Monday, December 31, 2007

ياحجي الجزء الأول

وأنا أحاول ان اودع سنه راحله واستقبل سنة جديده احاول ان اتذكر اي انجاز المحه على ارضي الغاليه تخيلت هذا الحوار
طفل يتحدث مع شايب عمره يتجاوز التسعين عاما عند دكّان بوعصفور
ياحجِّي
من صجِّي
اختلفت عليك الديره
شلون كنتو قبل
صج قول وفعل
صج كنتو قبل
تحبون بعض
والوفى بحياتكم انفرض
ياحجي
من صجي
تغيّر عليك الوقت
قولي حجي إشِّفِت؟
شلون قايله الديره
ياحجي
من صجي
بأيامكم كان نفس الحاله
كانت الحياة شقى وعباله
كنتو بهنا عايشين
كانت النيّات ماتشين
كان الكل يتهم غيره
كان الواحد يأنبه ضميره
قولي حجي
كان عندكم بواقين؟
ياحجي
من صجي
31/12/2007
الأثنين

Thursday, December 27, 2007

بنت السما



ملهمه

من عندي غيرج ملهمه

ورده حالمه متبسّمه

احساس يرويني وأفهمه

ملهمه

.....

أنتي الحس اللي احسه

واعيشه وأتنفسه 

وأكلِّمه

ملهمه

....

انتي خيال حواليني

انتي ماي عيني

أنتي أحلى واقع

وأحلى حلم أحلمه

ملهمه

...

أرسمك بدفتري قمره

سحر ساحرني بسحره

تصدقيني لو قلت 

انتي النبض

صدقيني لو قلت

منتي من الارض

انتي من السما

ملهمه

ماعندي غيرك ملهمه

21/12/2007
الجمعه

Monday, December 24, 2007

وصوص




الساعه الخامسه فجرا وأريد أن انام والحبيب قاعد يقحّص لمدة 10 دقائق بالتمام والكمال مبتهجا بالمطر ولم انم الا بعد ان طيّب خاطره وخاطر سيارته بالاستمتاع بإزعاج الناس


قحّص

خل سيارتك توصوص

ليش أنام ماله داعي

إطرب أسماعي

وعلى الإزعاج خلك

محرّص

قحّص

...


شالمشكلة لو شايب أزعجته

شالمشكله لو النوم منه طيرته

عادية السالفه لاتبالي

دام ماعندك والي

إعفسنا وخبّص

قحّص

.....


أنغام توايرك تطربنا

وصوت قزوزك يسعدنا

إستانس ياحبيبي وإفرح

عولص ناقز وتدربح

و بشبّه شبّص

قحّص

.....


هذا من طيب التربية والأخلاق

نغّم واشجينا يامال الطقّاق

نبي على انغامك نسهر

وبحس توايرك نفكر

خلك لنومتنا متربّص

قحّص

...


لو فيه قانون جان ماوطوطت

جان مليون مرّه فكّرت

عادية السالفه هدد

خمّس لايهمّك ياولد

لين النور علينا يبصبص

قحّص

....


ماتقول فيه ناس بتنام

ماتقول اللي تسويه حرام

وأهلك وينهم عنّك

مال بالطفاية أرنّك

وعقالي على ظهرك

يرقص

قحّص


Monday, December 17, 2007

33



يقولون صار عمري اليوم33
ماادري حسبتي صح والا غلط ؟

17/12/1974 - 17/12/2007 يقولون الناتج 33 سنه
بهذه المناسبه اهدي لنفسي هذه الأبيات


فرحان

خلقت لك مكانه

بهالزمان

قولي ياأنا

فرحان

متخيّل شكثر صار عمرك

متصوّر صرت شكبرك

فوق الثلاثين

ثلاث مرّات زاد عمرك

ثلاث مرّات زاد عمرك

لقيت ماتبيه

شفت ماكنت متمنِّيَه

صار عمرك ثلاثين
إيه
إيه
إيه

نثرت كلامك؟؟

وإلا هالعمر مثل مامر ماهمِّك

!! هالسّنه علامك

ماوفتك الحروف؟؟

وإلاّللحين ماتشوف

طريج دنياك

قولي يابرّاك

شكثر فيك بعد ؟؟بتقوله

قولي يابراك

شكثر إنت بتبقى إنت

شكثر صرت شكثر كنت

جم واحد فقدت

جم مرّه تعلّمت

ليش عشت

تبني بطيبتك طيبه

ليش عشت ؟؟

مثل الطفل البرئ

تتناثر أحلامه تحت لحافه

ليش صرت

إنسان جرئ

مابقى له شي ماخافه

ليش صرت

ليش عشت

قولي يابراك

فرحان؟؟

قدرت تربّي عيالك

قدرت تعرف مابقالك

ترى السّنين ركضت جدامك

حس بنفسك علامك ؟

ليمتى حياتك قلم ودفتر؟

ليمتى بتتخيّل وتتصوّر

وليمتى الذكرى اللي فيك

ماتبي تخلّيك

واللي خلاك للحينك حابّه؟

وللحين تقول

له رب يحاسبه

إسأل عيونك

شافت ماتبيه ؟

هالقلب لقيت أمانيه؟

سنينك اللي راحت ؟

صح ؟؟

قدرت تنسى فراق أبوك

قدرت تعوّضهم حنانه

قدرت تخلق لهم مكانه

ليمتى بتقول ليمتى
17/12/2007

Thursday, December 13, 2007

ماأعبّر




بعد باصبر!!؟

بعد بانطر!!؟

بعد بيزيد انتظاري

بعدها شابه ناري

 بس انتهيت

 بس اكتفيت

والله ماأعبّر

بعد باصبر !!؟

....

باحلفك بربّك تحس فيني

تحس شلون ذابت عيني

ماأقدر ارد النسم بصدري

ماظنتي عايش بس أدري

غيبتك تخنق وتكسر

بعد باصبر!!؟

....

 لوفيني حيل جان صبرت

مو لو تطمّني جان قدرت

خوّفت الخوف بداخلي

ماأدري شبقالي وشراحلي

الله وأكبر عليك

الله وأكبر

بعد باصبر!!؟

4/8/2007
السبت

Sunday, December 9, 2007

ناديه



كنت بمحطة قطار وشاهدت مشهدا أمامي لشخص يوادع حبيبته بجفاء بدون

 اهتمام وهي تبكي ألما فكتبت



ناديه

اصرخي عليه

باقي له معك وقت

لابد يوفيه

ناديه

الكل سمع حس بالندى

الكل لصوتك اهتدى

ودرى بصرخات بوسط اليوف

ودرى بأمان ضيّعه خوف

احنا نسمعك

سمعيه

ناديه
...

من عيونك درينا بمعنى الوفى

من عيونه شفنا كيف الجفا

كانت لحظه حزينه

تاخذ قلب وتهينه

كان الجحود منه

وفيه

ناديه

...

لو بيدي جان رجّعته

لو أقدر كنت فهّمته

انه عيونك تعزف احساس

كان قلتله يابن الناس

لاتموت عشره بغرور

وتيه

ناديه

06/04/2007
الجمعه
امستردام

Thursday, December 6, 2007

مصوقره



اللي يصير صج ؟

وإلا غشمره

علموني 

ترى ماأحب

الدندره

اللي يصير صج ؟

وإلا غشمره
...



حالتنا زينه وكويّسه

وإلا كلها بربسه

وإلا السالفه مصوقره

اللي يصير صج ؟

وإلا غشمره

...

كل موضوع معرّض للنقاش

والحجي هالأيام ببلاش

ولجنه بقفى لجنه

وياكثر مالبحنا

الكل يسأل الشايب والمره

اللي يصير صج ؟

وإلا غشمره

....



جم واحد معترض يتأفّف

جم واحد  يتأسّف

جم وفي مجتفين إيدينه

جم مره قالت الناس ملّينا

والوضع دايم لي ورى

اللي يصير صج ؟

وإلا غشمره

4/11/2007
الاحد

Tuesday, December 4, 2007

HELP ME!

استيقظت من النوم عصرا أردت أن أبدأ يوما مميزا بعد اسبوعا حافلا بالظلم على المستوى المهني ، أردت أن أبدأ يومي بالاستمتاع بهذا الجو الرائع
حاولت فتح الباب فإذا به مغلقا (وافّادي) ماذا أفعل ولايوجد أحد بالمنزل ولاحتى جيراني أبو ناصر وأبوغانم وأبو أحمد وسيده امريكيه تسكن بالقرب منا وأسميتها جانيت (مادري ليش ) لم يكن هناك اية وسائل مساعده.
واكتشفت ان ابني خشيم الفار أوصد الباب وأغلقه بالمفتاح وذهب ليقضي أمسية جديده بعد اسبوعا حافلا باللعب
وجدت ورقة بجانبي وأخذت القلم وكتبت
لحقوني
حبسني خشيم الفار
إعتقوني
صك علي الدّار
عينوني
لحقوني
ناديت الخل والرفيج
سمعني كل الفريج
يالأياواد سمعوني
لحقوني
بين 4 جدران لوحدي
اصرخ ياويلي واقردي
صك علي الباب ولدي
خذوه وخلّوني
لحقوني
يابو غانم يابوأحمد
يرانكم ترى مقرّد
أمل الطلعه تبدّد
يسلّمكم فكّوني
لحقوني
ياشفيق ياكومار ياجانيت
حسّوا باللّي سطر بالبيت
حتى على 777 دقّيت
وإسفهوني
لحقوني
ياخشيم الفار شسوّيت بأبوك
قاعد بريحاته لا تلفون لابوك
خلّيت الباب بويهي مصكوك
وطايله أذوني
لحقوني
وينكم ياأهل البلوقات
ياللي كتبتولي تعليقات
لحقوا على برّاك زتات
ياأهل السعوديه والامارات
تكفون شلّوني
لحقوني
1/12/2007
السبت

Thursday, November 29, 2007

ورد




عطية عيونك ... ماتنرد

تسكن يوفي... دفى وبرد

عطية عيونك ..ماتنرد


خذت منك حنان ماحصل

عرفت ويّاك ألامس الأمل

عرفت ويّاك عذوبة الهزل

وبساطة الجد

عطيّة عيونك .. ماتنرد


ماوفّيك حقّك لو شسوّيت

ياللي عيونك ذرى وبيت

وعلى جفونك سكنت

لاهمتني دنيا ولاوقت

ماأشوف إلا سما زرقا

وورد

عطيّة عيونك ... ماتنرد

28/04/2007

السبت

Monday, November 26, 2007

أحمدك يارب



أتصنع الفرح وأضحك مع الناس وأداري

وأخليها مستوره واللي بالقلب بالقلب

شذنب غيري يحترق بلواهيب ناري

وشيهم  لو الدمع من العين صب

أنا جروحي غريبه مالها محاري

انجرح احترق وماادري شالذنب

أنا عارف مليان مآسي وداري

أنا انسان على ضيمه ربى وشب

عمري مالقيت اللي يداري ويباري

و اللي بحنانه يمسح عالقلب

أنا ا الحزن هو كل أخباري

أنا ماأقول غير أحمدك يارب

19/2/2007
الاثنين

Thursday, November 22, 2007

أرض





تسمحين لي بأرض

تكون عيونك فيها قمر

وتكوني وحدك من البشر

تكوني حولي وحوالي

تكوني انتي القلب

وأنا النبض

تسمحيلي بأرض

....

اختار تواصيفها

وشتاها وصيفها

أرسم أحلام وأماني

بكيفي أزيّن مكاني

وبكيفي مواعيد الهوى

تلتم وتنفض

تسمحيلي بأرض

....


هاديه أرضي وناسها

والأروع إحساسها

وطن سماه بالأشواق مرسومه

الحب  مزيّن ملامح غيومه

وتمشي بهدا الليالي


تسمحيلي بوطن

مانؤمن فيه بالحظ

تسمحيلي بأرض


6/11/2007


الثلاثاء

Monday, November 19, 2007

خيازرين



ابي شي بالدّور غير طابور البنزين

أبي أحس بسنع وترتيب ونظام

أبي هالديره مره بنظامها تزين

أبي أحس مشينا سنه جدّام

ماأبي كثرة التشرّه والونين

أبي أحس تحققت لنا أحلام

و الديره تنمحي من البوّاقين

أبي تكتب بحريّه كل الأقلام

ماأشوف على هالأرض مسكين

ماأشوف إلا حب ووئام

فيه ناس عندنا مال خيازرين

 ناس تاكل وتشرب حرام

 يعافيكم شوية عقل رزين

وعين من خوفها من الله ماتنام

ابي خريطه واضحة للمواطنين

أبي شوية ذوق ونتيفة إحترام

أبي احس بيهال الديره فرحانين

أبي افعال والله شبعنا كلام

أبي النيّه بهالبلد أبد ماتشين

نفرّق بين المظلوم والظلاّم

أبي إيد تبني وإيد تعين

أبي شوية رقي بالذوق العام

أبي أحوال اتحاد القدم تزين

والخريج يلقى بوظيفته انسجام

ماأقول ودّي ننافس الصّين

أبي الكل يعيش بخير وسلام

أبي أقبر الجذب والجذّابين

أبي نرتقي عام بعد عام

بس واقفين صح بمحطة بانزين

واحنا زانطين السّنع والنظام

1/9/2007
السبت

Thursday, November 15, 2007

قلم


سر أبوحه للمره الأولى بصراحه محتاج قلم -خلص الحبر- ولاأملك إلا قلما وحيدا أتعبني معه وخانني مرات عدّة ، أتوسّل إليه أترجاه أن أجده وأتعب في العثور عليه،لاأملك إلا قلما واحدا ملازمني منذ فترة وللأسف إنتهى أمره وساءت
حالته . سأريكم احتياجي للقلم بهذه اللحظه وهذه الأيام وسأريكم مايفعله القلم عندما تتلهّف الأطراف لكتابة إحساس

أبي قلم

يلم إحساسي لم

وينثر بورقه

عيون مغورقه

بدمعتين

على من عاش حياته

بشوق  ووهم

أبي قلم

....

ياإيديني عينيني

حسّي باللّي فيني

إخذي الكلام من صدري

وإكتبي كلمتين بعمري


من غيرك يسندني


لي كسرني الألم

أبي قلم

15/11/2007
الخميس

Tuesday, November 13, 2007

تجديني



تجدّيني

وتسكن حنايا روحي

قبل عيني

تجدّيني

تهل صوبي

وتعلمني دروبي

وتدلّيني

تجدّيني

أتبع ضوى عيونك

و آثار جنونك

ألقاك بكل ماأشوفه

ألقاك بكلامي بحروفه

ألقاك بتكويني

تجدّيني

ماأبعد لحظه عن دربك

أقرب من دقّات قلبك

أقرب لك من أنفاسك

أقرب لك من إحساسك

الله ياكثر مافيني

تجدّيني

19/9/07
جنيف

Monday, November 12, 2007

حبول

جلست اكتب ابياتا جديده عن الاحلام وفجأة سمعت صوت اخر العنقود وهو يبكي وطارت كل الافكار مني وتذكرت ايام الصبا ايام المراهقه عندما كنت اكثر واحد بالدنيا يزعل ليش ماأدري وأذكر من كثر الزعل اجلس بالغرفه أياما عدّة ، أذكر الوالد رحمة الله عليه كان يمر عند باب غرفتي ويقول شوفوا هذا لايكون خاس
الله يرحمه كنت أدناة الدون أزعل ماكو شي عاجبني الحبيب افلاطون عصره المهم مرت علي هذه اللحظات وأنا افتر مع اخر العنقود لينام وقد عقدت العزم على الغاء الكتابة عن الاحلام واردت ان اشرح حالتي التي اعيشها في هذه اللحظات شايل اخر العنقود وأفتر فيه من دار لي دار
في كل دار بنيت فكره وشرحت الحال بالتفاصيل
اليكم الحال
هذي تاليتها
نهيهي بأنصاص الليول
هذي أخرتها
يسهرني ياهل هالطول
تبيه يسكت تترجاه تطلبه
تغني له تطق له رقبه
ولو بغى ترنعله طبول
هذي تاليتها
نهيهي بأنصاص الليول
وين قبل أيام دارك بروحك
كانت مصنع ارتباكات طموحك
أه ياداري خليتيني بهالحاله
ياداري محيسن لفح لفحناله
وكل هذا ماقبول
هذي تاليتها
نهيهي بأصاص الليول
يايايب الدوى يامودّي الأطبّه
تحس مرات جنك داش بشبّه
شايل ولدك وعلى جتفك يتحلّم
اهو مرتاح مهتني وانت تتألّم
وباب النقاش مقفول
هذي تاليتها
تهيهي بأنصاص الليول
قمت اقول قصص عن الخرفان والفيل
الساعه 2 أصير مو براك سبيل
هذا منومه وذاك موعد دواه
الساعه 2 قصص ومداراه
ماخليت شاذي وبلبول
هذي تاليتها
قمت آكل حبول
هذي تاليتها
تهيهي بأنصاص الليول
12/11/2007
الأثنين
الحبول هو البيض المتواجد بأحشاء السمكه

Friday, November 9, 2007

أدري فيه



أدري فيه

دوم يكابر

والوله شاقيه

أدري فيه


كبرياءه كاسيه

أدري فيه

....

مبيّن  إنه ناسيني

وكل قطعه بقلبه تبيني

معاندني وروحه تلومه


مومقتنع باللي يسويّه

أدري فيه

...

يزعل ياخذله يومين بعناده

جان فادني عنادي اذا فاده

يسوي مابداله بيرجع

يوم.. يومين... أربع

واللي خلاه بيرد ويناديه

أدري فيه

31/07/2007
الثلاثاء

Thursday, November 8, 2007

بوق 2


تحديث

أمر وزير الداخليه الشيخ جابر الخالد بترقيه استثنائيه للرقيب أول محمد بلال وذلك تقديرا لجهوده وكفائته وتفانيه بالعمل وتمت ترقيه محمد بلال الى وكيل ضابط



مقتطفات من امور حدثت لي اردت ان ابينها لكم

اولا : تلقيت خبرا أحزنني وأعتقد أحزن جميع الإخوه الذين لازموني منذ ابريل 2006 وهذا الخبر هو ان مدونة آه يابلد barrak74.blogspot.com

تم مسحها بالكامل وتم القضاء على جميع ماكتب وعلى جميع التعليقات الراقيه التي تلقيتها من اخوه اعزاء منهم من بقي معي الى الان ومنهم من غاب أو إختار الغياب

اعتقد انني املك ارشيفا كاملا لكل ماكتبته ، وكانت هناك محاولة ثانيه لسرقة ايميلي

ولكنني استطعت ان ارجعه للمرة الثالثه ، أجزم انه في كل مره اكتب فيها قصيده عن احوال البلد برؤيتي الصادقه اتعرض بعدها لسرقه فبعد ان كتبت إلا الدستور تم سرقة المدونه والان عندما كتبت تدوير تمت سرقة الايميل الخاص بي وتم مسح مدونتي العزيزه آه يابلد

عموما نظرا لحزني الشديد على ماحصل وأتمنى ان يكون تحليلي مخطئا ولكن سأبقى كما عهدتموني أنسان راس ماله كلامه ومشاعركم الطيبه

ومن الممكن ان تتعرض هذه المدونه للسرقة بالقريب العاجل وسيكون اللقاء عندئذ في

barrak74.com

واذا فيهم خير خل يلحقوني هناك ايه ترى السايت مسويه عند ناس ماعندهم كيري ميري وعندهم حرية رأي وأول حرف من اسمها الولايات المتحده الامريكيه عاد ذيك الساع ابيهم يوطوطون عندي


ثانيا : ابوبلال السيد محمد بلال وهو ذاك الشرطي الأسمر الذي يقف صباحا وظهرا في الشارع الفاصل بين منطقتي قرطبه والسره هو صديق لي راقي ومهذب ابلغني عن مشاعر الناس الصغير والكبير والطفل وكل شخص يمر بالقرب منه في ذاك الشارع انف الذكر وللعلم ابوبلال لم يتم ترقيته منذ 9سنوات احببت ان اقول ان هذا الشعب رائع وفيه طيبة الدنيا لشخص ادى واجبه بأمانه الا يحتاج هذا الشعب وبوبلال لوقفه كريمه وللعلم بوبلال سوف يقرأ كل مايكتب عنه

ثالثا : ماأحب اضيق خلق احد انا متضايق خلاص وعشان جذيه بقول نكته

فيه واحد غبي عاش بالكويت وماتوفق راح الصين وشرى بقاله يترزق الله منها دخل عليه واحد صيني يبي يشتري عشرعلب كوكا كولا وقاله : ينق شين شانق كوكا كولا

قاله الغبي عشر علب شنو؟





إلى اللقاء

Tuesday, November 6, 2007

ماي وضامي




ليش ماأحسه

وهو كل يوم جدّامي

ليش بيده الماي

وأنا جدّامه ضامي

ابفهم شالقصه

و شفيه

وشعلامي

ليش ماأحسه

وهو كل يوم جدّامي

....


فيه شي يبعدنا

فيه شي يردنا

يمكن أشواقي إنطفت

يمكن القلوب ماصفت

وماترس عينه

شوقي  وهيامي

ليش ماأحسه

وهو كل يوم جدّامي

ليش بيده الماي

وانا جدامه ضامي


12/08/2007

الأحد

Saturday, November 3, 2007

أدري



للحين علي تطري

رغم كل هالغياب

يحن لك قلبي

والوله باليوف ينساب

ويتجدد هواك بصدري

للحين علي تطري

....

يقولون كثر الصّد ينسّي

وأنا أصبّح فيك وأمسّي

شكثر فيني حب

شكثر لي قلب

أحب أنسان

مليون مرّه بغيابه أدري

للحين علي تطري

...


سنين مرّت وأيامك تتجدّد

سنين مرّت وملامحك تتحدّد

بحدود خفوقي

والله وربّي فوقي

ماحبّيت غيرك أحّد

يابعد عمري

للحين علي تطري

Wednesday, October 31, 2007

ياعمّي طير



تدوير

يرز التافه

ويهمّش عقل مستنير

تدوير

يموّت الراقي الشريف

شي يسوونه عالكيف

مايخافون الله

يذبحون النظيف

وينرز اللي ماعنده ضمير

تدوير

الله يعينج ياديرتي عليهم

صرتي لعبه بأياديهم

ناس مو كفو تخطّط

وعلى القرارات تشخّط

عشنا بسر 

والسر في بير

تدوير

مو عيب جذيه يسوّون

من الله مايخافون؟

دانة الخليج اخطفوها

العيون الحالمه عموها

مو عيب جذيه فينا يصير

تدوير

أبي واحد مرتز على عِلمَه

على قد أخلاقه وفهمه

موعشان حبّه خشم


ناس غشّم

صاروا هوامير

تدوير

إيه هيّن نشم ريحة إصلاح

إيه للأسف حظنا طاح

واللي بيقولّي تفاءل

بقوله : ياعمّي طير

تدوير