Friday, January 30, 2009

السموحه



فجأة قررت ان اغادر الى احدى الدول وذلك لاني احسست بأني مرهق من مسؤلياتي طلبت الرحيل لعدة أيام وقوبل طلبي بالإيجاب
احببت ان انقل لكم سبب الهروب الكبير قبل اعتذاري



السموحه

سافرت لإني انسان

محتاج يلقى روحه

سافرت

لاني لون شفاف

ضاع بكيان لوحه

السموحه

أببعد تعبت من مسؤلياتي

أببعد دربي عن خطواتي

أبخلق عالم جديد

عالم ماتلمسه إيد

عالم الحب هو طموحه

السموحه

آسف ياوقت تعبتني كثير

آسف ياوقت ويا ضمير

تعبتني فوق التعب تعب

أبي يومين أنسحب

بأداوي أنات مجروحه

السموحه

الهروب مرات أفضل حل

تحس الواقع سيف وإنسل

وقطع أوصال أوصالي

أبي أعيش لحالي

النفس والله مذبوحه

السموحه

حبيبتي آسف بس والله مجبور

بإختصار حبيبك معذور

يبي يرسم بعمره سعاده

يبي يلقى بالوقت إستفاده

تعب من دموعه ونوحه

السموحه

30-1-2009

Tuesday, January 27, 2009

باينه



باينه

جذباتك باينه

ألقاها بتواصيفك

بشفاهك

واضح زيفك

أعرف جذبك

ونماينه

باينه

......

لاتحاول تخدعني..واضحه

كل شي مْبَينه.. ..ملامحه

اللي مثلي .. يعرف الناس

يفهم قدر الوفى والإخلاص

اللي مثلي

الله صاينه

باينه

25/12/2008
الخميس

Sunday, January 25, 2009

معسّل تفّاح




زمان أوّل راح

تنام على سهمك

وانت مرتاح

ماينفعك لو تبرِّد

المؤشّر معرٍّد

مايشوف إلا تحت

والله وسواها البخت

 عقب الكشخه

ماعندك ثمن

معسّل تفّاح

زمان أول راح

،،،،

راح زمن الآجل والنّقدي

اللحين كلّش مايمدي

إقضب أرضك وإسكِت

أول الدينار عليك يتِكتكَت

طيحله اللحين نواح

زمان اول راح

،،،،

الطمع  يودّي بداهيه

جيبولي  خسران أوايهَه

شسوّيت للديره بفلوسك ؟؟

يامسافر يامسنّع ضروسك

طاح حظّك طاح

زمان أول راح

22/1/2009
الخميس

Wednesday, January 21, 2009

قـَمره مبتَـسمـَــــــه






تهلّين


قمره مبتسمَـه

تهلّـين

نسمه بالندى متعشمه

ذكرى مرتويه بلحظه

دنيا من حسِّك ماتفضى

تـَسكن الروح

قبل العين

تهلين

،،،،،


كل مابالدنيا إنتي

 من العذوبة تكوّنتي

ملزوم أطريج بحياتي

ملزومه تطريج كلماتي

الوله بزود


وأبي من يعين

تهلّين

،،،،،


بأوراقي ألقاج موجوده

يا وطن الحب وحدوده

يا شي مايتخيّله إنسان

يا معنى الأمان

كل شي يروح

بس إنتي تبقين

وتهلّين


29/09/2008

الأثنين

Tuesday, January 13, 2009

غتره بدون قحفيه




إحذروا من لِبَسْ غتره بدون قحفيّه

تراه مو سهل إخذوها منّي

تطل القذله جنها طرف زوليّه

مرّات إسمه خلف  أو حمنّي

لاتتحرش فيه  يأذّيك أذيه

إن وخّرته عنّك اهو يدني

إن كلّمته  يحوكك بصمّيّه

يغربل يشقِي يأذّي يِعنّي

اذا حاشه بفاق ترى  عاديه

 شغلوله غناية عينه رمنّي

بيقط بالدقيقه مليون بدليه

ومحاولاته تروح مِلح عالهبنّي

حاولوا تسوون له شرّوكه و قطّيه

إن بغى يفارج مدحوا له سِدني

بالكم عليه من الناس الجمبازيّه

حواليه ناس تتكوكس تغنّي

حواليه ناس مثل الهتليّه

هو راكد  كله وقار ومتأني

الحذر من الغتره بدون قحفيه

إفهم يافهيم وإخذها  مني

13/01/2009
الثلاثاء

Saturday, January 10, 2009

خِنينَه




بارسم لكم مدينه

تاخذ السّنع وتدينه

محتاره مذهوله

ماكو شي على أصوله

كل ماقالت : شالسالفه

قالوا : الأحوال زينه

برسم لكم مدينه

،،،،،،

كانوا أهلها ينهمون اليامال

كانوا أهلها غاصه وبحّاره

كان مافيه كلام بس أفعال

الجار يباري لزيجه وجاره

يسنده ويحبّه ويعينه

برسم لكم مدينه

،،،،،،

كانوا ناسها نواخذه

يحبون مدينتهم ويعمرونها

والكل حقّه ماخذه

كانوا بأفكارهم ينورونها

كانت أفكارهم خنينه

برسم لكم مدينه

،،،،،،

شوفوا رسمتي تمعّنوا حروفها

وليش أنا  رسمتها اليوم

شوفوا كلماتي واللي بيوفها

وحسّوا بألم بصدري مكتوم

الكل يقراها

ويغمّض عينه

هذي إهي المدينه

08/01/2009
الحميس

Sunday, January 4, 2009

متيمِّــــــــــــد






شلون أبْـــــرِد

وكلّك يسعِــــد

شلون أَبْـــــــرِد

وبعيونك تفاصــــيل الدفى

ومعاني الإخلاص والوفى

من أشوفها

أشوف النّور

وورود منثوره

وعصافير تغرِّد

شلون أبرد

.......



إستحاله يلمسني بِرد... أبد

أصلا البَرد منك.... إرتعَد

دافيه ملامحك ....وتدفِّي

يوفي وروحي وكفِّي

يصير القلب موَرِّد

شلون أبرِد

......




يَبرِد اللي يوفه ماحَبْ

اللي مايحـس فيه قلب

ولا إرتعشت أشواقه

وسكن حُبّه بأعماقه

يصير كيان متيَمِّــد(متجمّد)

ويَبْـــــــرِد


4/1/2009

الأحد