Thursday, October 25, 2007

طراره



بمناسبة الحديث عن حل المجلس والحديث عن تدوير بعض الوزراء والحديث عن تعيين بعض الدماء الجديده في الوزارات وبما انني لم ارتكب اي مخالفة مروريه جسيمه واحمل الجنسية الكويتية المادة الأولى وبما أنني كنت طالبا بالكويت بالمدارس الحكوميه منذ مرحلة الروضه إلى المرحلة الجامعيه وبما أنني فوق الثلاثين عاما وأحب بلدي حبا كبيرا أعتقد ماراح يلقون أحسن منّي وزير بس ماأدري ليش الى هذه الساعه محّد دق علي

تهقون ليش ؟




مادقّوا علي ماعطوني وزاره

ولاحسّوا بإمكانياتي الجباره

ولاحتىرقمي سألوني عنّه

ماحتى بالغلط عطوني رنّه

ياقاصدينها ياعياره

ماعطوني وزارة

ودّي أعرف شنهي المعايير

يبوني أهوّس وإلا أطير

ودي أفهم شنهي المواصفات

يبون ضمير حي وإلا مات

يبون ناس مريشه

وإلا فقاره

ماعطوني وزاره

إنزين على الأقل وزارة التخطيط

خل يعطون ويه للزعاطيط

يمكن يلقون فيهم حلول

خل أصبر يمكن أنول

يمكن تنفع الطراره

ماعطوني وزارة

أحس إني انفع للأعلام والأشغال

يمكن أعدّل وأصلح الأعطال

يمكن أسمح لبرنامج للمدونات

يمكن أهدي لشعبي حياة

وتكون بيدي مكامن السّنع

وأسراره

ماعطوني وزارة

31/07/2007

السبت

95 comments:

فراوله said...

صباح الجوري للتدوير الوزاري
لسيد المبدعين
براك
عاد تصدق انك تستاهل كل خير
مو بس وزارة
:)
اقولك شي شرايك بوزارة المالية مو احسن من التخطيط والاعلام؟؟؟
دمت ودامت ابداعاتك
الوزارية
:)

kuwaitya_7saweya said...

لوووووووووووووووووووووول
تبي تصير وزير لييييييييش؟
ينيت مثلا
ولا شنو بالضبط
وبعدين ان شاء الله لو يدقون عليك وتصير وزير الاعلام بتنشغل عنا
لالالا انا احتج واعترض
واذا ان شاء الله صرت وزير لاتنسى اخيتك
حاطه عيني على وزارة الماليه

The Voice Within said...

bs wizara ?

Afa 3aleik bs, Itha riseit 3ala wizara goli ;p

3alashan adrij ismik ma3a ilmorasha7in 7g iltashkil ilwzari ilyidid

O 3ala at3abi, lat7ati 3adi tag9i6 , bein kil fatra withanya rassiy 3alai chum munaga9a chinik matadri

> gno3a gno3a smila 3alai


Il post mo 6bi3i as usual, tislam eidik :D

حنطفيس said...

يبون وزير عقيدي حده يعرف يقرا ويكتب
يبون وزير للخزينه يبوق وعلى الشعب يكذب

يبون وزير اسم ابوه نحيطر واسم امه صبحه
منافق حرامي جلب بن ستعش عسى الله لايربحه

مايبونك ياولد الديره ياولد لولوه ومنيره
مايبون براك يرفع راية الأجداد ويكمل
المسيره

الله يستر عليناوعلى عيالنا ويحفظ مالهم ومالنا
الدير يابراك راحت شمام ومايسر العدو حالنا

وصح لساني

على نفسها جنت براقش said...

وما نيل المطالب بالتمنى ولكن تؤخذ الدنيا غلابا

يلا انا اننخبك اذا اتبع داءرك و اذا انا مو تبعها اسجل هناك
افا يا براك ماكو احسن منك
كافى البشت و الرزة
:P

Q8DOLL said...

ههههههههههههه
حسبي الله على ابليسك اخوي الوزير القادم براك
صج ضحكتني من صباح الله خير
اهم شي زهب بشتك
يمكن يمكن تنفع الطراره :)

سيدة نفسي said...

السلام عليكم والاكرام

منذ مدة لم أقرأ أبياتا هزلية وساخرة

ساخر من واقعنا الأليم وقد رسمت لنا أجمل كاريكاتير في أبياتك

سلمت يداك فقليل من الأقلام التي تبدع في المجال الساخر

أترككم برعاية الله

::heba:: said...

هاهاهاها صح لسانك براك
حبيبت الكلمات دائما تبدع
بالنوع هذا من الكتابات

يعطيك العافيه :D

lawyer said...

اذا صرت وزييييييير ؟؟

عند وقت للتدوين؟؟

انزيييييييييين اذا صرت وزيييير

عينييييييييي عندك بالمكتب

ابي معاش و ما ادوااام

هااااو انا مشغوووووله بمسك بلووقك

هذا و اليديد

بـابـل said...

صباح الورد أخوي براك


كلام حلو ويعكس الواقع

بس أنا لوبيدي أعطيك وزارة الطيبة والشعور


وبس


بابل

charisma said...

مساء الخير يا ويه الخير

اشلكك بالغرباااال
واللغوه والصيحه

خلك مرتال البال
ومستريح
تحط راسك على المخده ما اتحاتى ولا اتفكر بهم الوزاره وتوابعها

لانى اعزك ما ابيك تصير وزيير
ابيلك الخييير طييييعنى


انشاااءالله تلبس البشت بزفه خشيم الفار وخوانه قول اامييين

:))))

esTeKaNa said...

وانا على دعوة كريزما بقول اميييييييييييين يارب امين
:))
اشلك بالوزاره؟
اهم شي انهم بيدقون رنه
اذا الحكومه بتدق رنه لا طبنا ولا غدا الشر،حتى حكومتنا ما عندها رصيد
لووووووول
:))

بـوبـحــر said...

رجعت يا حبيبي رجعت ...


ياخوك هذي مو طرارة هذي شطارة ..مفسد مفسد..ادور الدنيا في اربع ..ايدين واريولي ..بس البس البشت ..اي البسه ..وغير جذي مو عاجبك ..روح حق صاحب الشان وقوله انه مو عاجبك ..غير جنوب السرة مراح اتشوف


وجه نظر الفاسد

ههههههههههههههه
يا اخي يا براك لك وحشه قويه

الحارث بن همّام said...

تبي تصير وزير ؟

من صجك انت؟

Ealaf said...

هههه أهلا بسعادة الوزير !

Barrak said...

فراوله

بسم الله الرحمن الرحيم وبه نستعين
نفتتح هذه الجلسه
يالله

اولا وانا اكتب الرد عليك خشيم الفار قاعد يمّي جان يقول فجأة فراوله انا طارت بوهتي شعرفه انا امس قاعد اعلمه الف باء مو راضي اللحين فراوله مره وحده قلتله شعرفك قالي هذي الصوره صورة فراوله
حسيت ان اذوني طالت
وسألني يبا ليش تطق طق الصغير
يعني ليش تطق على الكيبورد
شقوله هذا

نرد على تعليقك الجميل
شفتوا شلون ياناس فراوله تقول استاهل كل خير هذا صوت بالمخباة
لا مابي الماليه فيها عشرتعش وكيل مساعد وكل واحد أقوى من الثاني
ترى انا ذكرت هالوزارتين عمدا وكل شي مكتوب ترى وراه قصد
لان اذا صلح التخطيط والاعلام بكافة نواحيه راح نرتقي وايد
اشكرك سيدتي فراوله وعلى قولة خشيم الفار فلاوله

Barrak said...

kuwaitya_7saweya
وليش يعني اللي صاروا احسن مني

الحمد لله عقلي للحين موجود
ينيت لاني اعتقد ان ممكن افيد هالديره
على الاقل ماعندي قبليه ولا طائفيه ولااتبع راي أحد
لي نظريه بالحياة ابي اطبقها مو من حقي

وبعدين عمري ماانشغل عنكم لاني منكم
انتي محتجّه يعني خسرت صوتك

بصراحه انتي بخليك وزيره للماليه لان الحساويه معروفين بحرصهم الشديد على كل أمر مالي يعني اقص ايدي اذا واحد باق
بس اعتقد ماراح انتريّا معاشات منك
ههههههه
اتغشمر

Barrak said...

The Voice Within
لهالدرجه انتي واصله ماشاء الله
طيب اذا انتي واصله لهالدرجه عطيني وزارتين والا ثلاثه
وانا اضبطك
بس انسي موضوع المناقصات لان الشركات اللي راح اجيبها كلها المانيه وفرنسيه
وانتي كيفج


اشكرك على الاطراء
يعني موافقه هذي 2
اوكيه

Barrak said...

حنطفيس

ياخوي انت ليش ليش معصب
انت رشحني ماراح تخسر لو تجرب


وماأقدر اكمل على كلامك لاني لو بكمل بزعل نفسي وبزعل ناس وايد احترمهم أقدرهم

بس بقولك ترى اصابعك مو سوى

Shaima'a Alkandari said...

ايه ايه

انا اقولك ليش ماصرت وزير ولي الحين مادقوا عليك

لانك تحب الكويت وتهمك مصلحة البلد

SHAHAD said...

أفا عليك بس تبي وزارة
ابشر بس بشرط
تاخذ وزارة التربية
يبيلها واحد فاهم مثلك
انت بس زهب بشتك :))

مبدع يا براك :)

kila ma6goog said...

جربوا شاعر التشكيل الي فات و ما نفعهم

بنت الشامية said...

اذا تبى تصير وزير احنا نعينك وزير علينا.....وزير المدونات

والله خوش اسم

ااااااااااااوه نسيت اذا صرت وزير

منو يصير شاعر الحى ....ونقعد ندور عليك....وانت كله مشغول

عاد التخطيط او الاشغال او الاعلام

شلك بهالطلايب....يا وزارة سياديه والا ارفض.....عاد لا تنسانا
كلنا بنمسح جوخ فى مدونتك كل يوم
لوووووووووووول

فراوله said...

مساالورد والجوري
مبدعنا الغالي
براك
قول آمين
الله يخليلك خشيم الفار
وتشوفه معرس يارب
دمت بدفء وعذوبه
ابدا
:)

Barrak said...

على نفسها جنت براقش

انا مابي ارشح لمجلس الامه وتنتخبيني لا
انا ابي يدقون علي سيده الوه نبيك تمرنا
وقبل لاأمرهم أروح البغلي أشتري بشتين حق الوزارتين
عموما ضمنا 3 اصوات لي
هيّااااااه

Barrak said...

Q8DOLL


حلوه الوزير القادم
بيصيرون فيه وزيرين صلعان بومشاري وبوعبدالله
وبعدين البشت مال العرس زاهب يبيله مصبغه وبس

هذا الصوت الرابع

Barrak said...

سيدة نفسي
وعليكم السلام والرحمه

اشكرك سيدة نفسك وحياك الله
والابيات الهزليه دائما ماتكون اصعب مقارنة بالأبيات العاطفيه هذا بالنسبة لي
ماعرفنا انتي ويا ترشيحي والا لا

Barrak said...

::heba

اشكرك
عاد بس من هالنوع من الكتابات
عموما
اطراءك يشرفني سيدتي هبه

هم ماعرفنا ويانا والا علينا
بترشحيني

Barrak said...

lawyer

بجاوب على اسئلتك نقطه نقطه

اذا صرت وزييييييير ؟؟

قولي ان شاء الله
عندك وقت للتدوين؟؟

دائما المدير لايعمل بل يدير العمل وانا بصير وزير يعني بدير شئون الوزاره يعني بجابل الكمبيوتر وبكرف الوكلاء كراف وانطر النتائج وبتكون عندي حصانه بتولى اللي باطين جبدي واللي مااقدر اتكلم عنهم واتخشش بالحصانه

انزيييييييييين اذا صرت وزيييير
هم قولي إن شاء الله
عينييييييييي عندك بالمكتب

بعينك مسئوله لقسم منع الواسطات بوزارة الإعلام

ابي معاش و ما ادوااام

حاضرين بس معاشك راح يكون تحت ال100 دينار

هااااو انا مشغوووووله بمسك بلووقك
اذا جذيه صار المعاش فوق ال3 آلاف غير البونص واذا اخترب لاب توبك اخلي الوكيل المساعد للشئون الهندسيه يصلحه ب3دقايق
هذا و اليديد


اذا صرت وزير راح يكون عندي 50 بلوج

وهذا صوت رقم 5

Barrak said...

بـابـل

هلا بالفنان
صباح الفل
اشكرك على الاطراء

وترى وزارةالطيبة الشعور اذا عطوني اياها راح يستجوبوني كل النواب

وبعدين هل راح يعتبرونها من وزارات السياده
والا وزارات الزوليه

Barrak said...

charisma

بدينا بالحسد

لانك واثقه بعينوني تبين تحسديني

صدقيني راح انام واراتاح لان المصلحجيه معروفين
وعندي خطه متكامله
انتي رشحيني وشوفي شبيصير
راح اشق شقوق ماتخيط
واللي أخزه يتمقط
هاااا عرفتوني

والله ياوخيتي المنصب اذا استغليناه لخدمة البلد ماراح ننام دقيقه وتستاهل الديره هالشي
بس اذا استغليناه لخدمة عوير وزوير والمنقطع واللي مافيه خير راح نشاخر لي الصبح


بصراحه
كلامج وايد أثّر فيني

Barrak said...

esTeKaNa


وانا وياكم بعد
بس هم حساد مايخالف
اول شي راح اسويه اذا عطوني وزارة الاعلام راح احجب مواقعكم انتو الثنتين

اللي يعجبني فيك انك تصيدين اللي اقصده بثواني ماشاء الله عليك
صح هذا قصدي
اذا الحكومه بتدق رنه لا طبنا ولا غدا الشر،حتى حكومتنا ما عندها رصيد

صح لسانك انتي

Barrak said...

بـوبـحــر

حي الله من رجع

المفسد المفسد هذا انت سلمني وزاره وانا افلهم لك تفلّل
واللي يدورون رزق عيالهم ورزقهم من مناقصه والا منفعه لعائله او لتاجر هذول مكانهم النار ان شاء الله

بالنسبة لراعي الشان فمن المعروف ان راع الشان في إختيار الوزراء هو رئيس مجلس الوزراء الموقر بصراحه انا ماأعرفه بس يمكن واحد يقرا البلوج ويوصله طموحاتي ويختاروني وذيك الساعه راح اوديك جنوب السره
هههههههههههههههه

وفك عمرك يابوبحر

Barrak said...

الحارث بن همّام

شلون تقول لوزير الاعلام والتخطيط المستقبلي من صجك
انت بعد بامنع بلوجك

ياخوي يعني الواحد مايحلم
يعني شفيني انا شفيني

Barrak said...

Ealaf

ترى وناسه
سعادة الوزير مره وحده

شكلي بنام اليوم وبتلحف بالبشت

Barrak said...

Shaima'a Alkandari

والله العظيم ياشيماء
كلامك عور قلبي
وخلاني اقول آه يابلد مخنوقه بعبره


مااقدر ارد عليك

أفحمتيني

Barrak said...

SHAHAD
انا ماادري تتطنزين على وزارة التربية والا من صجك

اذا تطنزين
خل يعطوني وزارة التربيه وانا اخلي المدارس من الساعه 11 الى 12ونص لانه فيني عقده من قعده الصبح لازمتني طوال سنين الدراسه

اذا من صجك
مشكوره
والبشت زاهب
بس راح اشيل كليتين ببالي

Barrak said...

kila ma6goog

لانه كان يكتب بالوطن
انا اكتب هني
هذا هو الفرق

Barrak said...

بنت الشامية

لا يامعوده وزير مدونات لايحوشك لعدة اسباب
اولا انا صارلي سنه وكم شهر بعالم المدونات فيه ناس اكبر وأخبر مني
ثانيا بعالم المدونات ثلاث ارباع الناس فاهمه وواعيه يعني ملاحظاتهم ومتابعاتهم دقيقه مثلك انتي وغيرك من الزملاء وفوق كل هذا تطلعاتهم وايد طموحه باختصار ناس سنعه
بس بعالم الوزارات أكمّل وإلا فهمتيني ؟
حلوه شاعر الحي
لاتحاتين لاني اول مره بصير وزير باشتغل واراقب واشعر وأكتب بس قبل كل هذا بروح ازرعلي شعر على حساب الوزاره

بعدين انا مابي وزاره سياديه لا
بس الاعلام والتخطيط والمفروض ان هذول هم الوزارات السياديه
وعموما اذا صرت وزير اللي كان عنده اكثر من 100 تعليق بمدونتي راح اعينه وكيل وزاره برتية وزير وانتي كيفج

Barrak said...

فراوله

ويخليك ويسلمك سيدتي فلاوله

kuwaitya_7saweya said...

لوووووووووووووووووول
:)
ترى لم قتلك ينيت مااثصد منها شي بس انه شلك بعوار الراس واللويه
وانا ادري انه لو بحطونك وزير اكيد بكونون حطوا الرجل المناسب بالمكان المناسب

اما على المعاشات اغسل ايدك

Barrak said...

kuwaitya_7saweya

الظاهر انه لما يعطوني وزارة راح اين رسمي

شلون تبوني اقدر اشتغل ووزيرة الماليه ماتعطينا معاشات

انا احس اني راح اكون مناسب لو خلوني سفير بفرنسا أحسن من هاللويه

qesat_5ayal said...

الطرارة ان ابناء الديرة يبون يسنعونها وما بلقون من يلتفت صوبهم

طرارة شريفة


صح لسانك


اذا رشحوك بأيدك
لكن شلون انتخبك
مو اهو اختيار ؟!؟

الـفــــجـــ الــبـــعـــيـــد ــــــر said...

وزييييييييير!!!

خلك مرتاح البال
شو تبابها الصدعة وعوار الراااس
واستجواااب وعفسه

بس اذا صرت وزير.. بشتك بيوصلك هدية مني ;p

Aldenya said...

:>


ماعندهم سالفة
إذا ما إختاروك
بيختارون منو
!!!!

kuwaitya_7saweya said...

شفت السالفه مافيها معاشات غيرت رايك لووووووووول
:)

Noor said...
This comment has been removed by the author.
Noor said...
This comment has been removed by the author.
Noor said...

يبون ضمير ميت

يبون ايمشون معالاماتهم

يبون وزير يدوب ايفك الخط

يبون حرامى

يبون وزير عقليته محنطه من ايام الفراعنه



لهذه الاسباب الجوهريه اقولك انك ما تنفع للوزاره

nadeyah said...

تستاهل وانا ارشحك للوزاره اللى اشتغل فيها
وطالما انك مستعد للتوزير ومزهب البشت بس على فكره البشت يبيله تلميع
اقول لك انا تخطونى بالدرجه وابيها منك بصراحه ويا حبذا يعنى تشيل العلل ( جمع عله ) اللى عندنا وتريحنا منهم فى كم موظف زى اقلتهم بس همهم نقل الحجى والترزز عليك فيهم

Barrak said...

qesat_5ayal

صح لسانك فعلا الطراره اللي منها فايده تهتبر طراره شريفه

ياكبر كلامك

اذا رشحوني
انا ابي منك الدعاء
وانا علي الباجي

اشكرك

Barrak said...

الـفــــجـــ الــبـــعـــيـــد ــــــر

شو فيها اذا صرت وزير
راح اخلي كل المطبلين يخوزون عنكم
سواء بدولتنا او بأي دولة خليحيه شقيقه
اونه باستوي وزير
بس ابي وقفتكم معانا
وبعدين انا اقدر لك البشت اللي بتنطرشين لي اياه
بس من فضلك أبا مع البشت كيرخانه عسب اقدر اهندز البشت على مقاسي

على فكره كيرخانه يعني مكينة خياطه لغير المتحدثين باللهجه الإماراتيه العزيزه

Barrak said...

Aldenya

بيختارون عوير وزوير والمنكسر واللي مافيه خير

Barrak said...

kuwaitya_7saweya

هههههههههههه

Barrak said...

Noor

يمكن في يوم من الايام يجي الوقت ويكونون الناس اللي تكلمتي عن مواصفاتهم يعتبرون من غبار الزمن


ادري قاعد أحلم


يعني صكيتيها بويهي
عيل مامن فايده
اجابل المدونه وسايتي وديواني ابرك

Barrak said...

nadeyah

لهالدرجه عندكم بوزارتكم ضيم وضلايم

الله يعينك
بالنسبه لتلميع البشت لاتحاتين اذا البشت ماتلمّع الصلعه ملمعه تبرق برق من بعيد

على فكره طلباتك هذي خصوصا بوزارتكم لو أسويها ثاني يوم شايليني وناقفيني ونافييني الى جزيره صقليه

مااقدر عليها
انتي يبلج المصباح السحري ويالله ينفع

Fahad Al Askr said...

هابين هل اليومين ببوس الجتوف، خلص موديل حب الخشوم والأيادي

Mishari said...

صح لسانك والله لا يبليك بوزارة يا معود
:)

magnoonah said...

ليش طراره لا يبا تستاهل


بس انت اي وزاره تبي بالظبط


اي قرر من الحين عشان نعرف نحط براك المناسب في الكرسي المناسب
:)


بس ممكن سؤال
انت ليش تدور عوار الراس مو كافي من الدنيا طاح شعرك هالدور بتصير اقرع رسمي من سوالف حكومتنا القرعه


بعدين رنه شنو هالظلم عيالنا تلفوناتهم متروسه رصيد وهم يهال بالمدرسه والحكومه ام رنه؟؟

بعدين لو دقوا رنه شدراك مو هندي داق بالغلط

انا اقول مع احترامي لاخوي الكبر والعزيز براك

ابعد عن الشر وغنيله
وبشتك وده المصبغه وبخره ورد حطه بالكبت


تحياتي

Najmah said...

لووووول

عادي جايز :")



ودي افهم شنهي المواصفات
تبون ضمير حي ولا مات


حلوة اعجبتني :)

Barrak said...

Fahad Al Askr

انت وين ناوي توديني بالضبط

عندنا عيال عاوزين نربيهم

خل يحطوني وزير وانا اعلمك

Barrak said...

Mishari

الظاهر انك شاك بقدراتي

رشحني ماراح تخسر شي

ايبلك شهادة الدكتوراه بظرف 24 ساعخ
بعد شتبي

من أولها ببوق

Barrak said...

magnoonah

تستاهلين العافيه
انا قررت خلاص
بس ان شاء الله يدقون علي

انا اذا عطوني وزاره راح اخذ اجازه شهرين اشوف حل للقرعه

بعدين ان يتني رنه من اي جنسيه راح ادق على طول يمكن يخافون يكلموني

وبالنسبة للبشت انا موديه من قبل لااكتب القصيده المصبغه اول مايدقون بطرش عليه

وايد مصدق

Barrak said...

Najmah

على قولة ام خماس
عند العجايز كل شي جايز

انا ودي افهم شنو مواصفاتهم
بس

nadeyah said...

صباح الخير

مسجات بالتشكيل اليديد


ومافى وزاره لك

حمد said...

دائما مبدع ورائع

وبالتوفيق في موقعك اليديد .

Barrak said...

nadeyah

صباح الورد

عرضوا علي وزارتين بس لان وزير العدل والاوقاف اليديد عندي موقف وياه رفضت

قاعد يحاولون يقنعوني بوزاره جديده اسمها وزارة الاداره

لي اللحين افكر في الموضوع

Barrak said...

حمد

اشكرك اخوي وماعليك زود

وربي يبارك فيك

rwatan said...

عشان تصير وزير بالكويت فيه شروط وايد, أهمها

أن تكون أمك داعيه عليك

:)

Kuw_Son said...

حسافة والله ما عطوك وزارة !!

Barrak said...

rwatan

لا يبا هونا كلش ولا الغاليه

عاد عندها دعوه توديني ملح

Barrak said...

Kuw_Son
توه واصلني مسج مادري صج والا جذب بس مالقيت اسمي
عموما ماراح تطول هالحكومه وايد انصحهم يخشون هالبوست مع اول استجواب يرشحوني

ترى انفعهم

ezain_kilah said...

ولا يهمك... مرسوم مني لك... إنت من اليوم ورايح وزير الدولة للمدونات

فتى الجبل said...

راحت عليك اعلنوا التشكيل الحكومي الترقيعي كالعادة

Barrak said...

ezain_kilah

مشكوره
بس ابسأل سؤالين

الاول فيه معاش
الثاني لما اسافر يعطوني طياره خاصه

Barrak said...

فتى الجبل

لا ماراحت عطهم شهرين ويردون مره ثانيه يدورون غيرهم

sologa-bologa said...

أول شي بالنسبة للموقع
جميل بس ناقصه ملء الفراغ
بكلماتك الجميل
بس عندي ملاحظة صغيرونه
تحليل القضاياالعالمية من نظرة كويتية
أعتقد المفروض نطلع من اطار المحلية
في نظرتنا للعالم
بس

أما موضوع الوزارة
حسافة كنت مسكر جهازي والحين تم التشكيل
اللي اعتقد انه ماراح يدوم ستة أشهر
على أبعد تقدير


ودمت بحب وود

Barrak said...

sologa-bologa

اشكرك على هذه الملاحظات اللي بصراحه كنت انتظرها على أحر من الجمر

لاأعلم سبب اقتناعي بمحليتي في رجي وتحليلي للقضايا
ولكن ملاحظتك يجب الاخذ بها

لو مبطل جهازك جان اللحين عطيتك وزاره من الوزارتين اللي عطوني اياها

DiLLi O MiLLi said...

ياااا براك

ما تصلحلك الوزارة
أشلك بالوزارة .. أشلك بالدندره
تسأل شنهي معاير ماسك الوزارة
أنا أقولك
ترى ما يبيلها أمكانيات جباره
يبيلها واحد ما يدري وين الهوا داره
واحد ضميرة ميت ما همته الدِيره
يمشي على هواهم .. ما يمشي على الدَيره
مسكوهها ناس مريشه .. زاد ريشها
مسكوها ناس فقاره .. زاد شوحها
مثل البوم السماري .. ماشيه الوزارة
لا نوخذه .. ولا بحاره
عشان جذيه .. ما تصلحلك الوزارة

يااااا براك



خف طينة بهالشعر ماااا صارت
متعة قرائة بوستاتك

:)

Selezya said...

لوووووووووول

ياحراااام
والله كسرت خاطري

بس والله تستاهل

يعني كلامك احس طالع من قلب ولو صار هم بتكون خوش وزير وراح تعدل

بس عفيه عفيه عفيه براك لو يعني لو صار وصرت وزير ... ابي اشتغل سكرتيرتك ممكن؟
ترا خوش وحده انفع واضبطلك الشغل
ومن باب احترامي لكل المدونين الثانيين ودي توظفنا كلنا عندك
وشوف شلون بتطلع وزارتك
:)

Selezya said...

لوول طالع الواسطه من قبل لا تشتغل
سبحان الله فكرة الواسطه الله فطرها فينا
لا يبه خلاص ماني مشتغله عشان مايقولون قام هالوزير وشغل كل ربعه

SHAHAD said...

لا والله أتكلم جد
وزارة التربية يبيلها عقليه فذه
وانا أؤمن بعقليتك
.
.
بس شنو الكليات اللي بتحذفها ؟

على نفسها جنت براقش said...

جد اذا عندك رؤية مستقبلية واضحة و لها خطة مكتوبة
ليش ما تفكر جدياً بالموضوع
و مفاتيحك كثيرة
باذن الله
اهم شى ما تتخلى عن افكارك

MANAF said...

اسكت اخيرا شبكنا الحكومه

زميل والدي العزيز

الاستاذ جمال الشهاب

من خيرة الرجال

وهو في قمة التواضع والنبل

عطووه وزارتين

الشئون والعدل



اي شي تبي حاضرين

:)



خووش ماركيتينغ قاعد اسوي حق الريّال

بس يستاهل

____________________



اشرايك اعرفك على ابوي

يمكن يعطونك

التربيه

:)

واذا لزّمت احتمال نضغط عليهم ويعطونك الخارجيه

__________

هم انت تستاهل

Barrak said...

DiLLi O MiLLi

يادللي ويامللي
والله العظيم كلامك ذبحني
ليش احوالنا صارت جذيه
ماأقدر اقول غير من كبر كلامك
ماأقدر إلا اقول وأنا اتألم
صح لسانك
اه ياحبيبه ياكويت

Barrak said...

Selezya

أولا تستاهلين العافيه
ثانيا محد يكسر خاطر أحّد
ثالثا انتي قدمي اوراقك بالنسبه للمنصب وأنا اختار
رابعا تصدقين لو يعطون المدونين وزارات لمدة سنتين راح نشفّط على ألمانيا وننافس فنلندا ويصير عندنا نمو اقتصادي أكثر من الصين

Barrak said...

SHAHAD

أولا اشكرك على كلامك
وعلى ثقتك بإمكانيّاتي الجباره
لو اصير وزير التربيه ووزير التعليم العالي
ألغي كلية العلوم الاجتماعيه وكلية التربيه
لاتسألوني ليش هذي خطة
وبعدها اخلي المعهد العالي للفنون المسرحيه كليه
وأخلي كلية للفنون الجميله
وأرجع الفلسطينيين يدرسون
ووووو
امنع عصير السانكيست وأحط عصير كورتينا

Barrak said...

على نفسها جنت براقش

الفكره والله موجوده
اللي صاروا مو أحسن مني

بس للأسف ادري ماراح يصير هالشي لأن المعايير مختلفه هالايام
انا مثلا ماأنتمي لحزب ولاقبلي ولا انتمي لجمعيه معينه
وماأروح لدواووين وايد
وماأحب حب الخشوم
وماأكتب شعر بالجرايد أمدح فلان وعلان ولاأحط إعلان بالشوارع أشكر فيها فلان وفلنتان
يعني باختصار بنظرهم ماأصلح حق شي

Barrak said...

MANAF

أولا
الله يطول بعمر والدك اللهم آمين
ثانيا صديق والدك لاأعرفه ولكن دام هذي المواصفات فيه ربي يطرح فيه البركه ويقدر يسوي شي
ثالثا
كل اللي أبيه إنه يوصل بوستي هذا لكل مسئول ابي رايهم فيه
واذا قضبوني بعد مالنا الا وزير العدل اليديد
واخير أبيك تسأله أول مره أشوف بالجريده إعفاء وزير من منصبه ليش أعفو وزير العدل السابق عن منصبه

نسيت

انا بتعرف على ابوك مو عشان شي بس بهنيه على انه قدر يربي واحد مثلك تربيه صالحه
بالنسبة للخارجيه انا ماابيها ابيهم يحطوني ملحق ثقافي في سفارة الكويت بباريس بس بشرط يشيلون السفير الحالي

الـفــــجـــ الــبـــعـــيـــد ــــــر said...

على طاري التطبيل.. يامكثر الراقصة والطبال عند العرب.. على افااا من يشييييل

بس الله يهديك انت من وييين ظهرت الكيرخااانه حسيت بغبااااار ظهر من البوست
محد يقولها الحين انت من وييين تظهر هاي السوااالف..
اعطيك 10 على 10 في المطلحات الاماراتية

Barrak said...

الـفــــجـــ الــبـــعـــيـــد ــــــر

للاسف احوال العرب من سئ إلى اسوأ
بالنسبة للكيرخانه
سيدتي انا من هواياتي البحث في اللهجات وبما انكم ياأهل الامارات احتضنتمونا بأيام الغزو لمدة سنه وشهرين تكونت عندي صداقات من مناطق مختلفه وخصوصا العين ودبي وبصراحه بصراحه أموت على لهجة الاماراتيين القديمه اللي لازم الواحد تكون عنده خبره عشان يفهم
على فكره الى الان كل يوم جمعه البس الكندوره

لاتقولين اندوكم
كيفي

الـفــــجـــ الــبـــعـــيـــد ــــــر said...

لآلالالا
مابقول اندوكم بقووولك اششششكر فنننك
عيل معلومة يمكن بعد تعرفها الكندورة الاماراتية
نسميها بعد العربٍيّة
;P

والله يديم العلاقات الطيبة والنفوس الصافية

Barrak said...

الـفــــجـــ الــبـــعـــيـــد ــــــر

ولو اني عندي ملاحظات على الكندوره الجديده اللي لو يضرب الواحد صاروخ روسي مايصيبه شي من صلابتها
بالتسعينات كانت الكندوره جميله قبل الصرعات الجديده

بس اعتقد ان الشعوب الوحيده المنسجمه مع بعضها على المستوى الشعبي قبل الحكومي هي الشعوب الخليجيه

الـفــــجـــ الــبـــعـــيـــد ــــــر said...

هههههههههههههههههههههههههههههههه

بموت من الضحك على تعليقك..

تدري عاد كل شي يتغير ويتطور

بس بعد في انواع من قطع الكرتوون منها الخفيف ومنها اللي صدق ماتتحرك لوول

والله يديم المحبة بين الخليجين

Barrak said...

الـفــــجـــ الــبـــعـــيـــد ــــــر


اللهم آمين