كلاكيت للمره الثانيه

اللحين أنا شايب !!؟؟

وإلا توني شباب

لاتعيبون

ترى العياب عند الباب

توني صغير

وإلا مشدّق ؟؟

أبي الكل 

ينطق

ياجماعة الخير

كافي عذاب

أنا شايب

وإلا توني شباب

.......

براسي جم شعره بيضا

بس عندي إبتسامه عريضه

وأعرف إن الحياة صوره

إنت ترسمها

بأحلامك

بكلامك

بكبريائك

وتبقى إنسان صادق

في زمن كذّاب

اللحين أنا شايب!!؟؟

وإلا شباب

......

باقي ١٠ سنين ويقولولي: يدّي

 ويتجمّعون الأحفاد عندي

براكوه وهياوين

وقماشه ونسرين

وذياب

اللحين انا شايب!!؟؟

وإلا شباب

.....

تطير الدنيا فيني وأنا واعي

أدري فيه أمور مالها داعي

وأمور ابيها بس بعيده

 ربّي يرحم عبيده

الحمد لله خاطري

من كل شي طاب

لللحين انا شايب!!؟؟

وإلا لسّه شباب؟؟

١٧-١٢-٢٠١٠

الجمعه

٣٦

طارت السنين

ومن اللحين

صرت ٣٦

ومن اللحين

بدت تنكِتب عناوين

تختصر رحلتي

مع هالدنيا

وأعاتب نفسي على ماراح

وأطمّن قلبي بوعود

وأطوي كل أيّامي

وأبتسم

يمكن ألقى أحلامي

جود

وهذا إحنا عايشين

وطارت السنين

......

أكبر .. ويكبَر الحلم فيني

وضميري راضي .. ومراضيني

نفس كل سنه. أتبَسّم

ومن يديد أتنسّم

هوى الأماني الخنينه

أدري الأفراح مالها بينَه

بس أنا وقلبي

على الخير

ناوين

طارت سنين

وصرت ٣٦

١٧-١٢-٢٠١٠

الجمعه

ياوليدي يسلمك

حوار بيني وبين احد ابنائي أثناء مشاهدتي لاحداث التهجم على محمد الجويهل

ياوليدي لايهمّك

لو سمعت كلام يجرح

ياوليدي لايهمّك

تعلّم إنك تفرح

وترسم أحلامك بإيدينك

ياوليدي يسلمك

.......

لو شفت ناس تحبطك

خل تبتسم امانيك

لاتخلي ناس تافهه

من الاحلام تحرمك

ياوليدي يسلمك

.........

الزمن كفيل باللي يلعبون

لاني ابوك وعليك أمون

أبيك تعشق ديرتك

تعلم تحبها كل يوم

وقدّر أجدادك .. وسواياهم

وتابع مسيرة خطاهم

وخل حب الكويت بدمّك

ياوليدي يسلمك

........

الديره ياوليدي فيها رياييل

الديره مثل الشيره الواقفه

 يستظل فيها الضعيف

والجاهل والفاهم والكفيف

ضم الكويت بحب

مثل ماتضمّك

ياوليدي يسلمك

........

فيه ناس يبونها تنرز

بالغصب او بالدّز

لايهمونك ولا تسمع كلامهم

مثل ما الفوضى غاية احلامهم

خل السنع حلمك

ياوليدي لايهمك

٨-١٢-٢٠١٠

الاربعاء

غير نُمونه

تَبرق عيونه

وتمطر السما

لين شفته

تصير الدنيا مزيونه

وتتلوَّن اللحظات

بطيوف أشواقي

غير حسنه ...ماأشوف

وغير نوره ... ماألاقي

كل شي يصير

غير نمونه

وتبرق عيونه

....

هالعين....نورها كاسيني

هالعين ...بنظره تضويني

هالعين لو برقت

أحس  العذوبه رُبَت

بين جفونه

وتبرق عيونه

....

تضوي النيوم .. لو غَــمّض

أحس السما....تتــلَمَّض

غدير سحره العذب

جماله مو صج .. جذب

تتعبون لو توصفونه

وتبرق عيونه

٢٦-١١-٢٠١٠

الجمعه

صوت إحتبس

الصوت لو أصرخ ... إحتبَس

والجرح بالصّواب .. إنغرس

وقلبي من الوله.......... يِبَس

وتاهت خطوتي بدربي

وصار الحزن من صُلبي

والحال إنتكَس

.......

ماتنسِمع الآه ... لو أقولها

والروح زادت حمولها

وتمّيت أرسم الأحزان

وألوّن دنياي بألوان

ماتعرف إلا السواد

وبس

الصوت لو أصرخ ... إحتبَس

والجرح بالصّواب .. إنغرس

وقلبي من الوله.......... يِبَس

........

ألتجي للأوراق .. وأشكي لها

وأصدّق إني طمّنت روحي

وبحت بكل آلام جروحي

ومابقى فيني.... نِفس

الصوت لو أصرخ ... إحتبَس

والجرح بالصّواب .. إنغرس

وقلبي من الوله.......... يِبَس

....

يقولون دوى المهموم .. الصبر

واسمع هالكلام وأعتِبر

والعبره عرفتها .. تالي

الصح ... تنهدم آمالي

ومحد فيني حَس

الصوت لو أصرخ ... إحتبَس

والجرح بالصّواب .. إنغرس

وقلبي من الوله.......... يِبَس

....

٢١-٧-٢٠١٠

الاربعاء

حياة

بكلمتين منك  أنسحر .. عمر

وبحس صوتك... تزين الحياة

قيود الصمت بعيونك تنكِسر 

وتزيد الدنيا أمان ... وحلاة

حسّك يختصر كلمة سِحر

حسّك ينثر بالدنيا ... أمنيات

هذا بس صوتك ...شقول ياقمر

عن عين ورمش ونقاوة ذات

من عرفتك ماعرفت ... أخَسر

شلون وفيك اعذب الصفات

منوّر قلبي .. ومنوّرلي ..العُمُر

انت اجمل شي... بالحياة 

٢٣-٣-٢٠٠٦

الخميس

كل حقيقة ... خيال

كل حقيقة عند الناس

عندي أنا خيال

يحسّون .. الديره كئيبه

يشوفون .. أمور مريبه

وأنا كل شي آشوفه

طاغي الجمال

كل حقيقة عند الناس

عندي أنا خيال

.....

حقايق التفرقة يشوفونها باينه

وأشوف الواقع وأعاينه

ألقاه أبيض من البياض

اللهم ... لااعتراض

إحنا بنعمة

ياعيال الحلال

كل حقيقة عند الناس

عندي أنا خيال

....

ألقى أمل بكل فريج

للحين الحب لنا صديج

نلقاه بعيون الشيّاب

نحسه بقلوب الشباب

وبإبتسامات الأطفال

كل حقيقة عند الناس

عندي أنا خيال

......

كل الحقايق ... يوضّحها أمل

أمل يوميه بعيوني .. إستهَل

ووراني الكويت جميله

نسمات هواها عليله

ترى الأمل موجود

ومازال

كل حقيقة عند الناس

عندي أنا خيال

....

باجر صدقوني ... أحلى وأروع

هالديره مسرع ماتنسى الألم مَسْرَع

لانها طيبة وناسها طيبين

ربي يحفظها اللهم آمين

ترى الخير .. بقبال

كل حقيقة عند الناس

عندي أنا خيال

تامر عليها

شاسمّيها

أحاسيسنا

 وأشواقنا

وخفقات أفّادنا

وروحي اللي ترويها

شاسميها

.....

تفيض من روحك ... غناوي

تَسْحر ... تبهر ... تداوي

بسكوتك وبنبرة كلامك

بالحنايا تنعزف أنغامك

تصير غنايه بالروح

أشهَقها ... وأغنّيها

شاسمّيها

....

وحبّي لك .. شاسمّيه ؟؟

شلون أوصف معانيه ؟؟

وأصْدِق بكل إحساس ويّاك

الله يا غلاك

ترخصلك عيوني

لو تامر عليها

وشاسمّيها

٦-٥-٢٠١٠

الخميس

قوطي منخفس

من خبر بجريدة تنقلب الدنيا وتنعفس

ومن سالفه بدوانيه  يصير استجواب

اذا هذوله ربعنا طبيعي الحال منتكس

وطبيعي احنا للتخلف مشرعين الباب

اللي يقط بدليه احتمال كبير ينجِبِس

واللي يغني إغنية يسووّنه كباب

الروح من الكدر والضيم قامت تنتِرِس

نسينا الفرحه والبهجه وحتى اليبّاب

مفهوم الانهزاميه يوميّه فينا ينغرِس

شيّبونا غصب وإحنا للحينّا شباب

فيه ناس عقولهم جنها قوطي منخفِس

يسرحون يمرحون من غير أي حساب

احس نور الأمل خافت خايف مندِعِس

بقلب جم واحد يحب بذمّه هالتراب

تراب غالي يبيله ناس شوي تِحِس

تكشف المخادع وتبخص اللئيم والكذّاب

٢٧-٩-٢٠١٠

الثلاثاء

تنعفس : تنقلب رأسا على عقب

منتكس : منقلب

ينجبس : أي ينكبس أي يضرب

تنترس : تمتلئ

اليبّاب : الزغروطه قوللولولولوووش

قوطي : علبه والجمع قواطي 

منخفس : يعني قوطي سفن اب ودايسه عليه سياره

مندعس : مختبئ

تبخص : تعرف ... تفهم 

ليمن ذكرت فرقاك

ترتعش الروح

والحنايا تخاف

ليمن ذكرت فرقاك

تكتمل بملامح حزني

كل الأوصاف

وأتحرّاك

وكل ماأنتظر جيتك

وكل ماأتفزز لشوفتك

ماألقاك

وترتعش الروح

والحنايا تخاف

ليمن ذكرت فرقاك

........

الصبر وينك ياصبر وينك

ضعت أنا من بعد عينك

ولاقادر أتحمل ضياعي

ولاقادر آداري أوجاعي

ولاقادر أنساك

ترتعش الروح

والحنايا تخاف

ليمن ذكرت فرقاك

......

وتنكسر روحي برياح غيابك

وبجروحي حاسب حسابك

وداري انك سبب مافيني

وداري انك ساكن بعيني

وماخذ القلب معاك

وترتعش الروح

والحنايا تخاف

ليمن ذكرت فرقاك

براك

شيم

ودي أتكلم عن الواقع الأليم

بس باسكت لان هالشهر كريم

أشوف طبخات سياسيّه

ولويه وأذيّه

اخاف اقول

وادش بسين وجيم

.......

صندوق تنميه مافرحت فيه

ماادري ليش وايد أحاتيه

اسمع تصريحات

وفرد عضلات

بين هامور وزبيديّه

وشيم

....

ماودي بهالشهر أتكلّم

بحاول إني أتعلّم

وافرض قانون السكوت

وأطيحله محلبيه وبسكوت

وأستمر بالريجيم

.......

فيني حجي وايد .. وايد

بس رمضان يهوّن الجايد

ويخلّي الأرواح تتصافى

مالي شغل الا بالكنافه

الله يهدي الجذاب

ويعقّل اللئيم

20-8-2010

الجمعة

الشيم :من الاسماك المحببه عند اهل الكويت ، وتعد من اسماك الدرجة الاولى ، وقالوا في الامثال : الشيم أكل الحشيم او ماياكلها الا الحشيم

التحدّي

من يقبل التحدي

ويراهنّي

على قصص المسلسلات 

اللي مواضيعها

من سنة يدّي

من يقبل التحدّي

....

اراهن .. بنشوف بجي ونواح

اراهن ... على الصراخ والصياح

والخيانات الزوجيه والتفاهات

وثقل الدم بكل القطّات

وغير هالحجي ماعندي

من يقبل التحدّي

........

من يتحدّاني على تعابير الممثلين

عاقدين النونه وكلّه معصبين

ترى بيخسر اللي بيراهنّي

ياناس اخذوها منّي

صار الفن

سمك .. لبن .. تمر هندي

من يقبل التحدّي

أحاسيس حيّه

للحين الأحاسيس حيّه؟؟

للحين فيها خير الدنيا ؟؟

كثيرة أسإلتي

مالقيت حل لمشكلتي

غير اقدم حروفي هديّه

وأترجم اللي بصدري

من هواجيس

وأحلام

وأماني

كل اللي إبيه

أكون موجود

بسطر

بنبض حرف

بصدر صفحة

آنا إنسان عباره عن

كلمه ...... وأمنيّه

للحين الأحاسيس حيّه

......

وايد أسأل نفسي

ليمتى أكتب ؟؟

وأقرر خلاص كافي

بسّي

شالفايده من كلامي

وايد أسأل نفسي

علامي؟؟؟

كل ماأنوي اكتفي

أسمع صوت وفي

يحرّك المشاعر

: يقول

مثل مالجوع كافر

هم الصمت كافر

وايد أسأل نفسي

على أي أساس

سمّوني شاعر

وأنا غايتي

اقول اللي فيني

وأترجم صور بعيني

تسكن فيها يوميّه

للحين الأحاسيس حيّه

......

من فيض احاسيسي المتناثره

حتى الورق كسرت خاطره

يشوفني مرات

بدور البطل

بدور الطفل

بدور الولهان

بدور المواطن الإنسان

من فيض أحاسيسي المتناثره

حتى الورق كسرت خاطره

: قالّي

كمّل ... وقول

يمكن بحروفك تنول

دنيا جديده

رسمتها بخيالك

خذ الحروف حلالك

لاتفكر بإعجاب

او قبول

أو عطيّه

للحين الأحاسيس حيّه

....

شاللي قاعد اقوله

تعديت منطق الجنون وأصوله

غمضت عيني

وظل الحبر ينزف

وخلاني احلف

اني ابقى

صورة مالها برواز

نظرة يتيم معتاز

غمّضت عيني

وحلمت بوفا

مالقيت غير حروفي

الوفيّه

للحين الأحاسيس حيّه

٨-٨-٢٠١٠

الأحد