يهال

حديدٍ سهل يالدانه هانت

 الصعايب بتصير تساهيل

نفوس على الحب ماتوانت

ونفوس تغني بالزعل مواويل

نفوسنا عزيزه ابد ماخانت

بالمحبه تعيش كل التفاصيل

الدانه ياما شافت وعانت

غدر وطعنات وقال وقيل

هي درة البلادين وزانت

وبتزين وعن الحق ماتميل

بانت الاعيب اليهال  بانت

خفيف العقل مايصير ثجيل

حديد سهل يالدانه هانت

والله يكافينا شر الغرابيل

حسك كون

حسك كون

فيه النسمات تنادي

حسك حضن

ونبضة امان بفادي

.....

 حسك

يوصّي الفرحه ... وصيّه

يوصيها بيوفي تسرح

يخليها بعيني تتفتح

القاك ضحكة يتيم 

لين غافلوه ... بهديه

القاك بسمة عاشق

لي عنّت عليه .. اغنيه

الله الله لي هالكثر !!!

صرت العمر .. وأمانيّه !!

الله الله يالروح... 

والريّه

......

لما اسمعه

تتشرّع  بيبان الاماني

تصير السما  مكاني

تنبت براحة ايديني .. غيمه

تتلون بألواني

تصير عيونك

نور الكون

 وضيه

الله الله ياروح الروح ...

 والريّه ....

شسويت فيني

شسويت فيني

غفت نجوم بصدري

انهيت ونيني

احب همساتك .. تحازيني

احب ضوى نورك .. بعيني

احب  نسمات هواك 

تنزل بشراييني

شسويت فيني

...

شبتسوي بعد

عطيتني وعد

مع غيوم الافراح

تمطر بيوفي

طمنت خوفي

هل علي الامان

اللي ناسيني

شسويت فيني

زهيرية تتراكم

مالك العين و الحشا وهم للقلب .. مالك 

عطيتك اللي اقدر عليه وأعاني .. إهمالك

انت الاماني.. وآمالي.. متى أكون .. آمالك

ياناس ماحسيتوا بلواهيب الحشا .. تراكم

غيوم العذاب من راح   و بسماي .. تتراكم

 اسمع متى ياكرام الحي عيني .. تراكم

ياراس مالي  خلني نوبه راس ... مالك

مثلك ماألقى

مثلك ماألقى

انت النسم بيوفي

وانت الشهقه

قلبي لك ..

عيوني لك ..

رويحتي لك ..

تنقّه ..

مثلك ماألقى

....

حتى السما تغير لونها

بعيوني كل شي تغيّر

احبك اكثر من كلمة أكثر

سما دنيتي لونها لون عيونك

موزرقه 

مثلك ماألقى 

تنحب

اقدر احبك وكل مافيني منتلف

واقدر ابتسم لك وكلي .. شب

كل شي وياك طعمه يختلف

الحره وهي الحره منك تنحب

للوله طعم  احساسه مختلف

هواك يبرد الخفوق لي هب

وياك مااتعب مااقدر ماأعرف

الحره وإهي الحره منك ... تِنحَبْ

يامن علمتني الحب

ذكرى وفاة والدي ال١٤



السنين تمر والكسر كسر ماينجبر

تتلاشى الذكريات لي هل ذكراك

اللحين عرفت ليش علمتني الصبر

لانك عارف وجودك بكياني وغلاك

ولدك اللحين على خبرك وشوي كُبر

 تمر عليه حزّات يبي يكون وياك

ماتغير  الا الشيب وقام يكتب شعر

واحفادك اللي ماشافوك للحين بطرياك

لك بعيون الناس معزه ومكانه وقدر

استاذ دكتور ومُربّي ياكثر سواياك

سنين وحلم عيوني بشوفتك بس تِقر

١٤ سنه كلمة يبا بلساني تتحراك

علمتني الحب وبكل الحب بتنذكر

 يامال الجنه البارده يابوبراك

اخدرت

لو  اصرخ لك 

وأسمّع  وديان .. وبلاد

لو ان كثير الشوق

 بداخل العروق زاد

بوفيك حقك؟؟

لو  أسمّي الكون .. بإسمك

وألِم كلمات العشاق

واجمعها يمّك

بوفّيك حقّك ؟؟

والله مااوفيك 

لو اشيل افادي

وأخلّيك الفّاد
...

من كبر حبك 

 جروحي الاوليه .. بَرَتْ

من كبر حبك 

حتى الدنيا 

داخت وإخدرت

مابقى غيمه ماأمطرت

 صارت عيوني غنايتك

وشراييني اوتارك

والله مااوفيك حقك

لو اشيل افادي 

واخليك الفاد

تتأمّر

ابي لك .. اكثر

ابي لك .. اللي ماصار

واللي ماانحسب

 تنحط على حدود الهدب

وعلى ماي عيني .. تتأمّر


ابي لك اكثر

.......


ابي لك حشاي .. سحابه

خلك فيها .. روح

خلك فيها ..راحه

خلك فيها.. مساحه


وخلها فيك .. تتعطّر

ابي لك اكثر

حلم الندى بشراييني

هِل يامطر


خل الفرحه فيني  


عميقه 


هِل يامطر 


وإعزف بضلوع قلبي 


 موسيقى 


......



محد غيري 


 يقدّر عنوة الغيوم


وتعب القطرة


 قبل لاترويني


يتشكّل امل مغزول


 فيني

ويجدد حلم الندى


 براحتيني


حس المطر 


يخلّي قسوة الدنيا 

بعيوني


رقيقه



هِل يامطر


وخل الفرحه فيني


عميقه


هِل يامطر 


وإعزف بضلوع قلبي


 موسيقى

......



الدنيا نسّتني 


احساس البرد


العمر والناس نسوني


 طعم البردي


صار العطش


ينتهي فيني ويبتدي


الضما موجع أليم 


والوقت ردي


هِل يامطر


خلني اسبح بخيالي


نشّفَت عروقي 


 الحقيقه



هِل يامطر


وخل الفرحه فيني 


 عميقه


هِل يامطر 


وإعزف بضلوع قلبي


 موسيقى

قائمة موسيقى

انا ريشة امل 

في جناح الايام

انا احساس الذبول

بنشوة الاحلام

انا البسمه 

انا الحطام

......

انا اللي كسرت 

قوانين الحزن

انا اللي عطيت

 للأسى وزن

ولبّست الحيره ..

 ثوب جديد

انا فرحة اليتيم

 اذا انمدت له إيد

انا عدلت

 تكوين تفاصيل الآلام


انا ريشة امل 

في جناح الايام

.......


تمر باسماعي نغمه

مرّت بزحام حزين

اصير شجن الشجن

وبيوت الحنين

مسرح الحياة .. 

مااستوعب قصتي

مالقيت حوار...

 يشبه كلمتي

ولا حتى الارض مستوعبه

ولا الدنيا رضت 

تفهّمني معنى كلمة : هِبه

اللي يصير فيني

  حرام

انا ريشة امل 

في جناح الايام

ابي حقي

ابي حقي 

اللي انسلب مني

ابي عيني اللي نِستني

كل مافيني راح لك 

وهجرني 

ابي حقي

-------

ابي كلماتي اللي اختفت

ابي صوتي اللي خَفَتْ

ويوفي وعنوانه

ابي القاني .. ويني انا ؟

وين كلي 

دَلنِي

ابي حقي 

ابي حقي

لاتخليني

 يردني .. قلبي يردني 

لعيونك .. اللي آسرتني

يردني .. قلبي يردني

لاخر نجمه بالسما

ولاول شهقه

ترد فيني النسم

غيابك حبيبي

خنقني

ويردني .. قلبي يردني

--------

تعرف شلون نبضك

ينسج على ارضك

تعب وثقل وضيقه

اموت كل دقيقه

وابقى احبك

والله ياجرني

ويردني .. قلبي يردني

------

بارتاح ...لاتخليني 

من عمر وانا بروحي

باعيش.. شوف عيني

بس شوف وترد روحي

والله ترد روحي

 صدقني

لاتردني

تايه

تايه 

دروب ادلها ... ضاعت

دروب مااعرفها.. نادت

بين النبره والحرف مسافه


كل حجوه بلساني .. انباقت

حتى اللهفه .. انكرتني

حتى الفرحه ..استغربتني

الحلم اللي خبره فيني .. اتمناه

ضيعني وياه

يمكن ماني قد الفرحه

يمكن ادمنت الاه

تايه 

تايه

....

ليش اخاف اذا .. فرحت

ليش الامان .. يستغربني

تعيش البسمه بعيون البشر

وتبقى وياهم مرتويه

واذا فكرت ارتوي 

احس روحي غلط مسويه


ليش اخاف اذا فرحت

 

وتايه

.......

 تهب على قلبك نسمات

تغير كل نبضه بعروقك

توصل لاعمق نقطه بالذات

وبحب يخاف ربك فوقك

اشرّع شبابيك الاماني

تهل طيور على مد النظر

ويتزيّن بيتي ومكاني

وحس الهم فيني كبر

شاللي صاير ياكياني

قلبي انجبر؟ والا انكسر؟

تايه 

تايه

......

تيارات الحياة شالتني ببحرها

مابين حناياها كنت اسافر

محد ملا العين ونظرها

ولااقتنعت بكلمة .. مشاعر

ليش اللحين

ليش هالحزّه؟

ليش بيني والسما معزّه


انا اللي اوايه نفسي .. ماأغبي

انا اللي اوايه ؟؟؟؟

تايه 

تايه

......

ليش اخذ نجمه ...

 واتوّها بغيومي؟

واتركها 

ببحور ظروفي تومي

ليش ماأوعّيها ..

 واحسّسها بنورها

ليش ماأبيّن لها ..

 شنو دورها؟

في مجرات الكون


احد سمع عن كون مظلوم؟

ودنيا نست نجوم ؟

ونجمه توسّدت غيوم

انا اللي اوايه ...

تايه 

تايه

أهل

بالهدى ياحبيب الروح  تمهّل

 انتشي بسحر صوتك لين هل

احساسك تغافلني ابد ماوهّل



طيّرت قلبي  وحرمته آهاته

قلت : عطني همك و هاته

يازينك ويازين قلبك و رهاته

وياكبر فرحتي لي سألت :أهل؟

مطمني

احتاج ابقى عليك ولهان

مابي هالشعور يروح مني

لما اوله احس اني بأمان

اشتياقي لك بقلبي مطمّني

يالله

لاملامح 

لاطعم 

لااتجاه

بس الم

واه

...


تعبير صامت يخنق 

قلب مايقدر يخفق

عين دموعها تبرق

وحرمان 

يالله 

يالله 

يالله 

.....

اطياف احضان بعيده

بدايات ولادة قصيده

شاعر ارتجف وريده

وقيود قديمه متماسكه

استوطنت احشاه

يالله 

يالله

بوبراك

اهداء الى روح والدي 


ماتاخذني وياك ؟

باشوف عالمك

حدود سماك

الكلام عندك شلون ينقال ؟

الاحاسيس شلون تنحس ؟

كم حاله ضياع 

وكم لحظة ارتباك

ماتاخذني وياك ؟

ابي اكون صوب قلبك 

اغفي عليه

ابي انادي

واسمع لبّيه

من ١٤ سنه ماقلت يبا

ماودّك ارتاح ؟

ابي ترحمني من هواك 

ماتاخذني وياك

ماتاخذ اللي روحه بيت مهجور

 انت ضياه وحوشه والفنر والنور

ماتاخذ اللي عيونه نست الشوف

عاشت بارتباك ووحشه وخوف

يتروالي 

مابقى شي واكون وياك ... هناك

البس احلامي

ألبس احلامي وأهيم بين النجمات واتنشق غيوم 

حالمه

انرسمت اللحظات العذبه كون وطريج ومسار 

لعناوينك

احس كل قطعة بيوفي  مبتسمه فرحانه بس

 موفاهمه

شاللي يصير فيني كل من يشوفني يقول

 شزينك

خايف على قلبي شلون يتحمل مشاعر فيه

 متزاحمه

ايدي تكتب ازهار روحي تشهق ياقلبي الله 

يعينك

شهالحياة؟  شهالدنيا  كل يوم نور عيونك

 أوالمه

شنو انت شهالعمر اللي يقرب اللهفه  بيني 

وبينك

حتى مساماتي مرتوية ومع ندى غيومك

 متفاهمه

حبيت كلماتك بحتك حروفك حبيت سينك

 وشينك

من عرفتك مااشوف الا غيوم  غرقانه احساس

 حالمه

كل ماابي اهدى وارتاح ماادل الا مسار

 عناوينك

مايك

خلني رايك

وهواجيسك

وأفكارك

وشهقات المطر

وتيارات النهر

وقطرات الندى بمايك

خلني صوت الحزن 

في نايك

خلني  الفرح

لما يبتسم وهو يايّك

خلني رايك

صور افكاري

ابي ارسم صور لأفكاري

وانسج من وحي الخيال دروب

منو غير الأحلام يطفي ناري

ويخلي كبرياء الجرح يذوب

ودي اترجم غناوي الطيور

وأوصف صوت الجنحان

ودي اتعلّم ترانيم الزهور

وأصير غيمة ألحان

وأصير بذرة حنان

وأصير حُب منثور

يانسمة هوى مرّت على الغالي

ودّيني صوبه

يارويحة الجنه ناديه بدالي

ضيعتني دروبه

ماأبي أجف

صدري ارتجف

ياقلبي تحملني

فيني شي موعادي

ياقلبي وهّلني

انا عيونه مرادي

على يوفي 

صاحت الحنايا وافّادي

ياقلبي تكفى تحملني

لانك النور

يحق لي احتفل

لانك النور

واوفى الحروف 

واعمق المعاني 

بين السطور 

انتي الشمس 

اللي تحن علينا 

وحنانها حوالينا

يدور 

يحق لي احتفل


لان مثلك ماانوجد

انتي حبيبه مانتي بلد

انتي ام وظهر وسند

وحضن وسور

الفخر عرفناه منج


فخر لين سموني باسمج


انتي بنيتي بالفخر بيوت ودور

شوق وحسره

ذوقتني طعم الهيام ..... ورحت

علمتني ابد ماأنام ... وغبت

وانا لولاك ماعرفت ..

 الشوق والحسره

والقلب بلياك .. 

منهو يسرّه ؟؟

تراني من بعدك .. مِت

والروح ودها مني تتبرا

.......

تهت وتاه القلب بدقاته

قلب صرت انت حياته

غيابك هلاك .. وغربال

محد يلقّي لي بال

والقلب مل من صبره

والروح ودها منّي تتبرّا

......

وين مكانك انت وين

عاونّي شلون أدلّك

حملتني الهم دين

ليش جذيه يسلمك

مو حرام عليك  

بجفوني حزن الكون بأسره

والروح ودها منّي تتبرّا

زهيرية

انت بحياتي شمس  تشرق

هواك يغرّب بقليبي  ويشرق

من كثر حبك لو طروك اشرِق

انت الحلو  لو حظي ردي

رغم لهيب فراقك ذكراك  بردي

قلبي  لو رحت عنه صوبك طرِدِي

انت الجانب  اللي بحياتي مشرق

صوره

أدوّر صورة

فيها ملامح .. عمري

وشقا صبري

ترسم معالم الخيال 

وترتّب أموره

أدوّر صورة

...

بزواياها اصدق ذكرياتي

فيها كل حياتي

فيها العواطف والحنين

وضحكة ودموع عين

وسواد عمري ونوره

أدوّر صورة


...

أدوّر قمره فزت من صدري

وتاهت بينات النجوم

وغيمه انكرت الغيوم

وصار المر بقطراتها

ضرورة

أدوّر صورة

...

أدوّر صورة

تبني بوجداني مدينة

تداري قليبي وتعينه

تهديني عناوين جديدة

تاخذ الحب من إيده

وتهديه الامان

وتكسر كيان الجفا

وتهدم سوره

ادوّر صوره

محاتاتي

علمني الوقت احاتي

واتوسد حضن آهاتي

علمني أوله ... 

وأعيش بريحاتي 

و أحاتي

........

راح العمر بين محاتاة .. وانتظار

ولهفة وقلب شاب .. نار

عودت حروفي بدالي تحكي

و تنوح وتنخ وتبكي

انا دواي اوراقي

وفيض كلماتي

ومحاتاتي

....

عيش حياتك

عيش حياتك

تقدر لاخر نفس

تحقق حلمك

وترسم امنياتك

عيش حياتك

...

شيصير ؟؟ 

لو اخذت من الجنون لون

شيصير؟؟

لو عالمستحيل تمون

شيصير؟؟

لو عيونك وقلبك يحبّون

وزرعت البسمه بذاتك

عيش حياتك

....

اكسر قيودك

وبكيان الفرح

اثبت وجودك

حطم معنى التشاؤم

وتغافل اليأس

واترك التفاؤل

يحدد جهاتك

عيش حياتك

...

ان كان همك كُبَر

خل احلامك اكبر

لو كسرك ماإنجبر

ابد لاتتأثّر

احنا جم يوم بنعيش

عشان نحتر

شوف باكر 

لاتلتفت للي فاتك

عيش حياتك

...