Thursday, May 21, 2015

تباهى

تباهى


واجعل الكذب 

أسمى انواع الوجاهه

استرعِ للزيف انتباهه 

اغرس على ارضك

بذور الخداع

وانتظر غرسك يكبر

وابني  اطماع

واجني من مازرعته

غش

وتفاهه

وتباهى 

...

تباهى على مسرح الحياة

اكتب حوارات وردد افيهات

اختار الأدوار والممثلين

واسدل الستار بكيفك

النص بين إيدك 

اجعله دراما 

اجعله فكاهه

وتباهى

Tuesday, May 19, 2015

حس كلمه يصبرني


 كلمه منك .. تصبرني


شوفة مكان التقينا فيه..تطمني


ذكريات  وياك مرّت .. تصبرني 

ارضى بالقليل 

لانك على القليل ... معودني


.....

تعلمت... مااطمع وياك

ولااتمادى بأحلامي 

تأكدت..  ماالقاك 

ولاباشوفك جدامي 

لكنه حبّك

حَطم كل ياس ..

 تمكّن مني 

وحس كلمه .. يصبرني 

......

تعودت اعيش بشوية امل 

ومن الشويّه ابني اماني 

تعودت امنّي دمعٍ انهمل 

واوضح له قسوة زماني

لاانا اللي اقتنعت!!

ولا هو اللي فهمني

بس انت تصبرني




Tuesday, May 5, 2015

إسكت




بهالوقت ..... إسكت


شوف ........ وإقمِت

ماتفيد إنفعالاتك

خلك على سكاتك

ماراح توّحد عالم

أهو بالأصل متشتّت

إسكت 

.......

الكلام انتهى دوره

غيّر اشكال اعتراضك

لاتفتح باب انفعالاتك 

صون عهد الصمت 

اكسر مجاديف الغضب 

ماارتاح غير... النسّاي 

ومااشتقى الا...المتعنّت

 

 اسكت 





Sunday, May 3, 2015

مافي

تبي حب ؟؟

مافي

ودّك بحضن ؟؟

مافي

تتعشم بكلمة حلوه..

 رد يطمنك

 قلب يأمنِك

او شرح وافي ؟؟

مافي

......


تبي عيون .. تقدّر مشاعرك

مافي

تبي اللي ياخذ.. بخاطرك

مافي

يموت صبرك 

وينتهي عُمرك

ومالقيت لك ..

 صدر دافي

ومافي

...

تحتاج عقل تثيره .. ويثيرك


تحتاج راي يحفِّز .. تفكيرك


حفلة جفاف .. تِذبِحِك


تشوف التافه ينصحِك


ودك تقول: لا


تخاف ...يفضحك


ويظل سراج الرّقي

  
طافي


ومافي

....

توافه الأمور أشغلت .. الدّيره


لغة الشارع تكتب لنا ... سيره


والتاريخ يسجّل


لحظة ضياع :

مثقف

لحظة ضياع:

عاشق

لحظة ضياع

مؤدَّب

ونبقى نردد بالخفا

يانبع الوفى الصافي

ومافي

....

نَحَلْ جسم الوطن .. ونخاف يتكسَّر

وظل الرضيع قبل الكبير يتحسّر

ونقول باچر أحلى

وللاسف

يبقى الصح ضعيف

والغلط متعافي

ومافي

مافي