك العباره
ناس تغازل
وناس تناقش قوانين بازل
شوفي الفرق ناس تافهه تغازل
وناس مشغوله بمراجعة قوانين بازل

شفتي الفرق

وبصراحه صدقتي بالليل المجمعات توحش مو بس تخرّع

بعثرة مشاعر said...

مشكور عالشرح
معلومة يديدة :)

Barrak said...

بعثرة مشاعر

انتي اللي مشكوره على سؤالك

Mr. Thouq said...

كلام حلو يا حلو

GUCCI-q8 said...

جدا رائعه
يعطيك العافيه

Barrak said...

Mr. Thouq

شكرا ياذوق

Barrak said...

GUCCI-q8

اشكرك جدا