Wednesday, October 29, 2008

هناك



هناك

أبي أبعد هناك

بأي عالم انت ترتبه

 فايضه فيه المحبّه

أنا فيه الأرض

وانت الملاك

هناك

أبي أبعد بعيد هناك

.....

فيني احلام تبني وطن

تخلق واقع وتغير زمن

احلام تترجى الوقت يداريها

أحلام محد قدر يحتويها

غير ارض اسمها

براك

ابي ابعد بعيد هناك

6-9-2008
الأحد

Wednesday, October 22, 2008

إداد



اول ظهور صحفي لي عن طريق جريدة الصوت الكويتيه

اشكر السيد / يوسف محمد السميط

والسيد/ عبدالله الفريح

http://www.assawt.com/Upload/Page%20Pdf/2008%5c10%5c21%5c205613334-32.pdf

الطله الثانيه

http://www.assawt.com/Upload/Page%20Pdf/2008%5c10%5c22%5c193650407-32.pdf

Monday, October 20, 2008

مملحه




مصلحه

تاخذ السنع

وتعفر فيه

وتذبحه

مصلحه

،،،،

عشان فلوسك أحبّك

وأحاول أملك قلبك

أغنيلك وألفح لو تبي

اصيرلك سايق وصبي

أدوس منطق الكرامه

وأذبحه

مصلحه

،،،،

عشان منصبك أتقربلك

أموت فيك وأهواك كلّك

لك مدة للصلاحيه

اليوم وياك 100%

وإن شالوك

أحذفك بمملحه

مصلحه

،،،،،،،

عشان موترك أتغزّل فيك

أدبخك وأدلعك وأجدّيك

أتفيخر بيختك وشاليهاتك

أخليك أسعد أدمي بحياتك

والأماني حولك

مسدّحَــــه

مصلحه

20/10/2008

الأثنين

السّنع : بتشديد السين وهو الشئ الراقي ويطلق على الشخص المهذب سنع بتسكين النون

تعفر فيه : أي تقلبه رأسا على عقب

ألفح : لفح فلانا أي رقص

أحذفك بمملحه : أي أرميك بقنينه ممتلئه بالملح

موترك : سيارتك ان كانت جيبا او كشفا أو مصندقا
أجديك : الجيم تنطق جيما فارسيه أي اطبطب على صدرك لتتجدّى وعادة الامهات يجدون اي يطبطبون اطفالهن بعد رضع الحليب لاخراج الغازات وعادة ماينتهي التجدي بصوتا يصدح من حنجرة الطفل الرضيع وهناك اطفالا يطلقون اصواتا من منطقة عريفجان جنوب الكويت مثلا ويصل الصوت لحدود نيروبي

مسدّحه : أي مرتميه على الارض مثال انسدح لطفي على القنفه أي ارتمى لطفي على الأريكه حلوه الاريكه وعاش واقف

Wednesday, October 15, 2008

حدرك



منتظرك

و أدري

العمر مابرني

ولا بـَرّك

منتظرك

،،،،،،،،

جاسي إنتظار المجهول

يعلمني كيف أصبر

شوفني لما ماألقى حلول

ولما على فراقك ماأعبّر

مهما صار منك


يزيد قدرك

منتظرك

،،،،،،،،،

أكتبلك أشواقي على ورقتي

وأكسر بمحاريك صمتي

وأأمِّــــــل نفسي بالخيال

وأتريّا يتحقق المحال

وأرسمك غيمه

وأنا عطشان حدرِك

منتظرك

،،،،،،،،،

أتريّا

حلم مو راضي يصير

وأريِّـح

بالوله الروح والضمير

أرتاح


وأنا متعذب بفرقاك

أهتني

بليل ماشاف نور ويّاك

ينكسر خاطري

ينكسر خاطري

وهم أعذرِك

منتظرك

16/10/2008
الخميس

Monday, October 13, 2008

أحبك



قايلّـــــك

أحبك كلّــك

وماصدقتني

قايلّــــك

ماأقدر أملّـك

لإنّك مني

عندي دربين

ودرب وله

ودرب لهفه

وشوف اللي أسهلّــك

قايلّـــك

،،،،

كم مره كلامي أعيده؟؟

وكم مره بكتبك قصيده؟؟

وبقول انك بيوفي

وانك نظري وشوفي

ولو تغيب سنين عني

أدلّـــك

قايلّــــك

5/9/2008
الجمعه

Wednesday, October 8, 2008

يوميات متداول





السّوق حمر

والمؤشر بهمنا بُطر

السوق حمر

لعب بحسبتنا لعب

خلّه العموم حوَل

وذوقنا من المُر

الأمَـــــــر


السوق حمر


،،،،،،،


سدّح الأوادم ولعوزهم

الخساره وصلت لوَزهُم

من اللي بالأسهم وزْهم

وعلى همومهم عَبر

السوق حمر


،،،،



ناس من الحرة تسحق زجاير

ناس عقلهم منهم طاير

رهنوا بيوت وعماير

والقلب إنشطر

السوق حمر


،،،،
ناس إطمعوا وراحوا بِــــــلْد

ناس ذبحهم الجشع والعِنـــدْ

أوّل يلعبون كوت وهَنـــــد

واليوم بوزهم

بوز شِبر

السوق حمر

،،،،،،،


الصبر زين شبتسوون يعني

ياعبادين وبوشميس وحَـمَــنَي

لاتقولون : عينوا رمنـّي

: قولوا

صار صخر

السوق حمر

،،،،،،




08/10/2008

الأربعاء


Monday, October 6, 2008

ثمن



ماتحن

ماتهمّك روح  تِإنْ

ماتحن

ماشلت بيوفك ذرّة وفى

إنت الود أبد ماتعرِفه

لاماتعرفه

لا ماأظن

ماتحِن

،،،،

من غيري يعرف مافيك

ليتني أقدر مره أشقيك

وأذوقك ماذقته من جفاك

ليتني أكون غير ويّاك

وأدفعك الثمن

ماتحِن

،،،،

ماتسمع دقات قلب تنادي ؟؟

تنهِدم عشرة جدّامك ..عادي !!!؟

إنت إنسان جامده مشاعره

إنت إنسان عناده دامره

إنت إنسان؟؟

إنت إنسان ؟؟


لا ماأظن

ماتِحن

،،،

بعيده عنّك المشاعر والحنيّه

بعيد عنك أي إحساس موليّه

هذا جزى من إحتواك

روح الله معاك

المنه عليك

مو إنت اللي تمِن

ماتحن

1/8/2007
الاربعاء

Thursday, October 2, 2008

بطي


أعاني من مشكلة أخرى بخلاف مشكلة الصلع ، ألا وهي مشكلة أن خطّي باللغه العربيه والأنجليزيه يميل للهيروغليفيه
خطّي خرطي
اللي يقراه
يروح وطي
خطّي خرطي
،،،،
تشوف الألف كأنها بيت
وتشوف الضاد كأنها ليت
يميل للهيروغليفيّه
مايدانونه الهتليه
ولاجاسم ولا خالد
أو بُطِي
خطّي خرطي
24/7/2008