جرح غيابي

 اخترت اكون بعيد

واخترت انك تفقدني

عشان هيامي يردني

وان رديت

تشوف الفرح بملاقاتك

حب وهيام وقصيد

و اخترت اكون بعيد

...........

تسألني ليش؟؟

عشان الحب يكبر

ادري بتتعب وتتأثّر

والوله بيحرق يوفك

 بعيد عنك واشوفك

بصورة يحوفها الوله

بإحساس من عشقّه امتلى

وشوق كلماله يزيد

و اخترت اكون بعيد

.........

لاتحاسبني على غيابي

يااول واخر احبابي

ياحرف ماعرفت الا اكتبه

يا روح عطتني الموده هبه

يا حبي الوحيد

ماني بعيد

........

اكتبلك كلامي ليت يوصلك

حبيبي وانا اكتب لك أهلك

اتعب واتذكر وصوفك

والله للحين اشوفك

وللحين نيران الوله تقيد

انا اللي اخترت اكون بعيد

الاثنين

٢٤-١-٢٠١١

دبي

إدّاد

ماأحب أشكي بس الهم زاد

القلب تعب وماعاد يتحمّل

الحزن فيني ... يغطّي بلاد

لا الجرح رحم والوله ماوهّل

إن شكيت صدى الصوت عاد

وإن سِكَت ... الحال مايتبدّل

ماغير السهر يناجي السهاد

وماغير الحظ مارضى يتعدّل

ماأحب أشكي بس الهم زاد

والقلب تعب وماعاد يتحمّل

١٦-١٠-٢٠١٠

السبت

لما تغيب

لما تغيب

كل شي يتغيّر

الألم على الروح

سيّر

أحس الدنيا غريبه

كل لحظاتها كئيبه

والعمر بعذابي يقول :

طب وتخيّر

لما تغيب

كل شي يتغيّر

......

تصدق !!حتى الناس غير

حتى الورود وحتى الطير

يفقدون نورك

الكل مثلي يتحيّر

لما تغيب

كل شي يتغيّر

.......

لما تغيب كل شي يغيب

ماألقى بالدنيــا طِيب

جنّه الروح بتروح

جنّه مافيني روح

جنّه القلب صوب الموت

يِنيَرْ*

لما تغيب

كل شي يتغيّر

..........

جِنّهْ : أي كأنه

ينير : أي ينجر

كلاكيت للمره الثانيه

اللحين أنا شايب !!؟؟

وإلا توني شباب

لاتعيبون

ترى العياب عند الباب

توني صغير

وإلا مشدّق ؟؟

أبي الكل 

ينطق

ياجماعة الخير

كافي عذاب

أنا شايب

وإلا توني شباب

.......

براسي جم شعره بيضا

بس عندي إبتسامه عريضه

وأعرف إن الحياة صوره

إنت ترسمها

بأحلامك

بكلامك

بكبريائك

وتبقى إنسان صادق

في زمن كذّاب

اللحين أنا شايب!!؟؟

وإلا شباب

......

باقي ١٠ سنين ويقولولي: يدّي

 ويتجمّعون الأحفاد عندي

براكوه وهياوين

وقماشه ونسرين

وذياب

اللحين انا شايب!!؟؟

وإلا شباب

.....

تطير الدنيا فيني وأنا واعي

أدري فيه أمور مالها داعي

وأمور ابيها بس بعيده

 ربّي يرحم عبيده

الحمد لله خاطري

من كل شي طاب

لللحين انا شايب!!؟؟

وإلا لسّه شباب؟؟

١٧-١٢-٢٠١٠

الجمعه

٣٦

طارت السنين

ومن اللحين

صرت ٣٦

ومن اللحين

بدت تنكِتب عناوين

تختصر رحلتي

مع هالدنيا

وأعاتب نفسي على ماراح

وأطمّن قلبي بوعود

وأطوي كل أيّامي

وأبتسم

يمكن ألقى أحلامي

جود

وهذا إحنا عايشين

وطارت السنين

......

أكبر .. ويكبَر الحلم فيني

وضميري راضي .. ومراضيني

نفس كل سنه. أتبَسّم

ومن يديد أتنسّم

هوى الأماني الخنينه

أدري الأفراح مالها بينَه

بس أنا وقلبي

على الخير

ناوين

طارت سنين

وصرت ٣٦

١٧-١٢-٢٠١٠

الجمعه

ياوليدي يسلمك

حوار بيني وبين احد ابنائي أثناء مشاهدتي لاحداث التهجم على محمد الجويهل

ياوليدي لايهمّك

لو سمعت كلام يجرح

ياوليدي لايهمّك

تعلّم إنك تفرح

وترسم أحلامك بإيدينك

ياوليدي يسلمك

.......

لو شفت ناس تحبطك

خل تبتسم امانيك

لاتخلي ناس تافهه

من الاحلام تحرمك

ياوليدي يسلمك

.........

الزمن كفيل باللي يلعبون

لاني ابوك وعليك أمون

أبيك تعشق ديرتك

تعلم تحبها كل يوم

وقدّر أجدادك .. وسواياهم

وتابع مسيرة خطاهم

وخل حب الكويت بدمّك

ياوليدي يسلمك

........

الديره ياوليدي فيها رياييل

الديره مثل الشيره الواقفه

 يستظل فيها الضعيف

والجاهل والفاهم والكفيف

ضم الكويت بحب

مثل ماتضمّك

ياوليدي يسلمك

........

فيه ناس يبونها تنرز

بالغصب او بالدّز

لايهمونك ولا تسمع كلامهم

مثل ما الفوضى غاية احلامهم

خل السنع حلمك

ياوليدي لايهمك

٨-١٢-٢٠١٠

الاربعاء

غير نُمونه

تَبرق عيونه

وتمطر السما

لين شفته

تصير الدنيا مزيونه

وتتلوَّن اللحظات

بطيوف أشواقي

غير حسنه ...ماأشوف

وغير نوره ... ماألاقي

كل شي يصير

غير نمونه

وتبرق عيونه

....

هالعين....نورها كاسيني

هالعين ...بنظره تضويني

هالعين لو برقت

أحس  العذوبه رُبَت

بين جفونه

وتبرق عيونه

....

تضوي النيوم .. لو غَــمّض

أحس السما....تتــلَمَّض

غدير سحره العذب

جماله مو صج .. جذب

تتعبون لو توصفونه

وتبرق عيونه

٢٦-١١-٢٠١٠

الجمعه