تغريده

ممكن إنك توصل السما وتِنشِهر بتغريده

وممكن بكلمتين تصير معروف ومشهور

قَطَّه من فلان وإلا حجوة من إيديدَه

توصل بلدان وتعبر وديان وبحور

مغرد يقولون عنّه اووف الله يزيده

ومغرّد لو طروه يشع بكونك النّور

تصير حجوه بحلوج الناس بقصيده

ممكن تكون نجم ضاوي وبدر البدور

التويتر يودّيك لدول وأماكن يديده

بدون ترزز بدون تسمّت بدون بخور

يعرفونك العالم وتصير كلماتك نشيده

توصل طنجه دبي وزائير وكوالالمبور

ممكن تسولف عنك جانيت وتفيده

وبزّه وحسينوه وخلّود وفؤادونصّور

غربلونا كل يوم تقنيه غريبه وجديده

تاخذنا تدبّخنا تشلخنا تلف فينا تدور

التغريده آقوى من قناة ومقالة بجريده

التغريده ممكن تعدّل وتسنّع الأمور

خل نختصر حب الكويت ياناس بتغريده

المفروض اللي يحب هالأرض يكون مشهور