Tuesday, March 18, 2008

رفرف





بتفلسف

 بحبك بتفلسف

وعذب الكلام جدّامك

بيتخطرف

والحرف على إحساسي

يتعطّف

يرتجيه يتوسل له

بيترتّب على هوى حبّي

بيتزيّن على هوى شعوري

ابوصفك وماأوعدك بانصفك

بس الأكيد حرفي 

بيتكلّف 

بتفلسف بحبّك

 بتفلسف

.....

بارسم ماشافته عيني

يمكن أقدر 

وأبيّن شلون اللحظه معاك

تكون اسعد لحظات سنيني

وشلون

ماألقى حرف

يشرح مافيني

وشلون

ماألقى عون

على وصفك يجدّيني

أتم أرسم

وأقول أقدر

وماأقدر

أدوّر ألوان

وبعيونك تلاويني

أدوّر جنحان

وماألقى إلا جناحين

واحد فيهم خذاني

ورفرف

بتفلسف بحبّك بتفلسف

13/3/2008
الخميس

62 comments:

بـابـل said...

صباح الورد

ابوصفك وماأوعدك بانصفك

الله عليك وصف روعة وفيه فلسفة حب

براك شهادتي فيك مجروحة

إنت شمعة ببحر ظلام


وبس


بابل

`~MnO YeNSa! ~` said...

صبـــــــــــاح الخير

وايد حلو هال
part

ابوصفك وماأوعدك بانصفك

كلمات بسيطة من عيار ثقيــــل

اعجاز حروفك كامن في البساطة

charisma said...

تعبت وانا اركز ابى اضلل الاقرب لى من بين كلماتك
ما قدرت
كلها حسيتها
كل سطر فيها حلو
كلها احساس

تفلسف وتفلسف
وهم تفلسف يا براك

يحقلك ويا بختها
وصباحك خير يا ويه الخير

طيرتنى بالسما بهالصباحيه

Mohammad Al-Yousifi said...

الحكومة استقالت

و المجلس بينحل

و انت طايحله رومانطيقية؟

فتى الجبل said...

والله يا حظها فيك هذي اللي كل يوم يوم تكتب لها هالاشعار

Barrak said...

بـابـل

اهلا بصاحب التعليق الاول
اذا بتوصف شي معانيه كبيره اكيد ماتنصفه

اشكرك على لقبي الجديد
شمعه ببحر ظلام

انت راقي
وبس

Barrak said...

منو ينسى

صباح الورد
فعلا عيار الكلمات ثقيل
اشكرك سيدتي كلامك اعتز به

شكرا

Barrak said...

charisma

اهم شي عندي انك حسيتيها
وياعساك تطيرين بسما الافراح

اشكرك

Barrak said...

kila ma6goog

ومن قالك اني رئيس وزراء
او نائب اول او ثاني
تدري شنو مشكلتنا
اننا بوقت الازمات السياسيه نكون كلنا سياسيين
وبوقت نزول البورصه نكون كلنا محللين
وبوقت النكسات الكرويه نصير كلنا رياضيين
مو يمكن اقصد بكلامي اننا محتاجين لفلسفه بحب الكويت؟؟؟؟

Barrak said...

فتى الجبل

يمكن اللي اكتب لها ماتكون معشوقتي

ممكن تكون امي ممكن تكون اختي
ممكن تكون بنتي
او اي انسانه طاهره
ممكن تكون الكويت
ممكن تكون فرنسا

Anonymous said...

علمني براك ابي اتفلسف

علمني خلني أطير وأرفرف

وخوض بحر الشوق وأجدف

أحبها ومستعد أحلف

ومافي مثلها بالزين لو أدور وألف

وماكفاني حبي لها احسة بسرعة يجف

ودي أعطيها أكثر حب وأثنين وألف

علمني يا براك أبي أتفلسف

Barrak said...

حسافتج يا كويت

تبيني اعلمك وانا بالحب متكلف
حب اللي يحبك ولكلامك صفصف
والا حياك عندي بالدوانيه شرّف
واسمع غناية خدعوها للمطرف
احنا انتعلم منك يامؤلّف
خل حب الكويت بقلبك يرفرف

Anonymous said...

براك

ماني بشاعر واللة ولا مؤلف

انا عاشق ومن العشق أنتلف

ويوم إني سألتك تعلمني. لي الشرف

علمني أحب اللي مثلة الحب ما عرف

يوزن البنات كلهم بكف وهو يفوقهم بكف

يا حلو أسمي بلسانة .لا قالة قلبي يرف

Unknown said...

تفلسف لان المخ ما يشتغل الا بالشطحات والحب حلاته بشطحاته

Barrak said...

حسافتج يا كويت

انت اللحين غيرت القافيه
وهم اقولك

انا نقطه ببحرك
والله يخليكم لبعض
وان جان تبيني اكتب قصيده على بو انه من تأليفك ترى الحرف بعشر دنانير
وفيه عروض خاصه

ولازلت اقول انك شاعر

Barrak said...

Mishari

بتفلسف
واللي ابيه منكم
تصفون صفين وتقولن لي
لايوقف لايوقف

Anonymous said...

أتعبتني براك وياك وأنا الف

من بيت لي بيت اشيل الحرف واصف

علمني من شوق المحبين لو حرف

اهدي بة الغالية احلى وصف

علمني شقول للي خلت القلب إنغرف

وأموت وحيا لا مسها سو أبطرف

أما حب الكويت فما مثلة شرف

لا تخاف علية هذا مايضيع ومثلك عرف






وتسلم يا ملك التفلسف .. استسمحك بروح الحين وبذلف


:)

Barrak said...

حسافتج يا كويت

ههههههههههههههههههههههههههههههه



الله يحفظك

Najmah said...

قعلا
احيانا احس اني
بس بتفلسف
اقول كل اللي بخاطري
واحلل كل شي
واربط الاشياء ببعضها
واقول اشياء مالها تفسير واضح
احب اتفلسلف على شخص احبه
يكون فاهمني
يسايرني
ويرد على فلسفتي بفلسفة
:)
والحب بروحه فلسفة

Manooya said...

يبيله بوست قوي عن انحلال المجلس =)

مروة الزارع said...

كلمات جميلة جدا

تحياتى ليك ولمدونتك وكل اهل الكويت

DiLLi O MiLLi said...

الله الله الله
تفلسف يا براك


ابوصفك وما أوعدك بانصفك


وشلون
ماألقى حرف
يشرح مافيني
وشلون
ماألقى عون
على وصفك يجدّيني
أتم أرسم
وأقول أقدر
وماأقدر

وهذا حال كل محب
يصف الحب فى صمت عندما تعجز الكلمات عن وصفه

نزار قباني يقول

لأن كــــلام القوامـــيــيس مـــات
لأن كــــلام المكاتــــيــب مــــات
لأن كــــلام الروايـــــات مــــات
أريد اكتشـــــاف طـــــريقة عشقٍ
أحــبـــــكِ فيــها .. بـــلا كلــــمات






تحـــــــياتي

:)

بعثرة مشاعر said...

رفرف

كلمات حلوة كالعادة

:)

هذيان said...

يلي تشتكي من حالنا اليوم لا تحاتي
بأرسلك الوضع الصحيح وفوقه تحياتي
وضع النقاش وصل عندنا لوضع وضيع
أما من المغضوب عليهم وإلا لازم تطيع
نقاشتا كله ترى تحت مسمى غاية
والغاية دائمآ يحكمها اللعب بالنهاية
نختلف وكلآ يقول أنا كلامي الصح
ونبحث عن عقل الكلمة ونلقاه بالمصح
والحجي لا يحمل عقل ولا منطق
كله تفلسف المهم أنه نطق
كلنا نحجي ونحجي وبس نقول؟
بالآخر ما نسمع إلا صدى الخبول
كلامنا تراه كله بأسم الحرية
حتى السب تكفلة اليوم لنا الديمقراطية
يلي تقول الوضع وشلون
أخاف أكمل وعيوني يبكون؟؟

مع تحياتي لك براك

MANAF said...

قول كل اللي بخاطرك ياخوي



كلنا نحب كلامك


ونتفاءل فيه


انا بعد وياك

بتفلسف


:))

فريج سعود said...

البرك ماكو زهيرية عن الوضع الحالي ؟؟
تكفى اطربنا طلعنا من الجو الكئيب

Barrak said...

Najmah

ايتها الفيلسوفه القديره
تطلبين ان تتقني الفلسفه وهي لعبتك المفضله

دام ان قلبك ابيض
الله يعطيك على قد نيّتك
تفلسفي
على الاقل فلسفة النجوم راقيه يانجمه

Barrak said...

Manooya

ماأعتقد
لاني باختصار ابي الناس تحب وبعدين تفهم شالسالفه
ابي الشخص يتفلسف بحبه لوطنه
فلسفة جميله تملؤها الاخلاص

انا عن نفسي ماحبيت ان اتطرق لاي موضوع سياسي حاليا
الين اشوف اهل الكويت منو بيختارون
لان بالنهايه احنا اللي نقدر ندخل قاعة عبدالله السالم ناس كفو ونقدر بعد ندخل قاعة عبدالله السالم ناس لفو

Barrak said...

مروة الزارع

اولا تشرفت بوجودك سيدتي

ثانيا تحياتي لاهل مصر
والله يعينكم على بلواكم

Barrak said...

DiLLi O MiLLi

والله مابعد كلمات نزار قباني كلمات

اشكرك
دائما تعليقك له رونق خاص

Barrak said...

بعثرة مشاعر

اعتقد انك تخيلتي وياي الصوره اللي حاولت ارسمها
تخيلي جناحين
بس واحد فيهم يرفرف والثاني يحضني

هذي الصوره اللي ابيها توصل
مثل صورة طير النورس اللي تعمدت اني احطها

Barrak said...

تقولين مااحاتي وبحاول ماأحاتي
وبقول بتنفرش بالورد دروب حياتي

وضع النقاش اشبه بدلال قاعد يبيع
همه يربح وماعنده صدر وسيع


نقاشنا حالته مثل حالة المايه
اليوم رايحه ومن باجر يايّه

مفهوم الصح هالايام ياوخيتي شح
والصوت تعب ومل وانبح

وين الناس اللي بحبها تنطق
العموم باكاذيبه متشردق

كل اللي بقوله انها شدّه وتزول
وللحين ممكن نلقى امل للأصول

الحريه هذي ياناس اكبر هديه
هالديره محتاجه مننا شويّة حنيّه

صدقيني ياهذيان بتهون بتهون
فرحي عيونك لا ياوخيتي لايبكون


تحياتي لك هذيان

Barrak said...

MANAF

اهلا فيك اخوي
وكلنا نحب وجودك
ونتفاءل فيه

وتفلسف اخذ راحتك ياشاعر

Barrak said...

فريج سعود

اهلا اخوي
ماعندي زهيريه عن الوضع الحالي ولا فيه شي يستدعي اقول ان الوضع كئيب

بس فيه مثل وانا اشوف هالاوضاع طرى ببالي وقالوه اجدادنا قبل
يقول المثل

ماتقوم موجه إلا وحاديها هوا

والحادي معناته الدافع بقوّه

والمعنى ان الموج لايحصل الا عن هواء دافع له ، لان الموج يظهر في البحر قبل وصول الهواء

من كتاب الامثال الدارجه في الكويت

للمرحوم عبدالله النوري

هذيان said...

barrak


ما أجمل كلماتك

فما أجمل من آذان منصته و واعية و مدركة لحديث المدينة يومها يكون المنصت عقل عشق مدينته وقلب هوى الكويت


شكرآ عزيزي شكرآ لأنصاتك لحديثي

7osen said...

رفرف القلب مع كلماتك يالبرك رفرف

رووعة

مادري شقول شقوول

غير إني أعشق كلماتك

:)

أجمل تحياتي

qesat_5ayal said...

مع تلك الموسيقى
حلقت بخفة مع كلماتك العذبة

كم اشتقت ذلك الشعور الراقي
الحب النقي
الجمال في أرواح من نحب


أعدتني إلى الوادي الأخضر
والشمس المشرقة
والغيم المتناثرة

هكذا الحب مع كلماتك يطير بنا


دمت بحب
مع من تحب

فراوله said...

مساالورد والجوري
مساالترفرف بسما
التفلسف الراقي
مبدعنا
دائما ماتكون تلك اللغة التي تعتلي
محيا تعابيرك
تحمل لذة بطعم خاص لا يستسيغه الا من عاش
مرحلة من مراحل تلك التعابير
:))
هالتعبير يستقر باقصي مدي بالضمير
" يجديني "
تعبير تمبتي من قلب
باختصار كلامك ينحس وبعدين ينشاف
:)
دمت بدفء وعذوبه
وبتفلسف
ابدا
:))

Peace said...

تفلسف

Mok said...

:) يعطيك العافية

Kuw_Son said...

تفلسف يا براك .. شورانا غير التفلسف في الحب :)

bo rashed said...
This comment has been removed by the author.
aaaaaa said...

والله لو تصير ارسطو ماكو فايده
ما يعجبهم


براك حلو بكالشي حتى لو يتفلسف

esTeKaNa said...

هذا مو تفلسف
هذا احساس يرفرف
هذي بساطة تدش القلب
تدري اشلون تدش؟
دعوووم دعوم
:)))
تدري براك؟
مرات يكون للبعض لسان متكلف
يبدع بالتعابير
ويرسم لك احلى الكلمات
بس ما يدش القلب ابدا
ومرات انسان باحساس يرفرف
وكلمات تعتقد انها تتفلسف
يدش القلب من اوسع ابوابه
!!
وانته بهالكلمات رفرفت
ما تفلسفت
ودشيت دعوم دعوم
:))

enter-q8 said...

أتم أرسم

وأقول أقدر

وماأقدر

أدوّر ألوان

وبعيونك تلاويني

أدوّر جنحان

وماألقى إلا جناحين

واحد فيهم خذاني

ورفرف

بتفلسف بحبّك بتفلسف


ياليت الناس كلها تفلسف نفسك

ياحلو كلامك البلسم البنادول
بين زحمة و زخمة الحروف و الجمل

تفلسف علينا تفلسف

mowa6en said...

الله يفتح عليك .

تذكرت وانا اقرا ابيات قالها يزيد بن معاوية ..

نَالَتْ عَلَى يَدِهَا مَا لَـمْ تَنَلْـهُ يَـدِي

نَقْشاً عَلَى مِعْصَمٍ أَوْهَتْ بِهِ جَلَـدِي


كَأنـهُ طَـرْقُ نَمْـلٍ فِـي أنَامِلِـهَا

أَوْ رَوْضَةٌ رَصَّعَتْهَا السُّحْـبُ بالبَـرَدِ


بارك فيك الرب

Barrak said...

هذيان

شكرا لوجودك سيدتي

Barrak said...

7osen

مو انت تبي رومانسيه
هذي رومانسيه

عشون عيل

Barrak said...

qesat_5ayal

نعم سيدتي
اريد ان يطير بكم هذا الحب

تحلقون مع الحب

حب الوطن
حب الاهل
حب الامل
حب الام


لايحلق الا قلبا راقيا
وعقلا ملما بما تحويه هذه الكلمات

اشكرك سيدتي

Barrak said...

فراوله

من شفت كلمة تعبير تمبتي ابتسمت

اشكرك سيدتي

وتجديني هي كلمه تنشاف

قبل لاتنحس
ويالله الجدوه
اشكرك

Barrak said...

Peace

ان شاء الله

ياقلبي ابتسم said...

ابداااع كعادتك براك

يعطيك العافيه :)

magnoonah said...

احلى فلسفه

فلسفة الحب

ان جان ما تتفلسف بالحب بشنو بتعور راسك وتفكيرك وتفلسف فيه


ويا زيـــــــنها من فلسفه
الله لا يحرمنا منها

Barrak said...

Mok

يعافيك

Barrak said...

Kuw_Son

اي والله شورانا

استانس لما اشوف تعليقك

اشكرك

Barrak said...

الاخ اللي علق وانمسح تعليقه



اشكرك استاذي
وكلامك عني فخر لي
وأعدك بان خلال الايام المقبله ستجد ماقلته في تعليقك الممسوح

Barrak said...

انور عبدالله

غبت علي وايد ياانور

الحلاة نتعلمها منك

Barrak said...

esTeKaNa

بس شفت دعوم ابتسمت
وحسيت كيف الكلام وصل

اعرف الدعوم
اللي يوصل لاخر نقطة بالاحساس

كلامج فعلا يخليني ارفرف

اشكرك

Barrak said...

Enter-Q8

ياحلو وجودك
اخوي العزيز
دائما كلامك يشجعني منذ اول بداية لي في ابريل 2006 الى الان

دائما اتشرف بوجودك

افضالك علي وايد ياخوي

هذا من طيب اصلك

Barrak said...

moowa6en

حرام عليك
من امس وانا افتر من سايت لي سايت اذكر ان هذا الكلام الرائع قد تغنوا به سابقا

ابي اسمع نالت على يدها شلون اللحين

اشكرك يااستاذ

Barrak said...

ياقلبي ابتسم

اشكرك
واتمنى ان يكون قلبك مبتسما

Barrak said...

magnoonah

ولا يحرمنا منك ومن وجودك
ومن جنونك