Tuesday, January 15, 2008

برد




بارده

الدنيا بعد عينج

 بارده

صارت ظلام

كلها آلام

وتواصيف جامده

بارده

الدنيا بعد عينج بارده

...

تهل نسمة أتنشّقّها 

تاخذ منّي أماني

ويظل خوفي  بصدري 

وأرجع أبرد وأعاني

شهالدنيا حتى بهواها جاحده

بارده

الدنيا بعد عينج بارده

....


إشلون ياقلبي بتدفه

ومن داخلك بردان

شلون الدفى تعرفه

وانت للحين شفقان

وكل اللي تبيه فاقده

بارده

الدنيا بعد عينج بارده

....


كانت كفوفج تدفيني

كنتي نور عيني

للحينج بالروح رغم هالبرد

للحيني منتظر دفى رد

وللحين الأيام معانده

بارده

60 comments:

sologa-bologa said...

صح لسانك

كلماتك فيها الدفا
فيها الشوق فيها الوفا
حشا ماهي شاردة
وبوسط القلب لابدة
الله يرد اللي غاب
ويفرح قلب الاحباب
والكف فوق الكف تعود
وترجع ليالي السعود
وشموع الفرح قايدة
تمحي الليالي الباردة


ودمت بحب وود
يا شاعرنا

Anonymous said...

هالبلوق دافى ابوستاته وسوالفه

صباح الخير يا براك

:)

تهل نسمة أتنشّقّها بيوفي


تاخذ منّي أماني


ويظل بصدري خوفي


وأرجع أبرد وأعاني


شهالدنيا حتى بهواها جاحده

صح السانك
عجيبه السطور


كريزما

lawyer said...

لاتبرد اهي بعد اكثر
روووووح دفها
و اطلب منها الدفا

يمكن ترد تسكن يوووفك و تلامس برد جروحك

بترد
بس انت اطلب منها الدفا

kila ma6goog said...

اي والله بارده

:)

سدرة العشـــاق said...

ياحلو البرد

:)

nadeyah said...

اى والله برد برد

بس تدرى شنو الاحساس الحلو لما ادخل بلوقك احس بدفا اهل الكويت
الكلمات الاصيله اللى الحين اندرثرت اتحسسسنى ان الدفا بالمفرده الحلوه
اسمع صوت كويتى صجى


والله يحفظك ويحفظ لك اسرتك

`~MnO YeNSa! ~` said...

تاخذ منّي أماني
ويظل بصدري خوفي
وأرجع أبرد وأعاني
شهالدنيا حتى بهواها جاحده


دائما كلماتك تستوفقني و تخنقني العبرة ..

للحيني منتظر دفى رد
وللحين الأيام معانده

بعض المرات يكون كل شي بيدنا بس ليش نوقف اذا ندري انه بالنهاية نقدر نوصــــــــــــل للدفى

فتى الجبل said...

أنصحك ببطانيات مورا

عيون الحب said...

أحيانا يعجز اللسان عن الرد على كلمات بالرغم من اعجابه الشديد بها

بصراحة انا بهالبوست ماعرف شو ارد وأقول
روعة كالعادة
:)

DanDash said...

ماشاء الله عليك

حولت موضوع متداول يوميا "شلونكم ويا البرد"

لهل الكلمات الي تدفي شعورنا


إشلون ياقلبي بتدفه"
ومن داخلك بردان
شلون الدفى تعرفه
وانت للحين شفقان
وكل اللي تبيه فاقده"

بـابـل said...

ويظل بصدري خوفي


وأرجع أبرد وأعاني


شهالدنيا حتى بهواها جاحده



هلا وغلا

البرد بردين بغير حضن

على قولة نزار ""فالصمت في حرم الجمالِ جمالُ ُ""


مبدع يابراك


وبس



بابل

فراوله said...

مساالورد والجوري
مساالبرد المغلف بدفا
ابداعاتك
:)
مبدعنا
الراقي
أستوقفني هذا الابداع
شهالدنيا حتي بهواها
جاحده
):
الجحود أقسي شعور ممكن يمر
علي قلوب العاشقين
بس
بالنهاية
تلك هي فلسفة
قدر
:)
دمت بدفء وعذوبه
وابداع
ابدا
:)

صبا said...

يا حلوك ويا حلو بوستك

كلامك دافئ مثل قلبك الوفي وانا ما قول الا يا بختها فيك يا ابو الرومانسيه

بوووووووووست دافئ

بووووووووووست رائع


الدنيا بعد عينج بارده
إشلون ياقلبي بتدفه
ومن داخلك بردان
شلون الدفى تعرفه
وانت للحين شفقان
وكل اللي تبيه فاقده
بارده


واااااو

لك مني مليوووون تحية حب

هـــدب said...

كلمات دافئه وحنين واشواق سطرتها يديك يا براك
مااعذب كلماتك ومااعذب ندائاتك تحياتي لك

princess dodo said...

احياناً نلتمس هذا
الدفء وننشده من الحبيب
فى ليالى الحب الباردة

.
.

رائعة كلماتك عزيزى

.
.

تقبّل مرورى وتحياتى

بو محمد said...

كلمات عميقة أخي براك
الأيان باردة و لكن صقيعها لن يؤثر على قلب تغلي الأحاسيس فيه كغلي الحميم
بوست جميل و سنتابع المزيد إن شاء الله

Najmah said...

شلون ياقلبي بتدفه
ومن داخلك بردان

.
.
مايدفيك غير اللي تعرفه
يحتويك داخله بمحبة وحنان

.
.
رغم البرد
المشاعر تدفينا

joy said...

واي براك عورني قلبي
اخنقني العبرة

ياحظي علينا وعالحب


اطلب دفاها ترا حتى اهي انا متاكدة تبي دفاك

Eng_Q8 said...

صح لسانك

احب البرد

esTeKaNa said...

ليه قلبي ما لقا لبرده دفا الا دفاك؟
ليه انا عيني تشوف وما تشوف إالا بهاك؟
غريبه؟



ماهي غريبه لو اتفقنا
ان وجود قلوبهم حولنا دفا
وأمان بعز الشتا
وان الروح تعلقت تتشفق
على لحظة لقا



اشلون يا قلبي بتدفا
ومن داخلك بردان؟
فعلا يا براك
دفا قلبك هو سر الأمان
ولو بيدك اللي فاقده كانت الدنيا دفا وحنان


كل برد وأنته بخير
البرد يتحرش فينا ويحرك اصدق مشاعرنا

وخلك من حجي البرد والمشاعر
دفو خشيم الفار لا يبرد
:Pp~

Fahad Al Askr said...

شهالدنيا حتى بهواها جاحده

اختصرت الأكو والماكو

Shaima'a Alkandari said...

تعلييييقي راح

بس بكتب مره ثانيه

لك نسمه هواء منعشه فيها من الحراره والبروده

احس ان اللى تكتبه من اعماقك يطلع ويوصل لنا بسرعه البرق

مبدع ياخوي ماشاءالله عليك

العرزاله said...

أي أندروير أي قطن

انا سمعت عن برد يدش العظم بس برد يدش العين هذي يديده

مو صج بردنا

Barrak said...

الاستاذ سولوجا


البرد خله القلب حفا
مايدري على منو لفا
الدنيا صارت صاده
بدفاي ماهي جادّه
ياخوي يانسل الاطياب
يازينة الناس والشباب
الجو كله برورد
بس لي هني وماقدر اكمل
البرد يمّه اطرافي



ياصاحب التعليق الاول

Barrak said...

كريزما

اشكرك سيدتي الراقيه

كلامك دفه الجو



تهل نسمة أتنشّقّها بيوفي


تاخذ منّي أماني


ويظل بصدري خوفي


وأرجع أبرد وأعاني


شهالدنيا حتى بهواها جاحده

كل اللي صار اني صوّرت النسم وانا اتنفس وارد نسمي بهالبرد
مجرد تصوير لعملية التنفس في جو بارد جدا

Barrak said...

lawyer

الجو اكبر مني ومنها

اشكرك

Barrak said...

kila ma6goog

مو صج البرد مو صج

فريج سعود said...

ما خليت شي بالكبت ما لبسته وهم باردة
البارحة دشيت المطبخ ولا ادفى مكان اهو
بغيت انام فيه لو ما خفت يقعدوني من الفجر

Barrak said...

سدرة العشـــاق

ياحلو الحر

Barrak said...

nadeyah

أهل قبل يسمون البرد الشديد برد البطين

اشكرك سيدتي على وجودك
وانا نتاج هذه الارض
بثقافتها بتقاليدها بكلامها

احب ديرتي بكل مافيها
بأهلها بطريقة كلامهم ببحرها

Biznscheya said...

مايدفّي إلا الحبّ و الحنان .. عسى الله يرزق كل بني آدم حبّ و حنيّة من الي يعز عليه

البرد .. استغفرالله .. ربي أنقذنا منه و ردلنا 50 درجة سيليزية
:(

أبو شملان said...

صح لسااانك

مـــــي وعشرون عاما said...

مبدع الى حد ال......... ما اعرف والي يحير احيانا نضيع انفسنا في البرد ولا نعترض واحيانا نقول ياااارب بس نشم ريحة الحر

Barrak said...

منو ينسى

اسف على التأخير بالرد
سلامتك من حنقة العبره


هذا البرد ومايسوي

Barrak said...

فتى الجبل

ياحلو الفروه حلواه

Barrak said...

عيون الحب


اشكرك سيدتي الراقيه

Barrak said...

DanDash

هذا البرد ومايسوي
بس برد الجو له دوى
اللي ماله دوى هو برد الخفوق

Barrak said...

بابل


قولي ولو كذبا كلاما ناعما


الله عليك وعلى نزار
وعلي

Barrak said...

فراوله


وجودك هو اصل الابداع
اشكرك سيدتي

Barrak said...

صبا

لك مني مليون تحيه وشكر

Barrak said...

هدب

اشكرك ياهدب
وشرفتينا

حلو اسمك

Barrak said...

princess dodo



تشرفت بوجودك سيدتي

اشكرك

Barrak said...

بومحمد


شرفتني اخوي العزيز

اشكرك واشكر وجودك

Barrak said...

Najmah

انتي صح

شكرا يانجمه

Barrak said...

joy

سلامتج من عوار القلب

مايحتاج اطلب


وبس

Barrak said...

Eng_Q8

صح بدنك

وهو يحبك

Barrak said...

esTeKaNa

وامان بعو الشتا

هالجمله تدفي


كلامج غير
ينفط عذوبه

فعلا راقيه بمعنى الكلمه

بالنسبه لخشيم الفار
المفروض اهو يدير باله علينا

Barrak said...

Fahad Al Askr

اشكرك

وايد وايد

Barrak said...

Shaima'a Alkandari

اشكرك
وليش تعليقك راح

Barrak said...

العرزاله

انا من اشوف العرزايه اتنافض من البرد


شرفتني اخوي

Barrak said...

فريج سعود

من احس بالبرد اقول
الله يعين اللي داشين مغاوير هالحزه

Barrak said...

Biznscheya

فعلا مايبقى الا الحب والحنان

ياحلو شهر 7 والله

Barrak said...

بو شملان

صح بدنك اخوي

Barrak said...

مـــــي وعشرون عاما

اشكرك وتسلمين

Selezya said...

والله مادري شقول
اللي كتبوا قبلي كفوو ووفوا

صح لسانك
:)

salman almulla said...

نقلتني كتاباتك الى عالم آخر وتذكرت وجه جدتي الجميل المنير

افتقدها وافتقد لسماتها الحانية الدافئة بل افتقد نظراتها التي تملأني بالطمأنينة

وافقت من ذكرياتي لأجد دمعاتي تثبت مزاعم شوقي لها


إلى جنة الخلد ياجدتي

ربي يسعدك اخوي براك ويجمعك بأحبابك على كل خير

Kuw_Son said...

الجو بارد يا براك .. تدف زين
:P

صح لسانك

Barrak said...

Selezya

صح بدنك
اشكرك

Barrak said...

salman almulla
اشكرك اخي الراقي

والله يرحم امواتنا واموات المسلمين

Barrak said...

Kuw_Son

اي والله بارد

صح بدنك