معزوفة حلاتك

مرسومه بصفحة القلب ذكرياتك

وبداخل النبض شوق وأماني

انغام عذبه تعزف لحلاتك

حفلة وله  تشعل كياني

يخونني الحرف لو كتبت صفاتك

حتى الاقلام والورق ولساني

بقليبي انا محدً سوّه سواتك

من اطريك طار من مكانه وخلاني

ياغافلين

غافلين ... يا غافلين

بغيبوبة الزمن مغيبين

مابين صفقة اليوم

وسهرة البارح

عايشين 

وغافلين ..ياغافلين 

.......

الدنيا ... نسّتنا اشياء كثيره

مشكلة الانسان .. النسيان

ولي فات الفوت ... أنّبه ضميره

طابور جدام العين نشوفه

دورنا جاي 

بس متناسين

وغافلين

...

اعبر بأعماق نفسك

بسافر  ..بأعماق نفسي 

وأزور محطات بحياتي

رحله متعبه ... أحتاجها

تلاقي النفس ..علاجها

الكل يحتاج يسافر بأعماقه

الكل روحه لروحه مشتاقه

الحال يكسر الخاطر

بسافر بسافر

...

بأروي ضما احلام مهمومه

وأنثر صرخاتي المكتومه

والحنايا مع الافكار تتحاسب

والقلب مع اللي راح يتعاتب

بامحي الحيا بامحي الخجل

باحرق نفسي  واشعل امل

مااكابر 

بسافر بسافر

....

اطول سفر هو سفر الاعماق

تخيل انك شجره وروحك اوراق

عشان تحيا من جديد براحه

لاتهاب ماضيك واجهه

تعلم 

لاتكابر

وسافر

....

زهيري

عُودَه قصة فراقك عُوده

كسرت غصن الحنان وعُودَه

ليت طاري الغياب ماتعُودَه

شوفتك تروي الفّاد وتصونه

حافظ هواك بعمري وأصونه

ذاتك بقلبي ياقلبي مصُونه

بعدك ماعرفت الا اتدوده

ثقافة الوزار

منو عالغدا يلبس وزار

وفي بيته رواشن  وجندل

منو يعرف الجليب و اليُمّار

وفرق هب ريح عن التمبل

متى يبقى لتراثنا  آثار

متى درب الاصاله يندل

متى مثل مسلسل الاقدار

نسمع ذي وأهوه وتعنتل

كل شي تغير شصار؟؟

حتى الحجي علينا تبدل

متى ترد ثقافة الوزار

متى احوال السنع تتعدّل

زهيرية تحر

رسمت لي الاحزان سما وبحر

ومشيتني بيناتهم حزين وحُر

كل اللي شفته منك يِحُر

غديت ولهان وبقليبي حَرّه

عن اخبارك اسأل وأتحرّى

والخفوق به الف حره وحره

وكل حره بصدري تِحُر

تحت الهدب

تحت الهدب

تلقى تعب

ناطر عيونك

ترد بقايا روحي

وصوتي اللي ...إنسلب

وتحت الهدب 

تلقى تعب

.......

تصدّق !!! تعبت أنزف

تصدّق !!! ماتعلّمت أعزف

الا واوتار القلب مشدوده

تصدّق ودي اصرخ

بس الالم نشّف الريج

 مشكلتي ..

 وايد .. أحِب

وتحت الهدب

تلقى تعب

....

مابغيت أتكلّم

بس التعب غصبني

مابغيت أتألّم

بس مو منّي

كل شي بحياتي

له بعذابي سبب

وتحت الهدب 

تلقى تعب

...

شي يخوف لو كنت شاعر

وبداخلك وحش كاسر

ينهش احساسك ويهزمك

ماتلقى احد يفهمك

تحس بنشوة انتصار

وكل مافيك إنغلَب

وتحت الهدب 

تلقى تعب

..

الله أدرى

الله أدرى 

فيني

الله ادرى

 الروح مني تتبرّا

والموت يدني

ويزيد حزني

وكل شي قمت اخسره

الله ادري 

الله ادرى

.....

أشرب هم وأعطش ألم

واروي همّي بجرّة قلم

والعمر يبي زود

ماللشقى حدود

ابد بالمره

والله أدرى 

الله إدرى

.....

وقف الوقت على غيابك

وعلى لحظات الموادع

هذا الوقت جاسي

عمره مارحم ضايع

ولادارى عَبْرَه

والله أدرى

الله أدرى

لاماأظن

تحن ؟؟

إنت تِحِن!!!

وروحك تِإن!!!

انت عمرك

ماشلت ذرّة وفى

الود أبد ماتعرفه

لاماتعرفه

لاماأظن

إنت تحن!!!

.....

زهيري

دمعٍ غرق الوجنات تعال...مِشَّه

وارحم مهمومٍ دمعته...... برمشه

نخيتك هالالم عن يوفي... مَشّه

ابعده ترى منه البدن ......إنسَم

ياللي قبل لاتطلب قلت ....سم

من رحت مو قادر انا. ..اتنسّم

كأنه الموت على روحي ..يتمشّى

مابقى كلام

بحالتنا مابقى لنا كلام

خلص الحكي 

وكل مانبي قلناه


ماعرفت معاك الا حب وأحلام

ماعرفت إلا أقول  الله الله

اركب حصان خيالك

خذ بالك ...

لاتنحرم من نعمة خيالك

خذ بالك ....

اترك الكون والناس

اجعل الاحلام .. 

حلالك

لاتحرم نفسك من خيالك

.....

استمتع بهالنعمه

الحياة ماهي  مسؤوليات

الحياة ماهي مفاجآت

ارسم عالمك بروحك...

لوّن زوايا روحك...

روح ... لمكان ماتقدر له

روح.. احجز للمستحيل رحله

لاتهاب ....

استمتع بهالنعمه

وحط الفرحه... في بالك

لاتحرم نفسك من خيالك

.....

لاتنسجن بزنزانة الواقع

انسى معنى الحدود

انسى مفهوم القيود

اكتب  كلماتك

إلجم صرخاتك

واركب حصان آمالك

لاتحرم نفسك من خيالك

ماتدرين

تدرين ...

اني عايش بأرض 

نسماتها ماهي عليله

تدرين ..

ان السما علينا بخيله

والورود حوالينا جليله..

ومع هذا ...

ابقى اتغنّى فيك

بالنوير .. 

بالسدره الحنينه

واخلق من بساتين عيونك...

دواوين ...

وتدرين ...

،،،،

تدرين ...

ماشفت نهر جاري

عشان اشبه شوقي

وتصدقين ...

ماقدرت

اوصف نبض نُبض بعروقي

وهيام ...

ولهفه ...

وحنين....

وتدرين...

،،،،،

ماتدرين ...

معنى الهدوء افقده

بس احسه وياك

ماتدرين حبك بدا

يسري من قلبي لي يمناك

وياعلك تحسين

وتدرين ....

.......

ماادري شيصير

 اشوفك .. 

وماأدري شيصير !!

يخونّي التعبير

اصير  انسان ..

روحه بين ضلوعه بتطير 

ويخوني التعبير 

،،،

اشوفك 

بجمال ماعرف حدود

 أشوفك 

باوصاف مالها وجود

اشوفك بكذا صوره

بدر ينوّرني نوره

 شمس ملفوفه بحرير

ويخوني التعبير 

ماأدري شيصير

،،،

شهادة وفاة

شعب أدمن التشره و اظهار السلبيات

صار الهدف التحلطم التشاؤم والتشهير

بإصرار  يكتبون للوطن شهادة وفاة

كل يوم  يقتلون احلام وبسمات بضمير

كأنه هالارض مافيها ريحة الايجابيات

كأنه هالارض مامنها أمل مافيها خير

انا اليال

ظلال 

لها اشابيه بالارض ..
 وآمال

تنسج حياة ونبض ..
وسؤال

وشمس تعكس الواقع

الناس تشوف فيها نور

وانا اللي اشوفه خيال

وظلال

....

لي إهتز الغصن .. أسمع له أنّه

وصوت للريح .. يخوّف

اللي يصير .. شمنّه؟؟

وليمتى على هالحال

وظلال

...

الظل رسمه تشبه الاصل

مالها ملامح

الظل سواد لصوره

تحتاج خيال جامح

وطٌولة بال

وظلال

......

لو كل من حس نطق..

واستوعب المنظر

ولو الحرف غرق

بجوف الدفتر

وعلمني شلون احكي 

بلا كلافه

ولايبقى شي أخافه

ان قالوا الشعر بحر

أنا اليال ..

....

شلت روحي

شِلت روحي بإيديني وطلبتك طلب

خل عمري ويّاك يمشي  بهدا

وان راح بتبقى أغلى وأحَب

وياك لآخر نسم لآخر مدى

طرة نور

محتاج حضور

لعيوني وقليبي

محتاج شعور

محتاجك حبيبي

 تداريني..

تحس فيني..

حرام اموت فيك

وخاطري مكسور

محتاج حضور

...

 ابيك يمّي

ابي تذوب بدمّي

تسكن تفاصيل حلمي

ماابي انام مقهور

محتاج حضور

....

مطلبي مو صعب عليك

دارني مثل مااداريك

خلها دايم محاريك

 مثل طرّة النور

محتاج حضور

....

ابتهج

ابتهج لو اسمع طاري عنك
من الفرحه غورقت عيوني


سنين ماشفتك لكنك
الصوره البريئه بعيوني

جروح نديه

على هالحال يوميّه

اتذرى بآمال

وأحلام ورديه

ولاألقى راحه

ولاعيشه هنيّه

وعلى هالحال يوميّه

....

الايام وياي إبخلَت

والأفراح عنّي سَلَت

عايش عشان انظلم

عايش عشان أنحرم

كل شي يذبل

إلا جروحي نديّه

وعلى هالحال يوميّه

...

ليمتى اللي ابيه يروح

ليمتى الصبر ياروح

ليمتى قادره تشيليني

يزاج الله خير فيني

بس انتي الوفيه

على هالحال يوميّه

...

كل من لقى حلمه الا انا

انا انسان الوهم عنوانه

كل ماتتفزّز أحلامي

تسود بعيوني أيامي

وتصير الفرحه حياويّه

وعلى الحال يوميّه

.....

تبي اكثر

تبي تفاصيل اكثر

تشرح احوالي

تبي احلف شكثر ولهان

تبي احلف شكثر شقيان

تبي أبكي

تبيني أتعبّر

تبي أكثر

....

افهم اللي صاير ...شمنّه

حس  بقلبي طمنه

انا انسان راس ماله حزنه

اناانسان ضلوعه بصدره 

تتكسّر

تبي اكثر 

....

خذ من الانه .. واسمع صوتها

شوف نبراتها .. حس بجبروتها

لاتسمع لاتحس

بس افهم...

ترى الوله لو إلتم

بيوف عاشق يأذّيه

تحمّل حبيبي

انا وايد أتأثّر

تبي اكثر

لما تغيب

لما تغيب 

يزيد خوفي

يقل شوفي

وكل اللحظات تخون

ماتعرف توفي

حتى النسمه 

احسها لواهيب

لما تغيب 

….

مايصير للفرح بِينه 

يختفي مثل مااختفيت

وصور فظيعه وحزينه

تصير لآهاتي بيت

ويذوب فيني كل شي .. كئيب

حتى النسمه احسها لواهيب

لما تغيب …

….

لاتتخيل الحزن فيني

ولاتشوف رسماته بعيني

ولاتفكر تعيش هاللحظات 

بتحس كل مافيك مات

لاتتوقع بعدك حياة

لو مالي وياك  .. نصيب

لما تغيب

…

١٦-١٠-٢٠١٤

الخميس