Tuesday, January 26, 2010

نَسمَــــــــه معطَّـــــــــرَه




أحمد ربّي على ماضي أذكـــــــــرَه

بالدقايق بالثواني وباللّحظـــــــــــات

ذكراك تُمر عَلي نَسمه مِعَــــــــطَّـــــرَه

أحَن نسمَه مرَّت  بهالحيــــــــــــــاة

 شي أكبر من إنّي أتْصــــــــوَّرَه

أو أتخيّله ..أو توفّيه الكلمـــــــــات

لاتظن حبّك ذبح القلب وعَــــــــــوّرَه

ماشفت غير حنانك .. مامِن جســــــاة

للحين عيونك علي ...مسيطِـــــــــــرَه

آسرتني . مغرقتني ببحر الأمنـيات

ماغير أحمِد ربّي ووايـــــــــد أشــكُرَه

إنّه كان لي .. ويّاك...ذكريــــــــات

٢٥-١-٢٠١٠
الثلاثاء

Saturday, January 23, 2010

سوالف أمس



على حِس

سوالف أمس

سهرت  لوحدي

ذكرت كل كلمه إنقالت

وكل دمعه بخديداتك سالت

على روحي الضميانه

كان حسك 

يروي النَّفْس

على حس سوالف أمس

........

كلامك .. اللي إنقال

وحسّك ... اللي شال

قلب ملّته همومه

وطار بكلمه منك

وطابت جروحه


ردّت له روحه

بكلمه منك

بدى يتنفَّسْ

على حس سوالف أمس

....

للذكرى معاني تنسجني

تشِد بالخيال أوتار تعزفني

وأتغنّى بماضي حاضر بعيني

اشوفه وتحسه إيديني

انا عايش على حسك

وبس

وعلى حس سوالف

أمس

٢٣-١١-٢٠٠٩
الاثنين

Saturday, January 16, 2010

نحبّك



تدري ليش نحبّك

لانك حطيتنا بقلبك

تدري ليش ماننساك

لانه كل يوم بطرياك

ولإن وقفاتك

ولإن كلماتك

تحسسنا إننا جمبك

تدري ليش نحبّك

.......

لانّك نور للحين يضوي

لإنك غايب وحبّك يروي

للحين تسقينا من عطفِك

للحين ممدوده لنا كفّك



عرفت ليش نحبّك


Thursday, January 14, 2010

مفهوم التناغم



ودي ألقى للمحبه والتسامح أحزاب

تحتوي مفهوم التناغم في الحياة

ألقى حزب همّه بس الشبـــــــــاب

وحزب قانونه العطف والمداراة

حزب مايعرف إلا الفرح واليبّاب

يملك للسعاده أساليب وأدوات

ودي ألقى للمحبه للتسامح أحزاب

تحتوي مفهوم التناغم بالحياة

١٨-١١-٢٠٠٩
الاربعاء

Monday, January 11, 2010

أمرض


إن مرضتي

هَـــــــم آنا أمرض

مايبقي فيني

عِـــرجْ ينبض


١١-١-٢٠١٠
الأثنين

Sunday, January 10, 2010

طاري حسنك



أبتهج لو أسمع طاري مَر عنّك

بالخفا أبتسم وتزين ظنوني

أدري من سنين ماشفتك لكنّك

الصوره الوحيده البريئه بكوني

موشايفك و حافظ تفاصيل حسنك

مو شايفك بس عيونك بعيوني

اللي تسويه عيونك ترى منّك

من علمهم يبتسمون و يحضنوني

أبتهج لما أسمع طاري مر عنك

وبالخفا أبتسم وتزين ظنوني

Friday, January 1, 2010

خلونا نضحك






خلّونا نضحك

نشوف سنه يديده

الكل يرتب مواعيده

مع نسمات سنه نحسها

الامل بفرحه يلامسها

نخلي

ابتسامتنا عريضه

خلونا نفرح

ترى الفرح أبرك

خلونا نضحك
.......

ننفخ على شموع الكآبه

إنتحابب انتهادى انتصابا

إنتصافى إنتلامم

إنتحرّك

خلونا نضحك
......

نعيش بأمل راسم إبتسامه

يهذّب كل واحد كلامه

يفكر بحلمه براحته

يحس شنهي حاجته

من سنه مبتسمه

ترسم لنا رسمه

آتمنى الكل فهمني

وتعلم

وأدرك

يالله نضحك

١-١-٢٠١٠
الجمعه