Monday, March 31, 2008

شخبط شخابيط

بعض من شخابيطي احببت ان انشرها لانني اعلم انها لن تكتمل ولكن اعتقد بعد أن استمع لارائكم النيّره من الممكن ان اعيد النظر فيما قلته

اخاف ادور حضنك وماأدلّه
******
لاتسألني عن الخوف
هو احساس تناصف اليوف
*****
تتألّم ؟ انت تتألم
*****
اقدر اقولك ياأه
والا تقوليني؟
*****
ليش اللي عايش له يغيب
ليش عندي مشكله بالنصيب
*****
لوحدي ايه انا لوحدي
وذايق مرارات عندي
بس مرتاح
او ابي ارتاح
بس ماودي
*****
اقطع لك دروب وبعد فيني امشيلك
واخذك بيت وذرى وحضن
شبيدي غير احتويك واشيلك
واخليك نبض او ماي بجفن
******
فيه حد حس بهم محاره
وشاللي بجوفها ينتدارى
فيه حد فهم مضمون بحر
او استنتج اسراره
******
تخيّلني
نسمه انفاسها بارده
تتوسدها شهقه
تحييني وتخنقني
تخيلني
*****
شتكون الدنيا لو مافيها قمر
راح نعرف لذة الليل
راح نفهم تكوين السهر
******
ياليل منهو صديجك
منهو يبلل ريجك
بهمسات سهران
منو يطرزلك الكلام
ويخليه يبان
وينور طريجك
*****
المسافه
عمرها ماكانت مشكله بيناتنا
لان الصدق راس مالنا بحياتنا
تكوني هناك
أكون هني
بس معروفه جهاتنا
******
شاللي راح ياوقت وشبقى
جم فراق وجم لقى
قولي للزمن يصدق مع نفسه
عشان اصدّقه
******
كل همي بامي واخواني
ماخليت وقت علشاني
وان بقى لي لحظه
تتزين بأحزاني
******
كثري تخاف مني
والا الخوف تملكني
وضعّف نبراتي بلهاتي

67 comments:

Anonymous said...

:)



حلالك الشخابيط..


ودي امسك لك السما
كراس

واجمع لك الدنيا
الوان


وارسم مشاعرنا بيدك


حلالك

Anonymous said...

وارسم =إرسم



:)


حلالك

Barrak said...

Anonymous

اشكرك

Mohammad Al-Yousifi said...

بس لو بصوت هيفاء وهبي جان صاروا احلى

Barrak said...

kila ma6goog

بالله عليك هيفاؤه تقدر تقول
ماينتدارى

فريج سعود said...

اخاف ادور حضنك وماأدلّه
هذي بدايتها قوية
كملها

فتى الجبل said...

شوف
اول بيت الطبطبائي ما راح يرضى عليه وفيه
الباجي كملهم

Barrak said...

فريج سعود

بأحاول ولو اني ادري ماراح اقدر اكملها
لاني راح اتعب

Barrak said...

فتى الجبل

شوف الطبطبائي لي 17/5 لو شكتب عادي عنده
لانه بدائرتي ويبي صوتي

لاتحاتيه
بس ماقلت اي وحده اكملها

همس الاحباب said...

ونعمة الشخابيط
شخابيط رقيقة ورائعة
تمنياتى لك بالتوفيق
وتحياتى لك
خالد

بعثرة مشاعر said...

شخابيط حلوة
بس كلها حزينة :(


ليش اللي عايش له يغيب
ليش عندي مشكله بالنصيب

هذي عجبتني
حاولت اجاريك

-

ليش اللي عايش له يغيب
ليش عندي مشكلة بالنصيب

ليش أحلامي ارسمها و تخيب
ليش أحس بداخلي احساس الغريب

ليش الدنيا تباعدني عن الحبيب
.
.
.
-

جني زدتها ليشات
كتبتها على عجالة

خنشوف تكملتك :)

Aldenya said...

هذي شخابيط وجذي
بهالإحساس العميق
عيل لو اكتملت اشبتكون
؟؟
بصراحة
كلهم ممتازين لكن
هذي اعجبتني

تخيّلني
نسمه انفاسها بارده
تتوسدها شهقه
تحييني وتخنقني
تخيلني


وتسلم إيدك يا براك

Barrak said...

همس الاحباب


اشكرك ياخالد

وتشرفت بهذا المرور
سيدي الفاضل

Barrak said...

بعثرة مشاعر

احنا اللي مانجاريك

وايد عجبتني كلمة
تباعدني

بقولك شي
تدرين ليش انا كاتبها
لاني لو ماكتبتها هني راح تضيع حالها حال غيرها
مشكلتي قبل كان كلامي اكتبه على قوطي كلينكس او جريده
ويضيع
بس قلت هالمره لا

اشكرك

Barrak said...

Aldenya

اهي صج شخابيط
بس كل وحده فيها عباره عن حالة عشتها
لمدة شهر واحد بس

مااعتقد انها عميقه كثر ماهي بسيطه
تخيلني

اوعدك راح اكملها
بس لاتقولين متى

Barrak said...

Aldenya

اهي صج شخابيط
بس كل وحده فيها عباره عن حالة عشتها
لمدة شهر واحد بس

مااعتقد انها عميقه كثر ماهي بسيطه
تخيلني

اوعدك راح اكملها
بس لاتقولين متى

charisma said...

يا زينها من شخابيط
استمتعت بكل كلمه وكل شخبوطه
:))


شتكون الدنيا لو مافيها قمر
راح نعرف لذة الليل
راح نفهم تكوين السهر

يا سلام عليك يا براك
تسلم ادياتك

بوتشخيص said...

أخاف أدور حضنك و ما أدله ..

و أخاف حضني حبيبي تمله ..

تعبت أحاتي لعبة القدر ..أثرى القدر لاعب بعمري كله ..

تعبت أدور حضنك حبيبي .. و الغريب إنت في مكان قلبي و محله ...

و أقدملك قلبي بإيديني وأقولك ..

تكفى حبيبي ..قرب شوي و إستمع له ..
..


أدري مو مثل مستوى شعرك .. و بيت مكسور و الثاني ما يمشي بس حبيت أساهم معاك بالشخابيط

مشكور على هالبوست الحلو :)

Barrak said...

charisma

عاد انا محتار مفرد كلمة شخابيط
شخبوطه والا شخبطه

تهقين شنو الصح

؟؟
شتكون الدنيا لو مافيها قمر
راح نعرف لذة الليل
راح نفهم تكوين السهر



بهالمطلع
كنت أطالع القمر

وطرأت ببالي كلمة شتكون

الله يسلمك

Barrak said...

بوتشخيص

عندي لك سالفه عن جذبة ابريل عجيبه

المهم

بذمتك انا اللي شاعر والا انت اللي استاذ نتعلم منك
وهذا مو تصفصف حجي لا عندي الدليل
اللي يقول ويثبت البرهان

انت قلت

و أقدملك قلبي بإيديني وأقولك ..

تكفى حبيبي ..قرب شوي و إستمع له ..
..
كلمة قرب شوي

انت صورتلنا لحظه بسيطه وجبرتنا نشوفها بكلمة قرب شوي
تخيل بس شوي
مو وايد
ياسلام عليك

الدليل الثاني

وشوف شلون قدرت انك تخلق قافيه جديده بكلمه موزونه
استمع له
يالذكائك
انك لم تكتب استمعله
بل فصلت بين استمع و له لكي نستمع معك ونترنم ونحن نقرأ ونوزن كلمة استمع سكوت ...... له

ياسلام عليك
وتقول انا شاعر

وتبي تخلينا بعد

Q8DOLL said...

وايد حلو شخابيطك
حتى أحلى من شخابيط نانسي :)

ليش اللي عايش له يغيب
ليش عندي مشكله بالنصيب

Anonymous said...

هذي شخابيطة
عيل كلامك شلون


شخبط يا براك

SolaimaN said...

تخيّلني
نسمه انفاسها بارده
تتوسدها شهقه
تحييني وتخنقني
تخيلني

،،،

تصدق لو احس بهالحضن مجرد ثواني ، بس بصدق

ماعندي مشكله لو اتشحطط باجي عمري

،،،

يازين شخابيطك والله

vancouver said...

واااااااااااااااو


تطلب راينا في شنو
؟
في هالابداع


الصراحة كلهم عجبوني
وبعضهم
اتنبأ بانهم بصيرون امثال
مع الوقت
لو نشرتهم
:)

طاب يومك يا بو شخابيط الذهب

vancouver said...

تكمله بوتشخيص



واااااااااااو

حلوه وااااايد
أخاف أدور حضنك و ما أدله ..

و أخاف حضني حبيبي تمله ..

تعبت أحاتي لعبة القدر ..أثرى القدر لاعب بعمري كله ..

تعبت أدور حضنك حبيبي .. و الغريب إنت في مكان قلبي و محله ...

و أقدملك قلبي بإيديني وأقولك ..

تكفى حبيبي ..قرب شوي و إستمع له ..
--



كملهم براك
بانتظارك

mtfa2el said...

بو عبد الله لا يبوقونهم !!
ترى البوق حلالي هاليومين
باجر تلقاهم بمنتدى مساطيل واحد شاد حيله و متقمص الشخصية
خد بالك و انت ماشي
.
.
اقطع لك دروب وبعد فيني امشيلك
هذي نبي تكملتها يا بو عبد الله

Shaima'a Alkandari said...

اسمحلي اقوووووووووووولك


كل مره شخبط علشان نقرا شخابيطك الحلوه

العاصي said...

يسلمو عهالكلام المصفصف

أنا كويتي said...

فيه حد حس بهم محاره
وشاللي بجوفها ينتدارى
فيه حد فهم مضمون بحر
او استنتج اسراره

كلمات تحمل معاني عميقة تلامس القلب

يسلم فمك. درر وحياتك مو شخابيط

كتلة من المشاعر تتلاطم في بحر من الأحاسيس

وعلى طاري البحر, وهالكلمات الشاعرية, أقول لك سر بيني وبينك . ترى البحر أمان وروح تسبح وبلبط مع العيال بأمانة الله وحفظه. لأن التيارات البحرية بصور القوقل ما تجي إلا بأول إبريل من كل سنة. والبركة بالفوتوشوب :)

الثائر said...

etha hathe sh5abe6 3yal el e7sas shloon 9ayr

:)

charisma said...

ساك الله بالخير

شخبوطه مفرده كويتيه بحته
شخبطه والله هقوتى صح
انت ادرى ههههههه

شتكون عطت الكلام طعم لذيذ واحساس روعه
لى انا شخصيا ما ادرى عن غير

ويسلمك من كل شر

Nachla said...

براك
يا ريت لو كل الناس الوحيدة تقدر تكتب مثلك
ترست وقتي يعطيك العافية
خوش بييس

صبا said...

براااااااااك

اخاف ادور حضنك وماأدلّه

**
روعه
والاروع بو تشخيص

هذي شخابيط ؟؟ لا والله شي مرتب

تحياتي

فراوله said...

مساالورد والجوري
مسا الشخابيط الراقيه
مبدعنا الراقي
شخابيطك هالمره لها نكهه أحلا من
الحلا وزيادة
حبتين
:))
اهنيه شخبوطه لا يمكن تجاهلها
"كثري تخاف مني..والا الخوف تملكني"
!!!!
لمن يوصل الخوف بين شخصين تربطهم مشاعر ساميه
بهالطريقه
اتوقع الانفصال بيكون هو العذاب بعينه
...
دمت بدفء وعذوبه
ابدا
:))

Gmashah said...

:) مشكور وايد على مرورك بمدونتي و تعليقك ...

و قريت مدونتك .. و كاتباتك جدا جدا جدا جميله ماشالله عليك ...

و روحك حلوه

كل التوفيق والاحترام
قماشة

soul said...

تتألم ؟؟ إنت تتألم

حرام عليك ... وإلا تدري حرام عليه الي وصلك لهالحالة..

حلوة كملها...
:)

Anonymous said...

اهديك البوست اليديد
تلبية لرغبتكم الكريمة
لأبتعد عن السياسة

بوتشخيص said...

تتألّم ؟ انت تتألم
إنت الغدر منك يتعلم ..

ليش .. كلمة الحق تجرح؟

تحجى اشرح .. ليش ما تكلم؟

خل قليبي فيك يفرح..

تبجي تبيني أسامح ؟..اسم الله عليك حبيبي .. إنت إتحلم.

أسامح عشان ترتاح؟ ..وأنا أدري دموع الغدر هذه من عين تمساح؟


تألم حبيب تألم ..يا عساك ما تعلم



:) وسلامتك.. صارلي سنين ما أكتب خواطر بس شخابيطك روعة ..يستفزون كل من يهوى الشعر..و اسمحلي إني قاعد أكملهم :)

Anonymous said...

kella 7elo.

وردة حب said...

الله عليييييييك

شي حلو ينقرى من الصبح

الله يفتحها عليييييك يابااشا:p

`~MnO YeNSa! ~` said...

الله الله

يا براك


لاتسألني عن الخوف
هو احساس تناصف اليوف


شنو هالتعبير
الخوف يتناصف اليوف
مشالله
صورة حلوة وايد


*****
اقطع لك دروب وبعد فيني امشيلك
واخذك بيت وذرى وحضن
شبيدي غير احتويك واشيلك
واخليك نبض او ماي بجفن



حيل عورت قلبي هالحروف
امشيلك
ماي بجفن
احتويك


كلمات راقية


******
فيه حد حس بهم محاره
وشاللي بجوفها ينتدارى
فيه حد فهم مضمون بحر
او استنتج اسراره


اهني قلت براك قمة الاحساس الخيالي ..شلون قدر يبدي في هالشخبوطة وانا اخالفك الراي هذا الابداع
قمة الاحساس المرهف


******
شاللي راح ياوقت وشبقى
جم فراق وجم لقى
قولي للزمن يصدق مع نفسه
عشان اصدّقه


كثري تخاف مني
والا الخوف تملكني
وضعّف نبراتي بلهاتي


تدري قاعدة افكر .. شنو اللي
تكملها
توهقت
كلهم
كلهم
حيل
حلوين

ناطرة وحدة منهم على الاقل الايام الياية
آسف على الاطاله

~warda~ said...

خواطر راقية او
شخابيط مبدع بمعنى أصح
تسلم ايدك :)

Mok said...

صح لسانك

Barrak said...

Q8DOLL

خلوا نانسي بحالها

لان اعرف ناس ممكن يغتالوني اذا تكلمت عنها

على فكره انتي قطيتي بدليه بس بطوّفها

Barrak said...

حسافتج يا كويت

شخابيط مشخبطه مخربطه
ياحلوك ياربي

Barrak said...

SolaimaN

الله يبعد عنك الشحططه
ويرزقك بحضن يخلي يومك كله شخبطه

Barrak said...

vancouver


امثال مره وحده

ماادري ليش تذكرت اغنية عبدالحسين
مالت مسابقات رمضان
ياناس ياللي بيتكم فيه يهال
صوتوا لهم يمكنهم اللحين ناسيين

Barrak said...

mtfa2el

خذ بالك وانت ماشي تطلعلك بنت حوربه
تدّيك مقلب عالماشي
اوراجل عنده غيّه


وشدعوه ماباقوني
الصج يبقى والتصنف جهاله

Barrak said...

Shaima'a Alkandari

اسمحيلي اقولج

على امرج

Barrak said...

العاصي

يسلمك ويخليك

Barrak said...

أنا كويتي

اشكرك على مرورك الاول
تشرفت بك


واشكرك على الاطراء

وتوب توب يابحر

Barrak said...

m6rb_7nboli

الإحساس اصلا نتعلمه منك

اشكرك على هذا المرور

Barrak said...

charisma

ترى انتي عندك ثروه لغويه كويتية بحته

بالله عليج من وين مطلعه هقوتي

مال الواحد يخليج تسولفين ويسجل وراج

الله يحفظك

Barrak said...

Nachla

ياليت ياوخيتي ياليت

Barrak said...

صبا

تقريبا خلصتها بس مو عاجبتني للحين

Barrak said...

فراوله

تصدقين عاد

توني انتبه

اشكرك يافراوله

Barrak said...

Gmashah

العفو

وانتي اللي مشكوره على رد الزياره ون شاء الله ماتنقطع هالعاده

Barrak said...

soul

هذي الوحيده اللي احبها

وايد وايد


بس ماأعتقد ممكن أكملها لاني راح اكون قاسي وايد

اشكرك على هذا المرور

Barrak said...

حسافتج يا كويت

لحظع خل اصك الدار واجابل ابداعاتك

Barrak said...

بوتشخيص

قلالك احنا تلاميذك

Barrak said...

Soul

الحلو هذا الوجود
اشكرك

Barrak said...

وردة حب

الله يسلمج ويخليج

نهارك ورد

Barrak said...

منو ينسى


كل هذا انا كاتبه

حرام عليج
خليتيني ارد وأقرا اللي انكتب

ترى سهله على الكل انه يقرا
بس اعتقد صعبه ان الواحد يقدر يحلل كلام غيره

وانتي الصعب عندج شربة ماي
ماشاء الله عليج

Barrak said...

~warda
اشكرك سيدتي

وشكرا على مرورك
تشرفت بالورده

Barrak said...

Mok

صح بدنك

fghdfhg said...

أخي براك...
بل دعني أقول المميز براك

؟؟ما أقول لروعة ما قرأت هنا

مشاعر راقية
وأحاسيس صادقة وحروف استقرت فالصميم

حاولت اقتباس شيئا مما أعجبني
لكني وجدت نفسي أعيد كتابت ما خطته يمناك

رائعه جداقمة الإحساس حروف رقيقه وشفافه بما احتوت ومعاني شامخه تسرح بها الأذهان فالتفكير بما خططته لا ينتهي بانتهاء ما كتبت

سلمت يمناك وإلى الامام
لا تحرمنا روعة جديدك

Barrak said...

E6eba_Ethb7tny

اشكرك واشكر مرورك
واشكر قلبك الطيب