Sunday, February 21, 2010

فتح غمّـــض


ودّي أفتّح وأغمّض

وأكون بالسويد مشتّي

وفي باريس مصيّف

وبكوبنهاجن مرمّض

ودي أفتّح وأغمّض

......

ودي حلمي أشوفه بغمضه

وأهلّي الروح بطعم الراحه متلمضه

أذوق طعم الأناسه

أبتعد عن النّحاسه

ماأحش ولا أقرِض

فتّح غمّض

.......

لما الواحد يسافر يتغيّر

شعور الإرتياح فيه يكبَر

ومؤشر السعاده يِرتِفِع

يطق رقبه وصبع

ويخلي الطمأنينه بقلبه

تِستَعرض

فتّح غمّض

....

السفر يطيّر العقل

ينسيك معنى الثّقل

السفر يبيله بيزات

واحد غرقان دولارات

واليورو بعرجه ينبض

فتّح غمّض

......

يالمفلّس إقضب أرضك

ياعل مفهوم الفقر يرضّك

إشبع أقساط وفلَس

سيف الديون فيك إنغرس

وخلاك متخضخض

فتح غمض

....

ماعندك !! لاتشيحط وتسافر

مردّك ... بترِد وتقرّض الأظافر

من الحسره والقهر

ماتقدر توطوط حتى مصر

خلك بويل الحسرات

متمضمض

فتح غمض

....

ناس قادره تروح فيينّا

وناس الصبيه عندهم جنّه

ناس تحجز درجه أولى

وناس أحوالها هوله

كل ماتنوي السفر

تستمرض

فتح غمض

٢٠-٢-٢٠١٠


متلمضه : وتنطق الضاد ظاء يتلمّض أي يتذوق الشئ وهي لصق اللسان بسقف الفم أي ((اللهات)) ثم مداعبة السان للهات أكثر من مرّه حتى يستشف الطعم المراد تذوقه عادة يقوم بها بعض التجار عند التفكير بقول مؤثر وعند الفقاره آو الفقراء يتلمظون بالسكيك الظهاري بعد الغدا
الاناسه : الوناسه
النحاسه : اللعانه ويطلق على اللعين نحيس
تقرض : النميمه والجمع قراظ وتنطق القاف جيما فارسيه
يرضّك : يقلبك رأسا على عقب مثال جسّوم رض خلود رض أي تمكن منه وطرحه ارضا
فلس : بفتح الفاء وتسكين السين أي الإفلاس
متخضخض : أي مهتز والخضخضه هي الإهتزاز الشديد
لاتشيحط : الشّحاطه بتشديد الشين هي الاعتزاز الشديد بالنفس إلى درجه الغرور
توطوط : تصل
متمضمض : من المضمضمه
هوله : بضم الهاء اي الشكل الكئيب الغير مرتب
مثال فلان شكله هوله
أو شهالهوله

1 comment:

الجودي said...

يالمفلّس إقضب أرضك

ياعل مفهوم الفقر يرضّك


أوكي معاك يا المفلس أقضب أرضك بس ليش بعد ياعل مفهوم الفقر يرضك مسكين مو قاصرة رضاة إلي عنده كافيه ودامه غرقان بالديون و القروض عمره ما راح يسترد ولا يعيش عدل


تمنياتي لك بصيف باريسي حلو يسرسح على القلب