Thursday, October 29, 2009

قطيرات غيوم




تعبت

من كثر ماأحبك

تعبت

أكتبك .. أغنيك .. أرسمك

أنسجك .. أتخيّلك.. أحلمك

ولاقدرت

تعبت

من كثر ماأحبك

تعبت

.....

براكين من الوله .. داخلي

مأدري شبقالي ..وشراحلي

ماأدري شجنيت

وشاخذت

تعبت

تعبت

....

كَثرة الأشواق تأذي الروح

تعلّم النفس على النوح 

وتخلق كلام ماأعبّر أقوله

لو كلمة أحبك تكفي

جان ألف مره أحبك

قلت

وتعبت

من كثر ماأحبك

تعبت

........

لأن حبك ... سكن حنايا روحي

لانك أول ..... وآخر طموحي

مالقيت من أحبّه .. كثرك

أشوفك غيمه ... وأنا حدرك

وبقطيرات غيومك

ذِبت

وتعبت

تعبت

.....

ماتحس باللي فيني ... لإنك مرتوي

من أصدق أحاسيس مشاعري

ماتحس باللي فيني .. وقلبك قُوي

مادري من قواه ماادري

ومادري شبتسوي فيني

إنت

تعبت

من كثر ماأحبك

تعبت

Sunday, October 25, 2009

يوز






يوز عني يوز

لاتقول وخّر

وإدن وراك

و إبعد

أو خوز

يوز عني يوز

.....

أسوي من حيّاتك رغوه

أسوي من قذلتك حلوى

تبي مسقطيه لو محرقيّه

تبي مسويتها جيكره

وإلا عيوز

يوز عني يوز

.....

القمنده عندك القمنده

أنا على قد حالي بسيط

موعايش ببيت فيه برنده

كنت أحب أجمع النبابيط

كان كل شي فيني زين

اليوم ضرب الفيوز

يوز عني يوز

......

عشقي ماله حد للصبور

أحب صوت الجدور

لما إتراقع بالملاله

أحب ريحة البخور

من كسره صغيرونه

ريحتها غير نمونه

مثل ريحة بو عزوز

يوز عني يوز

......

ماعندي مواتر وسياكل

شارب نايم ماكل

أروح دوامي بإنتظام

أحترم كلمة دوام

وأسمع فيروز

يوز عني يوز

.....

مرات أروح سوق واجف

اشتري قحافي وجناجف

وميوه واستكانات وشراشف

وبطل فيمتو مرزوز

يوز عني يوز

.....

وايد أتحلطم بس مؤدب

احلم برحلة لباب المندب

او لروما وفنزويلا

وبتونس آكل باجلا

وبتركيا أمد البوز

يوز عني يوز

.....

ماأقز أبد كلّش خير شر

أقعد بالديره حتى لو حر

ماأتكلم بالتلفون وأسوق

ودمي دايما محروق

بس أطيب بالأفنيوز

يوز عني يوز

......

من أول واحد .. إثنين.. ثلاثه

لاهذا يرهن بيته

ولا يبيع ذاك أثاثه

كل موضوع بينحل

يابآب

يابحزيران

يابتموز

يوووووووووووز


١٥-٩-٢٠٠٩
الخميس

Tuesday, October 20, 2009

تمطر





تَمطِر

 الروح تمطر

مرتويه من حسك

تقطر

حروفك تقطر

على حنايا يوفي

على أطراف قلبي

وتلقى ندى

مغورق وبارد

وبنسماتك متعطر

تمطر

تمطر

.....

رسمه علي صدري رسمت

كل لون بتلاوينها إنت

كنت أصل تكوين روحي

كنت وكنت وكنت

بس خلاص ماأعبّر

أمطر

أمطر

١٩-٨-٢٠٠
الاربعاء

Monday, October 19, 2009

لاتمنع



لاتمنَع

وتخلي الناس

لعقليتك تخضع

لاتمنع

هذا إيه

وهذا عيب

وهذا وَعْ

لاتمنع

......

قبل لاتفرض قرارك إسمَع

شوف راي العاقل وإقنَع

شوف حالته نفسيته

شوف واقع ديرته

ومن وقتك الثمين

مره تبرّع

لاتمنع

......


هالمجتمع ثلثينه شباب

ناخذ الخبره من الشيّاب

ونخلق جسور من التواصل

مو مهم هذا رزه وذاك واصل

المهم الأمور

إتّسنّع

ويافهيم إسمع

لاتمنع

١٦-١٠-٢٠٠٩
الجمعه

Tuesday, October 13, 2009

ظلال





ظلال

تشكّلت أشابيها ...بأرض

وآمال

إنسجت حياة ونبض

وشمس تحرق اليابس والَخضَر

كل الناس تشوف فيها نور

كل الناس تحس بدفى

إلا أنا كل اللي أشوفه

خيال

وظلال

..........


لي إهتز الغصن

أسمعله .... أنَّه

واللريح صوت ... يخوِّف

وأغصب الورود تذبل

وهي مرتويه

اللي يصير ... شمنّه ؟؟

وليمتى على

هالحال

وظلال

....

الظل رسمه تشبه الأصل

....بس مالها ملامح

الظل سواد لصوره

.....تحتاج خيال جامح

يوصف اللحظه

وطُولت بال

وظلال

.....

لو كل من حَس نطق

وإستوعب المنظر

ولو الحرف غرق

بيوف الدفتر

وعلمني شلون

أحجي بلا كلافه

وأتعبّر

مايبقى شي أخافه

وإن قالوا الشعر بحر

أنا اليال

وظلال

.....

.....خلّتني أحزاني

أوزن الكلام

وأتنقَّى الكلمه

... وأذوبها بحشاي

......خلّتني أحزاني

أرسم بالهوى رسمه

تطير بسماي

مابقى عندي بعد

شي ينقال

ظلال

١٤-١٠-٢٠٠٩
الأربعاء


Tuesday, October 6, 2009

نَفَس الأحلام




خلّوني أتنفّس أحلام

من دون كلام

بس بالخيال

أرسم آمال

.... لا أكتب

.... لا أدوّن

.... لاأتشرّه

.... لاألوم

لا أنلام

بس أتنفّس أحلام

،،،،،،،،،


إخلقوا لي لغه يديده

ورتبوا أحلامي بجريده

مانشيت .... يزيّن حياتي

مانشيت .... يخلّيني أحاتي

ومقاله ماتخلّيني أنام

بس أتنفّس أحلام


،،،،،

......وعد مني

بس باحلم بحلمي

......وعد منّي

ما لي شغل باللي يمّي

كافي علي همّي

......وعد مني

بارفع الجام

وأتنفّس أحلام

،،،،

السلبيّه بازرعها بكياني

ماأتجرأ أحلم بأماني

أسكت وأقعد مكاني

ماأشوف جدام

،،،،،،،

يمكن باجر الحلم بفلوس

ومايكون شي محسوس

يوّد عليه حيل بالضروس

هذا اللي بقوله والسلام

هالله هالله بالأحلام

٦-٩-٢٠٠٩
الثلاثاء