Monday, June 1, 2009

ياليل دان




بعد ط
ول انتظار أكثر من سنة ونصف ، وصل السائق ، فرحت كثيرا وخصوصا ابني خشيم الفار لأنه يستطيع أن يستمع لأغنيته المفضله (ماشي اللي تقوله ) بكل سهوله ويسر، بصراحه كنت أحسد من يملك سائقا خاصا به فهو لايعرف ماهي ماهية أزمة المواقف ولايعرف ماهو مفهوم توصيل الاولاد للمدارس من فرحتي وبعد أول مشوار مع السائق الجديد والملقب ب (شتّيي) أخذت ورقتي ودفتري وأنشدت أنشوده بفارسي المقدام الجديد

شتّي وصل ياجدعان
مصدر الإلهام والحنان
بيوصلني لكل مكان
وأنا قاعد متربّع
من الوناسه متشبّع
وأغني ياليل دان
شتي وصل ياجدعان
،،،،،،،،
مابغيت توصل يابعد قلبي
ياللي بتونّسني بدربي
خلني أتسمّت وأتمتّح
أتشرقد أتزنجح
أطرّب بالي الحيران

شتّي وصل ياجدعان
،،،،،
طير فيني وين ماتبي
من فرحتي ودّي أحبي
ودي أهز جتفي
ودي أشربك بكفّي

ودي أزفن على السكّان

شتّي وصل ياجدعان
،،،،،،،
كنت بروحي أدوّر مصفط
بالي من الحيره تمغّط

أخاف أراجع وزاره
مكسره ضلوعي من الفراره
وياك أحس بأمان
شتّي وصل ياجدعان
،،،،،،
راح أدلعك وأدلّلك
لو تقحّص ماأسإلك
أنا معزّب واجد جين
لوبيدي عطيتك ألفين
وأحجزلك شاليه بالخيران
شتّي وصل ياجدعان
،،،،،
عيبك شعرك ناعم وايد
حسستني بواقعي الجايد
تحملني لو كنت أصلع
راسي من الضيم تفلّع
تحملني ياولد عم شاروخ خان
شتي وصل ياجدعان
،،،،،
من فرحتي ودي ألم كل السيايير
والحفارات والباصات والطيايير
ودي أحضن الرصيف
وأطق رقبه على السّيف
ودي أدق هبّان
شتي وصل ياجدعان
،،،،،،،،

متربع : أي أجلس القرفصاء
أتسمّت : يكسر التاء وتشديد الميم أي أجلس مفتخرا
أتمتّح: أنتفض بجلوسي أي جلسة كبرياء
أتشرقد : أستلقي على ظهري
أتزنجح: تنطق الجيم جيما فارسيه أي أتباهى بغرور
أطرّب : بتشديد الراء أي أطرب وأتغنى ببالي
أحبي :بفتح الحاء وكسر الباء أي أحبو
أشربك : أي أصفق بيدي بصوره مستمره
أزفن : بكسر الفاء وهي كلمه مشتقه من الزفان أي رقص الرجال في غناء فن الصوت
السكّان : بتشديد الكاف أي مقود المركبه
أدور مصفط : أي أبحث عن موقف
تمغّط:أي وصل لمرحلة من التصلب وعادة عند إستيقاظ الشخص من النوم يتمغط وتنطق الغين قاف
الفراره : أي الدوران في الشوارع
تقحّص : أي تصدر صوتا من الإطار الخلفي للمركبه
معزب : بتشديد الزين اي صاحب العمل
واجد جين : أي وايد زين ولكن باللغه الهنديه المعرّبه
تفلّع : أي أصيب وظهرت به اورام من أثر الإصابه
السيف : ساحل البحر بتشديد وكسر السين
هبّان : هذه الكلمه يصعب شرحها يرجى البحث في جوجل عن موسى فيروز

28 comments:

BKK said...

el fal lena in shallah. I am laughing hestirically in my office. You really ahve a great rhyme there. But 2000 what? Iraqi dinars? Toman? Egyptian pound? Yoi have to be specific. Ana sharit b 4000. Bi3t?

Um il sa3af wil leef said...

طلعت مصلع ...براااك بحاصه يا جدعان

Um il sa3af wil leef said...

براك...صرت مشهور ...كل هذه صور ؟؟

ميمة السبيت said...

ويييه عيل احنه سايقنا بيسافر الله يعيينه على اعصاب الوالده مسكينه اهيه المتضرر الوحيد

يالله قرت عينك و اكثر وقت تعرف فيه قدر شتي يوم اليمعة بمواقف الافنيوز

كبرياء انثى said...

قرت عينك يا براك :)

Barrak said...

BKK
إن شاء الله تفرحون بواحد نفس شتّي

ان شاء الله دوم تضحكين
اشكرك على كلامك
بالنسبه لموضوع الالفين

لو يبي يورو انا حاضر
بس مو بيدي
انا ماأبيعه لو ببيت على البحر قبال الأبراج

هذا شتي هذا

عشون عيل

Barrak said...

Um il sa3af wil leef

إي والله ياوخيتي مصلع
وأقولها بالفم المليان
ويسيل مثل الوديان

اهي بحاصه الى حد ما

ليش تخليني احسس على صماخي ليش

ياويلج من الله

ليش صرت مشهور شالسالفه
؟؟؟

Barrak said...

ميمة السبيت

الله يطول بعمر الوالده
بس اذا كانت هذي نقزه عشان تاخذون مني حبيب قلبي شتي

انا اسف

مأدرشي
واذا كانت مو نغزه الله يرده لكم بسرعه

اه يامواقف الافنيوز اه

Barrak said...

كبرياء انثى

بويه نبيك

ونااااااااااسه
ان شفتوا واحد بسياره ويا سايق ويردح ترى هذا انا

متستغربوش

عثماني said...

الاخ العزيز براك

نهنئكم بوصول الرفيق شتي

واذا حولك شتي ثاني .. يا معود بلغني
قاعد ادور لي سايق و ماني لاقي

و كل شتي و انت بخير

Barrak said...

عثماني

هلا وغلا

شخباري رفيق

صار اللحين مشير

بالنسبه لطلبك

شوف انا سويت شغله اتمنى ماتسويها
انا طيحت الميانه ويا كل هنود وبنغالية فريجنا يوم اتبوسم حق هذا يوم أناقش مشكلة ماما حسينه مع بنغلاديشي
يوم اقط باكيت على هندي جارنا
المهم لما يازلي واحد وطيحت وياه الميانه
قلتله طلبتك
قالي i give you
يعني عطيتك
جان اشرحله حالتي مع دمعيتين الريال ضبطني
انا برايي سو اللي سويته
ولاتحاتي
واذا ماصار
مالك الا الوسيط

ma6goog said...

قرة عينك

فريج سعود said...

اطول مدة انتظار مانت للسائق

اطول زهيرية كتبتها للسائق

شالسالفة ؟

سائقكم جامعي ؟

Um il sa3af wil leef said...

:)
إشدعوه لهالدرجه بحاصه ..بس أكيد ما وصلت للمرحله الكوجاكيه..يعني بحاصتك مو مثل بحاصة كوجاك
أتغشمر
بس سايقكم يشابه شاروخان ؟؟

جنون الكويت said...

هههههههههههههههه الله يطول بعمر السايق دام انه ونسك هالكثر

بنت سيف said...

برراك ..

ألف مبروك بس ضحكت من قلب على الحسد الاجتماعي في البيتين التاليين


عيبك شعرك ناعم وايد
حسستني بواقعي الجايد
تحملني لو كنت أصلع
راسي من الضيم تفلّع


تستاهلون .. السايق .. يسوق في عزكم

تحياتي

بنت سيف

Barrak said...

مطقوق

بويه نبيك

Barrak said...

فريج سعود

ليش الحسد

وبعدين فيه عندكم جامعيين بحكومتكم
وانا اتحداهم يفرحوني مثل فرحتي بشتي

اعتقد راح انزل ديوان جديد اسمه

شتّيات

Barrak said...

Um il sa3af wil leef

كوجاك يطلع علي وائل كفوري

الوضع مزري

سايقنا فيه من شاروخ بس بوهته بوهة فطومه

Barrak said...

جنون الكويت

اهو بس ونسني

انا احس اني طاير بالسما
والارض صايره مجموعة من الغيوم المبلله بالأفراح الورديه

ههههههههههه

Barrak said...

بنت سيف

من عندنا
بنت سيف عندنا

ياهلا ومرحبا
الله يبارك فيك ويخليك

بصراحه الموضوع مو موضوع حسد

بس شلون المعزب مصلع
والسايق بالشعر متدلّع

ماقبووووووووووووووووول

Um il sa3af wil leef said...

:(
فيه من بوهة فطوووومه؟؟؟
أول مره أدري إن لها شبيه لأن نوعها نادر

7osen said...

ههههههههه

عجييييبة

والله ضحكتني يالبرك

ههههههه

GUCCI-q8 said...

أعجز عن الكلام

رائع كما عهدتك

Barrak said...

Um il sa3af wil leef


هههههههههه

الحمد لله والشكر

Barrak said...

7osen

هلا فيج اخوي الرائع

شرفتني

Barrak said...

GUCCI-q8

الأروع وجودك

شكرا لكِ

Mai said...

LOOOOL

AMAZING!


حده عجيب

ومبروووك

الله يعطيك خيره ويكفيك شره

لكن دير بالك

ترى اوكي السايق يفكك من المصفط والحر و و و

لكن وراهم دلع و غباء وتفلسف
فلا تعطيه ويه وايد

الله يحفظ عيالك يارب : : ))