مرات الأفكار
تاخذ عقلي وتترِس
حجي واحد فاهم
وواحد منفّس
واحد ودّه يصير عَالم
وواحد حلمه يكون مدرّس
مرات الأفكار
تخليني انسان
يهذي
ويخربط
ويوَسوِس
ويوَسوِس
،،،،،،،
أتخيّل مدينتي الفاضله
ماتعرف معنى المجامله
مدينه ملوّنه مزيّنه
مدينه هاديه خِرمِس
مرات الأفكار
تاخذ عقلي
وتترس
،،،،،،،
أرتّب كيان وطن
وأتخيل الوضع بكيفي
علمت روحي ماتِإن
أسهّل كل الأمور
أرخّي وأيبِّس
مرات الأفكار ترفع
والينون يجبِس
،،،،،،
توصل قوانيني لحدود سومطره
أسمع لفيروز وكواسير البصره
ومنغّم أفكاري على نوته مضبوطه
أحس إني عايش مو خربوطه
إنسان له مبادي
اللي بقوله
خافوا الله
ترى ربكم يخفِس
لا إنبربس
٢٦-٦-٢٠٠٩
الجمعه
تترس : تمتلئ
يهذي : من الهذيان أي كلام غير مفهوم
خرمس : بكسر الخاء والميم وتسكين السين أي الظلام الدامس حالك السواد (( كيف حالك )) وبإضافة النون بالإماراتي حالنك
مفاهيم الصحن : مفاهيم تجبر أن لايتعدى التفكير حدود طبق الطعام
أيبّس : بتشديد الباء أي التعامل بصلاده مع ضربه قويّه
مثال : لاتيبّس مع روبرتو كارلوس
16 comments:
خافوا الله
ترى ربكم يخفِس
لو الكل يستشعر هالشي
جان الدنيا بخير
دمت بخير : )
أصبح للتعبير المجازي والإستعارة معنى جديد....
روبيرتو كارلوس.
احلى بربسه يالزميل
"ترى ربكم يخفس"
عز الله انك صاج
ناس راسها مزحوم بالفكر
وناس ترددات الصدى
وللكل تفضيلة
:)
ما شاء الله
قاعدة اصفق ..تسمعني
:P
*********************
يعطيك العافية صج لا انبربس
والمثال ناااار :)))
SHAHAD
الدنيا بخير
دام فيه ناس تفهم معاني كلماتي
بهالطريقه الجميله
اشكرك ِ سيدتي
ظامي سراب
سيدي الغالي
وإن أصبح للتعبير المجازي وللإستعاره معنى جديد
فهو بسبب إتباعنا لتعليماتكم والاستماع لنصائحكم القيّمه
انت استاذ لي بإختصار
وانا الناظر
بس تكفى علق على تعليقي عندك لاتعلقني وتدوخني بالتعلق
انتر كويت
شكرا يازعيم
كويــتي لايــعه كبــده
السؤال المهم
البربسه ليمتى
والله سؤالي برئ
اشكرك استاذنا
aL-NooR
اسمعكِ
AK-47
الله يعافيك ويخليك
نورتنا ياخوي الغالي
شهالغيبه
بصراحه نار
والله يخوي يا كثر ما نبربس بهالديرة ..
وربك يستر عليها بوجود الطيبين امثالك والقراء ..
تحياتي لسهلك الممتنع ..
أحمد الحيدر
تشرفت اخوي
تحياتي لك
ياااسلااام سلّّم
على البرك المعلم
والله شعر ويد عجبني
وفيه حيااااة
شكرا يالعزيز
شكرا يابو إحساس متحرك
وبس
بابل
بابل
اسف على تأخري بالرد
يااستاذ
الحياة نستمد معناها من احساسك العميق
اشكرك
Post a Comment