Tuesday, June 16, 2009

واقع



خلّونا نقرا الواقع

بتفاصيله


بلونه الغريب


بكل الإحتياجات


والمطامع


خلونا نقرا الواقع 


،،،،،
تنشاف الأمور بسطحيه


والمشاهد كلها جذبيـّه


لابلاد تعمـّرت


ولا الناس درت


على شنو تهاجم


وعن شنو تدافع


خلونا نقرا الواقع


،،،،،،


على المستوى الإقتصادي


شاللي تعالج ببلادي؟؟؟؟


الأصول وإلا الخصوم؟؟


مفهوم الذمم صار مذموم


ونور الخساير ساطع


خلونا نقرا الواقع


،،،،،،،،
على المستوى الإجتماعي


ليمتى نقول ماله داعي


أنا أشوف صوره


براويزها مكسوره


إن لمستها


تنجرح الأصابع


ويعورك


الواقع
،،،،،،،،،


منظومة القيم والتقاليد

والقبليه ومفهوم الأياويد

وإعتبارات زايفه مالها أساس


ماأدري شلون عايشه الناس


وليش أنا ساكت وأطالع


هالواقع؟؟


،،،،،،،

التخلّف صارت معاييره مختلفه


وايد تميل صوبه الكفـه


الأموال تجني مواقف وأساليب


فجأة الفار ينقلب ذيب


والخواف يصير بايع


هذا هو الواقع

16 comments:

esTeKaNa said...

وما أقساه من واقع يا براك
!!
الله يصلح الحال
:(
اليوم كل منا عبر عن وجهة نظره
ويبقى لبراك اسلوب خاص يعبر فيه عن وجهة نظره بكلمات قليله ولكنها تستوعب كل الفكرة
الله يحفظك ويبارك لك في قلمك وفكرك

:)

Sweet Revenge said...

وليش أنا ساكت وأطالع


ومن قال انت ساكت
قاعد تعبر افضل تعبير عن الي يصير
علي الاقل ثبت موقف

Mohammad Al-Yousifi said...

ولا الناس درت
على شنو تهاجم
وعن شنو تدافع

مسمار

كبرياء انثى said...

كفيت و وفيت يا براك :)
عسى اتغير هالواقع للأفضل

جنون الكويت said...

المشكله تكمن في مجتمعنا حيث اتجه الى التخصص العام واصبح كل شخص يريد التحاور والتكلم في جميع التخصصات حتى لو كانت بعيده عن مجاله وحتى لو كان لايفقه بها شيء
شكرا لك على الكلام الذي ينقط خبرات وعبر

كويــتي لايــعه كبــده said...

واقعنا واقع نبي الفكه منه
الساسة همهم هم غيرنا حنه
اللي يبي ياكل واللي يبي بس الحنه
واللي عمره سوى شيء ذبحك بالمنه
وان قلت للفاسد فاسد يا ويلك منه
مدعوم ومسنود بشكل ما ندري عنه

حنا ناس نبي استقرار سياسي واقتصادي
وما هو اقل منهم الاستقرار الاجتماعي
دخلونا بمشاكل بسوء ادارتهم ما لها داعي
شيء مقصود والباقي من الراس الفاضي
الله يعينك على هالعيال يا بلادي

الواحد لي فكر بديرته وعياله صار مهموم
الديرة صارت للردي ترحاب وللزين زقوم
تعمدوا بخرابها وطلع الخراب من يدهم اليوم
التاريخ ما يجامل مثل ما ذكر البوم
يذكر الزين والشين والخربان والملعون
يا الله سترك عسانا نلحق على شيء نعينه عون

تكلمنا يا براك اليوم عن الواقع
وحنا عايشينه وياك وبكل المواجع
يبون يسكتونا او يشترونا بالشرا والبايع
امعصي نبيع دين وقيم وديرة(ن) حنا لها نبايع
بعد ربي ما عزيت غيرها ولا لي بهالطبايع

كثرت فلوس الناس من الرحص والا نقصت
صارت كبيرة القوم وهي يعلم الله بشنو رضت
الكلام كلام الجود والفعايل دنت ورخصت
هذا زمن الردي وشوف أكثر الناس اللي وصلت
يعايرون الحقاني بالجهل والغباء لين خربت
الناس فهمت الرسالة وعن الصح ابعدت
واليوم ابعدت الكفاءة وتسير البلد وين ما سرت
ونسأل كيف صرنا هالشكل وكيف وكيف فسدت
ما ينفع الصوت لي فات الفوت والناس ندمت

الكلام بالقلب كثير ما هو بالقليل
شي ينقال وأكثره يسيل من القلب سيل
الحق بنقوله ولا حنا خايفين
غير ربنا ما فيه رب للعالمين
تعيش أسد عزيز ولو بس يوم
ولا ردي مليونير خايب(ن) دوم
البلد لها عيالها لي شدت الشدايد
عساها ما تشد ما نبي لها الا الفايد

كلام أحسه قبل لا اقوله ربي شاهد
ما دورنا الشهرة ولا المجد ولا الفوايد
من ما فيه خير لأهله ما فيه خير لأحد
والكويت أول أهلي محد قبلها محد
من عزيت شلع قلبك على شانه
ولا تقدر تعدي الغلط بالهانه
من ما اهتم بخراب ديرته وصلاحها
ما هو بكفو باسمها ومرها وحلاتها

sologa-bologa said...

فعلا من يقرا الواقع
!!!

يبيلنا منهج تفكيكي يمكن نقدر نفهم شي من الواقع

GUCCI-q8 said...

واقع لا بد منه
ونحن اقوى منه


تسلم على هالبوست

Barrak said...

استكانه


الله يسلمك ياصاحبة التعليق الأول

والله الواحد قام يستحي يكتب عن واقعه بهالطريقه

بس للأسف هذي الحقيقه
او هذا الواقع


الله يحفظكِ

Barrak said...

Sweet Revenge

مهما قلت خم اعتبر نفسي ساكت


لان اللي فيني ضيم ضيم

وصلت لمرحلة اببي ازنط

Barrak said...

مطقوق



يمكن

Barrak said...

كبرياء انثى


اتمنى اتمنى

Barrak said...

جنون الكويت


كلامك صح

ويزعل ناس وايده

فيه ناس عندنا اي مشكله بالبورصه يحللونها واي فاول بعيد عن نقطة البلنتي ب ست ياردات هم يحللونه

الشكوى لله

Barrak said...

كويتي لايعه جبده


كفيت ووفيت

اول مره ادري ان عندك مواهب تجبرني على رفع القبعه لك

استاذي

Barrak said...

sologa-bologa

وكلامك على متمه


يبيلنا سفره وبس



عدل ؟؟؟

Barrak said...

GUCCI-q8


مع احترامي لكلامك اعتقد ان الواقع اكبر منا

للاسف